Wanem As na Yu Mekim Wok Bilong God?
Wanpela king i save pret long God i bin givim dispela gutpela tok long pikinini man bilong em: “Yu mas i gat wanpela tingting tasol, em long i stap aninit long God bilong papa bilong yu. Na yu mas [givim bel na] wok strong tru long bihainim laik bilong em.” (1 Stori 28:9) Olsem na yumi save Jehova i laik bai yumi givim bel long mekim wok bilong em.
YUMI ol Witnes Bilong Jehova i save amamas long tokaut olsem nambawan taim yumi bin harim wanpela Witnes i kamapim gut insait bilong ol tok promis bilong Baibel, bel bilong yumi i amamas na yumi laik tok tenkyu. Long olgeta de yumi bin kisim sampela nupela save long ol samting God i laik mekim long bihain. Taim yumi wok long kisim save long Jehova, laik bilong yumi long mekim wok bilong God i wok long kamap strong moa long bel bilong yumi.
Planti manmeri ol i kamap Witnes Bilong Jehova pinis na ol i wok yet long mekim wok bilong Jehova long olgeta de ol i stap laip na ol i kisim bikpela amamas tru long mekim. Tasol sampela Kristen, taim ol i kirap mekim wok bilong God ol i wok strong, tasol bihain ol i no tingim moa ol samting i save kirapim yumi long mekim wok bilong God. Olsem wanem? Dispela samting i bin painim yu? Sapos olsem, yu no ken bel hevi. Sapos amamas bilong yu long mekim wok bilong God i lus pinis, yu inap kisim bek dispela amamas. Orait yu ken mekim wanem bilong kisim bek?
Tingim Ol Gutpela Samting Yu Kisim Pinis
Namba wan samting em i olsem, tingim gut long bel ol gutpela samting God i save givim yu long olgeta wan wan de. Tingting long ol gutpela presen bilong Jehova: ol samting em i wokim—em ol samting olgeta manmeri inap kisim, maski ol i husat o ol i maniman o rabisman—ol samting em i givim long yumi, olsem kaikai na dring, skin bilong yumi i stap gut, no gat sik, ol save bilong yu long tok i tru i stap long Baibel, na nambawan samting em i givim olsem presen, em Pikinini bilong em. Indai bilong em i opim rot bilong yu long mekim wok bilong God na bel i no gat tok. (Jon 3:16; Jems 1:17) Taim yu tingting long gutpela pasin bilong God, dispela bai kirapim yu long laikim em moa yet. Bel bilong yu bai kirapim yu long mekim wok bilong God, long wanem, yu amamas long ol gutpela samting em i mekim bilong helpim yu. Ating bai yu pilim wankain olsem man bilong raitim Song, em i tok: “God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru. Sapos mi autim tok long ol man na tokim ol long wok na tingting bilong yu, olaman! . . . Mi no inap kaunim ol samting yu bin mekim bilong helpim mipela.”—Song 40:5.
Devit i bin raitim dispela tok, em i wanpela man i gat planti hevi long i stap bilong em. Taim Devit i yangpela man em i mas lusim bikpela hap taim long ranawe, long wanem, King Sol wantaim ol soldia bilong en ol i laik kilim em i dai. (1 Samuel 23:7, 8, 19-23) Na tu, Devit i gat sampela pasin kranki bilong em yet em i mas wok long daunim. Em i tokaut long dispela samting long Song 40, em i tok: “Planti hevi i save kamap long mi, na mi no inap kaunim ol. Ol pasin nogut mi bin mekim, ol i daunim mi pinis, olsem na mi no moa lukluk gut. Ol pasin nogut i kamap planti moa, na i winim namba bilong gras bilong het bilong mi.” (Song 40:12) Tru tumas, Devit i gat ol hevi, tasol em i no larim ol dispela hevi i daunim em olgeta. Em i tingting strong long ol gutpela samting Jehova i mekim long em, maski em i gat ol hevi, na em i kisim save olsem ol blesing em i kisim i winim tru ol hevi em i karim.
Taim yu pilim olsem ol hevi i laik daunim yu olgeta o yu pilim olsem yu no inap mekim wanpela gutpela wok, em i gutpela sapos yu tingim ol gutpela samting i save painim yu, olsem Devit i bin mekim. Ating yu bin tingim tru ol gutpela blesing yu bin kisim na dispela i kirapim yu long dediket long Jehova. Kain tingting olsem inap kirapim gen dispela amamas yu bin lusim, na dispela bai helpim yu long mekim wok bilong God na bel i pilim tru ol samting Jehova i mekim bilong helpim yu.
