Mipela i Wok Strong Inap Long Skel Bilong Mipela!

“WOK strong inap long skel bilong yu.” Wanpela memba bilong lain Gavening Bodi i givim dispela gutpela tok long wanpela misineri. Tasol bilong wanem em i givim kain tok olsem long wanpela wokman i save mekim gut wok bilong God? Ating ol misineri i no save pret long wanpela samting, long olgeta de ol binatang, ol snek, hatpela san, sik, na ol narapela samting i putim hevi long ol, a?

Ol misineri bilong ol Witnes Bilong Jehova i wankain olsem ol narapela man na meri. Ol i Kristen em pasin bilong laikim tru Jehova na ol narapela man i bin kirapim ol long mekim wok long ol narapela kantri. Ol i wok strong long mekim wok bilong Jehova inap tru long save bilong ol, na ol i askim Jehova long strongim ol long mekim wok.​—⁠Efesus 6:⁠10.

Bilong kisim sampela save moa long wok misineri, yumi ken ting yumi stap wanpela de long wanpela haus misineri long Wes Afrika na raun wantaim ol.

Wok Misineri

Em klostu 7 klok long moningtaim. Mipela i kamap long haus misineri long taim stret bilong mipela i ken sindaun wantaim ol na skelim teks bilong de. Tenpela misineri i tok welkam long mipela na givim spes long tebol bilong mipela i ken sindaun wantaim ol. Taim mipela i wok long kisim save long narapela narapela, wanpela misineri​—⁠em i bin stap long dispela hap inap planti yia⁠—em i kirap stori long ol samting i pani na i bin painim em long wok autim tok. Tasol mipela i pinis long stori taim siaman bilong skelim teks bilong de i tokim dispela lain bilong amamas olsem em taim bilong skelim teks. Ol bai mekim dispela long tok Frans. Mipela i no save long dispela tok ples, tasol ol i toktok gut na dispela i soim olsem ol misineri i kam long narapela kantri ol i save gut long tok Frans.

Ol i skelim pinis teks bilong de, ol i beten, na nau em taim bilong kaikai. Mipela i kisim bikpela plet wit-biks samting, na misineri i sindaun klostu long mipela i tokim mipela long katim banana i go liklik liklik na tanim wantaim wit-biks. Mipela i tokim em olsem mipela i no laikim banana tumas, tasol em i tok bai mipela i senisim tingting taim mipela i traim ol banana i kamap long dispela hap. Olsem na mipela i putim liklik long kaikai. Man! Tok bilong em i stret. Ol dispela banana i swit tru, olsem aiskrim! Ol i tok, bret mipela i kaikai i kam long liklik stua i stap long hapsait bilong rot long haus misineri, na ol i bin wokim dispela bret long bikmoning yet.

Bihain long kaikai, mipela bai raun wantaim tupela misineri i marit, bai yumi kolim ol olsem Ben na Karen. Mipela i bin harim olsem teritori long dispela kantri long Wes Afrika i gutpela tru, na nau mipela yet i laik lukim dispela samting.

Taim mipela i kamap long ples bilong kisim PMV, inap olsem 12-pela manmeri i wet i stap. Bihain liklik, tupela misineri i toktok gut wantaim wanpela meri na pikinini man bilong em long tok bilong Baibel. Mipela i no save long tok Frans, olsem na mipela i sanap tasol na smail! Taim meri i kisim Wastaua na Kirap!, PMV i kam na olgeta i laik go insait long wankain taim! Taim mipela i kalap hariap long PMV, ol man i stap baksait long mipela ol i subim mipela i go insait. Mipela i hatwok long wokabaut stret taim mipela i go long baksait bilong PMV. Taim draiva i kirap long draiv, mipela i holim strong sia samting, nogut mipela i pundaun. Sampela taim PMV i stop, na sampela manmeri moa i kalap long PMV i pas pas. Mipela i smail long ol pasindia, na ol i smail long mipela. Mipela i gat bikpela laik long toktok wantaim ol, tasol mipela i no inap!

PMV i spit i go, na mipela i lukluk long windo long ol samting i wok long kamap long rot. Tupela meri i wokabaut wantaim na ol i karim hevipela samting antap long het bilong ol. Wanpela i karim bikpela dis i pulap long wara. Wanpela man i putim laplap long rot, na antap long en em i putim ol liklik samting em i laik salim. Long olgeta hap i gat ol manmeri i baim o salim olgeta kain samting ol man inap baim na salim.

Ben i sanap klostu long mi, na wantu em i pilim olsem samting i kaikaim em. Em wanem samting? Tru, PMV i pulap long ol man, tasol samting i kaikaim em gen. Em i lukluk i go daun. Klostu long lek bilong em i gat wanpela bek na insait long en i gat pato, na wan wan taim pato i subim het i kam ausait na kaikaim lek bilong Ben! Ben i tok, ating papa bilong pato i laik kisim em i go long maket bilong salim.

