Ol Yangpela, Litimapim Nem Bilong Jehova!
“Yupela ol . . . yangpela man na ol yangpela meri, . . . yupela olgeta litimapim nem bilong Bikpela!”—SONG 148:7, 12.
1, 2. (a) Planti yangpela i luksave olsem i gat wanem ol tambu i stap long ol? (b) Bilong wanem ol yangpela i no ken bel hevi long ol tambu ol papamama i putim long ol?
OL YANGPELA i save gut tru long ol samting ol man i tok ol i no inap yet long mekim. Planti ol inap tokim yu long ol i mas i gat hamas krismas pastaim na bai papamama i orait long ol yet i ken brukim bikrot o ol i no mas slip hariap long nait o ol inap draivim ka. Sampela taim, yangpela inap pilim olsem planti samting em i askim papamama long em i laik mekim i gat wankain bekim tasol, “Yu wet inap yu kamap bikpela liklik.”
2 Yupela ol yangpela i mas save olsem ol papamama i ting em i savepasin long putim ol kain tambu bilong lukautim yupela. Na tu, yupela i save Jehova i amamas taim yupela i bihainim tok bilong papamama. (Kolosi 3:20) Tasol sampela taim yu pilim olsem ol dispela tambu i mekim na laip tru bilong yu i no kirap yet? Olsem wanem? Olgeta bikpela samting i tambu inap long yu kamap bikpela liklik? Nogat tru! I gat wanpela wok long nau em i bikpela samting moa winim ol narapela samting yu wet long mekim. Olsem wanem? I orait long yupela yangpela i insait long dispela wok? Yes—na God Antap Tru i singautim yupela long mekim dispela wok!
3. Jehova i singautim ol yangpela long mekim wanem gutpela wok? Bai yumi skelim bekim bilong wanem ol askim?
3 Yumi stori long wanem wok? Lukim tok bilong tim skripsa bilong dispela stadi: “Yupela ol . . . yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela!” (Song 148:7, 12) Dispela em i gutpela wok yupela inap mekim: Yupela inap litimapim nem bilong Jehova. Olsem wanem? Yupela yangpela i amamas tru long insait long dispela wok? Planti ol i pilim olsem. Bilong save long as na i stret yupela i pilim olsem yumi laik skelim 3-pela askim. Namba wan, bilong wanem yupela i mas litimapim nem bilong Jehova? Namba tu, olsem wanem yupela inap mekim gut wok bilong litimapim nem bilong em? Namba tri, em i gutpela long kirap litimapim nem bilong Jehova long wanem taim?
Bilong Wanem Yumi Litimapim Nem Bilong Jehova?
4, 5. (a) Olsem Song 148 i kamapim, yumi inap insait long wanem gutpela samting? (b) Olsem wanem ol samting i no inap toktok o wokim tingting i ken litimapim nem bilong Jehova?
4 Wanpela as tru na yumi litimapim nem bilong Jehova em i olsem: Em i Man Bilong Wokim olgeta samting. Song 148 i helpim yumi long tingim gut dispela tok tru. Tingim: Bai yu pilim olsem wanem sapos yu kam kamap long wanpela bikpela lain na ol i mekim naispela singsing tru, em singsing i save kirapim bel bilong yu? Olsem wanem sapos yu save olgeta tok bilong singsing i tru na i kamapim ol tingting yu save em i bikpela samting na i samting bilong amamas na i save strongim ol man? Bai yu gat laik long lainim dispela song na bungim nek wantaim ol man i singim dispela song? Planti bilong yumi bai i laik mekim olsem. Song 148 i soim yumi olsem kain samting olsem i painim yumi, tasol em i gutpela samting moa. Em i stori long wanpela traipela lain, em olgeta i bungim nek na litimapim nem bilong Jehova. Tasol taim yu ritim dispela song, ating bai yu luksave long samting i narakain. Em wanem samting?
5 Planti samting i wok long litimapim nem bilong God em Song 148 i stori long en i no inap toktok o wokim tingting. Olsem: Yumi ritim olsem san, mun, ol sta, ren ais, win, na ol maunten i litimapim nem bilong Jehova. Olsem wanem ol dispela samting i no gat laip inap mekim olsem? (Ves 3, 8, 9) Long wankain pasin olsem ol diwai, ol traipela pis, na ol animal i save mekim. (Ves 7, 9, 10) Olsem wanem? Yu bin lukim ol naispela kala long skai taim san i laik i go daun o lukim mun i wokabaut antap wantaim ol sta o amamas na lap taim ol animal i pilai i stap o kirap nogut taim yu lukim wanpela ples i naispela tru? Sapos olsem, orait yu “harim” pinis song bilong litimapim nem bilong God em ol samting God i bin wokim i save singim. Olgeta samting Jehova i bin wokim i kirapim yumi long tingim em olsem Man Bilong Wokim olgeta samting, na i no gat narapela man long graun o long ples antap i winim strong, save, na pasin laikim bilong em.—Rom 1:20; KTH 4:11.
