Laip Stori

As na Mi Amamas Long Kamapim Disaipel

Stori bilong Pamela Moseley

Woa i stap long Inglan long 1941, taim mama i kisim mi i go long Leicester long wanpela kibung bilong ol Witnes Bilong Jehova. Mipela i harim Joseph Rutherford i mekim wanpela spesel tok long ol pikinini. Taim mitupela Mama i kisim baptais long dispela kibung, mi luksave olsem ol bratasista em ol i bin helpim mipela long kamap strong long ol samting bilong lotu, ol i amamas tru. Long dispela taim mi no luksave yet olsem bikpela amamas i save kam long pasin bilong kamapim ol disaipel bilong Jisas Krais.

LONG 1940 mipela i kirap stadi long Baibel. Mi tingim yet dispela de nogut long Septemba 1939 taim Wol Woa 2 i bin kirap. Mi lukim aiwara i pundaun long pes bilong mama bilong mi, na em i wok long askim olsem: “Bilong wanem ol manmeri bilong dispela graun i no inap i stap bel isi?” Papamama bilong mi ol i bin insait long ami long taim bilong Wol Woa 1, na ol i bin lukim ol samting nogut tru i bin kamap. Mama i go long pris bilong lotu Angliken long Bristol na givim dispela askim long em. Pris i tok tasol: “Long olgeta taim i gat ol woa i bin stap, na long olgeta taim bihain bai i gat ol woa i stap.”

Tasol i no longtaim bihain na wanpela lapun meri i kam lukim mipela long haus. Em i wanpela Witnes Bilong Jehova. Mama i givim wankain askim long em: “Bilong wanem ol manmeri bilong dispela graun i no inap i stap bel isi?” Dispela Witnes i tok ol woa i insait long mak i soim olsem yumi stap long taim bilong las de bilong pasin nogut i stap long nau. (Matyu 24:​3-​14) I no longtaim na pikinini meri bilong em i stadi long Baibel wantaim mipela. Ol i stap namel long ol manmeri i amamas long lukim mipela i kisim baptais. Bilong wanem pasin bilong kamapim disaipel i mekim ol manmeri i amamas tru? Bihain, mi kisim save long dispela. Orait nau mi laik stori long sampela samting mi bin lain long en insait long 65 yia bilong mekim wok bilong kamapim disaipel.

Kisim Amamas Long Mekim Wok Tisa

Mi kirap autim tok bilong Kingdom long Bristol taim mi gat 11-pela krismas. Wanpela brata i bin givim mi wanpela pikap na wanpela kat i gat ol tok bilong Baibel i stap long en na em i tok: “Orait nau yu go lukim olgeta manmeri i stap long ol haus long hapsait bilong rot.” Olsem na mi wanpela tasol i kirap autim tok. Mi pret tru. Mi pilaim wanpela tok bilong Baibel na bihain mi soim kat long man bilong haus, na dispela kat i kirapim ol man long kisim sampela buk bilong Baibel.

Sampela yia bihain, ol i kirapim mipela long ritim sampela tok bilong Baibel long ol man taim mipela i go lukim ol long ol haus. Pastaim, pasin bilong mi long sem i mekim na i hatwok long mi long toktok wantaim ol man em mi no save long ol na kamapim sampela skripsa bilong Baibel long ol. Tasol isi isi mi kisim strong long mekim dispela wok, na long dispela taim mi kirap amamas tru long mekim. Sampela man i ting mipela i wanpela lain bilong salim tasol ol buk long ol man, tasol taim mipela i ritim na kamapim mining bilong sampela skripsa bilong Baibel long ol, ol i luksave olsem mipela i man bilong skulim ol narapela long Baibel. Mi amamas tru long mekim dispela wok, olsem na mi laik mekim bikpela wok moa. Long Septemba 1955, mi kirap autim tok fultaim olsem wanpela painia.

Ol Gutpela Samting i Kamap Sapos Yumi No Les Hariap

Namba wan samting mi lain long wok bilong autim tok i olsem: Pasin bilong wok strong na no ken les hariap inap kamapim gutpela samting. Wanpela taim mi lusim nius Wastaua wantaim wanpela meri, nem bilong em Violet Morice. Taim mi kam bek lukim em, em i opim dua bikpela, foldim tupela han antap long bros bilong em, na em i harim gut ol tok bilong Baibel mi kamapim long en. Long olgeta taim mi go lukim em, i luk olsem em i gat laik tru long harim tok. Tasol taim mi tokim em long stadi long Baibel wantaim em, em i tok: “Nogat. Taim ol pikinini i bikpela, bai mi stadi.” Mi bel hevi tru! Baibel i tok i gat “taim bilong painim samting i lus na taim bilong lusim samting.” (Saveman 3:6) Mi tingting olsem, mi no ken lusim em, olsem givap long go lukim em.

