Pasin Bilong Tok Tru—Yu Ting Ol Narapela Tasol i Mas Mekim?
WANPELA meri i gat 16 krismas i tok: “Mi no laikim tru pasin bilong mekim tok giaman, na mi no laikim tru taim ol narapela i giamanim mi!” Yumi olgeta i save pilim olsem. Taim narapela i givim tok long yumi—maski long rot bilong maus o pas samting—yumi laik bai em i tok tru tasol. Tasol olsem wanem long yumi yet? Taim yumi givim tok long narapela, yumi save tok tru tasol?
Wanpela lain i bin givim askim long sampela man long Jemani na planti i tok olsem: “Pasin bilong tok giaman long ol liklik samting bambai man i ken lukautim em yet o ol narapela, dispela i no gat rong long en.” Na wanpela niusman i tok: “Pasin bilong tok tru oltaim em i gutpela pasin, tasol em samting i no gat amamas bilong en.”
Olsem wanem? Yumi laik bai ol narapela i mekim tok tru, tasol yumi pilim olsem i gat as na sampela taim yumi yet i no ken mekim tok tru? Pasin bilong mekim tok tru, dispela em i bikpela samting o nogat? Pasin bilong tok giaman inap kamapim wanem samting?
Pasin Bilong Tok Giaman i Kamapim Hevi
Tingim sampela hevi em pasin bilong tok giaman inap kamapim: Tok giaman namel long tupela marit na insait long famili inap kamapim pasin we narapela i no bilip moa long narapela. Pasin bilong tok baksait inap bagarapim gutnem bilong narapela. Taim ol wokman i giaman, nau kampani i mas apim pe bilong ol samting ol i salim. Taim man i wokim pepa bilong takis na i no baim stret ol takis, nau gavman i sot long mani bilong baim ol samting bilong helpim ol man. Taim kampani i givim wok long man bilong mekim wok painimaut na dispela man i giaman long samting em i painim, dispela i save bagarapim gutnem bilong kampani na kampani bai pinisim em long wok. Pasin bilong kisim kwik mani em pasin giaman i as bilong en, dispela inap mekim na man i lusim olgeta mani bilong em. Olsem na yumi ken save i gat as na God Jehova i nolaik tru long “pasin bilong mekim tok giaman” na “tok giaman long kot”!—Sindaun 6:16-19.
Tru tumas, pasin bilong tok giaman inap nogutim yumi olgeta olsem wanpela lain na yumi wan wan tu. Olsem na bilong wanem ol man i save giaman? Na yu ting pasin bilong i no kamapim stret wanpela tok em i wankain long pasin bilong mekim tok giaman? Bai yumi stori long bekim bilong ol dispela askim na sampela askim moa long stori i kam bihain.
[Piksa long pes 3]
Tok giaman namel long tupela marit i save kamapim pasin we narapela i no bilip moa long narapela