6, 7. (a) Song 148 i tok husat moa i save litimapim nem bilong Jehova? (b) Wanem samting inap kirapim yumi long litimapim nem bilong Jehova? Mekim tok piksa long dispela.
6 Song 148 i stori tu olsem ol ensel na ol man bilong graun i save litimapim nem bilong Jehova. Ves 2 i stori long “ami” bilong Jehova long heven, em ol ensel, i litimapim nem bilong God. Ves 11 i singautim ol bikman, olsem ol king na ol hetman, long litimapim nem bilong God. Sapos ol strongpela ensel i kisim amamas long litimapim nem bilong Jehova, orait husat man bilong graun i ken tok em i bikpela man tumas long mekim olsem? Na bihain, long ves 12 na 13, singaut i go long yupela yangpela long litimapim nem bilong Jehova. Yupela i gat laik long mekim olsem?
7 Tingim wanpela tok piksa. Sapos yu gat wanpela gutpela pren i save tru long mekim wanpela samting—olsem pilai spot, droim piksa, o mekim musik—bai yu stori long ol pren na famili bilong yu long dispela samting, a? Yes yu bai mekim. Ol save yumi kisim pinis long Jehova inap mekim wankain samting long yumi. Olsem: Song 19:1, 2 i tok olgeta samting bilong ples antap “i save tokaut.” Na taim yumi tingim ol narapela kain samting Jehova i bin mekim, yumi no inap pasim maus, yumi mas tokim ol narapela long God bilong yumi.
8, 9. I gat wanem as na Jehova i laik bai yumi litimapim nem bilong em?
8 Narapela as na yumi litimapim nem bilong Jehova em long wanem em i laik bai yumi mekim olsem. Bilong wanem? Yu ting em samting Jehova i mas kisim long ol man bilong graun? Nogat. Yumi ol man i mas i gat man i litimapim nem bilong yumi long sampela taim, tasol Jehova i antap moa yet long yumi. (Aisaia 55:8) Em i no gat tupela tingting long em yet o long ol pasin bilong em. (Aisaia 45:5) Tasol em i laik bai yumi litimapim nem bilong em na em i amamas taim yumi mekim olsem. Bilong wanem? Yumi ken skelim tupela samting. Namba wan, em i save olsem yumi mas litimapim nem bilong em. Em i wokim yumi bilong i gat laik long kisim samting bilong spirit, yumi laik mekim lotu. (Matyu 5:3) Jehova i save amamas taim em i lukim yumi wok long inapim dispela laik, kain olsem papamama i amamas taim ol i lukim yupela i kaikai ol kaikai ol i save em bilong strongim bodi bilong yupela.—Jon 4:34.
9 Namba tu, Jehova i save ol narapela manmeri i mas harim yumi i litimapim nem bilong em. Aposel Pol i raitim tok long yangpela man Timoti olsem: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Tru tumas, taim yu skulim ol narapela long God Jehova, na litimapim nem bilong em, ol inap kisim save long em tu. Kain save inap bringim ol long laip oltaim!—Jon 17:3.
10. Wanem samting i kirapim yumi long litimapim nem bilong God bilong yumi?
10 I gat narapela as na i stret yumi litimapim nem bilong Jehova. Tingim yet dispela tok piksa long pren bilong yu i save gut tru long mekim wanpela samting. Sapos yu harim sampela i sutim tok giaman long em na bagarapim gutnem bilong em, orait ating bai yu strong moa long tokaut long ol gutpela samting em i mekim, a? Yumi save, long nau planti man i bagarapim gutnem bilong Jehova. (Jon 8:44; KTH 12:9) Olsem na ol man i laikim em tumas i pilim olsem ol i mas tokaut long pasin tru bilong em, na stretim dispela tok i no tru. Olsem wanem? Yu tu i gat laik long tokaut olsem yu laikim tru na tenkyu tru long Jehova na yu laik bai em i stap King bilong yu, na yu no laik bai Satan i bosim yu? Yu inap mekim olsem long rot bilong litimapim nem bilong Jehova. Orait, narapela askim i olsem: Bai yu litimapim nem bilong em olsem wanem?
