Kain Stadi i Save Inapim Yumi Long Mekim Wok Tisa

“Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru. Yu mas was gut long ol pasin bilong yu yet na long wok yu mekim bilong skulim ol manmeri.”​​—⁠1 TIMOTI 4:​15, 16.

 1. Yumi ken tok wanem long ol samting bilong taim na stadi?

BAIBEL long Saveman 3:1 i tok: “Olgeta samting . . . i save kamap long taim bilong em yet.” Dispela tok em i tru long stadi yumi yet i mekim. Planti ol i hatwok long tingim tingim ol samting bilong spirit sapos taim o ples i no stret long mekim olsem. Tingim: Sapos yu bin wok strong long san olgeta na long apinun yu kisim bikpela kaikai na nau yu sindaun long sia bilong malolo na lukim TV, bai yu gat laik long stadi? Ating nogat. Orait yumi mas mekim wanem? Yumi mas makim wanpela taim na ples i gutpela long mekim stadi na bai stadi i ken helpim tru yumi.

 2. Wanem taim em i gutpela taim tru long stadi?

² Planti ol i lukim olsem moningtaim tru em i gutpela taim bilong ol long stadi, taim tingting bilong ol i klia. Na sampela i mekim sotpela stadi long taim bilong malolo long belo. Lukim stori bilong tupela man daunbilo ol i bin kolim taim bilong ol long mekim ol bikpela samting bilong spirit. King Devit bilong Israel bipo i tok: “Long moningtaim yu ken mekim mi i tingting gen long bikpela sori bilong yu. Mi save prea long yu tasol. Olsem na yu mas soim rot long mi na mi ken bihainim.” (Song 143:⁠8) Profet Aisaia i kamapim wankain tingting taim em i tok: “God, Bikpela i bin skulim mi long gutpela pasin bilong toktok, olsem na mi inap mekim gutpela tok bilong strongim bel bilong ol manmeri i no gat strong. Olgeta moning em i save mekim mi i laikim tumas long harim ol nupela samting em i laik skulim mi long en.” Tupela skripsa hia i lainim yumi olsem: Yumi mas stadi na toktok wantaim Jehova long taim tingting bilong yumi i klia, maski em wanem taim bilong de.​​—⁠Aisaia 50:​4, 5; Song 5:3; 88:⁠13.

 3. Wanem ol samting bai helpim yumi long mekim gut stadi?

³ Narapela samting bilong helpim yumi long mekim gut stadi, i olsem: Taim yumi stadi, no ken sindaun long sia i gutpela tru bilong malolo long en. Dispela i no inap helpim tingting long wok gut. Taim yumi stadi, tingting bilong yumi i mas klia, olsem na nogut sia samting yumi sindaun long en i mekim na nau ai i hevi na yumi laik slip. Na tu, bilong helpim yumi long stadi gut na tingim tingim ol samting long bel, i mas i gat wanpela hap we i no gat pairap o samting bilong pulim tingting. Sapos yumi stadi taim redio o TV i op o ol pikinini i wok long i go i kam, bai yumi no kisim gutpela samting long stadi yumi mekim. Taim Jisas i laik tingim tingim ol samting long bel, em i save go long wanpela hap i no gat man. Na em i toktok long painim wanpela hap i no gat man taim yumi laik beten.​​—⁠Matyu 6:6; 14:13; Mak 6:​30-​32.

Kain Stadi i Save Inapim Yumi Long Bekim Tok

4, 5. Buklet Yumi Mas Mekim Wanem? inap helpim man olsem wanem?

⁴ Yumi amamas long stadi taim yumi mekim wok long kain kain buk na nius bilong Baibel bilong helpim yumi long kisim sampela save moa, na long bekim ol askim bilong man i gat gutpela bel. (1 Timoti 1:4; 2 Timoti 2:​23) Planti nupela man i save stadi pastaim long buklet God i Laik Yumi Mas Mekim Wanem?,a em yumi inap kisim long 261 tok ples. Em i kamapim stret ol tok na i no hatwok long kisim gut na Baibel i as bilong olgeta tok bilong en. Em i helpim ol man long save kwik long ol samting ol i mas mekim na bai ol i ken lotu tru long God. Tasol em buklet tasol, olsem na i no gat spes long kamapim olgeta liklik liklik tok bilong ol samting ol wan wan stadi i stori long en. Sapos sumatin yu stadi wantaim em long Baibel em i kamapim sampela askim em i gat laik tru long save long bekim bilong en, orait yu ken mekim wanem bilong kisim sampela save moa long Baibel bilong bekim ol dispela askim?

