Ol i Mekim Laik Bilong Jehova

Maria i Laik Kisim “Gutpela Samting Tru”

LONG taim bilong Jisas, lo bilong ol rabai i tambuim ol meri long mekim sampela samting. Olsem na dispela lo i pasim ol meri long skul long tok bilong Lo. Wanpela tok ol i raitim long buk Misna i tok: “Sapos wanpela man i skulim pikinini meri bilong em long tok bilong Lo, dispela i olsem em i lainim pikinini meri long givim bel long mekim pasin pamuk.”​—⁠Sotah 3:⁠4.

Dispela i mekim na planti meri long Juda long bipo ol i no bin skul gut. Wanpela buk (The Anchor Bible Dictionary) i tok: “I no gat wanpela samting i makim olsem taim Jisas i no mekim yet wok bilong autim gutnius, ol rabai i bin larim ol meri Juda long kamap disaipel bilong wanpela bikpela tisa, na ol i no orait liklik long ol meri i ken raun wantaim kain tisa olsem, o skulim olgeta manmeri na i no ol pikinini tasol, nogat.” Na bilong daunim ol meri moa yet, sampela bikman bilong lotu i putim tu wanpela lo olsem ol man i no ken toktok wantaim ol meri long ai bilong ol man!

Jisas i sakim tru dispela kain pasin nogut. Em i skulim ol man na meri, na i gat ol man na meri wantaim long lain bilong em. (Luk 8:​1-3) Wanpela taim Marta na Maria i singautim Jisas i go long haus bilong ol. (Luk 10:38) Dispela tupela meri ol i susa bilong Lasarus, na 3-pela wantaim ol i disaipel na gutpela pren bilong Jisas. (Jon 11:⁠5) Yumi ken ting famili bilong ol i gat bikpela nem, long wanem, taim Lasarus i dai planti manmeri tru i bin kam bilong mekim gut bel bilong Marta na Maria. Tasol maski ol i bilong wanem kain famili, samting i bin kamap long taim ol i singautim Jisas i go long haus bilong ol em inap lainim ol na yumi tu long wanpela gutpela samting.

Sindaun Klostu Long Lek Bilong Jisas na Kisim Skul

Yumi save, Marta na Maria i amamas long kukim bikpela kaikai bilong Jisas, na ating ol i gat mani inap tru long mekim olsem. (Skelim wantaim Jon 12:​1-3.) Tasol taim Jisas i kam kamap long haus, Maria i “sindaun klostu long lek bilong Bikpela, na i harim toktok bilong em.” (Luk 10:39) No gat wanpela lo bilong ol tumbuna inap pasim Jisas long skulim wanpela gutpela meri i laik tru long lain! Yumi ken tingim Maria i sindaun long pes bilong Jisas olsem wanpela sumatin i putim gut yau long ol tok em Bikpela bilong em i mekim bilong skulim em.​—⁠Skelim wantaim Lo 33:3; Aposel 22:⁠3.

Tasol Marta i no mekim olsem. Em i “tingting planti long bikpela wok em i mekim bilong redim kaikai samting.” Em i laik kukim gutpela kaikai, olsem na em i gat planti wok bilong redim kaikai. I no longtaim na Marta i bel hevi long em tasol i mekim olgeta wok na susa bilong em i wok long sindaun klostu long lek bilong Jisas! Em nau, Marta i katim tok Jisas i mekim long Maria​—⁠ating em i katim tok wantu tasol na i tok: “Bikpela, susa bilong mi em i lusim mi na mi wanpela tasol mi wok long redim kaikai. Ating yu no tingting long dispela? Yu tokim em long kam helpim mi.”​—⁠Luk 10:⁠40.

Tru, i no gat rong long dispela tok Marta i mekim. Em i bikpela wok long redim kaikai bilong planti man, na wanpela man tasol i no ken mekim dispela wok. Tasol taim Marta i mekim dispela tok, Jisas i lukim olsem rot i op long lainim em long wanpela gutpela samting. Em i tok: “Marta, Marta, yu wok long tingting planti na yu wari long planti samting. Yu mas tingting long wanpela samting tasol. Dispela samting Maria i laik kisim, em i gutpela samting tru, olsem na yumi no ken pasim em long kisim dispela gutpela samting.”​—⁠Luk 10:​41, 42.

Jisas i no tok olsem Marta i no gat laik long kisim save long ol samting bilong spirit, nogat; em i save olsem Marta em i meri bilong givim bel long lotuim God.a Em dispela samting tasol i bin kirapim em pastaim long singautim Jisas i kam long haus bilong em. Tasol long dispela tok bilong Jisas, i olsem em i tok long Marta olsem, taim em i tingting tasol long redim kaikai em i abrusim wanpela rot i op long em long kisim skul i kam long Pikinini bilong God​—⁠em wan wan taim tasol ol inap kisim dispela kain skul.

Ating pasin bilong ples long dispela taim bipo inap strongim dispela tingting olsem taim meri i mekim gut ol wok bilong haus dispela i makim olsem em i meri tru. Tasol tok Jisas i mekim i kamapim olsem ol meri tu, wankain olsem ol man, ol i ken sindaun klostu long lek bilong Pikinini bilong God na kisim save long ol tok bilong helpim ol long kisim laip. (Jon 4:​7-​15; Aposel 5:​14) Long dispela as, i gutpela long Marta inap redim sampela kaikai tasol​—⁠o ating wanpela kain tasol​—⁠na em bai i gat taim long sindaun klostu long lek bilong Bikpela na lainim ol samting long em.​—⁠Skelim wantaim Matyu 6:⁠25.

Dispela i Lainim Yumi Long Wanem Samting?

Long nau, ol man na ol meri wantaim ol i stap insait long dispela lain em Jisas i singautim ol long “kisim wara bilong givim laip, em i olsem presen bilong God.” (KTH 22:17) Sampela i olsem Marta​—⁠pasin sori i kirapim ol na ol i strong long helpim ol wanbilip bilong ol long ol samting ol i sot long en. Ol i gat tingting na ol inap mekim samting na ol i save hariap long mekim, na Jehova i tok promis olsem em bai givim gutpela pe long ol long wok ol i mekim bilong helpim ol narapela. (Hibru 6:10; 13:16) Ating sampela i wankain liklik olsem Maria. Ol i save stap isi na tingim tru ol samting bilong spirit. Ol i save laik tru long tingim long bel Tok Bilong God na dispela i helpim ol long stap strong long bilip.​—⁠Efesus 3:​17-19.

Dispela tupela lain wantaim i save mekim gutpela wok long kongrigesen Kristen. Tasol tupela wantaim i mas tingting long kisim “gutpela samting tru,” na bilong mekim olsem ol i mas tingim ol samting bilong spirit olsem nambawan samting bilong ol. Taim yumi tingim ol samting em i bikpela samting tru, orait Jehova bai orait long yumi na mekim gut long yumi.​—⁠Filipai 1:​9-11.

[Futnot]