Jehova Em i Wasman Bilong Yumi
“Bikpela em i wasman bilong mi. Olsem na mi no inap sot long wanpela samting.”—SONG 23:1.
1-3. Bilong wanem Devit i stori long Jehova i olsem wasman bilong sipsip?
SAPOS wanpela i askim yu long stori long pasin bilong Jehova long lukautim lain bilong em, bai yu stori olsem wanem? Yu bai mekim wanem tok piksa bilong soim gutpela pasin bilong Jehova long sori na lukautim gut ol gutpela wokman bilong em? Winim 3,000 yia i go pinis, King Devit i raitim naispela tok i stori long Jehova, na bilong kamapim klia gutpela pasin bilong Jehova, Devit i stori long wok em i bin mekim taim em i yangpela yet.
2 Taim Devit i stap yangpela, em i bin mekim wok olsem wasman bilong sipsip. Olsem na em i save long pasin bilong lukautim ol sipsip. Em i save olsem sapos wasman i no lukautim ol sipsip, ol inap lus na ol stilman o wel animal inap kisim ol. (1 Samuel 17:34-36) Sapos i no gat gutpela wasman, ating ol sipsip i no inap painim ol ples i gat gutpela gras we ol inap kisim kaikai long en. Taim Devit i lapun, ating em i amamas long tingim bek dispela taim bipo we em i bin lusim planti aua long bringim ol sipsip i go long ples i gat gutpela gras na em i lukautim gut ol na givim kaikai long ol.
3 Olsem na taim holi spirit i kirapim Devit long raitim stori long pasin bilong Jehova long lukautim gut lain bilong em, Devit i tingim wok em yet i bin mekim olsem wasman bilong sipsip. Namba wan tok bilong Song 23, em Devit i raitim, i tok: “Bikpela em i wasman bilong mi. Olsem na mi no inap sot long wanpela samting.” Orait nau yumi ken stori long as na dispela tok i stret tru. Song 23 bai helpim yumi long save long olsem wanem Jehova i save lukautim ol man i lotuim em, olsem wasman i save lukautim ol sipsip bilong em.—1 Pita 2:25.
Nem i Stret Long Em
4, 5. Baibel i stori olsem wanem long pasin bilong ol sipsip?
4 Long Baibel Jehova i gat planti biknem, tasol dispela biknem “Wasman” i kamapim gut pasin sori bilong em. (Song 80:1) Bilong kliagut long as na Baibel i kolim Jehova olsem Wasman, i gutpela yumi save pastaim long tupela samting: namba wan, em pasin bilong ol sipsip, na namba tu, em ol wok na pasin bilong gutpela wasman.
5 Planti taim Baibel i stori long pasin bilong ol sipsip, ol i laik i stap klostu long wasman taim wasman i mekim gut long ol (2 Samuel 12:3), ol i no save bikhet na pait (Aisaia 53:7), ol i no inap lukautim ol yet na sakim ol birua. (Maika 5:8) Wanpela man bilong raitim buk em i bin lukautim ol sipsip inap planti yia, em i tok: “Ol sipsip i no inap lukautim ol yet olsem sampela man i ting. Oltaim wasman i mas stap wantaim ol na mekim bikpela wok bilong lukautim ol, winim ol narapela animal.” Bilong i stap laip, ol sipsip i mas i gat wanpela wasman i save lukautim gut ol.—Esekiel 34:5.
6. Wanpela dikseneri bilong Baibel i stori olsem wanem long wok bilong ol wasman bilong sipsip long bipo?
6 Ol wasman bilong sipsip long bipo i save mekim wanem wok long olgeta wan wan de? Wanpela dikseneri bilong Baibel i tok: “Long bikmoning yet em i save bringim ol sipsip i kam ausait long banis sipsip, na em i wokabaut i go pas long ol na bringim ol i go long ples i gat gutpela gras ol i ken kaikai. Orait nau em i save was long ol inap long de olgeta, nogut wanpela i go nabaut na lus, na sapos wanpela i lusim lain sipsip, wasman i save wok strong long painim i go i go inap long taim em i painim pinis na kisim em i kam bek. . . . Long nait em i save bringim ol sipsip i kam bek long banis sipsip, na taim ol i wok long i go insait long dua bilong banis, em i save kaunim ol na bai em i ken save olsem i no gat wanpela i lus. . . . Planti taim em i mas was long ol long nait, nogut ol wel animal o stilman i laik kisim sampela.”a
