Laip Stori
Mi Bilip Olsem Jehova Bai Lukautim Mi
Stori bilong Anna Denz Turpin
Mama i smail na i tok: “Olgeta taim yu save tok, ‘BILONG WANEM’!” Taim mi liklik, mi save givim planti askim long papamama bilong mi. Tasol Mama na Papa i no save krosim mi long dispela pasin bilong givim planti askim long ol. Tupela i skulim mi long wokim tingting na long makim ol samting mi laik mekim i stret wantaim maus bilong bel bilong mi em Baibel i skulim. Dispela skul mi bin kisim i gutpela samting tru! Wanpela de taim mi gat 14 krismas, ol Natsi i kisim papamama bilong mi i go na mi no bin lukim ol gen.
PAPA bilong mi, Oskar Denz, na mama bilong mi, Anna Maria, ol i sindaun long Lörrach, em wanpela taun bilong Jemani i stap klostu long boda bilong Swiselan. Taim tupela i yangpela, ol i insait long politik, na ol manmeri long hap tupela i sindaun long en ol i save gut na i rispektim tupela. Tasol long 1922, bihain liklik long tupela i marit, papamama bilong mi i senisim tingting bilong ol long politik na ol samting tupela i laik mekim long bihain. Mama i kirap stadi long Baibel wantaim ol Sumatin Bilong Baibel, em nem bilong ol Witnes Bilong Jehova long dispela taim bipo, na em i amamas tru long kisim save olsem Kingdom Bilong God bai kamapim gutpela taim na bel isi long graun. I no longtaim na Papa tu i kirap stadi, na ol i kirap i go long ol miting bilong ol Sumatin Bilong Baibel. Long Krismas bilong dispela yia, Papa i givim Mama wanpela buk bilong stadi long Baibel, nem bilong en The Harp of God. Mama i karim mi long Mas 25, 1923, na mi wanpela pikinini tasol bilong tupela.
Mi tingim ol gutpela samting long i stap bilong famili bilong mipela—long taim bilong san mipela i save go raun long bus bilong Black Forest, na tu Mama i lainim mi long kukim kaikai! Mi inap lukim yet long tingting olsem em i stap long haus kuk na lainim liklik pikinini meri bilong em long kukim kaikai. Tasol bikpela samting moa, papamama i lainim mi long laikim tru God Jehova na bilip long em.
Kongrigesen bilong mipela i gat 40 manmeri i givim bel long autim tok bilong Kingdom. Papamama bilong mi i save gut long rot bilong toktok wantaim ol man long Kingdom. Bipo papamama bilong mi i bin insait long planti wok bilong komiuniti, olsem na tupela i no pret long toktok wantaim ol narapela, na ol manmeri i save amamas long toktok wantaim tupela. Taim mi gat 7-pela krismas, mi tu mi laik autim tok long ol haus. Long namba wan de mi go autim tok, poroman bilong mi i givim mi sampela buk na nius na em i makim long pinga wanpela haus, na em i tok: “Yu go na askim ol long ol i laikim ol dispela buk na nius o nogat.” Long 1931, mipela i go long wanpela kibung bilong ol Sumatin Bilong Baibel long Basel, Swiselan. Papamama bilong mi i kisim baptais long dispela kibung.
Ol Bikpela Hevi na Bihain Hatpela Gavman
Long dispela taim i gat bikpela hevi long Jemani, na ol man bilong narapela narapela lain politik ol i save pait long rot. Wanpela nait, singaut bilong ol lain long haus i stap klostu long mipela i mekim na mi kirap. Tupela mangi i kilim i dai brata bilong ol long wanpela traipela fok, long wanem, tupela i no wanbel long tingting bilong em long ol samting bilong politik. Pasin bilong birua long ol Juda i go bikpela. Long skul wanpela liklik meri i mas sanap bilong em yet long wanpela hap, long wanem, em i bilong lain Juda. Mi sori tru long em, tasol mi no save olsem i no longtaim na ol man bai birua long mi tu.
Long Janueri 30, 1933, Adolf Hitler i kamap bikman bilong Gavman bilong Jemani. Mipela i sanap longwe liklik na lukim ol Natsi i putim fleg i gat mak bilong ol long haus kaunsil. Long skul tisa i skulim mipela long tok “Heil Hitler!” Long apinun mi tokim Papa long dispela samting. Em i tingting planti na i tok: “Dispela i no gutpela. ‘Heil’ i makim olsem kisim bek yumi. Sapos yumi tok ‘Heil Hitler!,’ dispela i makim olsem yumi tok Hitler bai kisim bek yumi na i no Jehova. Mi no ting dispela i stret, tasol yu yet i mas makim wanem samting yu bai mekim.”
