Lukautim Gut Maus Bilong Bel

ATING bai yu pret nogut tru long raun long balus em kompiuta bilong en i no wok gut. Tasol olsem wanem sapos wanpela man i bin mekim nabaut long dispela masin o senisim sampela namba long en i makim rot pailot i mas stiaim balus i go long en? Ating bai yu pret moa yet, a? Orait i gat wanpela man i laik mekim wankain samting long maus bilong bel bilong yu. Em i gat strongpela tingting long bagarapim dispela samting i save stiaim yu long bihainim stretpela pasin. Em i laik bai yu kamap birua bilong God na kisim bagarap!​​—⁠Jop 2:​2-5; Jon 8:​44.

Husat dispela man nogut? Baibel i tok “em dispela snek bilong bipo yet . . . ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun.” (KTH 12:⁠9) Long gaden Iden Satan i giamanim Iv na pulim em long givim baksait long lo em i save pinis em i stret na bikhet long God. (Stat 3:​1-6, 16-​19) Kirap long dispela taim na i kam, Satan i bin kamapim sampela lain bilong giamanim na pulim ol man long kamap birua bilong God. Wanpela lain i go pas long mekim olsem, em lotu giaman.​​—⁠2 Korin 11:​14, 15.

Lotu Giaman i Bagarapim Maus Bilong Bel

Long Buk Kamapim Tok Hait long Baibel, lotu giaman i olsem wanpela pamukmeri ol i kolim Bikpela Babilon. Ol tok bilong en i bin paulim tingting bilong planti man long ol samting bilong stretpela pasin na i bin kirapim ol long birua long ol man i holim narapela kain bilip. Buk Kamapim Tok Hait i tok, God i lukim olsem lotu giaman i gat asua long “olgeta man bilong graun ol birua i bin kilim ol i dai,” em sampela ol i man i lotu tru long God.​​—⁠KTH 17:​1-6; 18:​3, 24.

Jisas i toksave long ol disaipel long samting em sampela bai mekim, em lotu giaman i bin paulim stretpela pasin bilong ol. Em i tok: “Bihain bai taim i kamap, na ol man i kilim yupela i dai, ol bai i ting ol i mekim gutpela wok bilong God.” Ol dispela man ol i aipas tru long ol samting bilong stretpela pasin! Jisas i tok: “Ol i no save long Papa, na ol i no save long mi.” (Jon 16:​2, 3) Bihain liklik long Jisas i mekim dispela tok, sampela bikman bilong lotu ol i putim tok long kilim Jisas i dai, na bel bilong ol i no kotim ol liklik, nogat. (Jon 11:​47-​50) Tasol Jisas i tok wanpela mak bilong ol disaipel tru bilong em, i olsem: Narapela i mas laikim tru narapela. Na ol i mas laikim ol birua tu.​​—⁠Matyu 5:​44-​48; Jon 13:⁠35.

Narapela samting lotu giaman i bin mekim bilong bagarapim maus bilong bel bilong planti man, i olsem: Lotu giaman i orait long kain kain pasin pamuk ol man i gat laik long bihainim. Aposel Pol i tok profet long dispela olsem: “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim.”​​—⁠2 Timoti 4:⁠3.

Long nau ol bikman bilong lotu i save autim tok em yau bilong ol man i skrap long harim. Ol i tok God inap orait long man o meri i slip wantaim narapela i no poroman marit bilong em. Na sampela i orait long olkain pasin sodom. Na sampela pris pasto yet i save mekim dispela pasin. Nius The Times bilong Briten i tok, ol i bin votim “13 pris” bilong stap long lain bilong bosim Sios Bilong Inglan, maski ol i save ol i man bilong mekim pasin sodom. Taim ol bikman bilong misin i lusim ol lo bilong Baibel long ol samting bilong stretpela pasin na misin yet i larim ol i mekim, orait ol narapela long misin bai bihainim wanem ol lo? Planti milion manmeri ol i paul tru.

I gutpela moa sapos ol i larim ol tok i tru bilong Baibel long ol samting bilong spirit na stretpela pasin i stiaim ol! (Song 43:3; Jon 17:17) Baibel i tok, ol man i save mekim pasin pamuk, na ol man i trabel long ol maritmeri, ol bai “i no inap i go insait long kingdom bilong God.” (1 Korin 6:​9, 10) Na Baibel i tok ol man na ol meri “i lusim stretpela pasin bilong marit, na ol i bihainim pasin i no stret,” long ai bilong God dispela pasin em “pasin i gat sem.” (Rom 1:​26, 27, 32) Ol dispela tok i tru bilong stretpela pasin i no samting ol man bilong graun i bin kamapim, nogat; God yet i bin kamapim ol dispela lo na i no gat wanpela taim em i bin rausim. (Galesia 1:8; 2 Timoti 3:​16) Tasol Satan i gat ol narapela rot bilong bagarapim maus bilong bel.