7. Bilong wanem na sampela taim wasman i mas mekim moa yet pasin isi na pasin sori?
7 Sampela taim wasman i mas mekim pasin isi tru long ol sipsip, na em i mas mekim moa yet long ol sipsip meri i gat bel na ol pikinini sipsip. (Stat 33:13) Wanpela dikseneri bilong Baibel i tok: “Planti sipsip i save karim pikinini long arere bilong maunten, longwe long ol narapela sipsip. Long dispela taim, mama sipsip i no inap lukautim em yet, olsem na wasman i save was gut long em na kisim nupela pikinini sipsip na karim i go putim wantaim lain sipsip. Inap sampela de bihain long taim mama i karim, wasman bai karim pikinini sipsip long bros o long klos bilong em, i go inap long taim pikinini sipsip inap wokabaut.” (Aisaia 40:10, 11) Em nau, gutpela wasman i mas i gat strong na pasin bilong sori na mekim gut long ol sipsip.
8. Devit i kamapim wanem ol as na em i bilip strong long Jehova?
8 “Bikpela em i wasman bilong mi”—dispela tok i makim stret pasin bilong Papa bilong yumi long heven, laka? Taim yumi skelim ol tok bilong Song 23, yumi bai save long olsem wanem Jehova i save lukautim yumi long strong na pasin sori bilong wasman bilong sipsip. Long ves 1, Devit i tokaut long strongpela bilip bilong em olsem God bai givim olgeta samting ol sipsip i mas kisim na bai ol i “no inap sot long wanpela samting.” Long ol ves bihain long en, Devit i kamapim 3-pela samting i as na em i gat dispela strongpela bilip: Jehova i save go pas na bringim ol sipsip bilong Em, em i save lukautim ol, na em i save givim kaikai long ol. Orait nau yumi ken stori long dispela 3-pela samting.
“Em i Save Bringim Mi”
9. Devit i stori long wanem kain ples? Na olsem wanem ol sipsip inap i stap long kain ples olsem?
9 Namba 1, Jehova i save bringim, olsem go pas, long lain bilong em. Devit i tok: “Em i mekim mi i slip long gutpela gras. Na em i bringim mi i go long ol liklik wara na mi dring na mi malolo. Em i givim mi nupela strong. Na em i save bringim mi long ol gutpela rot, olsem em i tok bipo long mekim.” (Song 23:2, 3) Yumi ken tingim wanpela lain sipsip i slip long gutpela gras na ol i stap bel isi tru na i gat planti kaikai—Devit i mekim kain tok piksa olsem bilong stori long wanpela lain i stap belgut, na ol i kisim nupela strong, na ol i stap gut tru. Dispela tok, ples i gat “gutpela gras,” long tok Hibru em inap makim “gutpela ples.” Sapos ol sipsip i no gat wasman, ol yet i no inap painim gutpela ples bilong slip na kisim malolo. Wasman bilong ol i mas bringim ol i go long kain “gutpela ples” olsem.
10. Olsem wanem God i soim olsem em i bilip long yumi?
10 Jehova i save go pas long yumi olsem wanem long nau? Wanpela rot i olsem: Em i stap olsem gutpela piksa. Baibel i tokim yumi long “bihainim ol pasin em yet i save mekim.” (Efesus 5:1) Ol ves klostu long dispela ves i stori long mekim gutpela pasin long ol narapela, lusim sin bilong ol, na laikim tru ol. (Efesus 4:32; 5:2) Tru tumas, Jehova i stap gutpela piksa tru long kamapim ol dispela pasin. Orait yu ting i stret em i askim yumi long bihainim ol pasin bilong em? Yes, i stret em i mekim olsem. Dispela i soim olsem Jehova i bilip tru olsem yumi inap bihainim ol pasin bilong em. Olsem wanem yumi inap mekim olsem? God i bin wokim yumi i kain olsem em, olsem yumi inap bihainim ol pasin i stret na tingim gut ol samting bilong spirit. (Stat 1:26) Olsem na Jehova i save olsem maski yumi gat sin na yumi no gutpela tumas, yumi inap kisim ol pasin em yet i save kamapim. Tingim dispela: Gutpela God bilong yumi i bilip tru olsem yumi inap kamap olsem em. Sapos yumi bihainim pasin bilong em, em bai bringim yumi i go long wanpela gutpela ples “malolo.” Maski yumi stap namel long pasin bilong pait na bagarapim man, bai yumi “stap gut” na i stap bel isi, long wanem, yumi save God i orait long yumi.—Song 4:8; 29:11.
11. Taim Jehova i bringim ol sipsip bilong em i go, em i save tingim wanem samting? Olsem wanem dispela i kamap klia long samting em i askim yumi long mekim?
