Laip Stori

Save Long Samting i Stret na Mekim

STORI BILONG HADYN SANDERSON

Jisas i bin tokim ol aposel bilong em: “Nau yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.” (Jon 13:17) Tru tumas, ating yumi save wanem samting i stret, tasol sampela taim i hatwok long mekim! Tasol mi winim pinis 80 krismas, na insait long dispela taim mi mekim wok misineri inap 40 yia, na mi bilip tru olsem dispela tok bilong Jisas i tru. Taim yumi mekim ol samting God i tokim yumi long mekim, yumi stap amamas. Mi laik stori long dispela samting.

LONG 1925, taim mi gat 3-pela krismas, papamama i go harim wanpela tok bilong Baibel long ples bilong mipela, long Newcastle, Australia. Nem bilong dispela tok, “Planti Milion Man i Stap Nau Ol i No Ken i Dai,” na taim mama i harim, em i bilip olsem em i painim pinis tok i tru, na em i kirap long go oltaim long ol miting Kristen. Tasol i no longtaim na papa i les long harim tok bilong Baibel. Em i no orait long nupela bilip bilong mama na em i tok, sapos mama i no lusim dispela bilip, em bai lusim famili. Mama i laikim tumas papa na em i laik bai famili i stap gut wantaim. Tasol em i save em i mas bihainim tok bilong God, na em i strong long mekim ol samting i stret long ai bilong God. (Matyu 10:​34-39) Papa i lusim mipela, na bihain long dispela mi lukim em long wan wan taim tasol.

Taim mi tingting i go bek long dispela taim, mi amamas long pasin bilong mama long i stap gut long God. Disisen bilong em i bin helpim mi na bikpela susa bilong mi, Beulah, long kisim planti gutpela samting bilong spirit i kam inap long nau. Na tu, dispela i skulim mitupela long wanpela bikpela samting​—taim mipela i save pinis long wanem samting i stret, mipela i mas wok strong long mekim.

Ol Samting i Traim Bilip

Ol Sumatin Bilong Baibel, em nem bilong ol Witnes Bilong Jehova long bipo, ol i helpim gut famili bilong mipela. Bubu meri i kam sindaun wantaim mipela na em tu i kisim tok i tru bilong Baibel. Em wantaim mama i kamap gutpela poroman tru long autim tok, na gutpela pasin bilong tupela i mekim na ol man i rispek long ol.

Ol brata Kristen i mekim gut long mi na ol i skulim mi gut long autim tok. I no longtaim na mi lain long yusim wanpela kat i gat ol tok bilong Baibel long en na ol man i ken ritim. Na mi save pilaim ol tok bilong Baibel long masin pikap, na mi insait long wok bilong pasim bikpela toksave long bros na baksait na wokabaut long bikrot bilong taun. Mi hatwok long mekim dispela samting bikos mi save pret long ol man. Tasol mi save long samting i stret long mekim, na mi strong long mekim olsem.

Taim mi pinis long skul, mi kisim wok long beng na mi save raun mekim wok tu long ol narapela beng i stap aninit long en na ol i stap nabaut long New South Wales. I no gat planti Witnes long dispela hap, tasol skul ol brata i bin givim long mi i helpim mi long holimpas bilip bilong mi. Mama i save raitim ol pas i strongim mi long ol samting bilong spirit.

Ol dispela pas i helpim mi long taim stret. Wol Woa 2 i kirap pinis na gavman i singautim mi long go insait long ami. Maneja bilong beng em i strongpela man bilong lotu na em i wanpela kepten long ami bilong hap mi stap long en. Mi tokim em olsem mi Kristen na mi no save insait long ol pait, olsem na em i kolim tupela rot mi ken bihainim​—lusim lotu bilong mi, o lusim wok bilong mi long beng! Orait bihain mi go long ples bilong putim nem bilong go insait long ami. Maneja bilong beng i stap na taim mi go kamap long tebol em i lukluk i stap na em i laik save wanem samting bai kamap. Mi no orait long sainim nem bilong mi long pepa, olsem na ol ofisa i belhat. Tasol mi strong long mekim samting i stret. Jehova i helpim mi na mi stap bel isi na sanap strong. Bihain mi harim olsem sampela bikhetman bilong pait i wok long painim mi, olsem na kwiktaim mi pulimapim ol samting bilong mi long sutkes na mi kalap long tren na lusim taun.

