Yu Gat Pasin Bilong Wet i Stap?
“Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas wok strong long hariapim dispela De, bai em i kamap kwiktaim.”—2 PITA 3:11, 12.
1, 2. Yumi ken mekim wanem tok piksa i makim pasin bilong ‘wet’ i stap long dispela de bilong Jehova i kam?
TINGIM famili husat i wetim wanpela lain ol i singautim long kam kaikai. Hap taim famili i makim bilong kaikai i wok long kam klostu. Mama em i bisi long mekim ol liklik wok i stap yet bilong redim kaikai. Papa na ol pikinini i helpim mama na bai olgeta samting i redi. Olgeta i amamas long samting i laik kamap. Yes, famili olgeta i wet na amamas olsem klostu lain ol i singautim bai i kam na bai ol i kaikai gutpela kaikai na kisim amamas bilong bung wantaim.
2 Yumi ol Kristen i wetim bikpela samting moa long kamap. Em i wanem samting? Yumi olgeta i wetim de bilong Jehova! Taim dispela de i no kam yet, yumi mas stap olsem profet Maika, em i tok: “Mi bilip long Bikpela. Bai em i harim prea bilong mi, na mi wetim em i kam helpim mi na bai mi stap gut.” (Maika 7:7) Yu ting tok hia i makim pasin bilong wet nating olsem no gat wok? Nogat. I gat planti wok long mekim.
3. Olsem 2 Pita 3:11, 12 i kamapim, ol Kristen i mas i gat wanem kain tingting?
3 Aposel Pita i helpim yumi long bihainim stretpela tingting taim yumi wet. Em i tok: “Yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas wok strong long hariapim dispela De, bai em i kamap kwiktaim.” (2 Pita 3:11, 12) Pita i laik kirapim tingting bilong yumi, em i no gat askim tru tru long yumi mas i stap wanem kain. Long tupela pas spirit bilong God i kirapim em long raitim, Pita i stori long ol Kristen i mas stap wanem kain. Na em i tokim ol long wok strong yet long “wokabaut long pasin holi na bihainim olgeta pasin bilong God.” Maski em 30 yia bihain long taim Jisas Krais i bin kamapim ol mak bilong makim olsem “pasin bilong dispela graun i laik pinis,” ol Kristen i mas bihainim yet pasin bilong was i stap. (Matyu 24:3, NW ) Ol i mas ‘wetim De bilong God i kamap, na wok strong long hariapim dispela De.’
4. Wok bilong “hariapim” de bilong Jehova i makim wanem samting?
4 Yumi no inap mekim samting tru tru i “hariapim” de bilong Jehova. Na yumi no save “wanem de na wanem aua” Jisas Krais bai kam bilong bagarapim ol birua bilong Papa bilong em. (Matyu 24:36; 25:13) Wanpela buk i tok dispela tok “hariapim” i makim pasin bilong “ ‘no ken westim taim,’ olsem na em i kain olsem ‘pasin bilong givim bel, mekim wok, o tingting strong long wanpela samting.’ ” Olsem na Pita i kirapim ol wanbilip long ol i mas laik tru long dispela de bilong Jehova i kam. Ol inap mekim olsem long rot bilong tingting oltaim long dispela de. (2 Pita 3:12) Long nau “bikpela De” bilong Jehova i kam klostu pinis, olsem na yumi tu i mas i gat wankain tingting.—Joel 2:31.
Taim Yumi Wet, “Wokabaut Long Pasin Holi”
5. Olsem wanem yumi inap kamapim ples klia olsem yumi laik tru long lukim “De bilong God” i kamap?
5 Sapos yumi laik tru long abrusim bagarap long de bilong Jehova, bai yumi kamapim ples klia dispela samting long rot bilong “wokabaut long pasin holi na bihainim olgeta pasin bilong God.” Dispela tok “wokabaut long pasin holi” inap kirapim yumi long tingim tok bilong Pita, em i tok: “Yupela i mas i stap olsem ol pikinini i save harim tok. Bipo yupela i no gat save, na yupela i save bihainim ol kain kain laik nogut. Tasol nau yupela i no ken bihainim dispela pasin moa. Nogat. God i singautim yupela pinis, em i holi . . . Olsem na yupela i mas givim yupela yet long God na stap holi long olgeta wokabaut bilong yupela. Buk bilong God i tok olsem, ‘Yupela i mas i stap holi na bihainim gutpela stretpela pasin, long wanem, mi God bilong yupela, mi stap holi.’ ”—1 Pita 1:14-16.
