I Stret o i No Stret—Bai Yu Skelim Olsem Wanem?

EM WOK bilong husat long makim wanem samting i stret na wanem samting i no stret? Dispela askim i bin kamap long bipo yet, long taim namba wan man na meri i kamap. Buk Stat long Baibel i tok, God i bin makim wanpela diwai i stap long gaden Iden olsem “diwai bilong givim gutpela save long wanem samting i gutpela na wanem samting i nogut.” (Stat 2:⁠9) God i tokim namba wan man na meri long ol i no ken kaikai pikinini bilong dispela diwai. Tasol birua bilong God, em Satan, em i tok olsem sapos ol i kaikai pikinini bilong dispela diwai ‘bai ai bilong ol i op’ na ol i “kamap wankain olsem God” na ol bai “save long wanem samting i gutpela, na wanem samting i nogut.”​—⁠Stat 2:​16, 17; 3:​1, 5; KTH 12:⁠9.

Adam na Iv i mas skelim wanpela bikpela samting​—⁠bai ol i bihainim ol lo bilong God long wanem samting i stret na wanem samting i no stret, o tupela bai bihainim lo bilong ol yet long dispela samting? (Stat 3:⁠6) Tupela i makim rot bilong bikhet long God na kisim kaikai long dispela diwai. Dispela i makim wanem samting? Taim tupela i sakim dispela tambu God i bin putim, i olsem tupela i tok, i stap bilong ol wantaim ol pikinini bilong ol bai i gutpela moa sapos ol yet i makim wanem samting i stret na wanem samting i no stret. Orait yu ting ol gutpela samting i bin kamap long pasin bilong ol man long ol i laik i stap olsem God na makim wanem samting i stret o i no stret long bihainim?

Ol Kain Kain Tingting

Buk Encyclopædia Britannica i kamapim tok bilong ol saveman bilong bipo na buk i tok, kirap long taim bilong Sokratis, em wanpela saveman Grik, na i kam inap long nau, i gat “planti tok i kamap long wanem pasin i gutpela na wanem samting i stret na wanem samting i no stret.”

Olsem: I gat wanpela lain saveman olsem tisa Grik i bin stap olsem 600 yia paslain long Krais. Ol i bin skulim ol man olsem, ol samting em planti man i ting i stret o i no stret, em i stap olsem mak ol man i bihainim. Wanpela tisa olsem i bin tok: “Ol samting i olsem i stret na i gutpela long ol lain bilong wanpela taun, em i stret na i gutpela long dispela taun sapos ol lain bilong en i ting olsem.” Sapos dispela i stap olsem mak bilong bihainim, orait Jodie, em yumi stori pinis long em, em i mas holim dispela mani, long wanem, klostu olgeta man long komiuniti, o “taun,” bilong em, ol bai mekim olsem.

Immanuel Kant, em wanpela saveman i gat nem na em i bin stap olsem 200 yia i go pinis, em i kamapim narapela tingting. Nius Issues in Ethics i tok: “Immanuel Kant na sampela moa olsem em . . . ol i ting wan wan man o meri yet i mas makim wanem rot bai em i bihainim.” Tingting bilong Kant i makim olsem: Jodie yet i ken makim wanem samting em i laik mekim, tasol samting em i makim i no ken putim hevi long ol narapela. Em i no ken larim tingting bilong planti man i makim wanem pasin i stret em i mas bihainim.

Orait Jodie i mekim wanem? Em i makim namba 3 rot. Em i bihainim tok bilong Jisas Krais, em ol Kristen wantaim ol man i no Kristen ol i litimapim ol lo bilong em i makim wanem pasin i stret o i no stret. Jisas i tokim ol man: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Meri i kirap nogut taim Jodie i givim dispela 82,000 dola long em. Meri i laik save long as na Jodie i no bin kisim dispela mani, na Jodie i toksave olsem em i wanpela Witnes Bilong Jehova, na em i tok: “Dispela mani i no bilong mi na bai mi kisim.” Jodie i tingim tru tok bilong Jisas i stap long Baibel long Matyu 19:​18, i tok: “Yupela i no ken stil.”

I Gutpela Yumi Bihainim Tingting Bilong Planti Man?

