Yu Mas Mekim Wanem Bilong Helpim Marit Bilong Yu Long Wok Gut?

Olsem wanem? Sapos yu no bin lain long pasin bilong subim wara, bai yu kalap i go insait long wanpela wara? Sapos yu mekim olsem, dispela inap bagarapim yu​—⁠o kilim yu i dai. Tasol tingim dispela: Planti manmeri i hariap na marit na ol i no save long rot bilong mekim gut ol wok bilong ol insait long marit.

JISAS i tok: “Sapos wanpela bilong yupela i laik wokim wanpela haus bilong ol man i ken i stap na was long ol samting bilong en, orait ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat.” (Luk 14:28) Man i tingting long marit i mas mekim wankain samting olsem man i laik wokim haus i mas mekim. Em i mas tingting gut pastaim na bai em i ken save, em inap mekim marit bilong em i wok gut o nogat.

Skelim Ol Samting Bilong Marit

Sapos yu gat poroman yu ken kamapim ol amamas na ol hevi bilong yu long em, dispela em i wanpela gutpela samting tru. Na sapos yu stap wanpis o bel hevi i daunim yu na yu pilim olsem yu lus long wanpela samting, orait ating marit inap helpim yu. Taim mama i karim yumi, yumi gat laik long bel bilong yumi olsem narapela i mas laikim yumi na poromanim yumi na pas gut wantaim yumi​—⁠marit inap helpim yumi long ol dispela samting. Olsem na i gat as tru na taim God i wokim pinis Adam, em i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.”​—⁠Stat 2:​18; 24:67; 1 Korin 7:⁠9.

Tru, marit inap stretim sampela hevi. Tasol marit bai kamapim sampela nupela hevi tu. Bilong wanem i olsem? Long wanem, tingting na pasin bilong man na meri i marit i narapela narapela. Olsem na maski i olsem pasin na laik bilong tupela i stret wantaim, sampela taim hevi bai kamap namel long tupela. Aposel Pol i tok, ol marit “bai i painim planti hevi long laip bilong ol.”​—⁠1 Korin 7:​28.

Yu ting Pol i ting i no gat gutpela samting inap kamap insait long marit? Nogat, i no olsem! Em i laik bai man i tingting long marit em i mas kisim stretpela tingting long dispela samting. Taim man o meri i gat laik long narapela, em i save kisim bikpela amamas long dispela, tasol nogut em i ting olsem taim em i marit pinis inap sampela mun o sampela yia, dispela kain amamas bai stap yet, nogat. Olgeta wan wan marit i gat ol hevi bilong en yet. Olsem na yu no ken ting ol hevi bai kamap o nogat​—⁠yu mas ting bai yu mekim wanem taim ol i kamap.

Ol hevi i givim rot long man na meri marit long kamapim klia olsem narapela i givim bel tru long narapela. Yumi ken tok piksa olsem: Taim sip i stap nating long bris, sip inap luk olsem strongpela sip. Tasol bilong yumi ken save tru tru sip i strongpela o nogat, sip i mas raun long solwara​—⁠ating long taim bilong strongpela win na biksi. Na olsem tasol long marit. Taim tupela marit i no gat hevi na tupela i stap bel isi wantaim, i no dispela samting tasol i makim olsem marit i stap strong. Taim bikpela hevi i painim tupela marit na tupela i winim dispela hevi, em nau, dispela i makim olsem marit i stap strong.

Bilong mekim olsem, tupela marit i mas strong long stap gut long poroman​—⁠em laik bilong God na man i mas “pas wantaim meri bilong en” na tupela i mas “kamap wanpela bodi tasol.” (Stat 2:​24) Planti manmeri long nau i pret long mekim tok promis olsem narapela bai stap gut long narapela. Tasol sapos narapela i laikim tru poroman bilong em, ating tupela bai i gat laik long mekim tok promis long i stap wantaim. Sapos narapela i tok promis long stap gut long narapela, dispela bai mekim olsem marit bilong tupela em i bikpela samting​—⁠i no samting nating. Na narapela i ken bilip olsem maski wanem wanem samting i kamap, poroman marit bai sambai long em.a Sapos yu no redi long tok promis olsem, ating yu no redi long marit. (Skelim wantaim Saveman 5:​4, 5.) Man na meri i marit pinis, ating ol tu i mas pilim moa yet olsem bilong marit bilong ol i ken stap longtaim, narapela i mas bihainim pasin bilong i stap gut long narapela.

