Stori Bilong Wanpela Man

Mipela Bin Stap Gut Long Wok Bilong Mipela

STORI BILONG HERMANN BRUDER

I gat tupela samting mi ken mekim: bai mi wok faipela yia wantaim wanpela lain ami (French Foreign Legion) o go kalabus long Moroko. Mi laik stori long olsem wanem mi kisim dispela hevi.

MAMA i karim mi long Oppenau, Jemani, long 1911, tripela yia paslain long Namba Wan Pait Bilong Olgeta Hap i kirap. Papamama bilong mi, Joseph na Frida Bruder, tupela i gat 17 pikinini. Mi namba 13 pikinini bilong ol.

Mi inap tingim taim mi stap yangpela yet na mi lukim wanpela lain ami bilong pilaim musik ol i mats i go daun long wanpela bikrot long ples bilong mi. Mi laikim krai bilong ol dispela musik bilong mats, olsem na mi bihainim ol lain bilong wokim musik i go long ples bilong kisim tren, na mi kamap long taim stret bilong lukim Papa na ol narapela man em ol i pasim klos bilong ami na ol i kalap long tren. Taim tren i lusim ples na i go, sampela meri i sindaun long dua bilong tren na krai. Bihain liklik, pris bilong mipela i mekim wanpela longpela tok long haus lotu, na em i kolim nem bilong fopela man em ol i bin dai long pait bilong helpim kantri. Na em i tok: “Nau ol i stap long heven.” Wanpela meri i sanap klostu long mi em i airaun na em i pundaun.

Taim papa i stap long pait long hap bilong Rasia em i kisim sik taifoit. Em i kam bek long haus na skin bilong em i no gat strong na kwiktaim ol i putim em long haus sik. Pris i tokim mi olsem: “Yu go long haus lotu i stap arere long ples matmat, na yu mas kolim Beten Bilong Bikpela 50 taim na Beten Bilong Maria 50 taim. Na bai papa bilong yu i kamap orait.” Mi mekim olsem em i tok, tasol long de bihain Papa i dai. Maski mi liklik mangi, samting pait i kamapim i mekim mi bel hevi tru.

Mi Painim Tok i Tru

I hatwok long painim wok long Jemani, namel long taim bilong tupela bikpela pait. Taim mi lusim skul long 1928, mi painim wanpela wok olsem man bilong lukautim gaden long Basel, Swiselan.

Olsem Papa, mi wanpela strongpela Katolik. Laik bilong mi em olsem, mi laik mekim wok misin olsem wanpela bruda Kepyasin long India. Liklik brata bilong mi i bin kamap wanpela Witnes Bilong Jehova pinis na taim em i harim tok long ol samting mi tingting long mekim, em i kam long Swiselan long traim senisim tingting bilong mi. Em i tokim mi long ol hevi bai kamap sapos mi bilip long ol man, moa yet sapos em ol pris pasto, na em i kirapim mi long ritim Baibel na bilip long en tasol. Maski mi tingting planti, mi kisim wanpela Baibel Nupela Testamen na mi kirap ritim. Isi isi mi kisim save olsem planti bilip bilong mi i no wanbel wantaim tok Baibel i skulim ol man long en.

Long wanpela Sande long yia 1933, taim mi stap long haus bilong Richard long Jemani, em i tokim mi long sekanim tupela marit em ol i Witnes Bilong Jehova. Taim ol i kisim save olsem mi wok long ritim Baibel, ol i givim mi wanpela buklet nem bilong en The Crisis.a Mi ritim dispela buklet i go inap klostu long biknait na mi lusim. Mi bilip tru olsem mi painim tok i tru!

Ol Witnes Bilong Jehova long Basel i givim mi tupela buk Studies in the Scripturesb wantaim ol magasin na sampela narapela buk. Mi amamas long ol samting mi ritim, olsem na mi askim pris long rausim nem bilong mi long buk bilong lotu. Pris i kros nogut tru na em i tokim mi olsem mi stap long rot bilong lusim bilip. Tasol tru tru mi no lusim bilip bilong mi. Em namba wan taim long laip bilong mi, mi wok long kisim save long trupela bilip.

