Gutpela Tingting—Bilong Wanem Planti Man i No Bihainim?

WANPELA man i lukluk long samting narapela i mekim na i tok: “Man ya i mekim wanem? Olsem wanem em i no save olsem pasin em i mekim i kranki.” Narapela man i kirap nogut na i tok: “Sapos em i gat gutpela tingting em i no inap mekim olsem.” Ating yu bin harim ol kain tok olsem, a? Tasol “gutpela tingting” em wanem samting?

Gutpela tingting i makim olsem yumi mas i gat pasin bilong skelim gut ol samting na wokim gut tingting. Planti man ol i laik bai ol narapela i wokim tingting na tokim ol long ol samting ol i mas mekim. Ol i larim ol nius o TV samting, o ol wanlain bilong ol, o tingting bilong planti man, i makim ol samting ol bai mekim.

Long nau i olsem ol man i sot tru long gutpela tingting. Olsem wanem yumi inap kisim gutpela tingting? Dispela samting inap helpim yumi olsem wanem?

Olsem Wanem Yumi Inap Kisim?

Tru yumi no inap kisim kwik, tasol sapos yumi skelim gut ol samting na wok oltaim long kisim tingting i stret na pasin bilong makim gut ol samting bilong mekim, orait yumi inap tru long kisim gutpela tingting. Tingim 3-pela samting inap helpim yumi long mekim olsem.

Stadi long Baibel, na bihainim tok bilong en. Baibel i mekim ol gutpela tok i klia na ol man inap kisimgut, na em i nambawan rot bilong kisim gutpela tingting. (Efesus 1:⁠8) Aposel Pol i tokim ol Kristen: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” (Filipai 4:⁠8) Sapos yumi bihainim ol dispela tok oltaim, bai yumi makim gut ol samting bilong mekim na wokabaut wantaim savepasin.

Larim ol samting i painim yu i skulim yu. Wanpela man Swiselan i save raitim stori, em i toktok long gutpela tingting na skul yumi kisim long rot bilong ol samting i painim yumi, olsem: “Gutpela tingting i olsem . . . ol save yumi bin kisim long rot bilong ol samting i painim yumi wantaim pasin bilong skelim gut ol samting inap kamap bihain.” Tru tumas, “ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.” (Sindaun 14:15) Yumi inap kisim gutpela tingting long rot bilong ol samting yumi lukim, lainim, na ol samting i painim yumi. Isi isi yumi inap lain long mekim gut moa ol wok bilong yumi. Tasol bilong ol popaia bilong yumi i ken skulim yumi, yumi mas i gat pasin daun. Pasin bilong ol man nau long taim bilong las de, olsem litimapim nem bilong ol yet, pasin antap, na pasin bikhet, em i no mak bilong man i gat gutpela tingting.​—⁠2 Timoti 3:​1-5.

Bihainim savepasin long makim ol poroman. Ol poroman inap helpim yumi o pasim yumi long bihainim savetingting na gutpela tingting. Sindaun 13:20 i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” Yumi no gat wok long bihainim tingting bilong ol man i save sakim tok bilong God na givim baksait long tok bilong em long Baibel. Sindaun 17:12 i tok: “Sapos ol i bin stilim ol pikinini bilong mama bea na yu bungim dispela bea long rot, orait yu inap long kisim bikpela bagarap. Tasol sapos man i no gat gutpela tingting i wok long mekim kranki pasin, na yu bungim em, orait yu inap long bagarap olgeta.”

Helpim Yumi Olsem Wanem?

Pasin bilong kisim gutpela tingting i save helpim gut yumi. Yumi no les long i stap bilong yumi na yumi no save lusim nating taim. Na gutpela tingting i save helpim yumi long abrusim bel hevi i save kamap taim yumi no tingting gut pastaim na yumi mekim ol samting. Ol man i no gat pasin bilong makim gut ol samting bilong mekim ol i save givim hevi na hatwok long ol yet. Baibel i tok: “Man i no gat gutpela tingting . . . i save hatwok nating na pinisim strong bilong en.” (Saveman 10:15) Ol kain man olsem ol i save wok strong i go i go na bun bilong ol i slek olgeta, tasol hatwok bilong ol i no save kamapim wanpela gutpela samting.

Baibel i givim planti gutpela tok long yumi long pasin bilong i stap klin, toktok gut wantaim man, wok strong, na long ol samting yumi ken mekim sapos yumi stap rabis, na planti samting moa. Planti milion manmeri ol inap tokaut olsem taim ol i bihainim ol stiatok bilong Baibel, dispela i helpim ol long kamapim gutpela tingting, olsem na wok bilong ol i kamap gutpela. Tasol taim ol i no bin mekim olsem, wok bilong ol i lus nating.

Gutpela tingting i helpim yumi long mekim tru ol wok bilong yumi, winim pasin bilong bihainim nating ol lo bilong mekim wok. Tasol maski yu gat gutpela tingting, yu gat wok yet long kisim save. Sindaun 1:5 i tok: “Ol man i gat save [olsem gutpela tingting] . . . bai ol i kisim save moa yet.” Na tu, yumi mas lain long skelim gut ol tok yumi kisim save long en, na kisim stretpela tingting long en. Dispela bai helpim yumi long “bihainim pasin bilong gutpela tingting.”​—⁠Sindaun 28:⁠26.

Pasin daun i poroman wantaim gutpela tingting. Ating yumi laik mekim planti wok, tasol yumi mas bihainim gutpela tingting na mekim wok i stret long strong bilong yumi. Tru, aposel Pol i tok yumi mas “wok strong long mekim wok bilong Bikpela.” (1 Korin 15:58) Tasol yumi mas tingim tu wanpela stiatok i stap long Saveman 9:4: “Dok i gat laip i winim laion i dai pinis.” Sapos yumi lukautim gut skin bilong yumi taim yumi mekim wok bilong Jehova, ating bai yumi stap longpela taim moa na mekim yet ol wok. Gutpela tingting inap helpim yumi long skelim gut strong bilong yumi na bai yumi inap mekim ol wok yumi mas mekim tasol yumi no lusim amamas bilong yumi. Tru tumas, gutpela tingting i save helpim yumi long planti samting.

[Piksa long pes 14]

Baibel i gat planti gutpela tok bilong helpim yumi

[Piksa long pes 15]

Yumi inap kisim gutpela tingting long rot bilong ol samting yumi lukim, lainim, na ol samting i painim yumi