11 Taim Jehova i bringim yumi, em i save mekim pasin sori na pasin isi. Wasman i save tingim mak bilong strong bilong ol sipsip bilong em, olsem na taim em i bringim ol, em i save “wokabaut isi” wantaim ol. (Stat 33:14) Jehova tu, taim em i bringim ol sipsip bilong em i go, em i save tingim strong bilong ol na em i save “wokabaut isi” wantaim ol. Em i save tingim ol samting yumi inap mekim na ol hevi bilong yumi. I olsem em i save wokabaut isi inap long mak bilong strong bilong yumi, na em i no save askim yumi long mekim ol samting yumi no inap mekim. Tasol em i askim yumi long givim bel olgeta long mekim wok bilong em. (Kolosi 3:23) Tasol olsem wanem sapos yu lapun na yu no inap mekim wok olsem bipo yu bin mekim? O olsem wanem sapos yu gat wanpela bikpela sik na dispela i pasim yu? Long kain taim olsem, pasin bilong givim bel olgeta long God, em i wanpela gutpela samting tru. Yumi olgeta i narapela narapela kain. Pasin bilong givim bel olgeta i makim olsem yu mekim wok bilong God inap tru long mak bilong strong bilong yu yet. Maski yumi gat sik na yumi no inap wok strong, Jehova i amamas long yumi givim bel olgeta long lotuim em.—Mak 12:29, 30.
12. Lo Bilong Moses i kolim wanem pasin i soim olsem Jehova i save “wokabaut isi” taim em i bringim ol sipsip bilong em i go?
12 Bilong pilim gut pasin bilong Jehova long “wokabaut isi” wantaim ol sipsip taim em i bringim ol i go, yumi ken tingim tok em Lo Bilong Moses i mekim long sampela ofa bilong tekewe asua. Jehova i laik bai ol i givim ol gutpela ofa em bel bilong ol i kirapim ol long givim. Tasol Lo i makim ol kain ofa ol man inap givim. Lo i tok: “Sapos . . . em i sot long mani na em i no inap long baim sipsip o meme, em i mas kisim tupela pisin ol i kolim balus na bringim i kam.” Na olsem wanem sapos em i no gat mani bilong baim tupela pisin? Em i ken kisim “gutpela plaua” na givim olsem ofa. (Wok Pris 5:7, 11) Dispela i soim yumi olsem Jehova i no bin singaut long samting man bilong mekim ofa i no inap givim long em. Pasin bilong God i no save senis, olsem na yumi save em i no inap singaut long samting yumi no inap givim—em i amamas long kisim wanem ol samting yumi inap givim, na dispela pasin bilong em i mekim gut bel bilong yumi. (Malakai 3:6) Yumi ken amamas tru long gutpela Wasman olsem i bringim yumi!
“Mi No Ken Pret Long Samting Nogut”
13. Long Song 23:4, olsem wanem Devit i mekim tok olsem wanpela pren? Bilong wanem yumi no kirap nogut long dispela?
13 Devit i kamapim namba 2 as na em i bilip strong long Jehova: Jehova i save lukautim ol sipsip bilong em. Em i tok: “Maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi. Mi lukim yu i holim stik ol wasman bilong sipsip i save holim, olsem na bel bilong mi i stap isi.” (Song 23:4) Orait nau, Devit i toktok long Jehova olsem pren bilong em na i kolim em olsem “yu.” Yumi no kirap nogut long dispela, long wanem, Devit i stori long God i bin helpim em long stap strong na karim ol hevi i painim em. I olsem Devit i bin wokabaut long planti ples nogut i tudak tru—planti taim bagarap i laik painim em. Tasol em i no larim pret i daunim em, long wanem, em i pilim olsem God i stap wantaim em—i olsem God i holim “stik ol wasman bilong sipsip i save holim” na i redi long helpim em. Dispela save i mekim gut bel bilong Devit na i helpim em long go klostu moa long Jehova.b
14. Baibel i tok wanem long Jehova i save lukautim yumi? Tasol dispela i no makim wanem samting?
14 Olsem wanem Jehova i save lukautim ol sipsip bilong em long nau? Baibel i tok, i no gat wanpela birua—olsem spirit nogut o man—inap pinisim ol sipsip bilong Jehova long graun. Jehova i no inap larim dispela samting i kamap. (Aisaia 54:17; 2 Pita 2:9) Tasol dispela i no makim olsem Wasman bilong yumi bai banisim yumi na i no gat wanpela hevi inap painim yumi, nogat. Ol hevi i save painim ol man bilong graun, ol i save painim yumi tu, na pasin birua i save painim yumi olsem i save painim olgeta Kristen tru. (2 Timoti 3:12; Jems 1:2) Ating bai i gat sampela taim i olsem yumi “wokabaut long ples nogut na bikpela tudak.” Olsem: Ating klostu indai i painim yumi, long wanem, ol man i mekim nogut long yumi o bikpela sik i painim yumi. O ating taim nogut i painim wanpela yumi laikim tumas na klostu em i dai, o indai i painim em. Long ol dispela taim bilong hevi i olsem tudak tru, Wasman bilong yumi i stap wantaim yumi, na em bai lukautim yumi. Em bai mekim olsem wanem?