Ol brata long Basel i tingting long autim tok long hapsait bilong boda long hap bilong Frans long dispela wiken. Long gutpela pasin, wanpela brata i tokim mi olsem ol i no singautim mi long go wantaim ol, long wanem, mi kirap nau tasol long bung wantaim kongrigesen. Maski i olsem, mi kamapim olsem mi gat strongpela laik long kirap autim tok. Orait bihain long brata hia i kisim tingting long narapela elda, em i makim wanpela teritori long Swiselan bilong mi ken autim tok. Long Sande moning tru, mi kalap long baiskol bilong mi na mi go long wanpela liklik ples klostu long Basel. Mi gat 4-pela buk, 28 magasin, na 20 buklet long bek bilong mi. Planti manmeri bilong dispela ples i stap long haus lotu long taim mi bin kamap. Tasol i kam inap long 11 klok, olgeta buk na nius samting bilong mi i pinis.

Taim mi tokim ol brata olsem mi laik kisim baptais, ol i toktok gut wantaim mi na ol i givim ol kain kain askim long mi long ol samting bilong tok i tru. Mi pilim tru pasin bilong ol long givim bel na stap gut long Jehova na oganaisesen bilong em. Em taim bilong kol, olsem na wanpela brata i baptaisim mi long rum waswas long haus bilong wanpela elda. Mi inap tingim yet bikpela amamas na strong mi bin kisim long taim mi bin baptais. Em long 1934.

Wok Long Kingdom Fam

Long 1936, mi harim olsem ol Witnes Bilong Jehova i bin baim wanpela hap graun long Swiselan. Mi laik mekim wok long save bilong mi long wok gaden na mi kamapim dispela long ol. Mi amamas taim ol i singautim mi long wok long Kingdom Fam long Steffisburg, em i stap longwe long Bern inap olsem 30 kilomita. Taim rot i op mi bin helpim ol narapela long mekim wok bilong ol long fam. Betel i skulim mi olsem em bikpela samting long man i gat pasin bilong wok gut wantaim ol narapela.

Wanpela gutpela samting i kamap long ol yia mi bin stap long Betel em long taim Brata Rutherford i kam lukim fam long 1936. Taim em i lukim bikpela bilong ol tomato, na ol narapela kaikai i kamap gut, pes bilong em i lait na em i kamapim olsem em i amamas. Em wanpela gutpela brata!

Mi bin wok long fam winim 3-pela yia tasol na wanpela pas i kam long hetkota bilong ol Witnes Bilong Jehova long Amerika, na ol i ritim dispela pas long taim bilong kaikai long moning. Dispela pas i kamapim olsem taim i sot pinis bilong mekim wok autim tok na ol i singaut long ol lain em ol i gat laik long autim tok long ol narapela ples olsem painia. Kwiktaim mi volantia long mekim dispela wok. Long Me 1939, mi kisim toksave long ples bai mi go long en​​—⁠em Brasil!

Long dispela taim, mi go long ol miting long Kongrigesen Thun, em i stap klostu long Kingdom Fam. Long olgeta Sande, mipela olsem wanpela grup i save go long ol maunten Alp bilong autim tok, em olsem tupela aua taim mipela i go long baiskol. Margaritha Steiner em wanpela bilong dispela grup. Wanpela tingting i kamap long mi olsem: Taim Jisas i salim ol disaipel bilong em i go autim tok, em i salim ol i go tupela tupela. Taim mi tokim Margaritha olsem ol i bin makim mi long go long Brasil bilong mekim wok, em i kamapim laik bilong em olsem em tu i laik mekim wok long ol hap i sot long ol man bilong autim tok. Mitupela i marit long Julai 31, 1939.