6. Bilong i stap holi yumi mas mekim wanem?
6 Bilong i stap holi, yumi mas stap klin long skin, tingting, pasin bilong yumi, na long ol samting bilong spirit. Olsem wanem? Yumi wok long redi long dispela “De bilong God” long rot bilong stap holi olsem man o meri em nem bilong Jehova i stap long en? Em i no isi long stap klin olsem, long wanem, oltaim pasin bilong ol man long graun i wok long go nogut moa. (1 Korin 7:31; 2 Timoti 3:13) Olsem wanem? Yumi luksave olsem pasin bilong yumi na bilong ol man bilong graun i wok long kamap narapela kain olgeta? Sapos nogat, i gat as na yumi tingting planti. Tru, pasin bilong yumi i gutpela moa long pasin bilong ol man long graun, tasol nogut isi isi pasin bilong yumi i wok long bagarap. Sapos olsem, orait yumi gat wok long stretim dispela samting na bai God i ken amamas.
7, 8. (a) Olsem wanem na tingting bilong yumi olsem em i bikpela samting long “wokabaut long pasin holi” inap lus? (b) Bilong helpim yumi long stretim hevi, yumi mas mekim wanem?
7 Samting i kamap we man inap stap wanpis na lukim ol piksa bilong pasin sem long Intenet, olsem na sampela man husat bipo ol i no gat rot long lukim ol samting olsem, nau ol i luksave olsem ol i gat samting wanpela dokta i kolim olsem “bikpela saplai bilong ol samting bilong kirapim bel.” Sapos yumi wok long painim ol doti samting olsem long Intenet, i olsem yumi givim baksait long lo bilong Baibel long no ken “pas long ol samting i no klin.” (Aisaia 52:11) Yumi “hariapim dispela De” bilong Jehova? O nogut long tingting yumi mekim olsem dispela de i stap longwe yet, na yumi tok maski sapos yumi mekim tingting i doti, hap taim i stap yet bilong kamap klin gen. Sapos yumi gat kain hevi olsem, em i bikpela samting long yumi no lusim taim long prea long Jehova long ‘helpim yumi long givim baksait long ol samting i no gutpela.’—Song 119:37.
8 Bikpela lain bilong ol Witnes Bilong Jehova, ol yangpela wantaim ol lapun, ol i holimpas ol stretpela lo bilong God na sakim ol traim bilong pasin pamuk. Ol i save olsem taim i sot pinis na ol i tingim tok lukaut bilong Pita olsem “De bilong Bikpela bai i kamap wantu tasol olsem ol stilman i save kam,” olsem na ol i “wokabaut long pasin holi.” (2 Pita 3:10) Olgeta samting ol i mekim i kamapim ples klia ol i ‘wetim De bilong God i kamap na ol i wok strong long hariapim dispela De’ bilong Jehova.a
Taim Yumi Wet, “Bihainim Olgeta Pasin Bilong God”
9. Laik long bihainim olgeta pasin bilong God i mas kirapim yumi long mekim wanem?
9 Yumi mas “bihainim olgeta pasin bilong God” na bai yumi no ken lusim tingting long de bilong Jehova. Laik long “bihainim olgeta pasin bilong God” i olsem pasin bilong daun tru long em, na i kirapim yumi long mekim ol samting em i save laikim. Laik long i stap gut long Jehova em i nambawan bikpela samting i kirapim yumi long bihainim olgeta pasin bilong em. God i laik “kisim bek olgeta manmeri, bai ol i ken save tru long as bilong tok tru.” (1 Timoti 2:4) God “i no laik bai wanpela man i lus. Em i laik bai olgeta man i mas tanim bel.” (2 Pita 3:9) Olsem na dispela laik bilong yumi long bihainim olgeta pasin bilong God i mas kirapim yumi long wok strong moa long helpim ol manmeri long kisim save long Jehova na bihainim pasin bilong em.—Efesus 5:1.
