Laip Stori

Kisim Planti Blesing Long Holim Laik Bilong Mekim Wok Olsem Misineri

Stori bilong Tom Cooke

Pairap bilong gan i bagarapim stret naispela apinun. Ol bulet i sut i go long ol diwai long gaden bilong mipela. Wanem samting i kamap? Sotpela taim bihain mipela i kisim save olsem wanpela lain i pait long gavman na nau Yuganda i stap aninit long wok bos bilong Jeneral Idi Amin. Em long 1971.

BILONG wanem mi na meri bilong mi, Ann, i lusim Inglan we ol man i save stap bel isi na mipela i go long dispela hap bilong Afrika i save gat pait? Em pasin bilong mi long amamas long raun long ol ples, tasol pasin bilong papamama long givim bel long mekim wok bilong Kingdom i bin kirapim laik bilong mi long mekim wok olsem misineri.

Mi tingim dispela de em san i hat tru long Ogas 1946, taim papamama bilong mi i bungim ol Witnes Bilong Jehova long namba wan taim. Papamama i sanap long dua na i toktok longpela taim wantaim tupela manmeri i kam lukim mipela. Dispela tupela manmeri em Fraser Bradbury na Mamie Shreve, na planti taim tupela i kam bek bilong lukim mipela, na long ol mun i kam bihain, laip bilong famili bilong mipela i senis tru.

Papamama i Gat Strongpela Bel

Papamama i insait long planti wok bilong komiuniti. Olsem: Paslain liklik long ol i kirap stadi long Baibel, ol piksa bilong Winston Churchill i stap long haus bilong mipela. Long ol eleksen i bin kamap bihain long woa, wanpela lain politik (Conservative Party Committee) i mekim wok long haus bilong mipela. Na tu, famili bilong mipela i save long planti bikman bilong lotu na ol bikman long hap bilong mipela. Maski mi gat 9-pela krismas tasol, mi inap luksave olsem ol wanblut bilong mipela i kirap nogut taim ol i kisim save olsem mipela i laik kamap ol Witnes Bilong Jehova.

Ol Witnes mipela i bung wantaim ol, ol i save givim bel long autim tok na ol i no save pret na dispela i kirapim papamama long kirap mekim wok autim tok. I no longtaim na Papa i mekim ol tok long rot bilong wanpela bikmaus long ples stua planti man i save raun long en long Spondon, em asples bilong mipela. Na mipela ol pikinini i sanap long ples klia na holim ol Wastaua na Kirap! Mi mas tok stret olsem taim ol wanskul i kam bungim mi, mi gat laik long lus nating wantu tasol.

Papamama i stap gutpela piksa na dispela i strongim bikpela susa bilong mi, Daphne, long kirap mekim wok painia. Long 1955, em i go long Wastaua Baibel Skul Bilong Gileat na ol i bin makim em long mekim wok misineri long Japan.a Tasol liklik susa bilong mi, Zoe, em i no moa lotu long Jehova.

Long dispela taim, mi pinisim skul bilong kamapim ol piksa long ol buk samting, ol i kolim ilastresen na grefik ats. Bikpela samting long tingting bilong ol wanskul em pasin bilong gavman long singautim ol man long insait long ami samting. Taim mi tokim ol olsem mi bai bihainim maus bilong bel na mi no inap insait long ami samting, ol i ting mi tok pilai tasol. Dispela samting i opim rot na planti taim mi inap toktok wantaim sampela sumatin long ol tok bilong Baibel. Bihain liklik ol i putim mi long kalabus inap 12-pela mun, long wanem, mi no laik insait long ami. Wanpela sumatin long kolis bilong lain long kamapim piksa i amamas long harim ol tok bilong Baibel, bihain em i kamap meri bilong mi. Tasol bai mi larim Ann i tokim yu long olsem wanem em i lainim tok i tru.

