Putim Ol Mak Bilong Spirit Bilong Givim Biknem Long God
“TAIM man i no save wanem taun em i mas stiaim sip i go long en, orait maski win i kam long wanem wanem hap, dispela win i no inap helpim em.” Ating wanpela saveman bilong Rom long taim bilong ol aposel i bin mekim dispela tok, na dispela tok i kamapim klia wanpela tok i tru: Bilong i stap bilong yumi i gat as bilong en, yumi mas putim sampela samting olsem mak bilong winim.
Baibel i stori long sampela man i bin putim mak. Noa i wok strong inap 50 yia samting long “wokim wanpela sip” bilong ‘em wantaim meri pikinini bilong en ol i no ken bagarap.’ Profet Moses “i ting long dispela gutpela pe God i laik givim em.” (Hibru 11:7, 26) God i givim wok long Josua, senis bilong Moses, long go pait na kisim graun bilong Kenan.—Lo 3:21, 22, 28; Josua 12:7-24.
Ating aposel Pol i tingim dispela tok bilong Jisas long “autim dispela gutnius bilong kingdom bilong God long olgeta hap bilong graun” taim em i putim ol mak bilong spirit em i laik winim. (Matyu 24:14) Ol tok na driman Bikpela Jisas i givim long Pol, na wok bilong “i go long ol arapela lain manmeri . . . na autim nem bilong [Jisas] long ol,” dispela i bin kirapim Pol long wok strong long kamapim planti kongrigesen Kristen long ol hap bilong Esia Maina na Yurop.—Aposel 9:15; Kolosi 1:23.
Yes, long bipo yet i kam inap nau, ol wokboi bilong Jehova i bin tingim sampela gutpela wok bilong mekim na ol i bin inapim, na dispela i bin givim biknem long God. Olsem wanem yumi long nau i ken putim sampela mak bilong spirit long winim? Wanem sampela mak yumi ken wok long winim? Na wanem sampela samting yumi ken mekim bilong inapim ol dispela mak?
Stretpela Tingting i Mas Kirapim Yumi
Long klostu olgeta kain wok, i gat sampela samting ol man i ken putim olsem mak bilong winim, na ol man long nau i save mekim olsem. Tasol ol mak tiokratik i narapela kain long ol mak bilong graun ol man i laik winim. Long planti kain mak ol man i laik winim, bikpela samting i kirapim ol, em strongpela laik long kisim planti mani na bikpela namba na strong. Tasol i no stret sapos yumi wok long inapim wanpela mak bambai yumi ken kisim biknem na namba, a? Ol mak i givim biknem long God Jehova, em ol samting bilong lotu na wok bilong Kingdom. (Matyu 6:33) Samting i kirapim yumi long putim kain mak olsem, em pasin bilong laikim God na ol arapela na pasin bilong givim bel long God.—Matyu 22:37-39; 1 Timoti 4:7, NW.
Stretpela tingting i mas kirapim yumi taim yumi tingim ol samting bilong spirit yumi laik mekim na yumi wok long inapim—ating yumi laik mekim sampela bikpela wok moa o kamap strong long ol samting bilong spirit. Tasol maski stretpela tingting i kirapim yumi long putim ol mak, sampela taim yumi no winim. Olsem wanem yumi ken putim na inapim ol mak?
Mas i Gat Strongpela Laik
Tingim olsem wanem Jehova i wokim heven na graun. Long dispela tok “nait i go pinis na moning i kamap,” Jehova i makim ol wan wan de, o haptaim, em i bin wokim ol samting. (Stat 1:5, 8, 13, 19, 23, 31) Long kirap bilong ol wan wan de, em i save gut long samting em bai mekim insait long dispela haptaim. Na God inapim tru dispela laik bilong em long wokim ol samting. (KTH 4:11) Jop i tok, taim Jehova “i laik mekim wanpela samting, orait em i save mekim tasol.” (Jop 23:13) Yumi ken save olsem Jehova i amamas tru taim em i lukim “olgeta dispela samting [em i bin wokim] i gutpela”!—Stat 1:31.
