Olsem Wanem Long Bilip Bilong Helpaia?
TAIM yu harim dispela tok “hel,” yu tingim wanem kain ples? Yu ting hel em i wanpela ples tru tru we i gat paia na ol ston salfa na ol man i karim pen inap oltaim oltaim? O yu ting hel em i wanpela tok piksa tasol i makim i stap bilong man?
Inap planti handet yia, ol hetman bilong ol lotu i gat nem Kristen ol i ting hel em i wanpela ples paia we ol man i karim bikpela pen tru long skin bilong ol, na ol man nogut i no inap abrusim dispela ples. Planti ol narapela lotu i wanbel yet long dispela tingting. Nius U.S.News & World Report i tok: “Lotu Kristen i as na planti man i save long dispela tok ‘hel,’ tasol dispela bilip i no bilong lotu Kristen tasol. Klostu olgeta bikpela lotu bilong graun na sampela liklik lain lotu, ol i gat dispela bilip olsem bihain long man nogut i dai em bai kisim pen olsem pe bilong ol rong em i bin mekim.” Ol Hindu, Budis, Muslim, Jain, na ol Tao, ol i bilip long wanpela kain hel.
Tasol long tingting bilong planti man long nau, hel i makim narapela samting. Nius yumi kolim antap i tok: “I gat ol man i tingim yet hel olsem wanpela ples paia tru tru, tasol long nau tingting i wok long kamap olsem hel i makim wanpela ples we man nogut bai stap wanpis, dispela i givim tingting long yumi olsem hel i no ples hat olsem ol man i bin tingim.”
Nius La Civiltà Cattolica bilong ol Jesuit i tok: “I no stret . . . long ting God bai mekim wok long ol spirit nogut bilong givim pen long ol man nogut long rot bilong paia samting.” Nius i tok moa olsem: “Hel i stap, tasol em i no makim wanpela ples, nogat, em i makim i stap bilong wanpela man i pilim pen, long wanem, em i no gat rot long go klostu long God.” Long 1999, Pop John Paul Namba 2 i tok: “Hel i no makim wanpela ples, em i makim i stap bilong ol man husat i bihainim laik bilong ol yet na ol i surik olgeta long God, em as bilong laip na pasin bilong amamas.” Pop i stori long ol piksa i makim hel olsem ples paia na tok: “Dispela i makim bel kros na laip i no gat as bilong en, long wanem, man i lusim pinis God.” Sapos pop i bin tok hel em i wanpela ples i gat “paia i stap na Satan i pasim retpela klos na holim wanpela traipela fok,” saveman bilong lotu Kristen bilong bipo, em Martin Marty, em i tok: “ol manmeri bai no bilipim dispela tok.”
Kain senis olsem i wok long kamap long ol narapela lotu tu. Wanpela lain bilong Sios Bilong Inglan i tok: “Hel i no makim pasin bilong karim pen inap oltaim oltaim, nogat, em i makim pasin bilong strong olgeta long bihainim rot i birua olgeta long laik bilong God, wanpela samting tasol inap painim kain man olsem, em pasin bilong pinis olgeta na i no inap stap moa long wanpela hap.”
Wanpela buk bilong Lotu Episkopal Bilong Amerika i tok hel em i “dai i holimpas man inap oltaim oltaim, long wanem, man i givim baksait long God.” Nius U.S.News & World Report i tok olsem planti man moa i wok long kamapim tingting olsem “pinis bilong ol man nogut em bagarap tasol, i no bilong karim pen oltaim oltaim. . . . [Ol] i ting ol man husat i strong pinis long givim baksait long God, God bai pinisim tasol laip bilong ol long ‘paia’ bilong hel.”
Maski pasin bilong sakim bilip long helpaia i go bikpela long nau, i gat planti man i bilip yet olsem hel em i wanpela ples tru tru we ol man bai kisim pen. Albert Mohler, bilong wanpela bikpela skul bilong lotu (Southern Baptist Theological Seminary) long Louisville, Kentucky, U.S.A., i tok: “Baibel i kamapim klia olsem hel em i wanpela ples tru we paia i givim pen long man.” Na wanpela ripot (The Nature of Hell) bilong lain Evanjelikal i tok: “Hel i makim samting tru tru man i pilim na save long en, olsem God i sakim dispela man na em i karim pen.” Ripot i tok moa: “I gat mak bilong ol strafe na pen man bai kisim long hel, em bai kisim ol strafe i stret long ol rong em i bin mekim taim em i stap long graun.”
Olsem na yumi laik tingim dispela askim gen: Hel em i wanpela ples paia we man i kisim pen oltaim o em i makim olsem man i pinis olgeta na i no stap moa? O em i makim i stap bilong wanpela man i no gat rot long go klostu long God? Hel i makim wanem samting tru tru?
[Blok/Ol Piksa long pes 4]
Sotpela Stori Long Helpaia
OL MAN i tok ol i Kristen, ol i bin kisim dispela bilip long helpaia long wanem taim? Em longpela taim bihain long taim bilong Jisas Krais na ol aposel. Wanpela buk (French Encyclopædia Universalis) i tok: “Buk Apocalypse of Peter (ol i raitim 100 yia samting bihain long Krais), em i namba wan buk ol Kristen i kamapim i stori long ol strafe na pen ol sinman i stap long hel bai kisim [spirit holi bilong God i no bin kirapim ol long raitim].”
Tasol ol bikpela tisa bilong lotu Kristen long bipo, ol i no wanbel long hel i makim wanem samting. Justin Martyr, Clement bilong Alexandria, Tertullian, na Cyprian ol i bin bilip olsem hel em i wanpela ples paia. Origen na Gregory bilong Nyssa ol i ting hel em i makim olsem man i no gat rot long go klostu long God—em i pilim pen long samting bilong spirit. Tasol Augustine bilong Hipo, i bin ting pen man i kisim long hel em long samting bilong spirit na long skin tu—em wanpela tingting i bin kamap bikpela. Profesa J.N.D. Kelly i tok: “I kam inap long taim bilong 400 C.E. na i go, klostu olgeta man i bilip olsem ol man bilong mekim sin bai i no gat rot long tanim bel bihain long taim ol i dai, na dispela paia bilong kukim ol bai stap oltaim.”
Long yia 1500 samting, sampela man bilong lotu Talatala olsem Martin Luther na John Calvin, ol i tingim paia bilong hel i olsem tok piksa i makim pasin bilong stap longwe long God inap oltaim oltaim. Tasol planti yia bihain, dispela tingting olsem hel em i wanpela ples bilong kisim pen i kamap gen. Pasto Jonathan Edwards bilong lotu Talatala i bin pretim tru ol man bilong Amerika long yia 1700 samting taim em i kamapim kain kain stori nogut bilong hel.
Tasol i no longtaim bihain na dispela tingting olsem hel em i ples paia i wok long pinis. Nius U.S.News & World Report i tok: “Long yia 1900 i go inap long yia 2000, bilip bilong hel olsem wanpela ples paia i laik lus olgeta.”
[Ol Piksa]
Justin Martyr i bin bilip olsem hel em i wanpela ples paia
Augustine bilong Hipo i skulim ol narapela olsem pen man i kisim long hel i makim samting bilong spirit na long skin tu