Ann i Painim Tok i Tru

“Famili bilong mi i no lain bilong lotu, na mi no bin baptais long wanpela lotu. Tasol mi laik save long samting bilong lotu olsem na mi save go long ol misin ol pren bilong mi i save go long en. Ol stori mi harim Tom na narapela Witnes i autim long sampela sumatin long kolis i kirapim laik bilong mi long save long Baibel. Taim ol i salim Tom na narapela Witnes i go kalabus, long wanem, tupela i no laik insait long ami, mi kirap nogut.

“Mi save raitim pas long Tom taim em i stap long kalabus, na laik bilong mi long save long Baibel i go bikpela. Taim mi go long London bilong kisim sampela skul moa, mi orait long stadi long Baibel wantaim Muriel Albrecht. Muriel i bin mekim wok misineri long Estonia, na em wantaim mama bilong em i bin strongim mi tru. Insait long sampela wik tasol, mi wok long i go long ol miting na sanap ausait long Victoria Station, em hap bilong kisim tren, na wok long tilim Wastaua na Kirap!

“Mi go long Kongrigesen Southwark long saut bilong London. Ol brata na sista spirit bilong ol narapela narapela kantri i stap long dispela kongrigesen, na planti bilong ol i no gat planti samting bilong skin. Maski ol i no save long mi, ol i mekim gut long mi olsem mi wanpela bilong ol. Pasin laikim long dispela kongrigesen i mekim na mi save dispela em tok i tru, na mi kisim baptais long 1960.”

Wankain Laik​—⁠Sindaun i Senis Senis

Bihain, long 1960 yet, mi na Ann i marit na mitupela i putim mak bilong mekim wok misineri. Tasol ol samting i senis taim mipela i kisim save olsem mipela bai i gat bebi. Bihain long pikinini meri bilong mipela Sara i kamap, mi na Ann i gat laik yet long mekim wok autim tok long wanpela kantri i sot long ol pablisa bilong Kingdom. Mi salim pas long planti kantri bilong painim wok, na long Me 1966 mi kisim wanpela pas i kam long Dipatmen Bilong Ediukesen long Yuganda i tok i gat wanpela wok mi ken mekim. Tasol long dispela taim, Ann i gat bel long namba tu pikinini bilong mipela. Sampela i no ting em i gutpela tingting long mipela i go long ples i longwe tru. Mipela i toktok wantaim dokta bilong mipela na em i tok: “Sapos yupela bai i go, orait yupela i mas go paslain long meri bilong yu i gat bel 7-pela mun.” Olsem na kwiktaim mipela i go long Yuganda. Long dispela as papamama bilong mitupela i no lukim namba tu pikinini meri bilong mitupela, Rachel, i go inap long taim em i gat 2-pela krismas. Long nau mipela yet i kamap bubu, na mipela i pilim tru pasin bilong gutpela papamama bilong mipela long ol i bin daunim laik bilong ol yet.

Taim mipela i kamap long Yuganda long 1966, mipela i amamas na i tingting planti tu. Taim mipela i lusim balus, mipela lukim ol kain kain kala na mipela i laikim tru. Ol kala i lait tumas. Namba wan haus mipela i stap long en, em i stap klostu long taun Iganga, em 50 kilomita longwe long Jinja em wanpela taun long het bilong wara Nail. Ol lain Witnes i stap klostu moa long mipela em wanpela grup long Jinja. Ol misineri olsem Gilbert na Joan Walters na Stephen na Barbara Hardy i lukautim dispela grup. Mi askim dipatmen long salim mi i go wok long Jinja, dispela bai mekim na mipela inap helpim gut dispela grup. Bihain liklik long taim Ann i karim Rachel, mipela i go long Jinja. Long hap, mipela i amamas long wok wantaim ol gutpela Witnes long dispela liklik grup taim grup i wok long go bikpela na kamap namba tu kongrigesen long Yuganda.

Famili i Wok Wantaim Long Narapela Kantri

Mi na Ann i ting mipela i bin makim wanpela gutpela ples bilong mekim bikpela long ol pikinini bilong mipela. Mipela i amamas long wok wantaim ol misineri bilong ol narapela kantri na helpim dispela nupela kongrigesen long i go bikpela. Mipela amamas long stap wantaim ol brata sista bilong mipela long Yuganda, em ol i save kam long haus bilong mipela planti taim. Stanley na Esinala Makumba i bin strongim mipela tru.