Taim mi go bek long Newcastle, mi mas i go sanap long kot wantaim 7-pela brata moa i no laik go insait long ami. Mipela kot pinis na mipela i kisim 3-pela mun kalabus wantaim strongpela wok bilong mekim. Tru, haus kalabus i no gutpela ples bilong stap long en, tasol mi mekim samting i stret na mi kisim ol gutpela blesing. Taim mipela i lusim pinis kalabus, wanpela wankalabus, em wanpela Witnes nem bilong em Hilton Wilkinson, em i singautim mi i go wok long bisnis bilong em long wokim ol poto. Taim mi go, mi bungim wanpela meri na bihain em i kamap meri bilong mi, nem bilong em Melody, em tu i wok long dispela ples. Taim mi lusim kalabus, mi kisim baptais bilong makim olsem mi dediket pinis long Jehova.

Mekim Wok Autim Tok Fultaim

Taim mitupela Melody i marit pinis, mipela i kirapim bisnis bilong mipela yet long wokim ol poto long Newcastle. I no longtaim na mitupela i gat planti wok tru, na dispela i mekim na sik i kisim mipela na mipela i no strong tumas long ol samting bilong spirit. Long dispela taim Ted Jaracz, em i wok long brens ofis bilong ol Witnes Bilong Jehova long Australia na nau em i insait long Gavening Bodi, em i toktok wantaim mipela long ol mak bilong spirit em mipela i laik winim. Em nau, mitupela i pasim tok long salim bisnis bilong mipela na holim ol samting inap tasol long mipela. Long 1954 mipela i baim wanpela liklik haus ka na i go sindaun long Ballarat long Victoria, na mipela i kirap mekim wok painia, olsem autim gutnius fultaim.

Mipela i wok wantaim liklik kongrigesen long Ballarat na Jehova i blesim wok bilong mipela. Pastaim i gat 17 manmeri i save kam long ol miting, tasol insait long 18 mun namba i go antap na inap 70 ol i save kam. Orait bihain ol i singautim mi long mekim wok sekit long Saut Australia. Inap 3-pela yia mipela i raun lukim ol kongrigesen long biktaun Adelaide na long hap bilong wara Murray we ol i save planim ol rop wain na olkain muli. Man! I stap bilong mipela i senis tru! Mipela i amamas long wok wantaim ol gutpela bratasista. Em i olsem gutpela pe i kamap long rot bilong mekim ol samting mipela i save em i stret!

Wok Misineri

Long 1958 mipela i toksave long brens ofis bilong Australia olsem mipela bai go long “Laik Bilong God” Kibung Intenesenel long New York long dispela yia. Ol i bekim pas na salim sampela pepa bilong go long skul Gileat bilong ol misineri long Amerika. Mipela i gat 35 krismas samting, olsem na mipela i ting krismas bilong mipela i abrusim mak bilong go long Gileat. Tasol mipela i salim pepa i go na ol i singautim mipela long go long namba 32 klas. Namel long dispela kos mipela i kisim toksave long kantri mipela bai wok misineri long en​—em India! Pastaim mipela i tingting planti, tasol mipela i laik mekim ol samting i stret olsem na mipela i kisim dispela asainmen.

Mipela i kisim sip na i go kamap long Bombay (nau ol i kolim Mumbai) long wanpela bikmoning long 1959. Planti handet wokboi i slip nabaut long bris. Ol samting mipela i smelim i narakain tru. Taim san i kam antap, mipela i save dispela em i ples hat. Em i namba wan taim bilong mipela long stap long ples i hat olsem! Tupela marit i wok misineri, em Lynton na Jenny Dower, em ol i bin wok painia wantaim mipela long Ballarat, ol i wetim mipela. Tupela i kisim mipela i go long brens ofis bilong India, em wanpela liklik flet i stap antap long wanpela haus long taun. Inap 6-pela volantia bilong Betel i stap long dispela flet. Brata Edwin Skinner, em i bin mekim wok misineri long India kirap long 1926, em i tokim mipela long baim tupela bek olsem ruksak bilong pulimapim ol samting na redi bilong taim mipela i go long asainmen bilong mipela. Planti man bilong raun long tren ol i save karim dispela kain bek, na long ol yia bihain mipela tu i mekim bikpela wok long en.

Mipela i stap tupela de long tren na mipela i kam kamap long asainmen bilong mipela long Tiruchchirappalli, wanpela biktaun i stap long Madras provins long hap saut, (nau ol i kolim Tamil Nadu). Long dispela hap mipela i bung wantaim 3-pela painia salim bilong India em ol i autim tok long dispela hap i gat 250,000 manmeri long en. Mipela i no gat planti samting long haus. Wanpela taim mipela i holim liklik mani olsem 12 kina tasol. Tasol taim dispela mani i pinis, Jehova i no lusim mipela. Mipela kisim dinau long wanpela man i stadi long Baibel na rentim wanpela haus we mipela i ken mekim ol miting tu long en. Wanpela taim mipela i sot long kaikai na wanpela neiba i kukim kaikai i gat planti kari na givim long mipela. Mi laikim tru dispela kaikai, tasol em i pait tru long maus!

