Olsem Wanem Jehova i Ken Orait Long Ol Samting Yumi Mekim Long Olgeta De?
“Tupela gutpela aua tru, em tupela wantaim i gat 60 gutpela minit tru long en, tupela i lus nating long asde, namel long taim san i kam antap na long taim san i go daun. I no gat wanpela pe mi ken givim bilong kisim bek dispela tupela aua i lus, long wanem, ol i lus olgeta.”—Lydia H. Sigourney, bilong Amerika, em i save raitim ol buk (1791-1865).
I STAP bilong yumi ol man i sotpela na ol de bilong en i wok long pinis hariap. Devit i tingim i stap bilong ol man i sotpela tru na em i beten olsem: “Bikpela, hamas yia i stap yet long laip bilong mi? Wanem taim bai mi dai? Ating laip bilong mi em bai i sotpela tasol? Yu mas toksave long mi. . . . Long ai bilong yu dispela taim bilong mi em i samting nating.” Devit i laik bai toktok bilong em na ol samting em i mekim long i stap bilong em i amamasim Jehova. Devit i wet long God i helpim em, na em i tok: “Mi bilip long yu na wetim yu tasol i helpim mi.” (Song 39:4, 5, 7) Jehova i harim beten bilong Devit. Na tru tumas, em i skelim ol samting Devit i bin mekim na em i givim pe long Devit i stret long dispela.
Long olgeta de yumi bisi na i no hatwok long bihainim pasin bilong ol man long hariap hariap long mekim ol samting na mekim ol kain kain wok. Dispela inap mekim na yumi tingting planti, long wanem, i gat planti samting yumi mas mekim na kisim save long en na i gat sotpela taim tasol bilong mekim ol dispela samting. Olsem wanem? Yumi gat wankain tingting olsem bilong Devit, olsem yumi laik bai God i orait long ol samting yumi mekim? Tru tumas, Jehova i save lukim na skelim yumi wan wan. Inap 3,600 yia i go pinis, Jop, em wanpela man i save pret long God, em i save olsem God i save lukim olgeta pasin bilong em na em i save skelim olgeta samting em i mekim. Olsem na Jop i askim olsem: “Taim God i kam bilong kotim mi . . . , bai mi bekim wanem tok long em?” (Jop 31:4-6, 14) Yumi inap mekim ol samting long olgeta de em Jehova i orait long en sapos yumi putim ol samting bilong spirit i stap nambawan, na bihainim ol lo bilong em, na mekim gutpela wok long taim bilong yumi. Orait nau yumi ken skelim gut ol dispela samting.
Putim Ol Samting Bilong Spirit i Stap Nambawan
Baibel i laik kirapim yumi long putim ol samting bilong spirit i stap nambawan. Em i tok: “Yupela inap long skelim gut olgeta pasin na kisim ol pasin i gutpela tru.” Wanem ol dispela pasin i gutpela tru? Em ol ‘planti save, na tingting i kamap klia tru.’ (Filipai 1:9, 10) Bilong kisim save long ol samting Jehova i laik mekim, yumi mas mekim gutpela wok long taim bilong yumi. Tasol sapos yumi putim ol samting bilong spirit i stap nambawan, bai i stap bilong yumi i gutpela na yumi stap amamas.
Aposel Pol i tokim yumi long “trai long kisim save long ol pasin Bikpela i save laikim.” Bilong mekim olsem, yumi mas skelim ol tingting na laik i stap long bel bilong yumi yet. Aposel i tok moa: “Yupela i mas save gut long laik bilong Bikpela.” (Efesus 5:10, 17) Olsem na Jehova i laik bai man i kisim wanem kain save? Wanpela savetok bilong Baibel i tok: “Nambawan samting yu mas kisim, em i gutpela tingting. Tru, yu ken kisim planti arapela samting, tasol gutpela tingting em i nambawan tru. Yu mas laikim gutpela tingting na holim strong, na em bai i givim biknem long yu.” (Sindaun 4:7, 8) Jehova i save amamas taim wanpela man i kisim na bihainim gutpela tingting na save i kam long God. (Sindaun 23:15) Gutpela tingting na save i gutpela samting tru, long wanem, i no gat man inap rausim long yu na em i no inap bagarap. Em bai was na lukautim yu na bai yu abrusim “ol man i save mekim pasin nogut na i save mekim tok i no stret.”—Sindaun 2:10-15.
Olsem na em i gutpela tingting long sakim pasin bilong ting ol samting bilong spirit i no bikpela samting! Yumi mas kisim pasin bilong amamas long ol tok bilong Jehova na yumi mas pret long em. (Sindaun 23:17, 18) Tru, yumi ken kisim dispela kain tingting long taim yumi bikpela pinis o taim yumi lapun, tasol em i gutpela moa sapos yumi kisim na putim ol stiatok bilong Baibel long tingting na bel bilong yumi taim yumi yangpela yet. Saveman King Solomon i tok: “God i bin wokim yumi olgeta. Olsem na long taim yupela i yangpela yet, yupela i mas tingim em.”—Saveman 12:1.