Mi no laik salut long Hitler olsem na ol wanskul bilong mi i givim baksait long mi. Na tu, taim tisa i no lukluk sampela mangi i paitim mi. Bihain ol i lusim mi, tasol ol pren bilong mi tu i tokim mi olsem papa bilong ol i tambuim ol long pilai wantaim mi. Nogut mi bagarapim ol.
Tupela mun bihain long ol Natsi i kirap bosim Jemani, ol i tambuim ol Witnes Bilong Jehova olsem wanpela lain inap bagarapim Gavman. Wanpela lain ami bilong ol Natsi i pasim Betel long Magdeburg na tambuim mipela long mekim ol miting. Tasol mipela i stap klostu long boda, olsem na Papa i kisim ol pepa i tok orait long mipela i ken go long hapsait bilong boda long Basel, we mipela i save go long ol miting long Sande. Planti taim papa i save tok em i laik ol brata bilong mipela long Jemani i ken kisim kain kaikai bilong spirit bilong helpim ol long sanap strong na no ken pret.
Hevi Inap Painim Mipela
Taim ol i pasim ofis long Magdeburg, wanpela brata i bin wok long dispela ofis, nem bilong em Julius Riffel, em i kam long Lörrach, em as ples bilong em, bilong stretim wok bilong autim tok long pasin hait. Kwiktaim papa i tokim em olsem em i laik helpim em. Papa i toktok gut wantaim Mama na mi na em i tokim mitupela olsem em bai helpim wok bilong kisim ol buk na nius bilong Baibel long Swiselan i kam long Jemani. Em i tok olsem hevi inap painim em na ol polis inap holim em. Em i no laik bai mitupela i pilim olsem em i subim mipela long insait long dispela wok, long wanem, hevi inap painim mipela tu. Wantu Mama i tok: “Mi bai wok wantaim yu.” Tupela wantaim i lukluk long mi, na mi tok: “Mi tu bai wok wantaim yu!”
Mama i wokim wanpela paus inap long sais bilong wanpela nius Wastaua. Em bai putim buk o nius insait long en na samapim maus bilong en. Em i wokim ol poket long ol klos bilong Papa na tupela liklik trausis em mipela i werim aninit long klos bambai mipela i ken haitim ol liklik buk bilong Baibel long en. Long olgeta taim mipela i kisim ol buk na nius samting i kam bek gut long haus, mipela i save amamas tru na tok tenkyu long Jehova. Mipela i save haitim ol buk na nius long wanpela rum antap long haus.
Pastaim, ol Natsi i no ting mipela i insait long sampela kain samting. Ol i no save sutim ol askim long mipela na sekim haus bilong mipela. Tasol mipela i stretim rot long mekim wok long wanpela namba bilong toksave long ol brata spirit bilong mipela olsem wanpela hevi i kamap—em namba 4711, nem bilong wanpela sanda i gat gutpela smel. Sapos i no gutpela long ol i kam long haus, mipela bai mekim wok long dispela namba na toksave long ol. Na tu, Papa i tokim ol long lukluk i go long windo bilong haus paslain long ol i kam insait long haus. Sapos windo long han kais i op i stap, dispela i makim olsem i gat hevi na ol i no ken kam long haus.
Long 1936 na 1937, wanpela lain polis bilong Hitler ol i kolim Gestapo i holim planti tausen Witnes na putim ol long ol kalabus na ol banis kalabus nogut, na ol i mekim nogut tru long ol. Brens ofis long Bern, Swiselan, i kirap bungim ol ripot, na tu, ol i bungim sampela ripot em ol man i bin haitim na kisim i kam ausait long banis kalabus. Ol i bungim ol dispela ripot bilong raitim long wanpela buk ol i kolim Kreuzzug gegen das Christentum (Pait Long Lotu Kristen), em wanpela buk i kamapim ples klia pasin nogut ol Natsi i mekim. Mipela i bringim ol ripot i go long hapsait bilong boda long Basel, em wanpela wok mipela inap kisim bagarap long en. Sapos ol Natsi i holim mipela na lukim ol dispela pepa, wantu ol bai putim mipela i go long kalabus. Mi krai taim mi ritim stori bilong ol samting nogut i painim ol brata bilong mipela. Tasol mi no pret. Mi bilip olsem Jehova na papamama bilong mi, em ol gutpela pren bilong mi, ol bai lukautim mi.