Taim mipela i kamap long teritori, mipela i amamas long harim olsem mipela bai raun long wanpela hap em planti Afrika i save sindaun long kain hap olsem. Taim mipela i wokabaut i go long namba wan haus, Ben i paitim strong han bilong em bilong toksave long man bilong haus olsem mipela i kam. Em pasin bilong ol man long dispela hap long “paitim dua.” Wanpela yangpela man i kam na i tok em i gat wok, tasol em i singautim mipela long kam bek bihain liklik.

Long namba tu haus, mipela i bungim wanpela meri i toktok long wanpela tok ples em Ben i no save long en. Meri ya i singautim pikinini man bilong em na askim em long tanim tok Ben i mekim. Taim Ben i pinisim tok, meri i kisim wanpela buklet i stori long Baibel, na pikinini man i tok em bai kamapim ol tok bilong en long mama. Long namba tri haus, i gat sampela yangpela i sindaun long fran bilong haus. Tupela i lusim hariap sia ol i sindaun long en na givim long mipela. Mipela i toktok long pasin bilong yusim kruse long taim bilong lotu. Mipela i stretim tok bilong toktok gen long neks wik. Nau em taim bilong go lukim gen yangpela man mipela i bungim long namba wan haus. Em i bin kisim save long samting mipela i bin toktok wantaim ol yangpela i stap klostu. Em i gat planti askim long Baibel na em i laik stadi long Baibel. Ben i sekim sediul bilong em, na em i tok em inap kam bek long wankain taim long neks wik. Taim mipela i go bek long haus misineri bilong kaikai, Ben na Karen i tok ol i mas skelim gut wok bilong mekim ol Baibel-stadi, long wanem, ol inap kirapim planti Baibel-stadi, winim skel bilong ol.

Mipela i tokim ol olsem ol i save gut long tok Frans. Ben i tok, em na Karen i bin mekim wok misineri inap 6-pela yia, na nau ol i pilim olsem i no hatwok tumas long mekim tok Frans. Ol i tok, i hatwok long lainim nupela tok ples, tasol ol i no les na hatwok bilong ol i karim kaikai.

Long 12:⁠30 belo bek, olgeta misineri i bung bilong kaikai. Mipela i kisim save olsem long olgeta de em wok bilong wanpela misineri long redim kaikai bilong moningtaim na belo, na wasim ol plet samting bihain long en. Long dispela de, wanpela misineri i bin praim kakaruk na ol poteto, na wokim narapela kaikai long ol tomato. Kaikai i swit tru, em wanpela kaikai dispela sista i save kukim gut tru!

Ben na Karen bai mekim wanem long apinun? Ol i tok, olgeta man i save hait long san long 1 klok i go inap 3 klok long apinun, olsem na ol misineri i save malolo o mekim stadi bilong ol long dispela taim. Mipela i no kirap nogut taim Karen i tok ol nupela misineri i save kirap hariap long bihainim dispela pasin!

Bihain long malolo, mipela i go bek long autim tok. Inap sampela taim nau Ben i bin traim long bungim wanpela man i laik harim, tasol em i no stap long haus, tasol tupela yangpela man i opim dua taim Ben i paitim han. Ol i tok, man bilong haus i bin tokim ol long Ben i save kam lukim em, na em i kirapim ol long kisim wanpela buk bilong stadi long Baibel em buk Save i Bringim Man Long Laip Oltaim. Mipela i amamas long givim dispela buk long ol. Nau mipela i kalap long PMV i kisim mipela i go long hap we Karen bai stadi long Baibel wantaim wanpela meri.

Taim mipela i ron long PMV long ol rot i pulap long ol man, Karen i stori olsem em i bin bungim dispela meri taim tupela i bin raun long teksi wantaim sampela narapela pasindia. Karen i givim wanpela liklik pepa long meri na bai em i ken ritim taim em i raun long teksi. Meri ya i ritim pepa na askim Karen long givim narapela. Em i amamas tru long ritim dispela. Long pinis bilong raun bilong ol, Karen i stretim tok long go lukim meri long haus bilong em, na kirap stadi long Baibel wantaim em long buklet God i Laik Yumi Mas Mekim Wanem? Nau Karen bai mekim stadi namba 5 wantaim dispela meri.

Mipela i amamas tru long dispela de bilong autim tok, tasol mipela i gat yet sampela askim long wok misineri. Ben na Karen i tok taim mipela i go bek long haus, ol bai redim liklik kaikai long mipela na bekim ol askim bilong mipela.

Olsem Wanem Ol Inap Mekim Dispela Wok

Taim mipela i kaikai kiau ol i praim, bret, na sis, mipela i kisim sampela save moa long wok misineri. Long Mande planti misineri i save malolo o mekim sampela wok bilong ol yet. Planti misineri i save lusim sampela hap taim long dispela de bilong raitim pas long famili na ol pren. Em i bikpela samting long ol i harim ol stori i kam long ples bilong ol, na ol misineri i amamas long salim na kisim ol pas.