Nambawan rot bilong pilim tru ol tok bilong Jehova, em long rot bilong beten long em long olgeta de. Devit i luksave olsem em i bikpela samting long kamapim hevi bilong em long Jehova, olsem na em i tok: “Bikpela, harim prea bilong mi. Putim gut yau long singaut bilong mi. Yu no ken pasim yau long taim mi singaut long yu.” (Song 39:12) Olsem wanem? Pasin bilong yumi long pas gut wantaim God, sampela taim dispela i save mekim na yumi pilim tru na yumi laik krai? Tru tumas, sapos yumi pas gut wantaim Jehova na toktok wantaim em na tingim tingim long bel ol tok bilong em, em bai kam klostu tru long yumi.—Jems 4:8.
Lain Long Bihainim Tok
Moses, em tu i man bilong bilip, em i luksave olsem em i mas wetim God i helpim em. Olsem Devit, Moses i lukim olsem i stap bilong ol man i gat planti hevi long en. Olsem na em i tokim God long ‘soim em long pasin bilong kaunim ol de bilong em bambai em inap bihainim gutpela tingting.’ (Song 90:10-12, NW ) Bilong kisim gutpela tingting tru yumi mas lainim na bihainim ol lo na stiatok bilong Jehova. Moses i save long dispela, olsem na em i strong long putim dispela bikpela tok tru long bel bilong ol Israel na em i skulim ol gen long lo bilong God klostu long taim ol i laik kisim Graun Bilong Promis. Ol king Jehova bai makim bihain bilong bosim Israel ol i mas raitim ol tok bilong lo long wanpela buk bilong ol yet na ol i mas ritim long olgeta de ol i stap laip. Bilong wanem? Long dispela rot king bai lain long pret long God. Na dispela bai traim pasin bilong king long bihainim tok na i helpim em long abrusim pasin bilong litimapim nem bilong em yet na daunim ol arapela Israel, na em bai i stap king longpela taim. (Lo 17:18-20) Jehova i kolim gen dispela tok promis long pikinini bilong Devit, Solomon, na Em i tok: “Sapos yu wokabaut long ol gutpela rot mi bin makim bilong yu na yu bihainim ol lo na tok bilong mi, olsem papa bilong yu, Devit, i bin mekim, orait bai mi mekim yu i stap longpela taim long graun.”—1 King 3:10-14.
Pasin bilong bihainim tok em i bikpela samting long God. Sapos yumi mekim olsem sampela lo bilong Jehova i no bikpela samting, em bai lukim dispela pasin. (Sindaun 15:3) Yumi save long dispela samting na dispela i mas kirapim yumi long tingim olgeta lo bilong Jehova i bikpela samting, maski sampela taim i hatwok long mekim olsem. Satan i save mekim olgeta samting bilong ‘pasim yumi’ taim yumi strong long bihainim ol tok na lo bilong God.—1 Tesalonaika 2:18.
Em i bikpela samting long bihainim tok bilong Baibel long bung wantaim bilong mekim lotu na strongim ol narapela. (Lo 31:12, 13; Hibru 10:24, 25) Olsem na yumi mas askim yumi yet, ‘Mi save tingting strong na wok strong long mekim ol bikpela samting?’ Sapos yumi traim long kisim bikpela mani na yumi no i go bung wantaim ol narapela na kisim save long ol miting Kristen, dispela bai mekim na yumi no pas gut moa wantaim Jehova. Aposel Pol i tok: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ ” (Hibru 13:5) Sapos yumi bihainim ol lo bilong Jehova, dispela i kamapim klia yumi bilip olsem em bai lukautim yumi.
Jisas i lain long bihainim tok na em i kisim gutpela samting long en. Yumi tu i ken mekim olsem. (Hibru 5:8) Sapos yumi wok long kisim pasin bilong bihainim tok, bai yumi no hatwok long bihainim tok, na bai yumi mekim tu long ol liklik samting. Tru, yumi laik i stap gut long God, olsem na ol man bai mekim nogut long yumi. Na dispela bai kamap moa yet long ples wok, long skul, o long famili i no wanbel long lotu bilong yumi. Tasol tok Moses i givim long ol Israel inap mekim gut bel bilong yumi, em i tok, sapos ol i ‘laikim tru God na ol i harim tok bilong en na bel tru long em oltaim, ol inap i stap longpela taim.’ (Lo 30:20) Jehova i givim wankain tok promis long yumi tu.
Mekim Gutpela Wok Long Taim Bilong Yu
Sapos yumi mekim gutpela wok long taim bilong yumi, dispela bai helpim yumi long mekim ol samting long olgeta de em God i ken orait long en. Taim i no olsem mani em yu inap long bungim i stap, nogat; yu mas mekim wok long taim bilong yu, na sapos yu no mekim em bai lus nating. Olgeta aua i go pinis, ol i go olgeta. I gat planti samting bilong mekim na yumi no gat taim bilong mekim olgeta dispela samting. Orait olsem wanem? Yumi save mekim wok long taim bilong yumi i stret wantaim ol samting yumi gat tingting long mekim long i stap bilong yumi? Wanpela bikpela samting olgeta Kristen i mas tingting long mekim, em ol i mas insait long wok bilong autim tok bilong Kingdom na kamapim disaipel.—Matyu 24:14; 28:19, 20.
