Rispek na Amamas Long Yu Yet na Ol Narapela​—Dispela Samting Bai Kamap

“Yumi mas kamapim wanpela nupela pasin bilong graun ​—wanpela i gutpela moa yet​—wanpela nupela pasin we olgeta man i save rispek oltaim long ol narapela.”​—YUNAITET STETS PRESIDEN HARRY TRUMAN, SAN FRANCISCO, CALIFORNIA, U.S.A., EPRIL 25, 1945.

BIHAIN long Wol Woa 2 i gat planti man husat i gat wankain tingting olsem Presiden Truman, na ol i ting samting i bin painim yumi inap skulim yumi na dispela i ken helpim yumi long kamapim “wanpela nupela pasin bilong graun” we olgeta man bai rispek long olgeta narapela man. Tasol sori tru, ol samting i kamap long taim bilong yumi i kamapim klia olsem pasin bilong rispek long narapela i no stap. Ol man i mekim nabaut long pasin bilong “rispek oltaim long ol narapela.” As bilong dispela hevi i no ol man, nogat. Nambawan birua bilong ol man i as bilong dispela hevi.

As Bilong Dispela Hevi

Baibel i tok dispela birua em Satan, wanpela ensel nogut, na kirap long taim bilong Adam na Iv na i kam inap nau, em i bin salensim rait bilong God long bosim olgeta samting. Kirap long taim em i toktok wantaim Iv long gaden Iden, em i laik pulim ol manmeri long lusim wok bilong lotuim Man Bilong Wokim ol. (Stat 3:​1-5) Tingim ol samting nogut i painim Adam na Iv taim ol i bihainim tok bilong Satan! Taim ol i sakim lo God i bin givim ol long prut tambu, ol i “hait” long Jehova. Bilong wanem ol i hait? Adam i tokaut olsem: “Mi pret na mi hait. Long wanem, mi stap as nating.” (Stat 3:​8-10) Pasin bilong pas gut wantaim Papa bilong em long heven i senis, na tu, tingting Adam i holim long em yet i senis. Em i pilim sem na em i sem long stap long ai bilong Jehova.

Bilong wanem Satan i laik bai Adam i sem na i no amamas long em yet? Long wanem, God i wokim man i kamap olsem God yet, olsem piksa bilong Em, na Satan i amamas long lukim man i mekim samting i bagarapim dispela piksa i soim biknem bilong God. (Stat 1:27; Rom 3:23) Dispela i helpim yumi long save long as na pasin bilong semim na daunim narapela i bin kamap planti taim tru. Satan “em giaman god bilong dispela graun” na em i wok long kamapim dispela pasin nau ‘long dispela taim sampela bikman i wok long daunim ol arapela manmeri na mekim nogut long ol.’ (2 Korin 4:4; Saveman 8:9; 1 Jon 5:19) Olsem wanem? Dispela i makim olsem pasin bilong rispektim narapela na man i amamas long em yet i pinis olgeta?

Jehova i Save Soim Rispek Long Ol Man

Tingim i stap bilong Adam na Iv long gaden Iden paslain long tupela i mekim sin. Ol i gat planti kaikai, gutpela wok, na tupela wantaim olgeta pikinini ol bai kamapim ol inap i stap oltaim oltaim, no gat sik. (Stat 1:28) Olgeta samting long i stap bilong ol i kamapim klia gutpela laik bilong God.

Olsem wanem? Tingting bilong Jehova long soim rispek long ol man i senis taim Adam na Iv i mekim sin? Nogat. Tupela i stap as nating na ol i pilim sem. Tasol God i tingim ol na em i wokim “klos long skin bilong animal” bilong senisim ol lip bilong diwai fik ol yet i bin samapim. (Stat 3:​7, 21) God i no larim ol i sem i stap, nogat, em i soim rispek long ol.