⁵ Ol man i gat Watchtower Library long CD-ROM i stap long tok ples bilong ol, ol i no hatwok long painim tok bilong planti kain samting long kompiuta. Tasol olsem wanem long ol man i no gat kompiuta na dispela CD-ROM? Orait nau bai yumi skelim tupela tok em buklet Yumi mas Mekim Wanem? i stori long en, bambai yumi ken save long rot bilong kisim sampela save moa na bilong bekim gut ol askim ol man i kamapim​—⁠olsem God em i husat? na Jisas i wanem kain man?​​—⁠Kisim Bek 5:2; Luk 9:​18-​20; 1 Pita 3:​15.

God Em i Husat?

6, 7. (a) Wanem askim i kamap long God? (b) Taim wanpela pasto i mekim wanpela tok, em i lus long kamapim wanem bikpela samting?

⁶ Stadi 2 long buklet Yumi Mas Mekim Wanem? i bekim dispela bikpela askim, God em i husat? Dispela em wanpela bikpela samting yumi mas save long en, long wanem, man i no inap lotuim trupela God sapos em i no save long Em o em i no bilip tumas olsem Em i stap. (Rom 1:​19, 20; Hibru 11:⁠6) Tasol ol man long olgeta hap bilong graun i gat kain kain tingting long God em i husat. (1 Korin 8:​4-6) Olgeta kain kain lotu ol i gat narapela narapela tingting long God em i husat. Planti lotu bilong Kristendom ol i bilip olsem God em i God Triwan. Wanpela pasto long Amerika em i gat nem, em i mekim wanpela tok, nem bilong en “Yu Save Long God?,” tasol i no gat wanpela taim em i kamapim nem bilong God, maski planti taim liklik em i kamapim ol tok bilong Ol Skripsa Hibru. Em i mekim wok long wanpela Baibel i kamapim dispela tok “Bikpela,” na Jehova o Yawe nogat. Tasol dispela tok “Bikpela” i no makim stret wanpela man na i no nem tru bilong God.

⁷ Dispela pasto i lus long kamapim wanpela bikpela samting taim em i ritim Jeremaia 31:​33, 34: “Mi Bikpela [tok Hibru, Jehova], mi tok stret, long dispela taim ol man bai i no ken skulim ol wantok na brata bilong ol na tok olsem, ‘Yupela i mas save long Bikpela’ [tok Hibru, “Save long Jehova”]. Nogat. Olgeta bai i save pinis long mi, maski ol i man nating o ol i gat biknem. Long wanem, bai mi lusim sin bilong ol na mi no ken tingim moa.” Baibel em i mekim wok long en i no kolim nem tru bilong God, Jehova.​​—⁠Song 103:​1, 2, NW.

 8. Wanem skripsa i kamapim klia olsem yumi mas kamapim nem bilong God?

⁸ Song 8:9 i kamapim klia olsem i gat wanem as na i bikpela samting long kamapim nem bilong Jehova. “O Yawe [“Jehova,” NW ], yu Bikpela bilong mipela. Long olgeta graun nem bilong yu i stap nambawan tru.” (Baibel Sampela Sam Moa) Tasol long Buk Baibel na long sampela Baibel long tok Inglis yumi ritim olsem: “God yu Bikpela bilong mipela. Long olgeta hap bilong graun nem bilong yu i nambawan tru.” Olsem stori i kamap paslain long dispela i kamapim, yumi inap “save gut long God” sapos yumi larim Tok bilong em i givim save long yumi. Tasol wanem tul bilong stadi long Baibel bai bekim gut ol askim bilong yumi olsem i gat wanem as na yumi mas kamapim nem tru bilong God?​​—⁠Sindaun 2:​1-6.

 9. (a) Wanem buklet bai helpim yumi long kamapim klia olsem i bikpela samting yumi mas kolim nem bilong God? (b) Olsem wanem planti man bilong tanim tok ol i no bin soim rispek long nem bilong God?