Samting Mipela i No Tingim i Kamap

Long pinis bilong mun Ogas long 1939, mipela i kalap long sip na lusim Le Havre, Frans, na mipela i laik go long Santos, Brasil. Long sip, ol man i bin kisim pinis olgeta ples slip bilong tupela man long slip long en, olsem na mitupela i slip long ol narapela narapela rum slip. Taim mipela stap yet long sip, mipela i harim nius olsem Briten na Frans i tokaut long ol bai pait wantaim Jemani. Inap olsem 30 pasindia bilong Jemani i kirap mekim singsing bilong litimapim kantri. Dispela i mekim na kepten i kros na em i senisim ples em bai go long en na em i go long Safi, Moroko. Ol pasindia i gat ol pepa bilong raun ol i kisim long Jemani ol i gat faipela minit long lusim sip. Mipela tu i insait long dispela lain.

Mipela kalabus inap wanpela de long polis-stesin na bihain ol i tokim mipela long kalap long wanpela olpela bas em mipela i pas pas insait long en. Ol i kisim mipela i go long wanpela haus kalabus long Marrakech, em i stap longwe inap 140 kilomita. Taim nogut i kamap. Insait long ol sel bilong mipela, mipela i pas pas na stap long tudak. Na i gat wanpela toilet tasol bilong mipela olgeta na em wanpela hul long plua, na planti taim em i blok. Ol i givim mipela olgeta wan wan wanpela dotipela bek long slip antap long en, na long nait, ol rat i kaikaim lek bilong mipela. Ol i givim kaikai long mipela tupela taim long wanpela de long wanpela tin i ros pinis.

Wanpela ofisa bilong ami i tokim mi olsem ol bai larim mi long lusim kalabus sapos mi wanbel long wok faipela yia wantaim wanpela lain ami (French Foreign Legion). Mi no laik mekim, olsem na ol i tromoi mi long wanpela hul i tudak na i daun moa na mi stap long dispela hap inap 24 aua. Long dispela taim, mi wok long beten.

Bihain long 8-pela de, ol bikman bilong kalabus i larim mi long lukim Margaritha gen. Em i kamap bun nating, na em i krai nogut tru. Mi bin mekim ol samting mi inap mekim bilong strongim em. Ol i givim sampela askim long mipela na bihain ol i salim mipela long tren i go long Casablanca, na long dispela hap ol i larim Margaritha i lusim kalabus. Ol i salim mi i go long wanpela ples kalabus long Port Lyautey (nau em Kenitra), em i stap longwe inap 180 kilomita. Majistret bilong Swiselan i tokim Margaritha long go bek long Swiselan, tasol em i no laik lusim mi na em wanpela i go. Inap long dispela tupela mun mi stap yet long Port Lyautey, em i save lusim Casablanca long olgeta de na i kam lukim mi na kisim kaikai i kam long mi.

Wanpela yia paslain, ol Witnes Bilong Jehova i bin kamapim wanpela buk nem bilong en Kreuzzug gegen das Christentum (Pait Long Lotu Kristen) ol i mekim bilong ol man i ken save olsem ol Witnes i no insait long ol wok samting bilong gavman Natsi. Taim mi stap yet long kalabus, brens-ofis bilong ol Witnes Bilong Jehova long Bern i raitim pas i go long ol bikman bilong Frans, na long pas ol i putim dispela buk wantaim long soim ol olsem mipela i no bilong lain Natsi. Margaritha tu i mekim gutpela wok long go lukim ol hetman bilong gavman na tokim ol olsem mipela i no gat asua. Long pinis bilong 1939, mipela i kisim tok orait long lusim Moroko.