Bihain, taim Jehova i lukautim lain Israel, em i sori long ol pikinini, papamama bilong ol i dai pinis, ol meri, man bilong ol i dai pinis, na ol manmeri bilong ol arapela lain​—planti taim ol manmeri i save mekim nogut long ol dispela kain manmeri na pikinini. (Song 72:13) Olsem: Taim ol i wok long bungim wit, pikinini bilong diwai oliv na pikinini wain, ol i no ken i go bek namba 2 taim na kisim sampela i stap yet. Nogat. God i tokim lain Israel long larim ol dispela samting i stap “na ol manmeri bilong ol arapela lain na ol pikinini, papa bilong ol i dai pinis, na ol meri, man bilong ol i dai pinis, ol i ken kisim.” (Lo 24:​19-21) Taim ol i bihainim ol dispela lo, i no gat ol man i stap nating na singaut long mani samting, na tu, olgeta man i gat gutpela wok bilong mekim maski ol i stap rabis.

Jisas i Bin Soim Rispek Long Ol Man

Taim Pikinini Bilong God, Jisas Krais, i bin stap hia long graun, em i soim rispek long ol arapela. Olsem: Taim em i stap long Galili, wanpela man em sik lepra i pulap long em, i bin kam long Jisas. Bilong lepraman i no ken givim sik long ol arapela, Lo Bilong Moses i tok lepraman i mas singaut: “Mi no klin. Mi no klin.” (Wok Pris 13:45) Tasol dispela man i no bin singaut olsem taim em i kam klostu long Jisas. Nogat. Em i brukim skru na putim pes i go daun long graun na i tokim Jisas: “Bikpela, sapos yu laik, yu inap long mekim mi i kamap klin.” (Luk 5:12) Jisas i bin mekim wanem? Jisas i no krosim man na tok em i brukim Lo, na tu, em i no givim baksait long dispela man. Nogat. Em i soim rispek long lepraman taim em i holim em na tok: “Mi laik. Yu kamap klin.”​—Luk 5:13.

Long sampela narapela taim, Jisas i bin soim olsem em i no gat wok long tatsim man bilong oraitim sik bilong em​—sampela taim em i stap longwe tru long sikman em i oraitim. Tasol long dispela taim em i bin holim man. (Matyu 15:​21-28; Mak 10:​51, 52; Luk 7:​1-10) “Sik lepra i pulap tru long bodi bilong em,” olsem na i luk olsem inap planti yia i no gat wanpela man i bin tatsim em. Yumi ken ting olsem taim Jisas i holim em, dispela i mas mekim bel bilong dispela man i stap isi! Lepraman i gat laik long sik bilong em i mas pinis. Tasol pasin Jisas i bihainim long oraitim em i bin helpim lepraman long narapela rot​—man hia i kisim bek pasin bilong rispek na amamas long em yet. Yu ting i gat as na yumi ken ting olsem dispela kain pasin rispek i stap long nau? Sapos dispela pasin i stap, olsem wanem ol man bai kamapim long narapela?

Lo i Save Kirapim Man Long Rispek Long Narapela

Jisas i kamapim wanpela tok em planti man i ting em i nambawan tok bilong helpim ol man long pas gut wantaim: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Dispela gutpela lo i save kirapim man long soim rispek long ol arapela, na wet long ol arapela i bekim wankain pasin long em.

Taim yumi skelim ol samting i bin kamap long bipo, yumi luksave olsem ol man i no save bihainim dispela lo tumas​—planti taim ol i sakim. Wanpela man, yumi ken kolim Harold, i tok: “Bipo mi save amamas long daunim tru ol arapela. Mi inap mekim sampela sotpela tok bilong paulim na semim ol, na sampela taim mi mekim ol i krai.” Tasol wanpela samting i bin kamap na i kirapim Harold long senisim pasin em i save mekim long ol arapela. Em i tok: “Sampela Witnes Bilong Jehova i kirap long kam lukim mi. Taim mi tingim sampela tok na pasin mi bin mekim long ol mi save sem. Tasol ol i no givap, na isi isi, tok bilong Baibel i go daun long bel bilong mi na i kirapim mi long senis.” Long nau, Harold i mekim wok elda long wanpela kongrigesen Kristen.