Bilong winim ol mak yumi putim, yumi tu i mas i gat strongpela laik long inapim. Wanem samting bai helpim yumi long kisim dispela strongpela laik? Taim graun i stap nating yet, Jehova i save wanem samting bai kamap—graun bai kamap wanpela naispela ples i givim biknem na glori long em. Na olsem tasol, yumi inap strongim laik bilong yumi long inapim samting yumi tingting long mekim, long rot bilong tingim tingim ol gutpela samting yumi inap kisim long winim dispela mak. Tony i gat 19 krismas i bin mekim olsem. Em i no lusim tingting long namba wan taim em i go long wanpela brens ofis bilong ol Witnes Bilong Jehova long Westen Yurop. Kirap long dispela taim na i go, Tony i wok long tingim dispela askim, ‘Sapos mi go sindaun na mekim wok long kain ples olsem, i stap bilong mi bai i olsem wanem?’ Oltaim Tony i tingim tingim dispela samting, na em i wok strong long winim dispela mak. Em i amamas tru taim sampela yia bihain ol i orait long aplikesen bilong em long wok long brens ofis!
Taim yumi poroman wantaim ol arapela i winim pinis wanpela mak, dispela inap kirapim yumi long kisim laik long mekim tu. Jayson i gat 30 krismas, taim em i gat 13 krismas samting, em i no laik insait long wok autim tok. Tasol taim em i pinisim haiskul, em i amamas long kamap painia, olsem autim tok bilong Kingdom fultaim. Wanem samting i helpim Jayson long kisim laik long painia? Em i tok: “Mi toktok wantaim ol arapela i bin mekim wok painia na mi wok wantaim ol long autim tok na dispela i helpim tru mi.”
Raitim Long Pepa Ol Mak Yumi Laik Winim
Samting yumi gat tingting long mekim i save kamap klia tru taim yumi toktok long en. Solomon i tok, ol gutpela tok i olsem ol stik i gat sap bilong stiaim ol bulmakau—ol gutpela tok i gat strong long stiaim wokabaut bilong yumi. (Saveman 12:11, NW ) Taim yumi raitim ol dispela tok long pepa, yumi pilim tru ol dispela tok long bel na tingting. Long dispela as Jehova i tokim ol king bilong Israel long kisim wanpela buk na raitim Lo long en. (Lo 17:18) Olsem na i gutpela sapos yumi raitim long pepa ol mak yumi laik winim, na ol samting yumi bai mekim bilong inapim ol dispela mak. Na tu, yumi ken raitim ol hevi yumi ting em bai kamap bilong pasim yumi, na ol samting yumi ken mekim bilong winim ol dispela hevi. Na i gutpela tu sapos yumi luksave long ol samting yumi mas kisim save long en, ol wok yumi mas lain long mekim, na husat ol inap helpim na sapotim yumi.
Pasin bilong putim sampela mak bilong spirit long winim i bin helpim Geoffrey long stap isi. Longtaim em i bin mekim wok painia salim long wanpela longwe hap long wanpela kantri long Esia. Hevi i kamap taim meri bilong em i dai long wanpela taim em i no tingim. Taim Geoffrey i stretim pinis sampela samting, orait nau em i tingting long givim bel olgeta long wok painia long rot bilong putim sampela mak bilong winim. Em i raitim long pepa ol samting em i laik mekim, na em i beten na putim mak long kirapim 3-pela nupela Baibel stadi insait long mun. Long olgeta wan wan de, em i skelim ol wok em i mekim, na long olgeta 10-pela 10-pela de, em i skelim wok bilong em, i kamap gutpela o nogat. Olsem wanem? Em i winim dispela mak? Em i kirapim 4-pela nupela Baibel stadi na dispela i givim bikpela amamas long em!
Tingim Ol Samting Yu Ken Mekim Nau
Ating pastaim i luk olsem sampela mak yumi putim i hatwok tumas long winim. Long Tony, em yumi stori long em pastaim, mekim wok long wanpela brens ofis bilong ol Witnes Bilong Jehova i olsem wanpela driman tasol. Dispela i olsem, long wanem, em i bin bihainim pasin nogut, na em i no dediket long God. Tasol Tony i kirap stretim pasin bilong em na bai i stret wantaim ol pasin Jehova i laikim, na em i putim mak long kisim baptais. Taim em i winim pinis dispela mak, em i putim mak long kamap painia haptaim na painia oltaim, na em i raitim long kalenda det em bai kirap mekim dispela tupela wok. Taim em i painia pinis inap sampela mun, em i pilim olsem mekim wok long brens ofis i no olsem samting em i no inap mekim.