Skelim Ol Samting Bilong Amamas

Pasin bilong subim man long mekim pasin nogut, em samting nogut, tasol pasin bilong kirapim man na bai em i gat laik long mekim dispela pasin nogut, dispela i nogut moa yet. “Hetman i save bosim dispela graun,” em Satan, em i laik kirapim man olsem. Em i laik putim tingting nogut bilong em long tingting na bel bilong ol man em ol i no gat gutpela tingting o ol i no was gut​—⁠ol yangpela tu​—⁠long rot bilong sampela kain buk, piksa wokabaut, musik, kompiuta-gem, na ol hap bilong Intenet i gat ol piksa nogut bilong pasin sem.​​—⁠Jon 14:30; Efesus 2:⁠2.

Nius Pediatrics i kamapim wanpela ripot i tok olsem: “Long olgeta yia long Amerika ol yangpela i lukim long televisen pasin bilong bagarapim man inap 10,000 taim, na dispela pasin i nogut moa long ol program bilong ol pikinini.” Ripot i kamapim tu olsem “long olgeta yia, ol yangpela i lukim televisen, ol i harim ol tok na tok pilai bilong maritpasin samting inap olsem 15,000 taim.” Ripot i tok, long apinun, taim planti man i lukim televisen, “maritpasin samting i save kamap 8-pela taim insait long olgeta aua​—⁠dispela i dabolim 4-pela taim kain samting olsem i bin kamap long televisen long 1976.” Na “pasin bilong mekim ol tok nogut i wok long kamap bikpela moa.” Tasol planti saveman i bin kisim save olsem dispela kain samting ol man i lukim em inap bagarapim pasin bilong ol, na Baibel tu i tok olsem. Olsem na sapos tru tru yu laik mekim ol samting God i laikim na yu laik helpim yu yet, orait bihainim tok bilong Sindaun 4:​23, em i tok: “Gutpela tingting bilong stiaim laip bilong yu, em i save kamap long tingting bilong yu, . . . olsem na olgeta taim yu mas was gut tru long tingting bilong yu.”​​—⁠Aisaia 48:⁠17.

Planti musik ol man i laikim em tu inap bagarapim maus bilong bel. Nius The Sunday Mail bilong Australia i toktok long wanpela man bilong singsing em planti manmeri i laikim tru ol singsing bilong em, na nius i tok em i “wok strong long mekim ol man i kirap nogut.” Nius i tok, ol singsing bilong em i save “litimapim pasin bilong kisim drak, na reipim meri, na papa i mekim maritpasin wantaim pikinini” na em i “singsing long kilim i dai meri bilong em na tromoi skin bilong em long wanpela raunwara.” Nius i kamapim sampela tok moa em dispela man i kolim, tasol mipela i no ken kamapim, long wanem, dispela tok i nogut moa yet. Tasol maski ol singsing bilong em i kamapim ol tok i nogut tru, musik bilong em i mekim na em i bin kisim wanpela prais i gat bikpela namba. Olsem wanem? Maski yu laikim pairap bilong dispela musik, yu laik putim kain tok nogut olsem long tingting na bel bilong yu? Ating nogat tru, long wanem, ol man i mekim olsem, ol i bagarapim maus bilong bel bilong ol, na kisim “tingting nogut long bel,” na kamap birua bilong God.​​—⁠Hibru 3:​12; Matyu 12:​33-​35.

Olsem na skelim gut ol samting bilong amamas. Baibel i tok strong long yumi olsem: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.”​​—⁠Filipai 4:⁠8.

Ol Poroman na Maus Bilong Bel

Taim Neil na Franz i liklik yet, ol i poromanim ol gutpela Kristen.a Tasol Neil i tok, bihain “mi kirap raun wantaim ol poroman nogut.” Em i sori tru long dispela i mekim na em i kirap mekim pasin raskol na go long kalabus. Stori bilong Franz i wankain. Em i tok: “Mi ting mi inap raun wantaim ol yangpela bilong dispela graun na dispela i no ken bagarapim pasin bilong mi. Tasol Galesia 6:7 i tok, ‘Nogut yupela i ting yupela inap long trikim God. Yupela bai i no inap tru. Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.’ Long rot bilong bikpela hevi i painim mi, mi kisim save olsem tingting bilong mi i kranki stret, tasol tok bilong Jehova i stret olgeta. Mi mas stap laip olgeta long kalabus long ol rong mi bin mekim.”