Mipela i stap namel long ol kain kain animal bilong bus, olsem na i no ol brata tasol i save kam lukim mipela. Long nait ol hipopotamus i save lusim wara Nail na wokabaut i kam klostu tru long haus bilong mipela. Mi tingim yet taim snek moran, longpela bilong em inap 6-pela mita, i bin stap long gaden bilong mipela. Sampela taim mipela i go lukim ol wel animal i stap long ol bikpela pak, we ol laion na ol narapela wel animal i raun raun nating.

Long wok autim tok, mipela i gat wanpela samting i nupela long ol asples, em ol i no bin lukim karis bilong bebi. Taim mipela i go long ol haus, ol liklik pikinini i save bihainim mipela. Ol manmeri i lukluk long mipela na bihain ol i putim han long waitpela bebi. Mipela i amamas long mekim wok autim tok, long wanem, ol manmeri i mekim gutpela pasin. Mipela i ting olgeta manmeri bai i kam insait long tok i tru, long wanem, em isi long kirapim ol Baibel-stadi. Tasol planti manmeri i hatwok long lusim ol pasin bilong ples em Baibel i tambuim. Maski i olsem, planti liklik ol i bihainim ol stretpela lo bilong Baibel, na kongrigesen i go bikpela. Namba wan kibung sekit bilong mipela long Jinja long 1968 em wanpela bikpela samting long kongrigesen. Baptais bilong sampela brata sista long wara Nail em mipela i bin stadi wantaim ol, em samting mipela i no inap lusim tingting long en. Tasol i no longtaim na samting bilong bagarapim bel isi bilong mipela i laik kamap.

Tambuim Wok​​—⁠Traim Bilip na Pasin Bilong Wokim Tingting

Long 1971, Jeneral Idi Amin i daunim gavman na i kisim wok bos. Ol manmeri long Jinja i paul tru, na long dispela taim mipela i stap long gaden bilong mipela na dring ti na samting mi tok long en long kirap bilong stori i kamap. Insait long 2-pela yia bihain ol i rausim ol manmeri bilong Esia long kantri. Klostu olgeta man bilong ol narapela kantri i lusim Yuganda na ol skul na haus sik na klinik i kisim taim stret. Bihain ol i toksave olsem ol i tambuim wok bilong ol Witnes Bilong Jehova. Dipatmen Bilong Ediukesen i tingim laip bilong mipela na i salim mipela i go long biktaun Kampala. Taim mipela i go sindaun long Kampala, dispela i helpim mipela long tupela rot. Ol manmeri bilong Kampala i no save long mipela, olsem na mipela i fri long raun. Na tu, i gat planti wok bilong mekim long kongrigesen na long wok autim tok.

Sindaun bilong Brian na Marion Wallace na tupela pikinini bilong ol i wankain olsem bilong mipela, na ol tu i laik i stap long Yuganda. Mipela i amamas long mipela inap poromanim ol taim mipela i wok wantaim long Kongrigesen Kampala long taim bilong hevi. Ol stori mipela i ritim bilong ol brata i mekim wok long ol kantri i gat tambu i bin strongim tru mipela. Mipela i bung long ol liklik grup, na wanpela taim long olgeta mun, mipela i holim ol bikpela bung long Entebbe Botanikol Gaden, na mipela giaman mekim olsem wanpela pati. Ol pikinini bilong mipela i ting dispela em i gutpela tingting tru.

Mipela i mas was gut long pasin mipela i bihainim bilong mekim wok autim tok. Taim ol waitskin i go raun long ol haus bilong ol manmeri bilong Yuganda, ol i stap ples klia. Olsem na teritori bilong mipela em ol stua, ol bikpela haus i gat ol rum slip na insait long ol banis bilong ol skul samting. Wanpela pasin mi mekim wok long en long autim tok long ol stua em mi save askim long ol kaikai samting em mi save ol i no stap moa, olsem suga o rais. Sapos stuakipa i kamapim olsem em i bel hevi long samting i kamap insait long kantri, orait mi bai stori long em long tok bilong Kingdom. Dispela pasin bilong autim tok i wok gut. Sampela taim, mi kirapim gobek na tu, ol i givim mi liklik hap bilong dispela kaikai samting mi bin askim long en.