Skelim Yu Yet

Ating i no hatwok long kolim ol pasin yu laik bai poroman bilong yu i mas kamapim taim yupela i marit pinis. Tasol i hatwok long skelim yu yet bilong tingim ol samting yu inap mekim bilong helpim marit. Tasol taim yu no marit yet, na taim yu marit pinis, yu mas skelim yu yet​—⁠dispela i bikpela samting. Yu ken askim skin bilong yu olsem:

• Mi amamas long pas wantaim poroman marit bilong mi long olgeta yia mi stap laip?​—⁠Matyu 19:⁠6.

Long taim bilong profet Malakai, planti man i lusim poroman marit bilong ol​—⁠ating ol i laik maritim ol yangpela meri. Jehova i tok aiwara bilong ol meri em poroman marit i bin lusim ol em i pulap long alta bilong em, na em i kamapim rong bilong ol man i save mekim nogut olsem long poroman bilong ol.​—⁠Malakai 2:​13-​16.

• Sapos mi tingting long marit, mi abrusim pinis dispela taim bilong yangpela na skin i gat strongpela laik long mekim maritpasin na tingting inap paul long skelim gut pasin bilong poroman mi laik marit long em?​​—⁠1 Korin 7:​36.

Nikki i gat 22 krismas taim em i marit, na em i tok: “Sapos man o meri i marit taim ol i yangpela tumas, hevi inap kamap. Ol tingting na laik bilong yu na ol samting yu putim olsem mak bilong winim, ol dispela samting bai wok long senis, kirap long taim yu gat 18 krismas samting na i go inap long taim yu gat 28 krismas samting.” Tasol krismas bilong yu, em tasol i no inap makim olsem yu redi long marit o nogat. Tasol sapos yu marit taim yu yangpela yet na laik bilong bel long mekim maritpasin i nupela na i strong tru, dispela inap paulim tingting bilong yu na yu no tingim gut ol hevi inap kamap.

• Mi gat wanem ol pasin em inap helpim marit bilong mi long wok gut?​—⁠Galesia 5:​22, 23.

Aposel Pol i tokim ol Kolosi: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.” (Kolosi 3:​12) Dispela tok i stret long ol man i tingting long marit na ol man i marit pinis.

• Mi gat pasin olsem bilong man i bikpela pinis bambai mi inap sambai long poroman bilong mi long taim bilong hevi?​​—⁠Galesia 6:⁠2.

Wanpela dokta i tok: “Taim ol hevi i kamap, ating yumi tok em asua bilong poroman bilong yumi. Husat i gat asua i no nambawan bikpela samting. Bikpela samting em ol samting tupela marit wantaim i mekim bilong helpim marit bilong ol long wok gut.” Tok bilong saveman King Solomon i stret long ol marit, olsem: “I no gutpela long man i stap wanpis. Sapos tupela man i stap wantaim, em i gutpela,” long wanem, “sapos wanpela i pundaun, orait narapela i ken litimapim em gen. Tasol sori tru long man i stap wanpis na i pundaun. Bai i no gat man bilong helpim em.”​—⁠Saveman 4:​9, 10.

• Mi save amamas planti taim na ting ol gutpela samting tasol bai kamap, o mi save bel hevi na ting gutpela samting i no inap kamap?​—⁠Sindaun 15:⁠15.

Man bilong ting olsem gutpela samting i no inap kamap, em i save tingim olgeta wan wan de i olsem de nogut. Marit i no save senisim dispela kain tingting! Man o meri singel i gat pasin olsem man bilong sutim tok long ol narapela, o em i man bilong ting gutpela samting i no inap kamap, orait taim em i marit pinis, em bai mekim wankain pasin tasol. Dispela inap putim bikpela hevi long marit.​—⁠Skelim wantaim Sindaun 21:⁠9.

• Taim hevi i kamap, mi save stap isi o mi save belhat?​—⁠Galesia 5:​19, 20.

Baibel i tok, ol Kristen “i no ken kros kwik.” (Jems 1:​19) Taim man o meri i no marit yet na taim em i marit pinis, em i mas wok long bihainim dispela tok: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun.”​—⁠Efesus 4:​26.

Tingim Pasin Bilong Poroman Yu Laik Maritim

Wanpela savetok bilong Baibel i tok: “Man i gat gutpela tingting, em i save was gut long ol pasin em i mekim.” (Sindaun 14:15) Man i painim wanpela poroman bilong maritim em i mas bihainim dispela tok. Pasin bilong makim poroman marit em i wanpela bikpela samting tru man o meri bai mekim. Tasol planti ol i no lusim bikpela hap taim tumas long tingim wanem kain poroman ol bai maritim​—⁠ol i lusim bikpela hap taim moa long tingim wanem kain ka ol bai baim o wanem kain skul ol bai go long en.