10. I gat wanem as na yumi mas was gut long pasin bilong laikim tumas mani?
10 Bai yumi givim bel long bihainim olgeta pasin bilong God sapos yumi putim Kingdom bilong God i go pas. (Matyu 6:33) Stretpela tingting long mani kago i insait long dispela samting. Jisas i tok: “Yupela lukaut na was gut. Nogut yupela i mangal long kisim ol kain kain samting. Maski yu yet yu gat planti samting moa, tasol yu no inap kisim laip long ol dispela samting bilong yu.” (Luk 12:15) Ating yumi hatwok long bilip olsem pasin bilong laikim tumas mani inap mekim yumi lusim tingting long olgeta narapela samting, tasol yumi mas save olsem pasin bilong ‘tingting planti long ol samting bilong graun na wari long bungim planti mani’ inap “karamapim tok bilong God.” (Matyu 13:22) Ating i hatwok long kisim ol samting bilong skin. Olsem na long sampela hap, planti man i ting ol i mas i go long wanpela kantri we i gat planti wok mani na bai ol inap kisim gutpela sindaun, maski sapos ol i mas lusim famili bilong ol inap long sampela yia. Sampela manmeri bilong God tu i bin i gat tingting olsem. Sapos ol i go long narapela kantri, ating ol inap helpim famili bilong ol long kisim ol gutpela samting bilong skin. Tasol, olsem wanem long i stap bilong famili bilong ol long ples long ol samting bilong spirit? Sapos het tru bilong famili i no stap bilong mekim gutpela wok bos, bai famili i stap strong long samting bilong spirit na bai ol i ken abrusim bagarap long de bilong Jehova?
11. Olsem wanem wanpela man i bin soim olsem laik long bihainim olgeta pasin bilong God i winim laik long kisim mani?
11 Wanpela man bilong Filipin i go wok mani long narapela kantri em i bin lainim tok i tru bilong Baibel long ol Witnes Bilong Jehova i stap long Japan. Taim em i kisim save long wok bilong het bilong famili olsem Baibel i makim, em i luksave olsem em i mas helpim famili bilong em long lotuim Jehova. (1 Korin 11:3) Meri bilong em long ples i sakim nupela lotu bilong em, meri i laik bai em i salim yet mani i kam na maski long kam bek long ples bilong skulim famili long ol tok bilong Baibel i as bilong bilip bilong em. Tasol man i luksave olsem taim i sot pinis na em i laikim tumas famili, olsem na em i go bek long ples. Pasin isi em i mekim long famili i kamapim gutpela samting. Bihain famili bilong em i kamap wanbel long lotu i tru, na meri bilong em i kirap mekim wok painia.
12. I gat wanem as na yumi mas putim ol wok bilong spirit i go pas?
12 I stap bilong yumi i kain olsem ol man i stap insait long bikpela haus i paia. Yu ting em i savepasin long yumi raun hariap bilong kisim ol kago samting i stap insait long haus i laik bagarap? O yu ting em i bikpela samting moa long tingim laip bilong man—laip bilong yumi yet na bilong famili na ol narapela i stap long haus? Orait, klostu nau ol samting nogut bilong dispela graun i laik bagarap, na laip bilong ol man inap lus. Dispela save i mas kirapim yumi long putim ol wok bilong spirit i go pas na givim bel long autim tok long Kingdom bilong helpim ol man long abrusim bagarap.—1 Timoti 4:16.
Yumi Mas Stap “Klin Long Ai Bilong God”
13. Yumi laik stap olsem wanem taim de bilong Jehova i kamap?
13 Bilong strongim tok olsem i bikpela samting long bihainim pasin bilong wet, Pita i tok: “Ol pren tru, yupela i save wet long ol dispela samting i kamap. Olsem na yupela i mas wok strong long mekim yupela yet i stap klin long ai bilong God na yupela i no gat asua long wanpela samting. Na yupela i mas i stap wanbel wantaim God.” (2 Pita 3:14) Bihain long em i tokim ol man long wokabaut long pasin holi na bihainim olgeta pasin bilong God, Pita i tok em i bikpela samting long Jehova i lukim man i kamap klin pinis long rot bilong blut bilong Jisas. (KTH 7:9, 14) Bilong kamap klin olsem, man i mas bilip long ofa bilong Jisas na kamap wokman bilong Jehova i dediket na baptais pinis.