Wanpela mun bihain, mi go bek na stori long sampela skripsa moa wantaim Violet. I no longtaim na em i kirap stadi long Baibel long dua bilong haus long olgeta wik. Bihain em i tok: “Ating gutpela yu kam insait long haus, a?” Man! Violet i kamap gutpela wanbilip na pren bilong mi! Yes, Violet i kisim baptais na kamap wanpela Witnes Bilong Jehova.

Wanpela taim Violet i kirap nogut tru long kisim save olsem man bilong em i bin salim haus bilong ol na i bin lusim em. Gutpela tru, wanpela Witnes pren i helpim em, na long dispela apinun yet em i painim narapela haus. Em i laik tenkyu long Jehova, na em i pasim tok long bel olsem em bai mekim wok painia long laip olgeta bilong em. Taim mi lukim olsem spirit bilong Jehova i strongim em long givim bel tru long lotu i tru, mi kisim save long as na pasin bilong kamapim disaipel i givim bikpela amamas long yumi. Yes, mi laik mekim dispela wok long laip olgeta bilong mi.

Long 1957, ol i makim Mary Robinson na mi long mekim wok painia long hap bilong ol faktori long Rutherglen long Glasgow, Skotlan. Mipela i autim tok long taim bilong win, ren, na ais, tasol ol gutpela samting i kamap long dispela. Wanpela de mi bungim Jessie. Mi amamas long stadi long Baibel wantaim em. Man bilong em, Wally, em i wanpela Komiunis, pastaim em i no laik toktok wantaim mi. Taim em i stadi long Baibel na kisim save olsem Kingdom Bilong God tasol inap kamapim gutpela sindaun long ol manmeri, em i amamas tru. Bihain, tupela wantaim i kamap man bilong kamapim disaipel.

Long Namba Wan Taim Yumi Inap Kisim Tingting Kranki

Bihain mipela i kisim nupela asainmen long Paisley, long Skotlan. Wanpela de, taim mi autim tok long dispela hap, wanpela meri i pasim dua long pes bilong mi. Tasol i no longtaim na em i kam painim mi bilong tok sori long mi. Taim mi kam bek long wik bihain, em i tok: “Mi pilim olsem mi pasim dua long pes bilong God. Mi mas kam painim yu.” Nem bilong em Pearl. Em i tokim mi olsem em i bel hevi tru long sampela pren na wanblut bilong em na em i beten askim God long painim wanpela pren tru. Em i tok: “Na long dispela taim yu kam long haus bilong mi. Nau mi save olsem yu tasol yu dispela pren tru.”

I hatwok long i stap pren bilong Pearl. Haus bilong em i stap antap tru long wanpela maunten, na mi mas wokabaut i go antap. Taim mi wokabaut i go long haus bilong em bilong kisim em i go long namba wan miting, win na ren i mekim na klostu mi pundaun. Taim ambrela bilong mi i bruk, mi tromoi i go. Inap 6-pela mun bihain long em i pasim dua long pes bilong mi, Pearl i dediket long God na i kisim baptais long wara.

I no longtaim bihain na man bilong em i kirap stadi long Baibel, na inap liklik taim bihain, em i go autim tok wantaim mi long ol haus. Ren i pundaun olsem em i save mekim long olgeta taim. Em i tok: “No ken wari, mi save sanap long dispela kain ren inap planti aua bilong lukim soka, olsem na mi inap mekim wankain samting bilong mekim wok bilong Jehova.” Oltaim mi amamas long pasin bilong ol Skotlan long sanap strong.

Mi amamas tru taim mi go bek long dispela ples inap planti yia bihain na mi lukim olsem klostu olgeta manmeri mi bin stadi wantaim ol, ol i sanap strong yet long bilip! Dispela em i bikpela amamas bilong wok bilong kamapim disaipel. (1 Tesalonaika 2:​17-​20) Long 1966, taim mi mekim pinis wok painia inap 8-pela yia long Skotlan, ol i singautim mi i go long Wastaua Baibel Skul Bilong Gileat bilong skulim mi long kamap misineri.

Autim Tok Long Narapela Kantri

Ol i makim mi long go long Bolivia, long wanpela taun long ples hat, em Santa Cruz, na i gat wanpela kongrigesen long dispela taun i gat olsem 50 pablisa. Dispela taun i kirapim mi long tingim ol kauboi taun long ol muvi. Sapos mi tingim bek ol yia bilong mi long mekim wok misineri, ol narakain samting i no bin painim mi. Olsem: I no gat wanpela taim pukpuk i laik kaikaim mi, ol lain raskol i laik paitim mi, mi lus long ples drai, o lus long solwara. Nogat. Tasol long mi, pasin bilong kamapim ol disaipel em i gutpela samting moa.