Rot Sampela Yangpela i Litimapim Nem Bilong Jehova
11. Wanem ol stori long Baibel i soim olsem ol yangpela i ken mekim gutpela wok long litimapim nem bilong Jehova?
11 Baibel i soim olsem planti taim ol yangpela i save mekim gutpela wok long litimapim nem bilong Jehova. Olsem: I gat wanpela yangpela meri Israel em ami bilong Siria i bin holimpasim em. Em i no pret long autim tok long bosmeri bilong em long profet bilong Jehova, em Elisa. Ol i bihainim tok bilong em na bihain wanpela mirakel i kamap, na dispela i litimapim tru nem bilong Jehova. (2 King 5:1-17) Jisas tu i no bin pret long autim tok taim em i stap pikinini. I gat planti samting i bin painim Jisas taim em i stap pikinini, tasol Jehova i makim stori bilong samting i kamap taim Jisas i gat 12-pela krismas long i stap insait long Baibel. Em taim Jisas i no pret long kamapim ol askim long ol tisa long tempel long Jerusalem na ol i kirap nogut long pasin bilong em long kliagut long ol pasin bilong Jehova.—Luk 2:46-49.
12, 13. (a) Jisas i bin mekim wanem long tempel paslain liklik long taim em i dai? Dispela i mekim wanem long ol manmeri long dispela hap? (b) Jisas i ting wanem long ol tok ol yangpela mangi i mekim bilong litimapim nem bilong em?
12 Taim Jisas i bikpela pinis em i bin kirapim ol pikinini long litimapim nem bilong Jehova. Olsem: Sampela de paslain long em i dai, Jisas i bin stap long tempel long Jerusalem. Baibel i tok em i bin wokim “ol mirakel” long dispela hap. Em i rausim ol man husat i mekim dispela ples holi i kamap haus bilong ol stilman. Em i oraitim ol aipas na lek nogut. Dispela i mas kirapim olgeta man i stap long dispela hap, na moa yet ol hetman bilong lotu, long litimapim nem bilong Jehova na Pikinini bilong em, em Mesaia. Tasol tarangu, planti man long dispela taim ol i no bin mekim olsem. Ol i save God i bin salim Jisas i kam, tasol ol i pret long ol hetman bilong lotu. Tasol i gat wanpela lain i no pret long tokaut. Yu save ol i husat? Baibel i tok: “Tasol ol bikpris na ol saveman bilong lo i lukim ol mirakel em i wokim, na ol i harim ol pikinini i singaut insait long banis bilong tempel olsem, ‘Amamas long Pikinini Bilong Devit.’ Olsem na ol i bel nogut na ol i askim Jisas olsem, ‘Ating yu harim dispela tok ol i mekim?’ ”—Matyu 21:15, 16; Jon 12:42.
13 Ol pris i laik bai Jisas i tokim ol dispela mangi i wok long litimapim nem bilong em long pasim maus. Em i mekim olsem? Nogat tru! Jisas i bekim tok long ol pris olsem: “Yes, mi harim. Tasol ating yupela i no bin ritim dispela tok, ‘Ol liklik pikinini i save litimapim nem bilong yu.’ ” Em i klia tru, Jisas na Papa bilong em ol i amamas long pasin bilong ol dispela yangpela mangi. Ol dispela pikinini i mekim samting em olgeta man na meri i bikpela pinis i mas mekim, tasol ol i no mekim. Long tingting bilong ol pikinini em i klia tru ol i mas mekim wanem. Ol i lukim dispela man i wokim ol mirakel, em i no pret long autim dispela tok em i bilipim, na em i kamapim olsem em i laikim tru God na ol manmeri bilong Em. Em i tok em i Pikinini Bilong Devit, em i Mesaia—na tok bilong em i tru. Ol dispela mangi i kisim gutpela pe long bilip bilong ol; tok ol i autim i truim wanpela tok profet.—Song 8:2.
14. Ol yangpela i gat wanem ol gutpela samting em inap helpim ol long litimapim nem bilong God?
14 Yumi ken kisim wanem save long ol dispela stori? Olsem: Ol yangpela inap mekim gutpela wok long litimapim nem bilong Jehova. Planti taim ol i no hatwok long kliagut long tok tru, na ol i givim bel long kamapim bilip bilong ol. Na tu ol i gat narapela gutpela samting olsem Sindaun 20:29 i tokaut long en: “Ol yangpela man i gat strong.” Em nau, yupela ol yangpela i gat strong na pawa—ol samting bilong helpim yupela long litimapim nem bilong Jehova. Olsem wanem yupela yangpela inap yusim ol dispela gutpela samting?