Mipela stap pinis long sip i go long Brasil taim mipela i kisim save olsem i gat ol sabmarin bilong Jemani i was i stap long ol hap em sip i save ron long en long biksolwara Atlantik, na sip mipela i stap long en i namba wan kain sip ol i wok long painim. Sip mipela i kalap long en em Jamaique na em i wanpela kago sip, tasol em i gat ol gan long poret na baksait bilong en. Long san, kepten bilong sip i stiaim sip i go long sait sait na oltaim em wok long pairapim ol bikpela gan bilong sip. Na long nait mipela i pasim olgeta lait bai ol Jemani i no ken luksave long mipela. Bel bilong mipela i stap isi taim mipela i kamap long pasis bilong Santos, Brasil, em long Februeri 6, 1940, winim faipela mun bihain long mipela i lusim Yurop!

Go Bek Gen Long Kalabus

Namba wan asainmen bilong mipela long autim tok em long Montenegro, em wanpela taun i stap long wanpela provins long hap saut bilong Brasil em Rio Grande do Sul. I luk olsem ol bikman bilong lotu i bin kisim toksave olsem mipela bai kam. Olsem na bihain long mipela i autim tok inap tupela aua tasol, ol polis i kam na i kisim mipela na ol i kisim masin pikap bilong pilaim ol tok bilong Baibel long en wantaim olgeta buk na magasin samting, na ol i kisim tu bek bilong autim tok em ol i wokim long skin bilong kamel em mipela i bin baim long Moroko. Wanpela pris wantaim wanpela hetman bilong lotu em i save tok Jemani i wetim mipela long polis stesin. Tupela i putim yau taim bikman bilong ol polis i pilaim wanpela tok bilong Brata Rutherford long dispela masin pikap em ol i bin kisim long mipela. Brata Rutherford i tokaut stret. Taim em i stori long Vatiken, dispela pris i kros na pes bilong em i ret olgeta na em i lusim mipela na i go.

Bisop bilong Santa Maria i askim polis long salim mipela i go long Pôrto Alegre, em nambawan biktaun bilong provins. I no long taim na ol i larim Margaritha i go fri, na em i laik kisim helpim long majistret bilong Swiselan. Dispela majistret i tokim em olsem em i mas go bek long Swiselan. Long dispela taim gen, em i no laik lusim mi. Long olgeta taim Margaritha em wanpela poroman i stap gut long mi. Bihain long 30 de, ol i givim kain kain askim long mi na bihain ol i lusim mi. Polis i tokim mipela long tupela samting mipela inap mekim: lusim biktaun insait long tenpela de o “kisim hevi.” Mipela bihainim tok bilong ol brata long Hetkota na mipela i go long Rio de Janeiro.

“Plis Ritim Dispela Kat”

Maski kirap bilong wok autim tok bilong mipela long Brasil i gat ol hevi, mipela i amamas! Mipela i stap laip yet, bek bilong mipela i pulap gen long ol buk na nius samting, na mipela i gat ples olgeta bilong Rio de Janeiro long autim tok long en. Tasol mipela i gat liklik save tasol long tok ples Potugal, olsem wanem bai mipela i autim tok long ol man? Mipela i mekim wok long wanpela kat bilong helpim ol man long autim tok. “Por favor, leia este cartão” (“Plis ritim dispela kat”) em namba wan tok ples bilong Potugal mipela i lainim bilong mekim wok long en long autim tok. Dispela kat i mekim gutpela wok tru! Insait long wanpela mun tasol, mitupela tilim winim 1,000 buk. Planti ol man i bin kisim ol buk na nius samting bilong Baibel i bin kisim tok i tru long bihain. Mi mas tok tru olsem ol buk samting bilong mipela i mekim bikpela wok witnes winim ol samting mipela inap mekim. Dispela i givim tingting long mi olsem em bikpela samting long givim ol buk samting long ol man i laikim.

Long dispela taim Rio de Janeiro em i nambawan biktaun bilong Brasil, na long ol haus bilong gavman, ol man i amamas moa long harim tok mipela i autim. Rot i op long mi inap autim tok long minista bilong fainens na long minista bilong ami. Taim ol dispela samting i bin kamap, mi lukim tru spirit bilong Jehova i mekim wok.