⁹ Yumi ken lukim buklet The Divine Name That Will Endure Forever, ol i bin tanim long 69 tok ples.b Ol paragraf bilong het-tok “God’s Name​​—⁠Its Meaning and Pronunciation” (pes 6-​11) i kamapim klia olsem 4-pela leta Hibru, ol i kolim Tetragramaton (ol i kisim long tok Grik, olsem “4-pela leta”), i kamap olsem 7,000 taim long Baibel Hibru long bipo. Tasol ol pris pasto na ol man bilong tanim tok, em ol i bilong lotu Juda na Kristendom, long laik bilong ol yet ol i bin lusim dispela nem long klostu olgeta Baibel bilong ol.c Olsem wanem ol i ken tok ol i save long God na pas gut wantaim em sapos ol i nolaik tru long kolim nem bilong em? Ol i no inap. Nem tru bilong em i opim rot bilong yumi ken save long ol samting em i tingting pinis long mekim na em i husat tru. Na tu, sapos yumi no kamapim nem bilong God, i no gat wok long kolim hap beten bilong Jisas, “Papa bilong mipela, yu stap long heven, nem bilong yu i mas i stap holi.”​​—⁠Matyu 6:9; Jon 5:​43; 17:⁠6.

Jisas Krais Em i Husat?

10. Olsem wanem yumi ken save gut long i stap na wok bilong Jisas?

¹⁰ Nem bilong stadi 3 long buklet Yumi Mas Mekim Wanem? em “Krais Jisas Em i Husat?” Long 6-pela paragraf tasol i gat sotpela stori bilong Jisas, em i kamap olsem wanem, na i gat wanem as na em i kam long graun. Tru, nambawan gutpela stori bilong helpim yumi long kisim planti save moa long i stap bilong Jisas, em 4-pela Gutnius, tasol yumi ken lukim tu buk Nambawan Man Tru i Winim Olgeta Narapela Man, em yumi inap kisim long 111 tok ples.* Dispela buk i kamapim gut i stap bilong Krais na ol tok em i bin skulim ol man long en, em 4-pela Gutnius i as bilong en. Wanem samting i kamap pastaim, na wanem samting i kamap bihain, buk i putim ol stori olsem. Ol 133 sapta bilong en i stori long i stap na wok bilong Jisas. O yu ken lukim buk Insight, volium 2, aninit long het-tok “Jesus Christ.”

11. (a) Long bilip bilong ol long Jisas, wanem samting i mekim na ol Witnes Bilong Jehova i stap narapela kain? (b) Wanem sampela skripsa i daunim bilip bilong God Triwan? Wanem buklet i gutpela helpim long dispela samting?

¹¹ Long Kristendom i gat wanpela bikpela tok pait i kamap, olsem Jisas em i “Pikinini bilong God” na “God Pikinini” wantaim, o nogat. Wanpela buk (Catechism of the Catholic Church) i tok dispela tok pait em “nambawan tok hait bilong bilip Kristen,” olsem God Triwan. Ol Witnes Bilong Jehova i stap narapela kain long ol lotu bilong Kristendom​—⁠ol Witnes i bilip olsem God i bin wokim Jisas, tasol Jisas i no God yet. Buklet Gutpela Yu Bilip Long God Triwan o Nogat?, ol i bin tanim long 95 tok ples,d em i stori gut long dispela tok. Sampela bilong ol planti skripsa buklet i kamapim bilong daunim dispela bilip bilong God Triwan, em Mak 13:32 na 1 Korin 15:​24, 28.

12. Wanem narapela askim yumi ken tingim?

¹² Ol dispela tok yumi mekim long God na Jisas Krais i kamapim sampela rot bilong yumi ken mekim stadi na helpim ol man i no save long tok i tru bilong Baibel na bai ol i ken kisim stretpela save. (Jon 17:⁠3) Tasol olsem wanem long ol man i bin bung wantaim kongrigesen Kristen inap planti yia pinis? Ol i gat planti save bilong Baibel, olsem na yu ting ol i mas stadi yet long Baibel?

Bilong Wanem Yumi Mas ‘Was Gut Long Ol Pasin Bilong Yumi Yet’?