Mi pinis long skul taim mi gat 14 krismas na mi wok olsem kuskus long wanpela stua i save salim ol samting bilong haus. Mipela i save mekim dispela wok bilong karim ol buk na nius na ripot samting i go i kam long Sarere apinun o long Sande taim Papa i kisim malolo long wok bilong em. Long olgeta tupela tupela wik mipela i save mekim dispela wok. Mipela i luk olsem wanpela famili i raun wokabaut tasol bilong kisim amamas, na inap fopela yia ol gad long boda i no stopim mipela o sekim mipela—inap long wanpela de long Februeri 1938.
Ol i Painimaut!
Mi no inap lusim tingting long pes bilong papa bilong mi taim mipela i kamap long ples we mipela i save kisim ol buk na nius klostu long Basel na mipela i lukim planti buk na nius i stap. Ol i bin holim narapela famili i save kisim ol buk na nius, olsem na mipela i gat sampela buk moa mipela i mas kisim. Long boda wanpela man bilong skelim ol paspot samting i lukluk strong long mipela na em i tokim ol man long sekim mipela. Taim ol i painim ol buk, em i makim gan long mipela na kisim mipela i go long wanpela polis ka. Taim ol polis i kisim mipela i go, Papa i holim strong han bilong mi na i tok: “No ken kamapim ol brata bilong yumi long ol. No ken tokim ol long nem bilong ol bratasista!” Mi tokim em: “Mi no inap mekim.” Taim mipela i kamap long Lörrach, ol i kisim papa bilong mi i go. Em laspela taim mi lukim em taim ol i pasim dua bilong haus kalabus.
Inap 4-pela aua, 4-pela Gestapo i sutim askim long mi, ol i laik mi mas tokim ol long nem na atres bilong sampela narapela Witnes. Taim mi no mekim, wanpela ofisa i belhat na i tok: “Mipela i gat ol narapela rot bilong mekim yu toktok!” Mi no tokim ol long wanpela samting. Bihain ol i kisim mi na Mama i go bek long haus bilong mipela, na ol i sekim haus, em namba wan taim ol i mekim olsem. Ol i kisim mama bilong mi i go na ol i salim mi i go i stap wantaim anti bilong mi, tasol ol i no save olsem em tu i wanpela Witnes. Ol i larim mi i go bek long wok, tasol ol i makim 4-pela Gestapo i sindaun long ka i stap long fran bilong haus na was long olgeta samting mi mekim, na i gat wanpela plisman i save wokabaut raun na was long strit bilong mipela.
Sampela de bihain long belo, mi kam ausait long haus na mi lukim wanpela yangpela sista i raun long baiskol i kam long mi. Taim em i kam kamap, mi lukim olsem em i laik tromoi wanpela pepa long mi. Long taim mi kisim dispela pepa, mi tanim na lukluk long ol Gestapo bilong save olsem ol i lukim samting mi mekim o nogat. Mi kirap nogut, long dispela taim stret olgeta i apim het bilong ol i go antap na ol i lap!
Dispela pepa sista i givim mi i tokim mi long i go long haus bilong papamama bilong em long apinun. Tasol ol Gestapo i was long mi, olsem na olsem wanem bai mi mekim dispela samting em inap bagarapim papamama bilong em? Mi lukluk i go long dispela 4-pela Gestapo i stap long ka na long plisman i wokabaut i go i kam long strit. Mi no save mi bai mekim wanem, na mi beten strong long Jehova i ken helpim mi. Wantu tasol, dispela plisman i go long dispela ka bilong Gestapo na em i toktok wantaim ol. Orait em i go insait long ka, na ol i draiv i go!
Long dispela taim stret anti bilong mi i wokabaut i kam. Em apinun pinis. Em i ritim dispela pepa na i tok mipela i mas i go long dispela haus olsem pepa i tok, na em i tok olsem em i ting ol brata i stretim rot bilong mi long i go long Swiselan. Taim mipela i kamap, famili bilong haus i tokim mi long sekanim wanpela man em mi no save long em, em Heinrich Reiff. Em i tokim mi olsem em i amamas long mi kamap gut na hevi i no painim mi, na em i tok em i kam bilong helpim mi long ranawe i go long Swiselan. Em i tokim mi long i go bungim em long bus bihain long hap aua.