Bilong man i ken holim wok insait long kongrigesen Kristen, ol i mas “traim wok” bilong em pastaim. (1 Timoti 3:​10) Olsem na sapos yu tingting long marit, pastaim yu mas “traim wok” bilong poroman yu laik maritim. Tingim ol dispela askim daunbilo. Na gutpela sapos ol marit tu i tingim ol dispela askim.

• Em i gat wanem kain nem?​—⁠Filipai 2:​19-​22.

Sindaun 31:23 i stori long wanpela man marit ‘ol hetman bilong ples i givim biknem long em. Em i wanpela bilong ol dispela hetman.’ Ol hetman bilong taun i save sindaun long dua bilong taun bilong mekim kot. Em nau, dispela man marit i gat biknem na ol man i bilip long em. Tingting bilong ol narapela long wanpela man inap helpim yu long save em i gat wanem kain nem. Na tu sapos em i wanpela bos, tingim ol man i stap aninit long wok bos bilong em ol i gat wanem kain tingting long em. Dispela inap helpim yu long save, taim yu marit pinis long em, bai yu gat wanem kain tingting long dispela man.​—⁠Skelim wantaim 1 Samuel 25:​3, 23-​25.

• Em i man bilong bihainim stretpela pasin?

Man i kisim gutpela tingting na save i kam long God, em i “save bihainim klinpela tingting.” (Jems 3:​17) Poroman yu laik maritim, yu ting em i gat bikpela laik long inapim laik bilong em yet long ol samting bilong maritpasin na em i no tingim tumas i stap bilong em na bilong yu long ai bilong God? Sapos nau em i no wok strong long bihainim ol lo bilong God, yu ting i gat as na yu ken bilip olsem em bai bihainim ol dispela lo taim em i marit pinis?​—⁠Stat 39:​7-12.

• Em i save mekim wanem kain pasin long mi?​—⁠Efesus 5:​28, 29.

Buk Sindaun i stori long wanpela man marit i bilip long meri bilong em. Na tu, em i “litimapim nem” bilong em. (Sindaun 31:​11, 28) Dispela kain man, sapos em i bel nogut long sampela samting, em i no ken strong tumas long mekim, na em i no ken putim mak i antap tumas na poroman bilong em i no inap winim. Jems i tok, man i kisim gutpela tingting na save i kam long God, em i save “stap wanbel wantaim ol arapela, na [em] i save isi long ol, na . . . [em] i save sori tru long ol arapela na mekim gutpela pasin long ol.”​—⁠Jems 3:​17.

• Em i save mekim wanem kain pasin long papamama bilong em?​—⁠Kisim Bek 20:⁠12.

I no ol liklik pikinini tasol i mas daun long papamama bilong ol. Baibel i tok: “Papa bilong yu i bin kamapim yu na yu mas harim tok bilong en. Na taim mama bilong yu i lapun pinis, yu no ken rabisim em.” (Sindaun 23:22) Dokta W. Hugh Missildine i tok: “Planti hevi i save kamap insait long marit, na pasin na tingting bilong tupela i narapela narapela kain. Tasol man na meri i laik marit ol inap abrusim ol dispela kain hevi​—⁠o save ol dispela hevi bai kamap​—⁠sapos pastaim narapela i go long haus bilong narapela na lukim pasin poroman i mekim long papamama bilong em. Taim yu marit pinis, ating tingting bilong em long yu bai i wankain olsem tingting bilong em long papamama bilong em. Yu mas askim olsem: ‘Mi laik bai poroman i mekim wankain pasin long mi olsem em i save mekim long papamama bilong em?’ Na pasin papamama i mekim long em bai helpim yu long save long pasin em bai mekim long em yet, na pasin em i laik bai yu mas mekim long em​—⁠taim yupela i marit pinis.”

• Em i save belhat o tok nogut?

Baibel i tok: “Yupela i mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut.” (Efesus 4:​31) Pol i tokim Timoti olsem sampela Kristen bai “i gat laik nogut bilong tok resis na tok pait nabaut long ol liklik samting nating” na ol bai ‘bel nogut long ol arapela man na tok pait na tok bilas na tingting nogut long ol arapela na tok kros nabaut.’​—⁠1 Timoti 6:​4, 5.

Na Pol i tok moa, bilong man i ken holim wok insait long kongrigesen, em i no ken “pait long ol arapela man.” (1 Timoti 3:​3) Em i no ken paitim ol narapela, na em i no ken givim hatpela tok long ol. Man o meri i save kros kwik na pait, em i no gutpela man o meri bilong maritim.

