Pasin Bilong Laikim Tru God i Mekim Ol i Stap Wanbel

TAIM kongrigesen Kristen i kamap nupela long taim bilong ol aposel, wanpela nambawan pasin bilong en​—maski lain bilong en i bilong ol narapela narapela kantri​—em pasin wanbel. Ol dispela lain i lotuim God tru ol i bilong ol kantri long Esia, Yurop, na Afrika. Sampela ol i bin i stap pris, soldia, wokboi nating, refiuji, man bilong mekim kain kain wok, ol saveman bilong wok, na bisnisman. Sampela i bilong lain Juda, na sampela em ol man bilong ol narapela lain. Pastaim planti ol i man bilong pamuk, man bilong slip wantaim man, spakman, stilman, na man bilong pulim nating mani bilong ol man. Tasol taim ol i kamap Kristen ol i lusim ol dispela pasin nogut na ol i kamap wanbel long bilip.

Wanem samting i mekim na lotu Kristen bilong pastaim inap bungim ol dispela man na ol i kamap wanbel? Wanem as na ol i stap bel isi wantaim ol wanlotu na ol narapela man tu? Bilong wanem ol i no insait long ol pait bilong ol man? Bilong wanem lotu Kristen bilong pastaim i narapela kain long ol bikpela lotu bilong nau?

Wanem Samting i Mekim na Kongrigesen i Pas Gut Wantaim?

Nambawan samting i mekim na ol wanbilip i pas gut wantaim, em ol i laikim tumas God. Ol dispela Kristen i save, nambawan bikpela samting, em ol i mas laikim tumas God tru, Jehova, long bel bilong ol, na laip bilong ol, na tingting bilong ol olgeta. Olsem: Aposel Pita em i wanpela Juda, na holi spirit i tokim em long go long haus bilong wanpela man bilong narapela kantri, em i no wanpela man Pita bai poroman wantaim em. Tasol Pita i laikim tumas Jehova na dispela i kirapim em long bihainim dispela tok. Pita na ol narapela Kristen bilong pastaim ol i pas gut wantaim God, long wanem, ol i gat stretpela save long ol pasin bilong Em, na ol samting em i laikim, na ol samting em i no laikim. Bihain olgeta manmeri i lotuim Jehova ol i save gut olsem em i laik bilong Jehova long ol i mas i stap “wanbel . . . long wankain tingting na wankain laik.”​—1 Korin 1:10; Matyu 22:37; Aposel 10:​1-35.

Na ol bilipman i bilip long Jisas Krais na dispela tu i mekim na ol i pas gut wantaim. Ol i laik bihainim gut lek mak bilong em. Em i tokim ol: “Mi bin laikim yupela tru, na olsem tasol yupela wan wan i mas laikim tru ol arapela. . . . Dispela bai i soim olgeta man olsem, yupela i disaipel bilong mi.” (Jon 13:​34, 35) I no olsem long skin tasol ol i laikim narapela narapela, nogat. Ol i mas laikim ol tru na redi long daunim laik bilong ol yet bilong helpim ol. Orait wanem samting bai kamap long dispela? Jisas i tingim ol man i bilip long em na em i beten olsem: “Mi beten . . . bai dispela olgeta man i ken i stap wanbel, olsem yu Papa, yu stap long mi na mi stap long yu. Olsem tasol mi laik bai ol i ken i stap long mitupela.”​—Jon 17:​20, 21; 1 Pita 2:21.

Jehova i kapsaitim holi spirit, o strong, bilong em long ol wokman tru bilong em. Dispela spirit i kamapim pasin wanbel namel long ol. Em i helpim ol long save gut long ol tok bilong Baibel em olgeta kongrigesen i kisim pinis na bilip long en. Ol man i lotuim Jehova ol i autim wankain tok​—olsem mekim nem bilong Jehova i stap holi long rot bilong Kingdom Bilong God long han bilong Mesaia, em wanpela gavman bilong heven em bai bosim olgeta man bilong graun. Ol Kristen bilong pastaim ol i save ol i “no bilong dispela graun.” Olsem na taim pait i kirap insait long kantri o ol i pait long narapela kantri, ol Kristen i no insait long en. Ol i painim rot bilong i stap bel isi wantaim olgeta man.​—Jon 14:26; 18:36; Matyu 6:​9, 10; Aposel 2:​1-4; Rom 12:​17-21.

Olgeta bilipman i mekim wok bilong ol long kamapim pasin wanbel. Ol i mekim olsem wanem? Ol i was gut na bai pasin bilong ol i stret wantaim Baibel. Olsem na aposel Pol i tokim ol Kristen: “Yupela i mas rausim dispela olpela pasin na tingting bilong yupela i mas kamap nupela,” na “yupela i mas kamap ol nupela manmeri.”​—Efesus 4:​22-32.

Ol i Holim Strong Pasin Wanbel

Tasol ol dispela bilipman bilong bipo ol i gat sin i stap long skin bilong ol, na sampela taim i gat ol samting i kamap na i traim pasin wanbel bilong ol. Olsem: Aposel 6:​1-6 i stori long wanpela kros i kamap namel long ol Juda Kristen i save mekim tok Grik na sampela i mekim tok Hibru. As bilong kros em olsem, ol Juda i mekim tok Grik ol i ting ol Kristen i mekim tok Hibru i no mekim gutpela pasin long ol. Tasol taim ol aposel i harim, kwiktaim ol i stretim dispela hevi na ol i mekim long pasin i stret. Bihain i gat tok i kamap long wanpela bilip, na dispela i kirapim tok pait long ol samting ol man i no Juda ol i mas mekim insait long kongrigesen Kristen. Orait ol i skelim gut dispela samting na ol i pasim tok i stret wantaim ol stiatok bilong Baibel, na olgeta i orait long tok ol i pasim.​—Aposel 15:​1-29.