Olsem Wanem Yu Ken Litimapim Nem Bilong Jehova?
15. Bilong mekim gutpela wok long litimapim nem bilong Jehova, wanem samting i mas kirapim yu?
15 Bilong mekim gut wok bilong litimapim nem bilong Jehova bel i mas kirapim yu long mekim. Yu no inap mekim gut dispela wok sapos as na yu mekim em long wanem ol arapela i laik bai yu mekim. Tingim, namba wan lo em olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) Olsem wanem? Long rot bilong stadi bilong yu yet long Baibel yu save gut long Jehova? Taim yu kisim kain save olsem bai yu laikim tru Jehova. Na rot bilong kamapim dispela pasin laikim em long litimapim nem bilong em. Taim yu klia gut na pilim tru as na yu laik litimapim nem bilong Jehova, orait nau yu redi long givim bel tru long mekim olsem.
16, 17. Pasin yumi save bihainim i gat wanem wok long litimapim nem bilong Jehova? Kamapim stori long dispela.
16 Orait nau paslain long yu tingting long wanem tok yu bai kamapim yu mas tingting long pasin yu bai bihainim. Sapos yangpela meri Israel long taim bilong Elisa em i meri bilong giaman, em i no soim rispek, na i no save mekim gutpela pasin long ol man, yu ting ol lain Siria em ol i holimpasim em bai putim yau long tok em i mekim long profet bilong Jehova? Ating nogat. I wankain long nau, ol man bai putim yau long tok bilong yu sapos ol i lukim olsem yu save rispek long ol, mekim tok tru, na bihainim gutpela pasin. (Rom 2:21) Tingim wanpela samting i bin kamap.
17 Wanpela pikinini meri long Potugal i gat 11-pela krismas i gat hevi olsem: Tisa long skul i laik subim em long insait long sampela bikpela de. Tasol bel bilong em, em Baibel i bin skulim, i gat tok long dispela. Long pasin rispek em i stori gut long tisa long as na em i no inap mekim, tasol tisa i tok bilas long em. Inap planti taim tisa i laik semim em, na tok bilas long lotu bilong em. Tasol maski tisa i mekim olsem, yangpela meri i soim rispek long tisa. Sampela yia bihain, dispela yangpela meri i go bikpela pinis na em i mekim wok painia oltaim, olsem autim tok fultaim. Long wanpela kibung distrik, em i wok long lukim ol manmeri i kisim baptais na em i luksave long wanpela bilong ol. Em dispela tisa bilong em bilong bipo! Aiwara i pundaun taim narapela i holim narapela, na tisa i tokim yangpela sista olsem em i no bin lusim tingting long pasin bilong em long soim rispek. Wanpela Witnes i bin autim tok long em, na tisa i bin stori long pasin bilong dispela sumatin bilong em. Long dispela rot em i kirap stadi long Baibel na em i kisim tok i tru. Tru tumas, pasin yumi bihainim em i wanpela strongpela rot long litimapim nem bilong Jehova!
18. Sapos yangpela i pilim hatwok long kirapim toktok long Baibel na God Jehova, em inap mekim wanem?
18 Olsem wanem? Sampela taim long skul yu pilim hatwok long kirapim tok long bilip bilong yu? I no yu tasol i pilim olsem. Tasol yu inap mekim sampela samting bilong kirapim ol narapela long askim yu long bilip bilong yu. Olsem: Sapos lo i no tambuim yu long mekim olsem, yu ken bringim wanpela buk em Baibel i as bilong en long skul na ritim long belo kaikai o long ol narapela taim i stret long mekim olsem. Ating ol wanskul bai askim yu long samting yu wok long ritim. Long rot bilong bekim askim na stori long ol samting yu yet i laikim insait long dispela buk yu ritim, yu inap toktok gut wantaim ol narapela. No ken lusim tingting long givim askim na painimaut ol wanskul i gat wanem ol bilip. Putim gut yau long tok bilong ol na stori wantaim ol long ol save yu bin kisim long Baibel. Olsem ol stori i stap long pes 29 i soim, planti yangpela i wok long litimapim nem bilong God long skul. Ol i kisim bikpela amamas long mekim olsem na ol i helpim planti man moa long kisim save long Jehova.