Wanpela taim mi autim tok long wanpela ples bung namel long biktaun Rio na mi go insait long bikpela Haus Bilong Jas. Mi wokabaut raun liklik na mi luksave olsem mi stap insait long wanpela rum em olgeta man i pasim klos i blak, kain olsem ol i mekim bung bilong planim man i dai pinis. Mi go bungim man em i luk narapela kain long olgeta, na mi givim em dispela kat bilong mi long autim tok. Em i no wanpela bung bilong planim man i dai pinis, nogat. Mi bin pasim wok bilong wanpela kot, na mi wok long toktok wantaim jas. Em i lap, na i meknaisim han bilong em long ol gad bilong tokim ol long stap isi. Em i amamas long kisim buk Childrenc na em i givim kontribiusen. Taim mi laik go ausait, wanpela bilong ol gad i soim mi wanpela strongpela toksave i stap long dua Proibida a entrada de pessoas estranhas (Ol Man Nating i No Ken Kam Insait).

Narapela hap mipela i bin autim tok long en na i bin karim gutpela kaikai em pasis bilong sip. Wanpela taim, mi bungim wanpela boskru bilong sip na paslain long em i raun gen long solwara em i kisim ol buk. Bihain mipela i bungim em long kibung. Famili olgeta bilong em i bin kisim tok i tru, na em yet i wok long kamap strong. Dispela i mekim mipela i amamas tru.

Tasol i no olsem mipela i no gat wanpela hevi i kamap. Visa bilong mipela i bilong i stap inap 6-pela mun em i pinis, na i luk olsem gavman bai tokim mipela long lusim ples. Bihain long mipela i raitim pas i go long hetkota long dispela samting, mipela i kisim wanpela gutpela pas i kam long Brata Rutherford, em i strongim mipela long stap strong na em i tokim mipela long wanem samting mipela i ken mekim. Mipela i laik i stap long Brasil, helpim mipela i kisim long wanpela loya i mekim na long 1945 mipela i kisim visa bilong i stap olgeta.

Wanpela Wok Bilong i Stap Longtaim

Paslain long dispela, pikinini bilong mipela Jonathan i kamap long 1941, na Ruth i kamap long 1943, na Esther long 1945. Bilong lukautim famili long ol samting ol i mas i gat, mi mas painim wok skin. Margaritha i mekim yet wok autim tok fultaim i go inap long taim em i karim namba tri pikinini bilong mipela.

Oltaim mipela i bin wok olsem wanpela famili na autim tok long ples bung bilong ol taun, long ples bilong kisim tren, long ol rot, na long ol ples bisnis. Long Sarere nait, mipela i wok wantaim long tilim Wastaua na Kirap!, em ol taim bilong amamas.

Long haus, olgeta wan wan pikinini i gat wok long mekim long olgeta de. Jonathan i gat wok long klinim stov na haus kuk. Ol pikinini meri i klinim bokis ais, brumim arere long haus, na polisim ol su bilong mipela. Dispela i helpim ol long lain long stretim gut ol samting bilong ol yet na kisim pasin bilong mekim wok long tingting bilong ol yet. Long nau, ol pikinini bilong mipela i save givim bel long wok na ol i save lukautim gut haus bilong ol na ol samting bilong ol, dispela i mekim mi na Margaritha i amamas tru.

Mipela i bin skulim ol pikinini bilong mipela long bihainim gutpela pasin long taim bilong miting. Olsem na paslain long miting i kirap, ol i dring wanpela kap wara na ol i yusim toilet. Long taim bilong miting, Jonathan i sindaun long han kais bilong mi, na Ruth i sindaun long han sut bilong mi, na Margaritha i sindaun namel long em na Esther. Dispela i helpim ol long putim gut yau na kisim ol kaikai bilong spirit long taim ol i liklik yet.