Wok Bilong Autim Tok

Sampela man long Tiruchchirappalli i save long tok Inglis, tasol klostu olgeta i save mekim tok Tamil. Olsem na mipela i wok strong tru long lainim sampela liklik tok mipela i ken mekim wok long en long taim mipela i autim tok. Dispela i mekim na planti man bilong dispela hap i rispek long mipela.

Mipela i amamas tru long autim tok long ol haus. Ol India i save mekim gut long ol man i go long haus bilong ol, na planti ol i singautim mipela i go insait na dring ti samting. Em i ples hat tru, olsem 40 digri samting, olsem na mipela i amamas long dispela pasin bilong ol. Paslain long autim tok long ol, mipela i mas toktok long ol samting bilong mipela yet. Planti taim ol manmeri bilong haus i askim mitupela meri bilong mi: “Yupela i bilong we? Yupela i gat sampela pikinini? Bilong wanem yupela i no gat pikinini?” Orait nau ol i save tokim mipela long wanpela gutpela dokta em inap helpim mipela! Tasol ol dispela kain tok i givim rot long ol long save long mipela na mipela i ken stori long as na wok bilong mipela long skulim ol man long Baibel em i bikpela samting.

Planti manmeri mipela i autim tok long ol, ol i bilong lotu Hindu​—em i gat ol kain kain bilip i narapela kain tru long lotu Kristen. Mipela i no wok long tok pait long ol bilip na tok bilong lotu Hindu. Mipela i autim gutnius bilong Kingdom Bilong God tasol​—na gutpela samting i kamap long en. Insait long 6-pela mun inap olsem 20 manmeri i kirap kam long ol miting long haus misineri bilong mipela. Wanpela em i ensinia, nem bilong em Nallathambi. Bihain em wantaim pikinini man bilong em, Vijayalayan, i helpim 50 manmeri long kamap wokman bilong Jehova. Vijayalayan i wok tu long brens ofis bilong India inap sampela yia.

Go Long Narapela Narapela Ples

Mipela i no winim yet 6-pela mun long India na ol i singautim mi long kamap namba wan wasman distrik bilong India. Mipela i mas raun long olgeta hap bilong India, na stretim ol samting bilong wokim ol kibung na wok wantaim ol lain i gat 9-pela tok ples. Em i bikpela wok tru. Mipela i pulimapim ol klos samting bilong 6-pela mun long ol bokis kapa na long ol ruksak, na mipela i kisim tren na lusim taun Madras (nau ol i kolim Chennai). Dispela hap mipela i raun long en i bikpela inap olsem 6,500 kilomita, olsem na mipela i no malolo long raun. Wanpela taim mipela i pinisim kibung long biktaun Bangalore long hap saut long wanpela Sande. Orait nau mipela i kisim tren na i go long hap not long Darjeeling long as bilong ol maunten Himaleya bilong mekim narapela kibung long wik antap. Darjeeling em i longwe tru, inap olsem 2,700 kilomita, na mipela i mas senisim tren inap 5-pela taim.

Taim mipela i kirap long dispela wok, mipela i bin soim piksa wokabaut long ol man, nem bilong en The New World Society in Action. Dispela piksa i soim ol long bikpela wok em oganaisesen bilong Jehova long graun i mekim long olgeta hap. Planti taim i gat bikpela lain i save bung, inap sampela handet. Wanpela taim mipela i soim piksa long wanpela lain i stap arere long rot. Mipela soim piksa i stap na ol traipela klaut bilong ren i kamap. Wanpela taim bipo wanpela samting i bin kamap na ol i mas pasim piksa, na ol lain bilong lukim piksa ol i kros na i laik pait, olsem na mi soim yet piksa, tasol mi hariapim na bai em i pinis kwik. Tasol gutpela tru, piksa i pinis na nau ren i kam daun.

Long ol yia bihain long en, mitupela Melody i raun long klostu olgeta hap bilong India. Olgeta wan wan hap i gat ol kaikai na bilas na tok ples bilong ol yet, na ol ples tu i narapela narapela kain. I olsem mipela i raun long narapela narapela kantri. Tru tumas, ol samting Jehova i wokim ol i kain kain na i gutpela tru! Na i wankain tu long ol animal samting bilong India. Wanpela taim mipela i kem insait long bikbus bilong Nepal na mipela lukim wanpela bikpela taiga. Em i naispela animal stret. Dispela i strongim tru laik bilong mipela long i stap long Paradais we bel isi bai stap namel long man na ol animal.