• Em i putim wanem samting olsem mak bilong winim?

Sampela man o meri i wok strong long kisim planti mani na ol i kisim hevi long dispela. (1 Timoti 6:​9, 10) Na sampela i stap nating tasol​—⁠ol i no putim sampela mak ol i ken wok long winim. (Sindaun 6:​6-​11) Tasol ol man i aninit long God, ol bai strong long mekim wankain samting olsem Josua, em i tok: “Mi wantaim famili bilong mi, mipela bai i lotu long Bikpela tasol.”​—⁠Josua 24:⁠15.

Gutpela Pe Yu Kisim na Ol Wok Yu Mas Mekim

Marit em samting God Jehova yet i bin kamapim. (Stat 2:​22-​24) Em i mekim olsem na bai man na meri i ken pas gut wantaim inap long olgeta taim na narapela i ken helpim narapela. Taim man na meri marit i bihainim ol lo bilong Baibel, ol i ken ting olsem i stap bilong ol bai i gutpela.​—⁠Saveman 9:​7-9.

Tasol yu mas save olsem yumi stap long ‘taim bilong las de i gat planti hevi nogut tru.’ Baibel i bin tok profet olsem insait long dispela hap taim, ol man bai “laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na . . . givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. . . . Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru.” (2 Timoti 3:​1-4) Ol dispela pasin inap bagarapim marit. Olsem na ol man i tingting long marit, ol i mas tingting gut pastaim. Na ol man na meri i marit pinis, ol i mas wok yet long helpim marit bilong ol long wok gut long rot bilong kisim save long ol tok bilong God i stap long Baibel, na ol i mas bihainim.

Tru tumas, man i tingting long marit, em i no ken tingim de bilong marit na em tasol, nogat; em i mas tingim i stap bilong em bihain long dispela de. Na olgeta i mas tingim ol wok bilong marit​—⁠ol i no ken tingim de bilong marit tasol. Larim Jehova i soim rot long yu na bai yu tingim ol samting inap kamap insait long marit​—⁠nogut yu tingting long amamasim skin tasol. Sapos yu mekim olsem, bai yu amamas long marit bilong yu i wok gut.

[Futnot]

[Blok long pes 5]

“Stori Bilong En Long Pasin Bilong Laikim Tru Narapela Em i Nambawan Tru”

Saveman Kevin Leman i tok: “Olsem wanem yu inap save yu laikim tru wanpela man o nogat? I gat wanpela olpela buk i stori long pasin bilong laikim tru narapela. Dispela buk i gat olsem 2,000 krismas, tasol stori bilong en long pasin bilong laikim tru narapela em i nambawan tru, winim ol narapela stori long dispela pasin mi bin kaunim.”

Saveman Leman i toktok long tok bilong aposel Pol long Baibel long 1 Korin 13:​4-8:

‘Man i save givim bel long ol arapela, em i no save kros kwik. Em i mekim gutpela pasin long ol man. Em i no bel nogut long ol man i gat planti samting. Em i no litimapim nem bilong em yet. Em i no hambak na bikhet nabaut. Em i no tingting tumas long em yet. Em i no belhat kwik. Em i no tingim rong ol i mekim long em. Em i no amamas long pasin i no stret. Em i amamas long stretpela pasin. Em i no larim wanpela samting i daunim em. Long taim bilong hevi em i save sanap strong.’

[Blok long pes 8]

Ol Samting Yumi Pilim Long Bel Inap Giamanim Yumi

Yangpela meri bilong Sulem long taim bilong ol man i bin raitim Baibel em i save pinis olsem bel i save kirap kwik long laikim man na dispela pasin inap giamanim yumi. Taim strongpela King Solomon i gat laik long em, dispela meri i tokim ol yangpela meri poroman bilong em olsem ol i “no ken kirapim bel” bilong em long laikim dispela man inap long taim bel yet i laik mekim olsem. (Solomon 2:⁠7) Dispela yangpela meri i gat gutpela tingting em i laik bai ol poroman bilong em i no ken strong long em i mas bihainim laik bilong bel​—⁠nogut dispela i bosim ol samting em i mekim. Tingting bilong dispela meri em i gutpela long ol man na meri bilong nau i gat tingting long marit. Bosim gut bel bilong yu. Sapos bihain yu marit, yu mas marit, long wanem, yu laikim tumas dispela poroman​—⁠laik long marit tasol, nogat.

[Piksa long pes 6]

Maski man na meri i marit longpela taim, ol i inap strongim moa yet marit bilong ol

[Piksa long pes 7]

Em i save mekim wanem kain pasin long papamama bilong em?