Ol misineri i save stap na wok wantaim, olsem na em i bikpela samting long ol i toktok gut wantaim na bung wantaim bilong toktok long ol samting bilong spirit. Bilong helpim ol long mekim olsem, ol i gat sediul bilong mekim Baibel-stadi bilong ol yet, na tu, long olgeta Mande nait ol misineri i save stadi long Baibel long rot bilong nius Wastaua. Ben i tok taim ol misineri bilong kain kain ples i sindaun wantaim, sampela liklik hevi bai kamap, tasol taim famili i kisim kaikai bilong spirit long rot bilong stadi, dispela i helpim ol long sindaun gut na stap wanbel wantaim. Em i tok tu olsem, em i bikpela samting long ol i no ken tingting tumas long ol yet olsem ol i winim ol narapela.

Pasin daun tu i bikpela samting. Ol i salim ol misineri bilong helpim ol narapela, i no bilong ol narapela i helpim ol. Ol misineri i tok, wanpela tok i hatwok tru long mekim long olgeta tok ples em “sori,” na i hatwok moa taim man i mas tok sori long pasin o tok em i popaia long mekim. Ben i kamapim stori bilong Abigel long Baibel, stori i tok Abigel i tok sori long pasin nogut man bilong em i bin mekim, na long dispela rot em i stretim ol samting na bikpela hevi i no kamap. (1 Samuel 25:​23-28) Pasin bilong “stap wanbel” wantaim, em i wanpela bikpela samting bilong man i ken stap olsem gutpela misineri.​—⁠2 Korin 13:⁠11.

Wanpela taim long olgeta mun ol misineri i save mekim miting na toktok wantaim long ol samting bilong famili, olsem ol sediul bilong mekim ol wok bilong haus. Bihain long miting, ol i kaikai sampela switpela samting. Mipela i ting dispela miting em i gutpela samting tru long ol i mekim, na ol i ken kaikai na amamas wantaim.

Taim mipela i kaikai pinis, mipela i raun na lukim haus misineri. Mipela i luksave olsem haus i no gat planti bilas samting long en, tasol ol misineri i wok gut wantaim na haus i klin tru. Haus i gat bokis ais, masin bilong wasim klos, na stov. Karen i tok, long ol kantri i gat bikpela san, olsem long dispela kantri long Wes Afrika, ol haus misineri inap kisim eakon tu. Ol gutpela rum slip, kaikai i save strongim skin, na ol samting ol i mekim bilong lukautim helt bilong ol, i helpim ol misineri long stap gut na mekim wok.

Tingim Ol Gutpela Samting

Mipela i pilim tru olgeta samting mipela i bin lukim. Olsem wanem? Wok misineri em samting mipela tu inap mekim? Olsem wanem mipela inap save? Ol misineri i kamapim sampela tok mipela i ken tingting long en.

Pastaim ol i tokim mipela olsem, ol misineri Kristen i no go bilong raun na lukim nupela hap. Ol i go bilong painim ol man i gat gutpela bel na i laik kisim save long ol gutpela tok promis bilong God. Ol misineri i save lusim inap 140 aua long olgeta mun long autim tok, olsem na em i bikpela samting long ol i mas laikim tru wok autim tok.

Mipela i tok, ‘tasol olsem wanem long ol snek, palai, na ol binatang?’ Ben i tok, ol dispela samting i stap long planti hap ol i save salim ol misineri long en, tasol ol misineri i lain long ol dispela samting. Em i tok, olgeta hap ol misineri i wok long en i gat ol gutpela samting bilong en, na taim ol misineri i stap pinis inap longpela taim, ol i kirap tingting long ol gutpela samting bilong hap ol i wok long en. I no longtaim na ol samting em bipo ol i ting i “narapela kain” i kamap samting ol i no tingting tumas long en, na sampela taim em i kamap samting bilong amamas long en. Wanpela misineri i bin wok long Wes Afrika inap planti yia na bihain em i mas go bek long ples bilong lukautim famili samting, em i tok i hatwok tru long lusim Wes Afrika, winim taim em i bin lusim ples bilong em inap planti yia i go pinis. Kantri em i mekim wok misineri long en i bin kamap olsem ples bilong em.

Yu Redi?

Ben na Karen i bin kirapim mipela long tingting long planti samting. Olsem wanem long yu? Yu bin tingting long mekim wok misineri long narapela kantri? Sapos olsem, ating klostu nau yu inap winim dispela mak. Wanpela bikpela pasin ol man i laik kamap misineri i mas mekim, ol i mas i gat bikpela laik long mekim wok bilong God fultaim na amamas long helpim ol man. Tingim dispela: Ol misineri i no gat narapela kain strong bilong mekim wok, nogat; ol i wankain olsem ol narapela man na meri. Ol i wok strong inap long skel bilong ol bilong mekim dispela wok i bikpela samting tru.

[Ol Piksa long pes 27]

Long olgeta de ol i skelim teks bilong de pastaim

[Ol Piksa long pes 29]

Wok misineri inap givim bikpela amamas

[Piksa long pes 29]

Sampela hap long Afrika