Ol dispela stori i soim olsem ol dispela tok kros i no brukim ol lain bilong narapela narapela ples insait long kongrigesen Kristen bilong pastaim, o kirapim ol long strong long bihainim tingting bilong ol yet long ol samting bilong bilip na bagarapim pasin wanbel bilong ol, nogat. Bilong wanem? Long wanem, ol samting i mekim ol i stap wanbel​—olsem laikim tru Jehova, bilip long Jisas Krais, laikim tru ol narapela na daunim sampela laik bilong ol yet, larim holi spirit i soim rot long ol, holim wankain tingting long ol tok bilong Baibel, na redi long senisim pasin bilong ol​—em ol strongpela samting bilong helpim kongrigesen bilong pastaim long i stap wanbel na stap bel isi wantaim.

Wanbel Long Lotuim God Long Nau

Olsem wanem? Pasin wanbel inap kamap long dispela kain rot long nau? Yu ting ol dispela wankain samting inap wok yet long pasim ol wanbilip wantaim na helpim ol long i stap bel isi wantaim olgeta lain man long olgeta hap bilong graun? Yes, ol inap! Ol Witnes Bilong Jehova i stap wanbel insait long wanpela lain brata i stap long olgeta hap, winim 230 kantri na ailan samting. Na ol samting i mekim ol i stap wanbel, em ol dispela samting tasol i bin mekim ol Kristen bilong pastaim i stap wanbel.

Bikpela samting tru i helpim ol Witnes Bilong Jehova long i stap wanbel, em pasin bilong ol long givim bel tru long God. Olsem na ol i wok strong long i stap gut long em maski wanem ol hevi i painim ol. Na ol Witnes Bilong Jehova i bilip long Jisas Krais na ol tok em i bin skulim ol man long en. Ol dispela Kristen i laikim tru ol wanbilip na ol i daunim sampela laik bilong ol yet long mekim olsem, na ol i save autim wankain gutnius bilong Kingdom Bilong God long olgeta kantri ol i autim tok long en. Ol i amamas long tokim ol man bilong olgeta lotu, skin, kantri, na lain, long dispela Kingdom. Na tu, ol Witnes Bilong Jehova i no insait long ol samting bilong dispela graun, na dispela i helpim ol long sakim ol samting bilong politik, ol pasin na sindaun bilong ol man, na ol samting bilong bisnis, em ol i save brukim ol man. Ol Witnes i save ol i gat wok long kirapim ol man long i stap wanbel, olsem na ol i save bihainim pasin i stret wantaim ol lo bilong Baibel.

Pasin Wanbel i Pulim Ol Narapela

Planti taim dispela pasin wanbel i bin kirapim tingting bilong ol man i no Witnes. Yumi ken tingim Ilse,a bipo em i wanpela sister bilong Misin Katolik long wanpela haus sister long Jemani. Em i lukim wanem samting bilong ol Witnes Bilong Jehova na em i laikim? Ilse i tok: “Ol i gutpela lain tru. Ol i no save go insait long ol pait, na ol i no save mekim wanpela samting bilong nogutim ol narapela man. Ol i laik helpim ol man long i stap amamas long paradais long graun aninit long Kingdom Bilong God.”

Narapela em Günther, bipo em i wanpela soldia bilong Jemani na ol i salim em long Frans long taim bilong Wol Woa 2. Wanpela taim wanpela pris Talatala i mekim lotu long ol soldia long lain bilong Günther. Pris i beten askim God long helpim na lukautim ol, na helpim ol long winim pait. Taim ol i lotu pinis, Günther i sanap mekim wok bilong em long was long ol birua. Em i holim glas bilong lukluk longwe na em i lukim ol soldia bilong lain birua i bung na pris i mekim lotu. Bihain Günther i tok: “Ating dispela pris tu i beten askim God long helpim na lukautim ol, na helpim ol long winim pait. Mi bin tingting, olsem wanem na ol lotu Kristen i stap birua birua insait long dispela pait.” Günther i no lusim tingting long dispela samting. Bihain em i bungim ol Witnes Bilong Jehova em ol i no save insait long ol pait, olsem na em i go insait long bikpela lain brata bilong ol i stap long olgeta hap.

Bipo Ashok na Feema i bilong wanpela lotu bilong Is. Long haus ol i gat liklik alta bilong wanpela god. Bihain wanpela bikpela sik i painim famili bilong ol, na nau ol i kirap long glasim gut lotu bilong ol. Ashok na Feema i toktok wantaim ol Witnes Bilong Jehova na tupela i kirap nogut long ol tok bilong Baibel na long pasin laikim i stap namel long ol Witnes. Olsem na nau tupela i save wok strong long autim gutnius bilong Kingdom Bilong Jehova.

Ilse, Günther, Ashok, na Feema nau ol i stap wanbel wantaim planti milion Witnes Bilong Jehova insait long wanpela lain brata i stap long olgeta hap. Ol i bilip long tok promis bilong Baibel olsem ol samting i mekim ol i stap wanbel long lotuim God long nau, liklik taim em bai mekim olgeta lain i bihainim tok bilong God long stap wanbel. Long dispela taim bihain bai i no gat moa ol pait nogut, pasin birua, na pasin bilong brukim lain, em ol i mekim long nem bilong lotu. Olgeta manmeri bilong graun bai stap wanbel long lotuim God tru, Jehova.​—KTH 21:​4, 5.

[Futnot]

[Ol Piksa long pes 4, 5]

Ol Kristen bilong pastaim ol i bilong kain kain lain na sindaun, tasol ol i stap wanbel