14. Wanem samting i insait long wok bilong stap “klin”?
14 Pita i kirapim yumi long wok strong tru long stap “klin.” Wokabaut na pasin bilong yumi Kristen i olsem klos man i pasim. Olsem wanem? Yumi lukautim gut klos Kristen bilong yumi na bai ol doti bilong dispela graun i no ken pas long en? Taim yumi lukim wanpela doti i stap long klos tru tru, wantu yumi traim rausim. Sapos em wanpela klos yumi laikim tru, bai yumi strong long rausim olgeta dispela samting i mekim klos i doti. Olsem wanem? Yumi gat wankain tingting sapos kranki samting long pasin o wokabaut bilong yumi i mekim na i olsem klos Kristen bilong yumi i doti?
15. (a) I gat wanem as na ol Israel i mas putim ol sotpela string long arere bilong klos bilong ol? (b) Wanem samting i mekim na ol wokboi bilong Jehova long nau i stap narapela kain?
15 Ol Israel i mas putim “ol sotpela hap string” long arere bilong klos bilong ol na ol i mas putim “wanpela blupela string” antap long hap ol sotpela string i stap long en. I gat wanem as na ol i mas mekim olsem? Em i bilong kirapim ol long tingim ol lo bilong Jehova, bihainim ol, na “stap holi” long ai bilong God bilong ol. (Namba 15:38-40) Yumi ol wokboi bilong Jehova long nau i stap narapela kain long ol man bilong dispela graun, long wanem, yumi bihainim ol lo na stiatok bilong God. Yumi holimpas stretpela pasin, tingim blut olsem samting i holi, na abrusim ol samting i olsem pasin bilong lotuim giaman god. (Aposel 15:28, 29) Planti man i rispek long pasin bilong yumi long wok strong long stap klin.—Jems 1:27.
“I No Gat Asua Long Wanpela Samting”
16. Yumi mas mekim wanem na bai yumi “no gat asua long wanpela samting”?
16 Na tu, Pita i tok Jehova i mas lukim yumi olsem man “i no gat asua long wanpela samting.” Olsem wanem yumi inap stap olsem? Man inap klinim na rausim doti i stap long wanpela samting, tasol i no olsem long samting i gat “asua” long en. Wanpela asua i makim olsem samting long insait i nogut. Pol i tokim ol wanbilip Kristen long Filipai olsem: “Yupela i no ken toktok planti na tok pait nabaut. Yupela i mas mekim olsem bai yupela pikinini bilong God i ken i stap stret na i no gat rong na i no gat asua. Na bai yupela i holimpas tok i gat laip, na bai yupela i stap olsem ol lait namel long ol lain manmeri bilong dispela graun.” (Filipai 2:14, 15) Sapos yumi bihainim dispela tok, bai yumi abrusim pasin bilong toktok planti na tok pait, na gutpela bel bai i kirapim yumi long mekim ol wok bilong God. Pasin bilong laikim tru Jehova na ol man bai kirapim yumi taim yumi autim tok long “gutnius bilong kingdom.” (Matyu 22:35-40; 24:14) Na yumi bai wok yet long autim tok maski bikpela lain manmeri i no save gut long as na yumi amamas long lusim taim bilong yumi long helpim ol narapela long kisim save long God na long tok bilong em long Baibel.
17. Wanem samting i mas i stap olsem as na yumi laik mekim bikpela wok moa insait long kongrigesen Kristen?
17 Yumi laik stap olsem man i no gat “asua,” olsem na i gutpela long skelim as tru long yumi mekim ol samting. Yumi lusim pinis pasin bilong graun we ol man i tingim ol yet tasol na wok strong long kisim planti mani o bikpela namba. Sapos yumi laik kisim sampela gutpela wok moa insait long kongrigesen Kristen, yumi mas i gat gutpela bel, na yumi laik kisim dispela wok, long wanem, yumi laikim tumas Jehova na ol narapela. I gutpela long lukim ol strongpela brata i givim bel long kisim wok “wasman,” ol i stap amamas na pasin daun i as na ol i givim ol yet bilong mekim wok bilong Jehova na helpim ol wanbilip. (1 Timoti 3:1; 2 Korin 1:24) Yes, ol man i winim mak bilong mekim wok elda ol i “lukautim gut ol manmeri bilong God” na ol ‘i amamas long mekim dispela wok, olsem God i laik bai ol i mekim. Ol i no mekim dispela wok bilong kisim pe tasol. Nogat. Ol i gat laik tru long mekim dispela wok. Ol i no stap olsem ol bikman na daunim ol manmeri bilong God. Nogat. Ol i mekim gutpela pasin tasol, bai ol narapela i ken lukim na bihainim.’—1 Pita 5:1-4.