19. Ol yangpela i ken mekim wanem bilong mekim wok bilong ol long autim tok i kamap gutpela moa?
19 Autim tok long ol haus em i wanpela gutpela rot bilong litimapim nem bilong Jehova. Sapos yu no insait yet long dispela wok, orait putim dispela olsem wanpela mak yu laik winim. Sapos yu insait pinis long dispela wok, olsem wanem, i gat sampela mak moa yu inap putim? Olsem: No ken mekim wankain tok long olgeta haus yu go long en, painim rot bilong mekim wok i gutpela moa, askim papamama na ol narapela i gat save long kamapim sampela tok bilong helpim yu. Lain long mekim bikpela wok moa long Baibel, long mekim ol gutpela gobek, na kirapim wanpela Baibel stadi. (1 Timoti 4:15) Taim yu litimapim nem bilong Jehova long ol dispela rot, dispela bai mekim wok bilong yu i kamap gutpela moa, na bai yu amamas moa yet long autim tok.
Wanem Taim i Stret Long Kirap Litimapim Nem Bilong Jehova?
20. Bilong wanem i no stret long ol yangpela i ting ol i yangpela tumas long litimapim nem bilong Jehova?
20 Yumi stori pinis long 2-pela askim na dispela namba tri askim, em i no hatwok long bekim. Baibel i bekim stret dispela askim: “Long taim yupela i yangpela yet, yupela i mas tingim [God].” (Saveman 12:1) Tru tumas, taim bilong kirap litimapim nem bilong Jehova em nau. Ating yu laik tok: “Mi yangpela tumas long litimapim nem bilong Jehova. Mi no gat save. Mobeta mi wet inap mi bikpela liklik.” Sapos yu ting olsem yu mas save, yu no namba wan man i bin kisim dispela kain tingting. Yangpela Jeremaia i bin tokim Jehova: “Sori, God, Bikpela, mi yangpela tumas na mi no save long pasin bilong autim tok.” Jehova i strongim em na tokim em olsem i no gat as long em i pret. (Jeremaia 1:6, 7) Olsem tasol, i no gat as na yumi pret taim yumi litimapim nem bilong Jehova. Maski wanem samting nogut i kamap long yumi, Jehova inap stretim.—Song 118:6.
21, 22. Bilong wanem Baibel i tok ol yangpela husat i litimapim nem bilong Jehova ol i kain olsem wara bilong nait? Bilong wanem dispela tok piksa i save strongim yumi?
21 Olsem na mipela i laik kirapim yupela ol yangpela: No ken surik long litimapim nem bilong Jehova! Nau long taim yupela i stap yangpela em i nambawan gutpela taim bilong kirap mekim dispela wok i winim olgeta narapela wok ol man i mekim hia long graun. Taim yupela i mekim olsem, yupela i kam insait long wanpela gutpela samting tru—yupela i kam insait long wanpela famili i stap long olgeta hap bilong heven na graun em ol i litimapim nem bilong Jehova. Jehova i amamas tru olsem yupela i stap insait long dispela famili. Tingim dispela tok man bilong raitim song i mekim long Jehova: “Taim yu laik pait long ol birua ol manmeri bilong yu bai i go wantaim yu na helpim yu, na bai yupela i go antap long maunten bilong God. Olgeta nait, wara i save kamap long gras, na gras i kisim nupela strong. Na bai yu tu yu kisim strong long olgeta de.”—Song 110:3.
22 Taim san bilong moning i kisim wara i save kamap long gras long nait, dispela i save luk naispela tru, a? Dispela wara i save givim nupela strong long ol samting, ol i lait, na ol i planti tru, yumi no inap kaunim. Long ai bilong Jehova ol yangpela husat i stap gut na wok long litimapim nem bilong em long dispela taim nogut, ol i luk olsem dispela wara bilong nait. Em i klia tru olsem taim yupela i makim olsem yupela i laik litimapim nem bilong Jehova dispela i mekim Jehova i belgut tru. (Sindaun 27:11) Olsem na yupela ol yangpela, litimapim nem bilong Jehova!
Bai Yu Bekim Olsem Wanem?
• Wanem sampela bikpela as na yumi litimapim nem bilong Jehova?
• Wanem ol stori long Baibel i soim olsem ol yangpela ol inap mekim gutpela wok long litimapim nem bilong Jehova?
• Ol yangpela i ken mekim wanem bilong litimapim nem bilong Jehova long nau?
• Wanem taim i stret long ol yangpela i kirap litimapim nem bilong Jehova? Bilong wanem i olsem?
[Ol Piksa long pes 25]
Olsem wanem? Sapos pren bilong yu inap mekim gut tru wanpela wok, bai yu tokaut long ol arapela long dispela samting?
[Piksa long pes 27]
Ating ol wanskul i gat laik long save long ol bilip bilong yu
[Piksa long pes 28]
Sapos yu laik bai wok autim tok bilong yu i kamap gutpela moa, askim wanpela Witnes i gat save long helpim yu