13. Sampela i gat wanem tingting kranki long stadi?

¹³ Sampela em ol i bin stap insait long kongrigesen inap planti yia pinis ol i kisim tingting olsem ol i ken mekim wok long save bilong Baibel ol i bin kisim insait long namba wan na namba 2 yia samting ol i bin stap Witnes Bilong Jehova, olsem na ol i no wok long kisim sampela save moa. I no hatwok long tingting olsem: “Mi no gat wok long stadi strong olsem ol nupela i mas mekim, long wanem, long ol yia i kamap na i go pinis, planti taim mi bin ritim Baibel na ol buk i kamapim tok bilong en.” I olsem yumi tok: “Nau mi no gat wok long tingim hamas kaikai mi kisim, long wanem, long ol yia i go pinis mi bin kisim planti kaikai.” Yumi save, oltaim bodi i mas i gat gutpela kaikai em ol i bin redim gut, bambai bodi i ken stap strong na wok gut. Na olsem tasol, yumi mas wok oltaim long stap strong long ol samting bilong spirit!​​—⁠Hibru 5:​12-​14.

14. I gat wanem as na yumi mas was gut long yumi yet?

¹⁴ Olsem na maski yumi bin stadi long Baibel inap longtaim pinis o nogat, yumi olgeta i mas bihainim tok Pol i bin givim long Timoti, em i wanpela strongpela wasman long dispela taim. Pol i tok: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:​15, 16) I gat wanem as na yumi mas tingim gut dispela tok bilong Pol? Tingim: Pol i bin tok tu olsem yumi gat pait long “olgeta kain pasin bilong trik na giaman” bilong Satan na “olgeta spirit nogut i stap antap.” Na aposel Pita i mekim tok lukaut olsem Satan i “raun bilong painim ol manmeri bilong kaikai,” na nogut dispela “ol manmeri” em yumi yet. Sapos yumi no was gut na yumi slek, dispela inap opim rot long Satan.​​—⁠Efesus 6:​11, 12; 1 Pita 5:⁠8.

15. Yumi gat wanem samting bilong spirit bilong lukautim gut yumi? Bilong lukautim gut, yumi mas mekim wanem?

¹⁵ Olsem na wanem samting bai lukautim yumi? Aposel Pol i tok: “Yupela i mas kisim olgeta klos pait God i save givim yupela, na long taim nogut yupela bai inap sanap strong long pait. Na long taim pait i pinis, yupela bai i sanap strong i stap yet.” (Efesus 6:​13) Bilong dispela klos pait bilong spirit i ken helpim gut yumi, dispela klos pait yet i mas stap gut, na tu, yumi mas wok oltaim long lukautim. Hap bilong dispela klos pait God i givim long yumi, em ol nupela save yumi kisim bilong Tok Bilong God. Dispela i makim olsem yumi mas wok long kisim ol save bilong tok i tru em Jehova i kamapim long rot bilong Baibel na lain gutpela wokboi. Pasin bilong stadi oltaim long Baibel na long ol buk na nius bilong Baibel, dispela em i bikpela samting yumi mas mekim bilong lukautim gut ol klos pait spirit bilong yumi.​​—⁠Matyu 24:​45-​47; Efesus 6:​14, 15.

16. Yumi ken mekim wanem na bai yumi save tru olsem ‘pasin bilong bilip olsem hap plang’ bilong yumi i save wok gut?

¹⁶ Pol i stori long wanpela bikpela hap bilong dispela klos pait​—⁠‘pasin bilong bilip olsem hap plang’​—⁠em bilong helpim yumi long sakim na mekim i dai olgeta spia paia Satan i save sutim i kam long yumi, em ol tok giaman ol man i sutim long yumi na ol tok bilong ol man i tromoi bilip pinis. (Efesus 6:​16) Olsem na i bikpela samting long yumi mas skelim bilip bilong yumi olsem em i stap strong o nogat, na tingim ol samting yumi mas mekim bilong holimpas na strongim dispela bilip. Ating yu ken askim: ‘Mi save mekim wanem bilong redi long Baibel-stadi mipela i mekim long olgeta wik long rot bilong Wastaua? Mi bin stadi gut na bai mi inap kamapim ol gutpela bekim long dispela miting na long dispela rot mi “kirapim ol manmeri bilong God long laikim ol arapela na mekim ol gutpela pasin long ol”? Mi save opim Baibel na ritim ol skripsa em paragraf i no kamapim ol tok bilong en? Mi insait tru long miting na long dispela pasin mi strongim bel bilong ol narapela?’ Kaikai bilong spirit yumi kisim, em i strongpela kaikai, na bel i mas mekim wok long en na bai dispela kaikai i ken helpim gut yumi.​​—⁠Hibru 5:​14; 10:⁠24.