Yumi Mas i Stap “Wanbel”
18. Ol Witnes Bilong Jehova ol i gat nem long ol i bihainim wanem kain pasin?
18 Bihain Pita i tokim yumi long stap “wanbel.” Bilong stap olsem, yumi mas i stap wanbel wantaim Jehova na ol narapela man. Pita i kamapim klia em i bikpela samting long “laikim tru ol arapela manmeri bilong God” na wok oltaim long stap wanbel wantaim ol wanbilip Kristen. (1 Pita 2:17; 3:10, 11; 4:8; 2 Pita 1:5-7) Bilong stap wanbel, yumi mas i gat pasin bilong laikim tru narapela. (Jon 13:34, 35; Efesus 4:1, 2) Pasin bilong yumi long laikim tru narapela na stap wanbel i kamap ples klia tru long taim bilong ol kibung intenesenel bilong yumi. Long wanpela kibung long Kosta Rika long 1999, wanpela stuakipa long ples balus i bel nogut i stap, long wanem, ol Witnes i wok long bung bung bilong tok welkam long ol brata sista i kam long ol narapela kantri na ol i popaia na pasim rot bilong ol man long lukim stua bilong em. Tasol long namba tu de ol i mekim olsem, em i luksave long pasin laikim na pasin wanbel ol Witnes i kamapim taim ol i amamas long tok welkam long ol wanbilip ol i no save long ol. Orait, long laspela de nau, stuakipa tu i bung wantaim ol Witnes bilong tok welkam, na em i toksave olsem em i laikim Baibel-stadi.
19. I gat wanem as na yumi mas wok strong long stap wanbel wantaim ol wanbilip?
19 Pasin bilong yumi long givim bel long stap wanbel wantaim ol brata sista spirit bilong yumi inap mekim bikpela samting long laik bilong yumi long dispela de bilong Jehova wantaim nupela taim bilong em i mas kam hariap. (Song 37:11; 2 Pita 3:13) Sapos yumi pilim olsem i hatwok long stap wanbel wantaim wanpela wanbilip. Olsem wanem? Yumi inap lukim olsem yumi stap wanbel wantaim em long Paradais? Sapos wanpela brata i bel nogut long yumi, wantu yumi mas ‘go stretim tok wantaim em.’ (Matyu 5:23, 24) Yumi mas mekim olsem sapos yumi laik stap wanbel wantaim Jehova.—Song 35:27; 1 Jon 4:20.
20. Wanem ol samting i soim olsem yumi bihainim pasin bilong ‘wet’?
20 Olsem wanem? Yumi yet i ‘wetim De bilong God i kamap, na wok long hariapim dispela De’? Em nau, yumi stap holi long dispela graun em pasin nogut i pulap long en, dispela i soim olsem yumi laik tru long lukim pinis bilong pasin nogut. Na tu, yumi bihainim olgeta pasin bilong God, dispela i kamapim klia olsem yumi dai stret long lukim de bilong Jehova i kam na long stap aninit long wok King bilong em. Na yumi gat laik long stap long nupela taim em pasin wanbel i stap long en, olsem na yumi wok long stap wanbel wantaim ol wanbilip long nau. Long ol kain rot olsem, yumi soim olsem yumi gat pasin bilong ‘wet’ na yumi “wok strong long hariapim dispela De” bilong Jehova.
[Futnot]
a Lukim stori bilong sampela long Wastaua bilong Janueri 1, 2000, pes 16 na 1997 Yearbook of Jehovah’s Witnesses, pes 51.
Yu Inap Tingim Yet?
• Pasin bilong “wok strong long hariapim dispela De” bilong Jehova i makim wanem samting?
• Olsem wanem wokabaut bilong yumi i kamapim klia yumi bihainim pasin bilong ‘wet’?
• Bilong wanem yumi mas “bihainim olgeta pasin bilong God”?
• Yumi mas mekim wanem na bai Jehova i lukim yumi i ‘stap klin na no gat asua na stap wanbel’?
[Piksa long pes 11]
Kamapim pasin bilong ‘wet’ long rot bilong wokabaut long pasin holi
[Ol Piksa long pes 12]
Wok bilong autim tok bilong Kingdom i helpim man long abrusim bagarap
[Piksa long pes 14]
Taim yumi wetim de bilong Jehova i kam, yumi mas wok long stap wanbel wantaim ol wanbilip