Stretim Ol Wok Bilong Kongrigesen

Long dispela taim bipo, ol brata long India i mas lain long bihainim gut ol pasin em oganaisesen bilong Jehova i bin putim. Long sampela kongrigesen ol man i save sindaun long narapela sait bilong haus miting na ol meri i sindaun long narapela sait. Ol miting i no save kirap long taim stret. Long wanpela ples, ol i save paitim strong belo bilong singautim ol lain bilong autim tok bilong Kingdom i kam long miting. Na long sampela hap, ol i save kam long miting long taim ol i lukim san i kam antap inap long wanpela mak. Sampela taim kibung i no save kamap, na sampela taim wasman sekit i no save kam lukim kongrigesen. Ol brata i gat laik long mekim samting i stret, tasol ol i mas lain long mekim.

Long 1959, oganaisesen bilong Jehova i kamapim Skul Bilong Wok Kingdom. Dispela skul i kamap long olgeta hap bilong graun i helpim ol wasman sekit, painia salim, misineri, na ol elda bilong kongrigesen long mekim gut ol wok bilong ol olsem Baibel i makim. Taim dispela skul i kirap long India long Disemba 1961, mi stap olsem tisa bilong klas. Isi isi, ol save ol i kisim long dispela skul i helpim ol kongrigesen long kantri na ol i wok long kamap strong hariap. Taim ol brata i save pinis long wanem samting i stret, spirit bilong God i kirapim ol long mekim dispela samting.

Ol bikpela kibung tu i strongim bel bilong ol brata na helpim ol long i stap wanbel. Wanpela kibung mi save tingim yet, em “Gutnius Bilong i Stap Oltaim” Kibung Intenesenel i bin kamap long New Delhi long 1963. Ol Witnes bilong olgeta hap bilong India i bin raun inap planti tausen kilomita bilong kam long dispela kibung, na sampela i mas tromoi olgeta mani bilong ol long mekim olsem. I gat 583 bratasista bilong 27 narapela kantri tu ol i kam long dispela bung, na dispela em i namba wan taim ol Witnes bilong India inap bung na poroman wantaim bikpela lain brata bilong ol narapela kantri.

Long 1961, ol i singautim mitupela Melody long i go wok long Betel long Bombay, na bihain mi insait long Brens Komiti. Bihain mi kisim ol narapela wok. Inap planti yia mi mekim wok olsem wasman son long sampela hap bilong Esia na Midel Is. I gat sampela tambu long wok bilong autim tok long planti bilong ol dispela kantri, olsem na ol Witnes bilong ol dispela hap ol i mas ‘tingim gut pastaim ol samting ol i laik mekim, na no ken tingting long mekim wanpela rong.’​—Matyu 10:16.

Wok i Go Bikpela na Ol Senis

Long 1959, taim mipela i kam nupela long India, i gat 1,514 pablisa i autim tok long India. Long nau dispela namba i go bikpela inap 24,000. Tupela taim mipela i mas i go sindaun long ol nupela brens ofis insait o klostu long Bombay. Orait long Mas 2002, lain bilong Betel i go sindaun long nupela haus brens gen, em ol i wokim klostu long Bangalore, long hap saut bilong India. I gat 240 lain bilong Betel i wok long dispela nupela brens ofis, na sampela i mekim wok bilong tanim tok bilong ol buk na nius samting i go long 20 tok ples.

Mitupela Melody i amamas long wetim taim bilong go sindaun long Bangalore, tasol sik i painim mipela na mipela i mas i go bek long Australia long 1999. Nau mitupela i wok long Betel long Sydney. Maski mipela i lusim pinis India, mipela i laikim yet ol gutpela pren na ol pikinini bilong mipela long spirit ol i stap long India. Mipela i amamas tru long kisim ol pas long ol.

Mitupela Melody i tingting bek long 50 yia samting mipela i bin mekim wok bilong God fultaim na mipela pilim olsem mipela i bin kisim gutpela samting tru long en. Bipo em wok bilong mipela long kisim ol poto na bai i gat piksa bilong man i stap oltaim. Tasol wok bilong mipela long helpim ol man long mekim ol samting na bai God i no lusim tingting long ol, dispela em i gutpela moa. Em nau, disisen bilong mipela long putim laik bilong God i go pas i opim rot na mipela i mekim planti gutpela samting tru long laip bilong mipela! Tru tumas, taim yumi mekim ol samting God i tok i stret long mekim, yumi save stap amamas!

[Ol Mep long pes 15]

(Bilong save ol dispela rait i stap we long pes, lukim buk o magasin)

INDIA

New Delhi

Darjeeling

Bombay (Mumbai)

Bangalore

Madras (Chennai)

Tiruchchirappalli

[Ol Piksa long pes 13]

Hadyn na Melody long 1942

[Piksa long pes 16]

Lain bilong Betel long India, 1975