15, 16. (a) Olsem wanem Jehova i save helpim yumi long karim ol hevi i laik pasim yumi? (b) Kamapim wanpela ekspiriens long olsem wanem Jehova i save helpim yumi long taim bilong hevi.
15 Jehova i no tok promis long wokim mirakel na pasim ol hevi o bagarap i laik kamap long yumi.c Tasol yumi ken bilip tru olsem Jehova bai helpim yumi long winim ol hevi i painim yumi. Em inap givim savetingting long yumi na bai yumi inap karim hevi bilong “ol kain kain traim.” (Jems 1:2-5) Wasman bilong sipsip i save holim stik bilong rausim ol wel animal i laik bagarapim sipsip, na tu, long dispela stik em i save subim sipsip isi tasol bilong stiaim em i go long stretpela rot. Jehova inap “subim yumi isi tasol” long rot bilong wanpela wanbilip, bambai yumi ken bihainim wanpela tok bilong Baibel em inap helpim yumi long daunim sampela hevi long i stap bilong yumi. Na tu, Jehova inap givim strong long yumi bilong karim hevi. (Filipai 4:13) Long rot bilong holi spirit em inap givim “bikpela strong” long yumi. (2 Korin 4:7) Spirit bilong God inap helpim yumi long karim ol hevi na traim em Satan i putim long yumi. (1 Korin 10:13) Em nau, yumi save olsem Jehova i redi oltaim long helpim yumi, na dispela i mekim gut bel bilong yumi.
16 Tru tumas, maski yumi stap long wanem ples nogut bilong tudak, i no olsem yumi mas wokabaut wanpis long dispela ples, nogat. Wasman bilong yumi i stap wantaim yumi na em i save helpim yumi long ol rot em pastaim yumi no klia gut long en. Tingim stori bilong wanpela elda Kristen husat i kisim sik kensa long kru. Em i tok: “Pastaim mi ting olsem ating Jehova i kros long mi o em i no laikim mi. Tasol mi tingting strong olsem mi no ken lusim Jehova. Mi beten na kamapim hevi bilong mi long em. Na Jehova i helpim mi—planti taim em i mekim gut bel bilong mi long rot bilong ol bratasista. Planti ol i tingim ekspiriens bilong ol yet long taim ol i gat bikpela sik na ol samting ol i bin mekim bilong karim dispela hevi, na ol i kamapim ol gutpela tok bilong helpim mi. Ol gutpela tok bilong ol i kirapim tingting bilong mi olsem dispela hevi i painim mi em i no narapela kain samting. Ol i helpim mi gut, olsem na mi bilip tru olsem Jehova i no kros long mi. Tru, sik bilong mi i givim hatwok yet long mi, na mi no save wanem samting bai kamap. Tasol mi bilip tru olsem Jehova i stap wantaim mi na em bai wok yet long helpim mi long karim dispela hevi.”
“Yu Redim Gutpela Kaikai Bilong Mi”
17. Devit i stori olsem wanem long Jehova long Song 23:5? Bilong wanem dispela tok i no narapela kain long tok piksa bilong wanpela wasman bilong sipsip?
17 Orait nau Devit i kamapim namba 3 as na em i bilip strong long Wasman bilong em: Jehova i save givim kaikai long ol sipsip bilong em, na em i givim planti kaikai tru long ol. Devit i tok: “Yu redim gutpela kaikai bilong mi long ples klia na ol birua bilong mi ol i lukim mi. Yu kisim mi i kam sindaun wantaim yu, na yu lukautim mi gutpela tumas.” (Song 23:5) Long dispela ves, Devit i stori long Wasman bilong em olsem wanpela man i save givim planti kaikai na wara long ol man i stap wantaim em. Dispela tupela tok piksa—olsem gutpela wasman i save tingim ol sipsip, na wanpela man i save givim planti kaikai long ol man i stap wantaim em—ol i no narapela narapela kain. Long wanem, gutpela wasman i mas save long ples i gat gutpela gras bilong ol sipsip na wara inap long ol na bai ol sipsip i “no inap sot long wanpela samting.”—Song 23:1, 2.