Ating sampela bai tok, pasin bilong Jodie olsem em i laik mekim pasin i stret, em i kranki tru. Tasol tingting bilong planti man i no gutpela long stiaim yumi. Olsem: Sapos yu bin i stap namel long wanpela lain em planti bilong ol i bilip olsem pasin bilong kilim ol pikinini na givim olsem ofa em i orait tasol, olsem sampela lain bilong bipo i bin ting, bai yu ting dispela pasin i stret? (2 King 16:⁠3) Sapos yu bin kamap insait long wanpela lain ol i ting pasin bilong kaikai man em i stretpela pasin, yu ting dispela bai mekim na i no gat rong long kaikai man? Maski planti man i orait long wanpela pasin, i no olsem dispela pasin i stret, nogat. Long bipo yet Baibel i mekim tok lukaut long dispela, olsem: “Sapos ol planti man i mekim pasin nogut, orait maski long bihainim pasin bilong ol.”​—⁠Kisim Bek 23:⁠2.

Jisas Krais i kamapim narapela as na yumi no ken hariap long bihainim tingting bilong ol man long wanem samting i stret o i no stret. Em i kamapim long ples klia olsem Satan em “hetman i save bosim dispela graun.” (Jon 14:30; Luk 4:⁠6) Satan i mekim wok long dispela namba bilong em long giamanim “olgeta manmeri bilong graun.” (KTH 12:⁠9) Olsem na sapos yu bihainim tingting bilong planti man long wanem samting i stret o i no stret na yu putim olsem lo bilong yu, nogut yu kisim tingting bilong Satan long wanem pasin i stret, na dispela bai nogutim yu tru.

Yu Inap Bilip Long Tingting Bilong Yu Yet?

Orait yu ting ol wan wan man yet i mas makim wanem samting i stret o i no stret? Baibel i tok: “Yu no ken ting save bilong yu yet inap helpim yu.” (Sindaun 3:⁠5) Bilong wanem yu no ken ting olsem? Long wanem, olgeta man bilong graun i bin kisim wanpela pasin kranki em inap paulim tingting bilong ol. Taim Adam na Iv i bikhet long God, ol i kisim ol lo bilong man nogut Satan na ol i laik bihainim em olsem papa bilong ol long spirit. Em nau, ol i putim wanpela kain pasin long skin bilong olgeta pikinini bilong ol​—⁠bel i save giaman na em inap luksave long wanem pasin i stret tasol em i laik bihainim pasin i no stret.​—⁠Stat 6:5; Rom 5:12; 7:​21-24.

Buk Encyclopædia Britannica i toktok long pasin ol man i ting i stret o i no stret na i tok: “Ol man i save wanem pasin i stret ol i mas bihainim, tasol ol i kirap mekim ol samting i helpim ol yet. Long ol lain bilong Wes i hatwok tru long soim ol man long as na ol i mas mekim ol pasin i stret.” Baibel i tokaut stret olsem: “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jeremaia 17:⁠9) Yu ting bai yu bilip long wanpela man em i gat nem long mekim tok giaman na tingting bilong em i nogut tru? Nogat, a?

Tru, ol man i no bilip long God ol tu inap mekim ol pasin i stret na wok long putim ol gutpela stretpela lo long bel bilong ol bilong bihainim. Tasol planti taim ol stiatok bilong ol dispela lo i stap long bel bilong ol i wankain olsem ol lo bilong Baibel long stretpela pasin yumi mas bihainim. Maski ol dispela man i tok i no gat God i stap, ol tingting bilong ol i kamapim klia olsem ol inap tru long kamapim ol pasin bilong God long wokabaut bilong ol. Dispela i kamapim klia olsem, long pastaim tru God i bin wokim ol man i wankain “olsem God yet.” (Stat 1:27; Aposel 17:​26-28) Aposel Pol i tok: “Long dispela pasin bilong ol, tok bilong lo God i bin raitim long bel bilong ol em i kamap ples klia.”​—⁠Rom 2:⁠15.