Ol man kain olsem Neil na Franz ol i no kirap wantu tasol na mekim pasin raskol, nogat​—⁠pastaim ol i no gat tingting long mekim olsem. Dispela samting i save kamap isi isi. Ating namba wan samting ol i kirap mekim, em pasin bilong raun wantaim ol poroman nogut. (1 Korin 15:33) Na bihain, kisim drak na dring planti tumas. Strongpela dring inap bagarapim maus bilong bel. Orait nau man i kirap mekim pasin raskol o pasin pamuk.

Olsem na nogut yumi kirap mekim dispela namba wan samting, a? Bung wantaim ol man i gat gutpela tingting na i laikim tru God. Ol bai helpim yu long strongim maus bilong bel na bai bel i ken stiaim yu gut na yu inap abrusim planti hevi. (Sindaun 13:20) Tru, Neil na Franz i stap yet long kalabus, tasol nau ol i save olsem maus bilong bel em i wanpela gutpela samting tru God i bin givim long ol, na em samting ol i mas skulim na lukautim gut. Na tu, ol i wok strong long ol i ken pas gut wantaim God bilong ol, em Jehova. Kisim gutpela tingting, na larim ol dispela pasin kranki bilong ol i lainim yu.​​—⁠Sindaun 22:⁠3.

Lukautim Gut Maus Bilong Bel

Yumi soim olsem yumi laik lukautim gut maus bilong bel, taim yumi wok long kisim pasin bilong laikim tru God na bilip long em, wantaim pasin bilong pret long em. (Sindaun 8:​13; 1 Jon 5:⁠3) Baibel i kamapim klia olsem sapos maus bilong bel i sot tru long ol dispela pasin, orait em i no inap helpim yumi long bihainim stretpela pasin. Song 14:1 i tok long ol man i save tok: “I no gat God i stap.” Ol i no bilip, olsem na dispela i mekim wanem long pasin bilong ol? Ves i tok moa: “Ol i save mekim pasin i nogut tru.”

Ol man i no bilip tru long God, ol i no gat gutpela samting bilong wetim i kamap bihain. Olsem na ol i laik kisim amamas nau tasol, na inapim ol laik bilong skin. Tingting bilong ol i olsem: “Yumi kaikai na dring, long wanem, tumora bai yumi dai.” (1 Korin 15:32) Tasol ol man i wetim prais bilong kisim laip oltaim, ol i no larim ol amamas bilong dispela graun i pulim ol long lusim rot bilong laip. Olsem wanpela kompiuta bilong stiaim gut balus, maus bilong bel em ol i skulim pinis, em bai helpim ol long stap gut long rot bilong bihainim tok bilong God na stap gut long em.​​—⁠Filipai 3:⁠8.

Bilong maus bilong bel i gat strong na i ken wok gut, Tok Bilong God i mas soim rot long en long olgeta taim. Baibel i tok kain tok olsem bilong soim rot, em i stap. Em i tok: “Taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” (Aisaia 30:21) Olsem na makim taim bilong ritim Baibel long olgeta de. Dispela bai strongim yu long taim yu hatwok long mekim ol samting i stret o yu tingting planti. Yu ken bilip olsem sapos yu bilip tru long Jehova, em bai stiaim yu long stretpela pasin yu mas bihainim na long ol samting bilong spirit. Bihainim pasin bilong man bilong raitim song, em i tok: “Oltaim mi save pilim Bikpela i stap klostu long mi. Em i stap klostu na i givim strong long mi, olsem na i no gat wanpela samting i ken mekim mi i pret na guria.”​​—⁠Song 16:8; 55:⁠22.

[Futnot]

[Ol Piksa long pes 5]

Lotu giaman, em Baibel i kolim ‘Bikpela Babilon,’ i gat asua long bagarapim maus bilong bel bilong planti man

[Kredit Lain]

Priest blessing troops: U.S. Army photo

[Ol Piksa long pes 6]

Pasin bilong lukim pait na pasin pamuk bai bagarapim maus bilong bel bilong yu

[Piksa long pes 7]

Sapos oltaim yu kisim Tok Bilong God bilong soim rot long yu, dispela bai lukautim maus bilong bel