Ol Miting Bilong Kongrigesen Inap Helpim Yu
Yumi mas tingim gut long bel ol gutpela pasin bilong Jehova, na tu yumi mas poroman wantaim ol wanbilip Kristen. Taim yumi bung wantaim ol man, meri, na yangpela ol i laikim tumas God na ol i tingting strong long mekim wok bilong em, dispela i save strongim yumi. Pasin ol i save bihainim inap kirapim yumi long givim bel olgeta long mekim wok bilong Jehova. Na taim yumi kam bung long Haus Kingdom dispela inap strongim ol tu.
Tru, taim yumi wok strong long de olgeta na yumi kam bek long haus, o yumi bel hevi, long wanem, yumi gat wanpela hevi samting, ating em i hatwok long tingting long i go long miting long Haus Kingdom. Long kain taim olsem ating yumi mas subim skin bilong yumi, olsem “paitim tru bodi,” bambai yumi bihainim lo bilong bung wantaim ol wanbilip Kristen.—1 Korin 9:26, 27; Hibru 10:23-25.
Sapos yumi mas mekim olsem, yu ting dispela i makim olsem yumi no laikim tru Jehova? Nogat. Ol strongpela Kristen bilong bipo em ol i bin laikim tumas Jehova, ol i mas taitim bun tru long mekim laik bilong God. (Luk 13:24) Aposel Pol em i kain Kristen olsem. Em i tokaut klia long tingting bilong em olsem: “Mi save, i no gat wanpela gutpela samting i stap insait long mi. Mi tok long olpela bel bilong mi tasol. Tru, mi laik mekim gutpela pasin, tasol mi no inap mekim. Gutpela pasin mi laik mekim, em mi no save mekim. Na pasin nogut mi no laik mekim, em mi save mekim.” (Rom 7:18, 19) Na em i tokim ol Korin olsem: “Mi save autim gutnius, em i no samting bilong mi amamas long mi yet. Nogat. Mi no gat narapela rot. Mi mas mekim tasol. . . . Sapos long laik bilong mi yet mi mekim dispela wok, orait bai mi kisim pe. Tasol, sapos mi no laik na mi mekim, orait em i wok God i givim mi long mekim.”—1 Korin 9:16, 17, Nupela Testamen na Ol Sam.
Pol i wankain olsem planti bilong yumi—laik nogut bilong skin i save pait wantaim laik bilong em long mekim samting i stret. Tasol em i bin pait strong bilong daunim ol dispela laik nogut na klostu olgeta taim em i winim dispela pait. Tasol Pol i no inap mekim dispela long strong bilong em yet. Nogat. Em i tok: “[God] i save strongim mi, na long strong bilong em mi inap mekim olgeta samting.” (Filipai 4:13) Jehova i bin strongim Pol, na em bai strongim yu tu long bihainim stretpela pasin sapos yu askim em long helpim yu. (Filipai 4:6, 7) Olsem na yu mas “wok strong long lukautim bilip” bilong yu na Jehova bai mekim gut long yu.—Jut 3.
Taim yu mekim dispela pait, i no olsem yu mas stap wanpis na mekim. Nogat. Long ol kongrigesen bilong ol Witnes Bilong Jehova i gat ol strongpela elda Kristen i stap, ol i wok strong long lukautim bilip bilong ol yet na ol i gat laik long helpim yu tu. Sapos yu go lukim wanpela elda bilong kisim helpim, em bai mekim tok bilong “strongim bel” bilong yu. (1 Tesalonaika 5:14) Em i laik i stap olsem “ples hait ol manmeri i ken i go na hait long en long taim bilong bikpela win na ren.”—Aisaia 32:2.
“God yet em i as bilong dispela pasin bilong laikim ol arapela,” na em i laik bai pasin bilong laikim em tumas i kirapim ol wokboi bilong em long mekim wok bilong em. (1 Jon 4:8) Sapos yu gat wok long strongim gen pasin bilong yu long laikim tru God, kirap bihainim ol tok yumi stori pinis long en. Bai yu amamas taim yu mekim olsem.