Tru, ating yumi save long wanem pasin i stret, tasol bel bilong yumi i mas i gat strong long mekim pasin i stret. Orait olsem wanem yumi ken kisim strong bilong mekim pasin i stret? Bel i save kirapim yumi long mekim ol samting, olsem na sapos yumi wok long kisim pasin bilong laikim tru God Jehova, em i As bilong ol tok bilong Baibel, dispela inap helpim yumi long kisim dispela kain strong.​—⁠Song 25:​4, 5.

Strong Bilong Mekim Gutpela Pasin

Bilong lain long laikim tru God, namba wan samting em yumi mas kisim save olsem ol lo bilong em i gutpela bilong helpim yumi. Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:⁠3) Olsem: Baibel i gat ol gutpela tok em inap helpim ol yangpela long skelim wanem pasin i stret na wanem pasin i no stret taim ol i tingting olsem ol bai dring bia o wain samting, o kisim drak, o mekim maritpasin taim ol i no marit yet. Na Baibel inap helpim ol marit long skelim ol samting ol i ken mekim bilong stretim kros, na em inap givim sampela stiatok long ol papamama bilong helpim ol long taim ol i mekim bikpela long ol pikinini.a Taim ol i bihainim ol lo bilong Baibel i makim wanem pasin i stret o i no stret, dispela bai helpim ol yangpela na lapun wantaim, maski ol i bin skul gut o nogat, o ol i bilong wanem lain o wanem kain sindaun.

Taim yumi kisim ol kaikai i gat gutpela marasin, dispela i save givim strong long yumi long mekim wok, na olsem tasol, taim yumi ritim Baibel dispela i save givim strong long yumi long bihainim ol lo bilong God long i stap bilong yumi. Jisas i tok, ol tok bilong God i olsem kaikai i save strongim yumi long i stap laip. (Matyu 4:⁠4) Na em i tok moa: “God i bin salim mi na mi kam, na kaikai bilong mi, em long bihainim laik bilong em.” (Jon 4:34) Jisas i bin kisim ol kaikai bilong spirit long Baibel na dispela i helpim em long sakim ol traim na long skelim gut ol samting em i mas mekim.​—⁠Luk 4:​1-13.

Ating pastaim bai yu hatwok long kisim ol tok bilong God long Baibel na putim long tingting na kirap bihainim ol lo bilong em. Tasol tingim: Taim yu pikinini yet ating yu no bin laikim ol kaikai i save strongim skin. Tasol bilong kamap strong, yu bin lain long laikim ol dispela gutpela kaikai. Na olsem tasol, ating pastaim bai yu hatwok long kisim pasin bilong laikim ol lo bilong God. Tasol sapos yu wok strong, bai yu kisim pasin bilong laikim tru God na kamap strong long ol samting bilong spirit. (Song 34:8; 2 Timoti 3:​15-17) Bai yu lain long bilip long Jehova na dispela bai kirapim yu long “mekim gutpela pasin.”​—⁠Song 37:⁠3.

Ating yu no inap bungim kain samting olsem i bin painim Jodie. Tasol long olgeta de yu mas skelim na tingim gut ol liklik samting na bikpela samting​—⁠i stret long mekim o nogat. Olsem na Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:​5, 6) Sapos yu lain long bilip long Jehova, dispela bai helpim yu long nau, na tu, dispela bai opim rot long yu long i stap oltaim oltaim, long wanem, pasin bilong bihainim tok bilong God Jehova i save bringim man long laip i stap oltaim.​—⁠Matyu 7:​13, 14.

[Futnot]

[Rait long pes 6]

Sapos planti man i bihainim wankain tingting, ating wanpela strongpela spirit i stiaim tingting bilong ol

[Ol Piksa long pes 5]

Inap planti handet yia pinis, ol saveman i bin mekim planti tok long wanem samting i stret na wanem samting i no stret

SOKRATIS

KANT

KONFUSAS

[Ol Kredit Lain]

Kant: From the book The Historian’s History of the World; Socrates: From the book A General History for Colleges and High Schools; Confucius: Sung Kyun Kwan University, Seoul, Korea

[Ol Piksa long pes 7]

Baibel i save helpim yumi long skelim wanem samting i stret o i no stret, na tu, em i save kirapim yumi long mekim ol samting i stret