Long dispela taim, pait i wok long go bikpela tru. Pasin birua i stap namel long Yuganda na Briten i go nogut moa, na dispela i mekim na ol bikman i no wokim gen kontrak bilong mi. Olsem na long 1974, bihain long 8-pela yia mipela i bin stap long Yuganda, em taim nau bilong tok gutbai long ol brata bilong mipela. Tasol laik bilong mekim wok olsem misineri i no pinis.

Go Long Niugini

Long Janueri 1975, rot i op long mipela i ken wok long Papua Niugini. Na dispela em i kirap bilong 8-pela yia mipela i amamas long mekim wok long dispela hap bilong Pasifik. I stap bilong mipela wantaim ol brata na long wok autim tok i bin gutpela tru na i gat ol blesing bilong en.

Famili bilong mipela i tingim taim mipela i stap long Papua Niugini olsem taim bilong insait long ol drama bilong Baibel. Long olgeta yia, mipela i helpim long redim drama bilong kibung distrik na mipela i kisim bikpela amamas long en! Mipela i amamas long bung wantaim planti famili em ol i save tingim ol samting bilong spirit, na dispela i bin helpim ol pikinini bilong mipela. Bikpela pikinini bilong mipela, Sara, i maritim wanpela painia salim em Ray Smith, na tupela i mekim wok painia salim klostu long boda bilong Irian Jaya (nau Papua, wanpela provins bilong Indonisia). Haus bilong ol em wanpela haus kunai i stap long ples, na Sara i tok em i bin lainim planti samting taim em i mekim wok long dispela hap.

Lain Long Ol Senis i Kamap

Bihain long 8-pela yia long Papua Niugini, papamama bilong mi i mas kisim sampela helpim moa. Tasol ol i no laik bai mipela i kam bek long Inglan, ol i orait long kam stap wantaim mipela, na mipela olgeta i go long Australia long 1983. Papamama i bin go stap tu wantaim susa bilong mi Daphne, em i stap yet long Japan. Bihain long papamama bilong mi i dai, mi na Ann i mekim wok painia, na rot i op long mipela inap mekim wanpela gutpela wok em mi pilim i hatwok long mekim.

Mipela i stat tasol long mekim wok painia taim ol i singautim mipela long mekim wok sekit. Kirap long taim mi pikinini, mi tingim raun bilong wasman sekit em wanpela spesel samting. Nau mi kamap wanpela wasman sekit. Em wanpela wok i gat hatwok bilong en, winim ol narapela wok mipela i bin mekim inap long dispela taim, tasol planti taim Jehova i helpim mipela long rot mipela i no bin lukim long bipo.

Taim Brata Theodore Jaracz i mekim raun bilong son long Australia long 1990, mipela i askim em olsem em i ting mipela i lapun tumas long mekim wok fultaim long narapela kantri o nogat. Em i tok: “Olsem wanem long Solomon Ailan?” Em nau, taim mi na Ann i gat 50 krismas samting mipela i go mekim namba wan asainmen bilong mipela long wok misineri.

Mekim Wok Long “Ol Amamas Ailan”

Solomon Ailan i gat nem olsem “Ol Amamas Ailan,” na mipela i bin amamas tru long ol wok mipela i mekim long hia inap 10-pela yia samting. Mi na Ann i lain long gutpela pasin bilong ol brata sista long Solomon Ailan taim mi mekim wok wasman distrik. Mipela i pilim tru gutpela pasin ol i mekim long mipela, na olgeta brata sista i mekim pasin isi long mi taim mi wok strong long kamapim klia ol samting long Tok Pisin bilong Solomon Ailan​—⁠em wanpela tok ples i no gat planti ol tok long en.