Samting i bin kamap long Harold i kamapim klia olsem, “tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. . . . Olsem na em i save gut tru long olgeta tingting na laik bilong bel bilong yumi.” (Hibru 4:12) Tok Bilong God i gat pawa long wok insait long bel bilong man na senisim tingting na pasin bilong em. Dispela em i wanpela bikpela samting long pasin bilong rispektim ol arapela​—bel i mas kirapim yumi long helpim ol, i no long mekim nogut long ol, na bilong soim ona long ol, i no daunim ol.​—Aposel 20:35; Rom 12:10.

Stretim Bek Pasin Bilong Givim Rispek

Em dispela wankain laik i save kirapim ol Witnes Bilong Jehova long toktok wantaim ol narapela long ol gutpela samting Baibel i tok bai kamap bihain. (Aposel 5:42) Pasin bilong “autim . . . gutpela tok bilong samting i gutpela moa” em i nambawan rot long soim rispek long ol arapela. (Aisaia 52:​7, NW) Insait long dispela “samting i gutpela moa” em pasin bilong “kamap nupela man,” dispela bai mekim na yumi kilim i dai pasin bilong “bel i kirap long mekim ol pasin nogut,” olsem pasin bilong semim na daunim ol arapela. (Kolosi 3:​5-10) Na tu, Jehova i tingting pinis long pinisim ol samting na ol tingting i save mekim na narapela i no save rispek long narapela. Na em bai pinisim tu dispela man husat i kirapim ol man long daunim ol arapela, em Satan. (Daniel 2:44; Matyu 6:​9, 10; KTH 20:​1, 2, 10) Taim ‘olgeta samting long graun i save tru long Bikpela,’ orait long dispela taim tasol bai olgeta man i rispek long ol arapela.​—Aisaia 11:9.

Mipela i singautim yu long kisim save long dispela gutpela hop tru. Long rot bilong bung wantaim ol Witnes Bilong Jehova, bai yu yet i kisim save olsem pasin bilong bihainim ol stiatok bilong Baibel i save kirapim ol man long soim rispek long ol arapela. Na bai yu kisim save long olsem wanem klostu nau Kingdom Bilong God bai kamapim wanpela nupela pasin bilong graun “i gutpela moa yet”​—wanpela nupela pasin we “olgeta man i save rispek oltaim” long ol narapela na pasin bilong daunim na semim narapela i no inap kamap gen.

[Blok/Piksa long pes 6]

Ol i Bihainim Tru God na Rispek Long Ol Yet

Long taim bilong Wol Woa 2, gavman Natsi i no laikim ol bilip bilong ol Witnes Bilong Jehova, olsem na ol i bin salim moa long 2,000 Witnes i go long ol kalabus nogut. Wanpela meri, Gemma La Guardia Gluck, i bin stap long kalabus nogut bilong Ravensbrück, na long buk bilong em, My Story, em i stori long pasin bilong ol Witnes long ol i no lusim bilip bilong ol, em i tok: “Ol Gestapo [wanpela lain polis bilong Hitler] i bin tokaut olsem sapos i gat wanpela Sumatin Bilong Baibel i laik sainim pepa i tokaut olsem em i givim baksait long ol bilip bilong em, orait ol bai larim em i go fri na ol i no inap mekim nogut moa long em.” Dispela meri i stori long ol Sumatin Bilong Baibel husat i tok nogat long sainim dispela pepa: “Ol i laik kisim pen na stap isi na wetim nupela taim.” Bilong wanem ol i mekim olsem? Magdalena, em i winim 80 krismas na yumi bin kamapim sampela tok bilong em long stori i kamap paslain long dispela, em i tok: “Pasin bilong stap gut long Jehova em i bikpela samting tru, winim olgeta samting mipela inap mekim bilong i stap laip. Bilong rispek na amamas long mipela yet, mipela i mas stap strong na no ken lusim bilip bilong mipela.”a

[Futnot]

[Piksa long pes 5]

Jisas i bin soim rispek long ol manmeri em i oraitim

[Piksa long pes 7]

Ol Witnes Bilong Jehova i save soim rispek long ol arapela taim ol i “autim . . . gutpela tok bilong samting i gutpela moa”