Namba wan meri mi bin stadi wantaim em long Baibel long Santa Cruz em Antonia. Mi hatwok long skulim ol man long Baibel long tok ples Spen. Wanpela taim, liklik mangi bilong Antonia i tok: “Mama, taim meri hia i toktok, em i save mekim ol popaia bilong mekim mipela i lap, a?” Bihain Antonia na pikinini meri bilong em Yolanda ol i kamap disaipel. Yolanda i gat wanpela boipren ol i kolim Dito, na em i stadi long Yunivesiti bilong kamap loya. Dito tu i kirap stadi long Baibel na em i kam long ol miting bilong mipela. Taim mi stadi wantaim em, mi lain long narapela samting long pasin bilong skulim ol man long tok i tru bilong Baibel: Sampela taim yumi mas subim man liklik.

Taim Dito i lusim sampela stadi, mi tokim em: “Dito, Jehova i no fosim yu long sapotim Kingdom bilong em. Yu yet i mas makim samting yu laik mekim.” Taim em i bekim tok olsem em i laik mekim wok bilong God, mi tokim em: “Yu gat ol piksa bilong wanpela lida bilong ol lain i laik daunim gavman. Sapos wanpela visita i kam lukim yu na em i lukim ol dispela piksa, yu ting em bai ting yu makim pinis olsem yu sapotim Kingdom Bilong God?” Dispela tok i subim em liklik long skelim wanem samting em i laik mekim.

Tupela wik bihain, wanpela pait i kirap insait long kantri bilong daunim gavman, na ol stiuden bilong yunivesiti i kirap pait wantaim ol polis long gan. Dito i singaut long pren bilong em: “Kam, yumi ranawe long hia!” Tasol pren bilong em i tok: “Nogat! Dispela em bikpela de mipela i bin wetim longpela taim pinis,” na em i kisim gan bilong em na i go long rup bilong yunivesiti. Em wanpela bilong ol 8-pela pren bilong Dito em ol i dai long dispela de. Yu inap tingim amamas bilong mi taim mi lukim dispela man, Dito, husat inap dai long dispela de sapos em i no bin mekim disisen long kamap wanpela Kristen tru?

Mi Lukim Spirit Bilong Jehova i Mekim Wok

Wanpela de mi abrusim wanpela haus, mi ting mipela i lukim pinis lain bilong dispela haus, tasol nau meri bilong haus i singaut long mi. Nem bilong em Ignacia. Em i bin save long ol Witnes Bilong Jehova, tasol man bilong em i birua tru long ol Witnes, na em i bin pasim em long kamap strong long ol samting bilong spirit. Man bilong em i wanpela plisman, na em i gat bikpela skin, nem bilong em Adalberto. Ignacia i paul long planti bilip bilong Baibel, olsem na mi kirap stadi long Baibel wantaim em. Maski Adalberto i traim strong long stopim ol dispela stadi bilong Baibel, tasol mi inap toktok wantaim em inap longpela taim liklik long ol narapela samting. Em namba wan samting i helpim mipela long kamap pren.

Tingim amamas bilong mi taim mi lukim Ignacia i kamap wanpela gutpela sista long kongrigesen, na em i helpim planti manmeri long ol samting bilong spirit na bilong skin. Bihain, man na tripela pikinini bilong em ol i kamap Witnes. Taim Adalberto i kisimgut insait bilong gutnius, em i go long polis stesin na i givim bel tru long toktok wantaim ol plisman, na long dispela rot em i kisim 200 sabskripsen bilong Wastaua na Kirap!

Jehova i Mekim Kaikai i Kamap

Bihain long 6-pela yia long autim tok long Santa Cruz, ol i makim mi long go autim tok long nambawan biktaun bilong Bolivia, em La Paz, na mi stap 25 yia long dispela taun. Long 1972 samting, brens ofis bilong ol Witnes Bilong Jehova long La Paz i gat 12-pela bratasista i wok long en. Taim wok bilong autim tok i go bikpela na ol i mas kisim ol bikpela haus moa, ol i wokim nupela haus brens long Santa Cruz, em wanpela taun i wok long go bikpela hariap. Ol i kisim brens ofis i go long dispela hap long 1998, na ol i singautim mi long mekim wok long brens ofis, nau i gat olsem 50 bratasista i wok long en.

Long 1966 i gat wanpela kongrigesen tasol long Santa Cruz na long nau i gat winim 50 kongrigesen. Long 1966 i gat 640 Witnes long Bolivia olgeta, na nau i gat klostu 18,000 Witnes!

Mi amamas tru long wok bilong mi long Bolivia i bin kamapim ol gutpela kaikai. Tru tumas, pasin bilong ol wanbilip Kristen long i stap gut long Jehova i save strongim mi long olgeta taim. Yumi olgeta i save amamas long lukim olsem Jehova i save blesim wok bilong autim tok bilong Kingdom. Yes, yumi amamas tru long insait long dispela wok bilong kamapim disaipel.​​—Matyu 28:​19, 20.

[Piksa long pes 13]

Mekim wok painia long Skotlan

[Ol Piksa long pes 15]

Mekim wok long brens ofis long Bolivia; (liklik piksa) long gretiuesen bilong namba 42 klas bilong Skul Gileat