Sindaun Bilong Mi Long Narapela Kantri
Mi bungim Brata Reiff na aiwara i kam daun long pes bilong mi, long wanem, mi bel hevi stret long lusim papamama bilong mi. Ol samting i kamap wantu tasol. Pastaim mipela i wari, tasol bihain mipela i bung wantaim ol turis na i go kamap gut long hapsait bilong boda long Swiselan.
Taim mi kamap long brens ofis long Bern, mi kisim save olsem ol brata long dispela hap i stretim rot bilong mi long ranawe. Ol i mekim gutpela pasin long mi na givim ples slip bilong mi. Mi wok long haus kuk, na mi amamas tru long mekim dispela wok. Tasol i hatwok tru long i stap long narapela kantri, na mi no save wanem samting i painim papamama bilong mi, em ol i putim tupela long kalabus inap 2-pela yia! Sampela taim, wari na tingting planti i save daunim mi tru, na mi save go long ples waswas na lokim dua na krai. Tasol long olgeta taim mi save raitim pas long papamama, na tupela i strongim mi long i stap gut long Jehova.
Pasin bilong papamama long bilip strong i kirapim mi long dediketim laip bilong mi long Jehova na kisim baptais long Julai 25, 1938. Bihain long mi stap wanpela yia long Betel, mi go wok long Chanélaz, em wanpela fam em brens long Swiselan i bin baim bilong kamapim kaikai bilong famili Betel na em i stap olsem haus bilong ol brata i ranawe long ol man i mekim nogut long ol.
Taim haptaim bilong papamama long kalabus i pinis long 1940, ol Natsi i tok ol bai larim tupela i go fri sapos ol i tokaut olsem ol i lusim bilip bilong tupela. Tupela i sanap strong long bilip, olsem na ol i salim ol i go long ol banis kalabus nogut. Ol i salim Papa i go long Dachau na Mama long Ravensbrück. Long taim bilong kol long 1941, mama bilong mi na sampela narapela meri Witnes long kalabus i no laik mekim wok bilong ol ami. Olsem na lain Natsi i givim strafe long ol. Ol i mas sanap ausait long kol inap 3-pela de na 3-pela nait, na bihain ol i putim mama na ol narapela Witnes long rum i tudak na ol i givim liklik kaikai tru long ol inap 40 de olgeta. Bihain ol i paitim ol nogut tru. Mama i dai long Janueri 31, 1942, tripela wik bihain long ol i paitim em nogut tru.
Ol i kisim papa long Dachau i go long Mauthausen long Ostria. Long dispela haus kalabus ol Natsi i save kilim i dai ol kalabusman long rot bilong subim ol long mekim ol strongpela wok na ol i no givim kaikai long ol. Tasol 6-pela mun bihain long Mama i dai, ol Natsi i kilim i dai papa bilong mi long narapela rot, olsem: Ol dokta i givim sik TB long sampela kalabusman na bai ol i ken kisim save dispela sik bai mekim wanem long man. Bihain, ol dokta i save givim sut long klok bilong kilim i dai ol dispela kalabusman. Ripot bilong ol i tok olsem klok bilong Papa i no strong, olsem na em i dai. Em i gat 43 krismas tasol long dispela taim. Sampela mun bihain tasol mi kisim save long indai bilong papamama bilong mi. Taim mi tingim bek papamama bilong mi, aiwara i save pulap yet long ai bilong mi. Tasol long dispela taim bipo na long nau tu, bel bilong mi i stap isi, long wanem, mi save olsem Mama na Papa, em tupela i tingting long kisim laip long heven, tupela i stap long han bilong Jehova.
Bihain long Namba Tu Pait, mi go long klas namba 11 bilong Wastaua Baibel Skul Bilong Gileat long New York. Em i gutpela samting tru long stadi long Baibel inap 5-pela mun! Taim mi pinis long skul long 1948, ol i salim mi i go long Swiselan bilong mekim wok olsem misineri. I no longtaim bihain, mi bungim James L. Turpin, wanpela gutpela brata em i bin winim klas namba 5 bilong Skul Gileat. Taim ol i wokim namba wan brens ofis long Teki, em i stap olsem wasman bilong brens. Mipela i marit long Mas 1951, na i no longtaim bihain mipela i kisim save olsem mipela bai kamap papamama! Mipela i go sindaun long Amerika na bihain pikinini meri bilong mipela, Marlene, i kamap long Disemba.
