Yumi Ol Manmeri Bilong Bilip
Ol i Mekim Ol Baibel-Stadi i Strongim Bilip Bilong Ol Man Long India
KIRAP long traipela maunten Himaleya i gat ais i save karamapim het bilong en long hap bilong not na i go olgeta long nambis bilong solwara Indian long hap saut, dispela ples India i stap. Em wanpela kantri i gat ol kain kain ples long en, na i gat kain kain lotu. I gat wan bilion samting manmeri long dispela hap, na inap 83 pesen i bilong lotu Hindu, 11 pesen i bilong lotu Muslim, na ol narapela i bilong ol lotu ol i kolim Kristen, na ol Sik, ol Budis, na ol Jain. Olgeta dispela lain i stap fri long mekim lotu. Wanpela buk (The World Book Encyclopedia) i tok: “Lotu em i bikpela samting tru long i stap bilong ol man long India.”
Wanpela lain i bihainim stret ol bilip Kristen bilong ol em ol Witnes Bilong Jehova, i gat olsem 21,200 i stap long India. Olsem ol poroman wanlotu bilong ol long ol narapela hap bilong graun, ol dispela Witnes long India i ting olsem em i gutpela wok ol inap mekim bilong helpim ol man i sindaun klostu long ol na bai ol i ken bilip strong long Tok Bilong God, em Baibel Holi. (2 Timoti 3:16, 17) Skelim stori bilong wanpela famili long Senai long hap saut bilong India, olsem wanem ol i bin kisim save long tok i tru bilong Baibel.
Taim ol i no bungim yet ol Witnes Bilong Jehova, dispela famili i bin insait tru long ol lain karismatik bilong lotu Katolik, na ol i tok, ol i save lukim ol samting olsem driman, na mekim tok long kain kain tok ples, na stretim sik. Ol i gat biknem long lotu na long dispela ples. Na ol man i save kolim sampela bilong ol olsem “Swami,” insait bilong en i olsem “Bikpela.” Orait long wanpela taim wanpela Witnes i go lukim dispela famili na soim ol long tok bilong Baibel olsem Jisas em i Pikinini bilong God, na em i no God i Gat Olgeta Strong, olsem planti man i bilip long en. Na tu, dispela Witnes i soim ol olsem nem bilong God em Jehova, na laik bilong Jehova em olsem, em i laik mekim dispela graun i kamap gutpela ples paradais.—Song 83:18; Luk 23:43, NW; Jon 3:16.
Ol i save tingim gut tok bilong Baibel na ol i laikim dispela tok ol i harim, olsem na dispela famili i orait long stadi long Baibel wantaim ol Witnes Bilong Jehova long olgeta wik. Dispela i mekim na ol wanlotu bilong ol i tok bilas long ol. Tasol dispela famili i strong yet long stadi long Baibel. Taim save bilong ol i go bikpela na bilip bilong ol i kamap strong, ol i lusim ol pasin bilong lotu giaman ol i save bihainim. Long nau, tripela long dispela famili ol i strongpela Witnes i baptais pinis, na mama i save mekim wok painia haptaim long taim em inap long mekim.
Bilip i Mekim na Em i Winim Hevi Bilong Skin i Bagarap
Sunder Lal em wanpela yangpela man i sindaun long wanpela ples long Punjap, na em i mas i gat strongpela bilip na strongpela bel na bai em i ken autim gutnius bilong Kingdom bilong God long ol narapela. (Matyu 24:14) Wanpela samting em i mekim i olsem, em i bin lusim ol bilip giaman bilong famili na bilong ples na em i kirap lotu long God tru, em Jehova. Na narapela samting em olsem, Sunder Lal i no gat lek.
Long 1992, i stap bilong Sunder Lal i senis. Em i wok olsem helpim bilong wanpela dokta na em i save bung wantaim famili bilong em long lotuim ol narapela narapela god haiden. Wanpela tisa bilong lotu bilong ol i save helpim ol long mekim olsem. Long wanpela nait em i pundaun long taim em i laik brukim rot bilong tren. Wanpela tren i krungutim em na katim tupela lek bilong em long skru antap. Em i stap laip, tasol em i no inap wokabaut moa. Sunder Lal i bel hevi tru long dispela na em i laik kilim em yet i dai. Famili bilong em i save helpim em, tasol i olsem em i no gat rot bilong mekim ol samting long bihain.
Orait bihain wanpela Witnes Bilong Jehova i kam lukim Sunder Lal na i soim em long wanpela tok bilong Baibel olsem God i tok promis long kamapim gutpela ples paradais na em bai pinisim sik bilong ol man i save laikim em na pret long em. Sunder Lal i orait long stadi long Baibel, na inap wanpela yia em i stadi strong. Ol i singautim em i go long ol miting na bihain em i go. Em i save sindaun long baksait bilong wanpela wilwil bilong poroman bilong em na poroman i save kisim em i go. Em i save pilim pen long taim em i ran long wilwil, tasol em i save kisim gutpela samting long en. Em i bungim ol arapela i save bilip tru long ol tok promis bilong Baibel na i bihainim ol tok Baibel i skulim ol long en na em i lukim tru olsem ol samting em i bin lain long en long stadi bilong em, em i tru.
Sunder Lal i kirap autim gutnius long ol man i sindaun klostu long em, na long 1995 em i kisim baptais. Pastaim em i save wokabaut long han na pulim skin bilong em i go long haus bilong ol man long ples na autim tok long ol—em pasin bilong em long wokabaut. Tasol nau em i kisim wanpela presen long ol brata bilong em bilong spirit—em wanpela wilwil i gat 3-pela taia na ol i wokim bilong man i ken “kikim” long han. Gutpela tru em i gat dispela wilwil—nau em yet inap autim tok na em inap raun 12 kilomita long i go long ol miting bilong kongrigesen. Sampela taim long taim bilong bikpela ren na win, na sampela taim em hat nogut tru inap 43 digri; em yet i save kikim wilwil na i go.
Sunder Lal i save go long ol miting, na tu, em i save stadi long Baibel wantaim planti man em ol i gat laik long bilip strong long trupela God, em Jehova. Sevenpela Baibel-stadi bilong em ol i baptais pinis, na 3-pela man em i bin autim tok long ol tasol ol wanwok Witnes i bin stadi wantaim ol, ol tu i kisim baptais.
Olsem Baibel i tok, “planti man ol i no bilip.” (2 Tesalonaika 3:2) Tasol ol “manmeri God i bin makim bilong kisim laip i stap gut oltaim” ol inap kisim strongpela bilip taim ol i stadi long Tok Bilong God. (Aposel 13:48) Na tu, dispela kain stadi i save mekim na ai bilong ol man i lait tru taim ol i tingim ol gutpela samting bai kamap long bihain—em dispela samting ol lain manmeri long India em namba bilong ol i wok long i go bikpela ol i bilip long en.
[Mep long pes 30]
(Bilong save ol dispela rait i stap we long pes, lukim buk o magasin)
AFGANISTAN
PAKISTAN
NEPAL
BUTAN
SAINA
BANGLADES
MIANMA
LAOS
TAILAN
VIETNAM
KAMBODIA
SRI LANKA
INDIA
[Kredit Lain]
Mountain High Maps® Copyright © 1997 Digital Wisdom, Inc.