18. Wanem samting i soim olsem Jehova em i Man bilong givim planti kaikai long yumi?
18 Yu ting Wasman bilong yumi i save givim planti kaikai long yumi? Tru tumas, em i save mekim olsem! Tingim planti kain kain gutpela kaikai bilong spirit yumi save kisim long nau. Long rot bilong lain wokboi i gat gutpela tingting, Jehova i bin givim yumi ol gutpela buk na nius na ol gutpela tok i kamap long ol miting, na ol liklik na bikpela kibung—em olgeta i save inapim yumi long ol samting bilong spirit yumi mas kisim. (Matyu 24:45-47) Tru tumas, yumi no sot liklik long kaikai bilong spirit. “Wokboi i gat gutpela tingting” i bin prinim planti milion Baibel na ol buk na nius samting bilong helpim yumi long stadi long Baibel, na yumi inap kisim long 413 tok ples samting. Ol dispela kaikai bilong spirit em Jehova i givim, ol i kain kain—sampela em “susu,” olsem ol as tok bilong Baibel, na sampela em “strongpela kaikai,” olsem ol strongpela tok bilong Baibel. (Hibru 5:11-14) Olsem na taim sampela hevi i painim yumi, o yumi mas wokim tingting long sampela samting, yumi inap painim ol tok bilong helpim yumi. Sapos yumi no gat ol dispela gutpela kaikai bilong spirit, yumi bai lus tru, a? Tru tumas, Wasman bilong yumi i save givim planti kaikai tru long yumi!—Aisaia 25:6; 65:13.
‘Bai Mi Stap Long Haus Bilong Yu’
19, 20. (a) Long Song 23:6, Devit i kamapim wanem bilip bilong em? Olsem wanem yumi inap kisim dispela wankain bilip? (b) Stadi i kamap bihain long dispela bai stori long wanem samting?
19 Devit i tingim gutpela pasin bilong dispela Man i save was long em na lukautim em long kaikai, na em i tok: “Bikpela, bai yu lukautim mi gut, na olgeta de mi stap laip bai yu marimari long mi. Na bai mi stap oltaim oltaim long haus bilong yu.” (Song 23:6) Devit i mekim dispela tok, long wanem, em i tenkyu tru long Jehova na bilip long Em—em i tenkyu long ol samting Jehova i bin givim long em na em i bilip long ol samting Jehova bai mekim bihain. Devit, pastaim em i wasman bilong sipsip, em i stap bel isi, long wanem, em i save olsem sapos oltaim em i stap klostu long Wasman bilong em long heven—i olsem em i stap long haus bilong Jehova—oltaim Jehova bai lukautim em na mekim gut long em.
20 Yumi ken tenkyu tru long ol dispela naispela tok i stap long Song 23! Devit i kamapim stret tru pasin bilong Jehova long bringim, lukautim, na givim kaikai long ol sipsip bilong em. Ol gutpela tok Devit i bin mekim, ol i stap gut long Baibel bambai yumi tu i ken bilip tru olsem Jehova em i Wasman bilong yumi. Yes, sapos yumi stap klostu long Jehova, em bai lukautim yumi olsem gutpela Wasman inap oltaim oltaim. Jehova em i nambawan Wasman bilong yumi, na yumi olsem ol sipsip bilong em, tasol yumi yet i gat wok long wokabaut wantaim em. Stadi i kamap bihain long dispela bai stori long ol samting yumi mas mekim bilong wokabaut wantaim em.
[Ol Futnot]
b Devit i bin raitim planti song i litimapim nem bilong Jehova, long wanem, em i bin kisim bek Devit long han bilong ol birua.—Lukim ol het tok bilong Song 18, 34, 56, 57, 59, na 63.
c Lukim stori “God i Kirap na Pasim Ol Hevi—Em Bai Mekim Olsem Wanem?” long Wastaua bilong Oktoba 1, 2003.
Yu Inap Tingim?
• Bilong wanem i stret long Devit i stori long Jehova i olsem wanpela wasman bilong sipsip?
• Olsem wanem Jehova i save bihainim gutpela tingting long go pas na bringim yumi?
• Olsem wanem Jehova i save helpim yumi long stap strong na karim ol hevi?
• Wanem samting i soim olsem Jehova em i Man bilong givim planti kaikai long yumi?
[Piksa long pes 18]
Olsem wanpela wasman bilong sipsip long Israel, Jehova i save go pas na bringim ol sipsip bilong Em