Insait long ol yia i go pinis, mitupela Jim i kisim bikpela amamas long mekim wok bilong Kingdom. Mi tingim yet wanpela sumatin bilong Baibel, em wanpela yangpela meri bilong Saina, nem bilong em Penny, em i bin amamas tru long stadi long Baibel. Em i kisim baptais na bihain em i maritim Guy Pierce, nau em i wanpela bilong Gavening Bodi bilong ol Witnes Bilong Jehova. Ol kain manmeri olsem i helpim mi long daunim bel hevi long papamama bilong mi i no stap.
Long kirap bilong 2004, ol brata long Lörrach, em ples bilong papamama bilong mi, ol i wokim wanpela nupela Haus Kingdom long Stich Strit. Kaunsil bilong taun i tingim ol samting ol Witnes Bilong Jehova i mekim, na ol i senisim nem bilong dispela strit na ol i kolim Denzstraße (Denz Street) bilong litimapim nem bilong papamama bilong mi. Niuspepa Badische Zeitung, i gat dispela het tok, “Bilong Tingim Tupela Marit Denz Ol i Bin Kilim i Dai: Nupela Nem Bilong Strit,” na aninit long dispela het tok nius i tok olsem papamama bilong mi “i dai long han bilong ol man long banis kalabus nogut long taim bilong gavman bilong Hitler, long wanem, tupela i sanap strong long bilip bilong ol.” Samting kaunsil bilong taun i mekim em samting mi no bin ting em bai kamap, na mi amamas tru.
Papa i save tok, mipela i mas tingim olsem Armagedon i no inap kamap long taim bilong mipela, olsem na mipela i mas stretim ol samting bilong lukautim mipela long bihain, tasol taim mipela i mekim olsem, mipela i mas bihainim stretpela pasin na tingim olsem Armagedon inap kamap tumora—em gutpela tok tru mi wok strong long bihainim long olgeta taim. Pasin bilong i stap isi na wet i hatwok, long wanem, nau hevi bilong i go lapun i mekim na mi no inap lusim haus. Tasol mi no gat tupela tingting long tok promis bilong Jehova long ol gutpela wokman bilong em: “Yu mas bilip strong long Bikpela. . . . Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—Sindaun 3:5, 6.
[Blok/Piksa long pes 29]
OL GUTPELA TOK BILONG BIPO
Long 1980 samting, wanpela meri i save stap long wanpela ples longwe liklik long Lörrach i kam raun long Lörrach. Long dispela taim, ol manmeri long taun i kisim ol samting ol i no laikim i kam long wanpela hap we ol narapela i ken sekim na kisim ol samting ol i laikim. Dispela meri i painim wanpela liklik bokis i gat ol samting olsem tret na sisis long en na em i kisim i go. Bihain, long as bilong bokis, em i painim sampela poto bilong wanpela liklik meri na ol pas ol i raitim long ol pepa bilong banis kalabus nogut. Dispela meri i kirap nogut long ol tok bilong pas na em i laik save long dispela liklik meri long poto.
Wanpela taim long yia 2000, dispela meri i lukim wanpela stori long niuspepa i toktok long wanpela so bilong ol samting i bin kamap bipo long Lörrach. Dispela niuspepa i stori long ol samting i bin painim ol Witnes Bilong Jehova na famili bilong mipela long taim bilong ol Natsi. Dispela niuspepa i gat piksa bilong mi taim mi liklik. Taim dispela meri i lukim olsem liklik meri long piksa i stap long niuspepa i wankain long piksa em i holim, em i toksave long meri i raitim stori long niuspepa long ol pas—em inap 42 olgeta! Sampela wik bihain, mi kisim ol dispela pas. Long ol pas, oltaim papamama i wok long askim anti long mi stap olsem wanem. Long olgeta taim tupela i bin tingim mi. Em i gutpela samting tru ol dispela pas i no bin bagarap na bihain long 60 yia ol i painim ol!
[Ol Piksa long pes 25]
Taim Hitler i kamap bikman, famili bilong mipela i bruk
[Kredit Lain]
Hitler: U.S. Army photo
[Ol Piksa long pes 26]
1. Brens ofis long Magdeburg
2. Lain Gestapo i holim planti tausen Witnes
[Piksa long pes 28]
Mitupela Jim i kisim bikpela amamas long wok bilong Kingdom mipela i mekim