Yumi inap mekim gutpela wok long taim bilong yumi sapos yumi save em i bikpela samting. Olsem na Efesus 5:16 i tok, ‘yumi gat taim bilong mekim pasin bilong God, tasol nogut dispela taim i lus nating.’ Dispela i makim olsem yumi no ken lusim taim long ol samting i no bikpela samting. Yumi mas lusim sampela samting yumi save mekim na i pulim nating taim bilong yumi. Pasin bilong lusim bikpela hap taim long lukim TV o Intenet, o ritim ol buk nating, o lusim bikpela hap taim long painim ol amamas, ol dispela samting inap pinisim strong bilong yumi. Na tu, pasin bilong bungim bungim ol samting bilong skin inap pulim bikpela hap taim bilong yumi em yumi inap mekim wok long en bilong kisim gutpela tingting na save.
Ol man i helpim dispela tok olsem ol man i mas mekim gutpela wok long taim, ol i tok: “Em i hatwok long mekim gut wok long taim bilong yu sapos yu no putim sampela mak bilong winim.” Ol i kolim faipela samting bilong putim olsem mak: putim stret wanpela mak, yu inap long kaunim, yu inap long winim, yu mas i gat stretpela tingting long mak yu putim, na bihainim stret taim.
Wanpela mak yumi inap putim em long ritim Baibel. Namba wan samting em, yumi mas makim stret wanpela mak yumi laik winim—olsem ritim Baibel olgeta. Namba tu samting em yumi inap long kaunim. Taim yumi mekim olsem yumi inap save long wanem sapta yumi stap long en. Ol mak yumi putim i mas kirapim yumi long wok strong na kamap bikpela. Na yumi inap long winim na yumi mas i gat stretpela tingting long en. Yumi mas tingim tu save yumi gat, na ol samting yumi inap long mekim, na hamas aua bai yumi lusim. Long sampela, ol i mas i gat bikpela taim moa bilong winim ol mak ol i putim. Laspela samting em, yumi mas skelim hamas taim bai yumi lusim long winim dispela mak. Sapos yumi makim wanpela det bilong pinisim wanpela wok dispela bai kirapim yumi long winim dispela mak yumi putim.
Olgeta brata sista bilong famili Betel, em ol i stap long hetkota bilong ol Witnes Bilong Jehova o long ol narapela brens long olgeta hap, ol i gat wanpela mak ol i mas winim em bilong ritim Baibel olgeta long namba wan yia ol i stap long Betel. Ol i luksave olsem pasin bilong ritim Baibel i helpim ol long kamap strong long ol samting bilong spirit na long i go klostu moa long Jehova, na em i skulim ol long mekim ol samting bilong helpim ol yet. (Aisaia 48:17) Yumi tu inap long putim mak bilong ritim Baibel?
Ol Gutpela Samting Bai Kamap
Taim yumi putim ol samting bilong spirit i stap namba wan samting long i stap bilong yumi dispela bai kamapim planti gutpela samting. Em i helpim yumi long kisim bikpela amamas long ol samting yumi kisim na ol samting yumi tingting long mekim long i stap bilong yumi. Taim yumi toktok wantaim Jehova oltaim long rot bilong beten bai yumi go klostu long em. Pasin bilong beten i kamapim klia olsem yumi bilip long em. Taim yumi ritim Baibel na ol buk na nius em Baibel i as bilong en em ol “wokboi i gat gutpela tingting” i redim i kamapim klia olsem yumi gat laik long harim tok bilong God taim em i toktok long yumi. (Matyu 24:45-47) Dispela bai helpim yumi long kisim gutpela tingting na save na em bai helpim yumi long skelim stret ol samting yumi tingting long mekim na makim ol gutpela rot long i stap bilong yumi.—Song 1:1-3.
Yumi save amamas long bihainim ol lo bilong Jehova, na taim yumi mekim olsem dispela i no givim hevi long yumi. (1 Jon 5:3) Taim olgeta samting yumi mekim long olgeta de i givim biknem long Jehova, yumi strongim pasin bilong yumi long pas gut wantaim em. Na tu yumi inap long helpim tru ol wanbilip Kristen bilong yumi. Taim yumi mekim olsem dispela i save mekim Jehova God i amamas. (Sindaun 27:11) Na yumi bai amamas tru long save olsem Jehova i orait long yumi long dispela taim nau na i go inap oltaim oltaim bihain!
[Piksa long pes 21]
Ol Kristen i mas tingim ol samting bilong spirit i bikpela samting
[Ol Piksa long pes 22]
Yu mekim gutpela wok long taim bilong yu?
[Piksa long pes 23]
Yumi strongim pasin bilong yumi long pas gut wantaim Jehova taim olgeta samting yumi mekim long olgeta de i givim biknem long em