17. (a) Satan i mekim wok long wanem gip nogut bilong traim long pundaunim yumi long ol samting bilong spirit? (b) Wanem samting bai daunim dispela gip nogut bilong Satan?

¹⁷ Satan i save long ol samting yumi ol man bilong graun inap pundaun long en, na ol pasin bilong trik na giaman em i save mekim i no stap ples klia. Wanpela samting em i mekim wok long en bilong pulim ol man, em ol piksa nogut bilong pasin sem ol man inap lukim long rot bilong TV, Intenet, video, na ol buk na nius. Sampela Kristen i bin larim dispela kain gip nogut i pundaunim ol, na dispela i bin mekim na ol i mas lusim wok ol i holim insait long kongrigesen, o sampela samting nogut moa i kamap. (Efesus 4:​17-​19) Wanem samting bai daunim dispela gip nogut bilong Satan? Yumi no ken lusim pasin bilong stadi oltaim long Baibel, go long ol miting Kristen, na no ken lusim sampela hap bilong klos pait i kam long God. Olgeta dispela samting wantaim i helpim yumi na bai yumi ken save long wanem samting i stret na wanem samting i no stret, na yumi mas nolaik tru long samting God i nolaik tru long en.​​—⁠Song 97:10; Rom 12:⁠9.

18. Olsem wanem “bainat bilong Holi Spirit” i ken helpim yumi long dispela pait bilong spirit yumi mekim?

¹⁸ Sapos oltaim yumi stadi long Baibel, orait stretpela save bilong Tok Bilong God bai lukautim yumi, na tu, “bainat bilong Holi Spirit, em tok bilong God,” bai helpim yumi long mekim pait. Tok Bilong God “i sap moa, na i winim bainat i gat tupela sap . . . [na] i save sutim man na i go insait tru. . . . Olsem na em i save gut tru long olgeta tingting na laik bilong bel bilong yumi.” (Efesus 6:​17; Hibru 4:​12) Sapos yumi lain long mekim gut wok long dispela “bainat,” orait taim traim i painim yumi, bai yumi inap kamapim long ples klia olsem dispela traim em i wanpela trik bilong Satan bilong bagarapim yumi. Save yumi bin kisim long Baibel bai helpim yumi long sakim ol pasin nogut na mekim ol pasin i gutpela. Olsem na yumi olgeta i mas askim yumi yet: ‘Bainat bilong mi i save wok gut, o ros i holim pinis? Mi hatwok long tingim bek ol skripsa em ol i bilong strongim mi long mekim pait?’ Yumi mas holimpas pasin bilong stadi gut long Baibel na long dispela rot yumi ken sakim Satan.​​—⁠Efesus 4:​22-​24.

19. Sapos yumi stadi gut oltaim, dispela bai helpim yumi olsem wanem?

¹⁹ Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” Sapos yumi tingim gut na bihainim dispela tok Pol i givim long Timoti, bai yumi inap strongim yumi yet long ol samting bilong spirit na mekim gut wok bilong yumi long autim tok. Ol elda na ol kongrigesen sevent i ken helpim gut kongrigesen, na yumi olgeta inap i stap strong long bilip.​​—⁠2 Timoti 3:​16, 17; Matyu 7:​24-​27.

[Ol Futnot]

Yu Tingim Yet?

• Wanem kain hap yumi sindaun long en bai helpim yumi long mekim gut stadi?

• Planti Baibel ol man i bin tanim i mekim wanem long nem bilong God?

• Yu bai mekim wok long wanem ol skripsa bilong sakim bilip bilong God Triwan?

• Yumi mas mekim wanem na bai ol trik bilong Satan i no ken pundaunim yumi, maski yumi bin stap trupela Kristen inap planti yia pinis?

[Ol Piksa long pes 19]

Bilong stadi gut, yu mas sindaun long wanpela hap i no gat planti pairap

[Ol Piksa long pes 23]

“Bainat” bilong yu i wok gut, o ros i holim pinis?