Bihain liklik long taim mipela i kamap long Solomon Ailan, ol birua i traim long pasim mipela long mekim wok long Haus Kibung bilong mipela. Angliken sios i sutim tok long ol Witnes Bilong Jehova long kot na i tok nupela Haus Kibung bilong mipela long Honiara i stap long graun bilong ol. Gavman i helpim tok bilong ol, olsem na mipela i apil i go long Suprim Kot. Kot bai skelim na tok mipela i mas rausim Haus Kibung, em 1,200 manmeri inap sindaun long en, o nogat.

Ol i skelim dispela kot inap wanpela wik olgeta. Loya bilong ol lain i birua long mipela i mekim hambakpasin taim ol i sutim ol tok long mipela. Bihain loya bilong mipela, Brata  Warren Cathcart bilong Nu Silan, i bekim stret na i daunim olgeta wan wan tok bilong ol. Long Fraide, planti manmeri i harim pinis nius bilong dispela samting i kamap long kot, na haus kot i pulap tru long ol bikman bilong lotu, na ol ofisa bilong gavman, na ol brata Kristen bilong mipela. Mi tingim wanpela popaia ol i bin raitim long sediul bilong kot i tok: “Gavman bilong Solomon Ailan na Sios bilong Melanisia i kot wantaim Jehova.” Em nau mipela i win.

Tasol bel isi bilong dispela Ol Amamas Ailan i no inap i stap longtaim. Mi na Ann i stap namel gen long bikpela hevi na pait taim wanpela lain ami i pait bilong daunim gavman. Pasin birua long narapela lain i mekim na bikpela pait i kamap insait long kantri. Long Jun 5, 2000, ol i daunim gavman na wanpela lain bilong pait i bosim biktaun. Inap sampela wik, Haus Kibung bilong mipela i stap olsem haus bilong ol man i no gat ples slip. Ol bikman i kirap nogut long lukim olsem ol brata Kristen bilong mipela bilong narapela narapela lain em pasin birua i stap long en, ol i stap wanbel olsem wanpela famili long Haus Kibung. Dispela i litimapim nem bilong Jehova!

Ol man bilong pait, ol tu i rispektim bilip bilong ol Witnes Bilong Jehova long ol i no laik insait long pait. Dispela i helpim mipela long askim wanpela komanda long larim wanpela trak i gat ol buk na nius na ol narapela samting i go long liklik lain brata i stap long hap ol birua i bosim. Taim mipela i painim ol famili em ol i no bin bung wantaim mipela inap sampela mun, mipela olgeta i krai.

I Gat Planti Samting Mipela i Tenkyu Long En

Taim mipela i tingim bek laip bilong mipela long wok bilong Jehova, i gat planti samting mipela i mas tenkyu long Jehova long en. Mipela i amamas long lukim tupela pikinini meri bilong mipela na ol man bilong ol, Ray na John, ol i stap gut long mekim wok bilong Jehova. Ol i bin helpim gut mipela long wok misineri bilong mipela.

Inap 12-pela yia nau, mi na Ann i amamas long mekim wok long brens-ofis bilong Solomon Ailan, na long dispela taim mipela i bin lukim namba bilong ol man bilong autim tok bilong Kingdom long Solomon Ailan i go bikpela inap tupela taim, winim 1,800. I no longtaim i go pinis mi kisim narapela gutpela blesing moa, mi go long Skul Bilong Ol Komiti Bilong Brens long Patterson, New York. Tru tumas, mipela i amamas long laip bilong mipela wantaim planti blesing mipela i kisim long pasin bilong i gat laik long mekim wok misineri.

[Futnot]

[Piksa long pes 23]

Long de mitupela i marit, 1960

[Piksa long pes 24]

Long Yuganda, Stanley na Esinala Makumba i bin strongim tru famili bilong mipela

[Piksa long pes 24]

Sara i wokabaut i go long haus bilong neiba

[Piksa long pes 25]

Mi droim piksa bilong helpim mi long skulim ol man bilong Solomon Ailan

[Piksa long pes 25]

Mipela i bung wantaim wanpela longwe kongrigesen bilong Solomon Ailan

[Piksa long pes 26]

Famili bilong mipela long nau