Yumi tu, taim yumi tingim ol bikpela mak yumi laik winim long bihain, i gutpela sapos yumi brukim i go long sampela liklik mak yumi ken winim pastaim. Taim yumi wok long winim ol liklik mak, yumi ken wok tu long winim wanpela bikpela mak. Sapos oltaim yumi skelim ol samting yumi mekim, i kamap gutpela o nogat, dispela bai helpim yumi long putim tingting i go long ol bikpela mak yumi laik winim. Pasin bilong beten planti taim long Jehova long ol samting yumi laik mekim, dispela tu bai helpim yumi long wok yet long inapim ol mak. Aposel Pol i tok, “yupela i mas beten oltaim.”—1 Tesalonaika 5:17.
Wok Strong na Wok Yet Long Mekim
Maski yumi bin tingim gut ol samting yumi laik mekim bihain na yumi gat strongpela laik long mekim, sampela taim yumi no inap. Ating disaipel Jon Mak i bel hevi tru taim aposel Pol i no laik kisim em i go long namba 2 raun bilong Pol long wok misineri. (Aposel 15:37-40) Disaipel Mak i mas kisim skul long dispela na mekim sampela senis long dispela mak em i bin putim long mekim sampela wok moa. Em i mekim. Bihain, Pol i mekim gutpela tok long Mak, na Mak i wok wantaim aposel Pita long Babilon. (2 Timoti 4:11; 1 Pita 5:13) Ating nambawan gutpela wok tru em i bin mekim em wok bilong raitim stori bilong laip na wok bilong Jisas.
Taim yumi wok long winim sampela mak bilong spirit, ating sampela hevi inap painim yumi tu. Yumi no ken givap, yumi mas tingim ol gutpela samting yumi mekim pinis, na skelim gen ol samting yumi laik mekim, na sapos i no gat wok moa long mekim, orait lusim. Taim ol hevi i kamap i laik pasim yumi, yumi mas wok strong na wok yet long mekim. Saveman King Solomon i tok: “Olgeta samting yu laik mekim, em yu mas putim long han bilong Bikpela. Na em bai i mekim ol dispela samting i kamap gutpela.”—Sindaun 16:3.
Tasol sampela taim hevi i kamap na nau yumi no inap mekim ol samting yumi laik mekim. Olsem: Sapos yumi gat sik o yumi mas mekim sampela wok bilong helpim famili, ating dispela bai pasim yumi long inapim sampela mak. Yumi no ken lusim tingting olsem nambawan prais tru em laip i stap oltaim oltaim—long heven o long Paradais long graun. (Luk 23:43, Nupela Testamen na Ol Sam; Filipai 3:13, 14) Yumi inap kisim olsem wanem? Aposel Jon i tok: “Man i bihainim tok bilong God, em bai i stap oltaim.” (1 Jon 2:17) Maski sindaun bilong yumi i no larim yumi long inapim wanpela mak, yumi inap wok yet long “aninit long God tasol na bihainim ol lo bilong em.” (Saveman 12:13) Ol mak bilong spirit yumi laik winim bai helpim yumi long putim tingting i go yet long bihainim laik bilong God. Olsem na yumi mas mekim wok long ol bilong givim biknem long Man Bilong Wokim yumi.
[Blok long pes 22]
Sampela Mak Bilong Spirit Yumi Ken Tingim
○ Ritim Baibel olgeta de
○ Ritim olgeta wan wan Wastaua na Kirap!
○ Mekim ol beten i kamap gutpela moa
○ Kamapim ol pasin em holi spirit i as bilong en
○ Mekim sampela wok moa
○ Mekim gut moa wok bilong autim tok na lainim ol man
○ Lain long autim tok long telefon, long kain kain taim na ples, na ol ples bisnis