Jehova i bin blesim ol dispela hatwok bilong mipela. Olgeta pikinini bilong mipela i mekim yet wok bilong Jehova na ol i amamas long insait long wok autim tok. Long nau Jonathan i mekim wok elda long Kongrigesen Novo Méier, long Rio de Janeiro.

Long 1970, olgeta pikinini bilong mipela i marit pinis na ol i no stap moa long haus. Olsem na mi na Margaritha i pasim tok long go long hap i no gat planti man bilong autim tok. Namba wan hap mipela i go long en em Poços de Caldas, long provins Minas Gerais, long dispela taim i gat wanpela liklik grup i gat 19 pablisa tasol bilong Kingdom. Mi bel hevi tru long namba wan taim mi lukim ples ol i save holim miting long en​​—⁠wanpela rum i nogat ol windo, na i gat bikpela wok long stretim gut ol samting. Kwiktaim, mipela i kirap painim wanpela gutpela haus bilong mekim wok long en olsem Haus Kingdom na i no longtaim na mipela i painim wanpela gutpela haus i stap long gutpela hap. Bikpela senis i kamap! Bihain long fopela yia na hap, namba bilong pablisa i go antap inap 155. Long 1989 mipela i go long Araruama long Rio de Janeiro, na mipela i mekim wok inap 9-pela yia. Long dispela taim mipela i stap na lukim tupela nupela kongrigesen i kamap.

Kisim Blesing Long Pasin Bilong Stap Gut Long Wok Bilong Mipela

Long 1988, hevi bilong sik na laik bilong i stap klostu long ol pikinini i kirapim mipela long go stap long São Gonçalo, Rio de Janeiro. Mi mekim yet wok elda long dispela kongrigesen. Mipela i traim long mekim wok autim tok long olgeta mun. Margaritha i save amamas long autim tok long ol manmeri long wanpela bikpela stua i stap klostu, na kongrigesen tu i mekim gutpela pasin na i makim sampela teritori i stap klostu long haus bilong mipela, dispela i mekim na mipela i no hatwok long autim tok inap long strong bilong skin bilong mipela.

Winim 60 yia, mi na Margaritha i bin stap ol wokman bilong Jehova i dediket pinis. Mitupela yet i kisim save olsem “ol het bilong graun, o samting nau i stap o samting bai i kamap bihain, o kain kain strong, o samting bilong antap, o samting bilong daunbilo, o sampela arapela samting i stap nabaut, dispela olgeta i no inap long tekewe yumi long sori bilong God. Dispela sori yumi kisim long Krais Jisas, Bikpela bilong yumi.” (Rom 8:​38, 39, Nupela Testamen na Ol Sam) Mipela i bin amamas tru long lukim wok bilong bungim ol “arapela sipsip” i karim kaikai. Ol dispela sipsip i gat tingting long kisim laip oltaim long graun i gutpela olgeta we ol samting God i wokim i naispela tru bai stap! (Jon 10:16) Taim mipela i kam long Rio de Janeiro long 1940, i bin i gat wanpela kongrigesen tasol na 28 pablisa. Long nau i gat 250 kongrigesen na i winim 20,000 ol pablisa bilong Kingdom.

I gat ol sampela samting i bin mekim na mipela inap go bek long ol famili bilong mipela long Yurop. Tasol wok Jehova i givim mipela em hia long Brasil. Mipela i amamas tru olsem mipela i bin stap gut long dispela wok!

[Ol Futnot]

[Piksa long pes 21]

Long Kingdom Fam i stap long Steffisburg, Swiselan, long 1938 samting (Mi stap arere tru long han kais)

[Piksa long pes 23]

Long 1939, paslain liklik long mitupela i marit

[Piksa long pes 23]

Long Casablanca long 1940 samting

[Piksa long pes 23]

Autim tok olsem wanpela famili

[Piksa long pes 24]

Insait long wok autim tok long nau