Ol i Mekim Wok Autim Tok Long “Haus Ston”

Mining bilong nem bilong dispela kantri long Afrika em “Haus Ston.” Dispela kantri i gat nem, long wanem, wanpela bikpela wara kalap, em Victoria Falls, i stap long en, na tu, em i gat planti kain kain animal. Tasol em i gat ol traipela haus bilong bipo yet, winim ol narapela hap bilong Afrika long hap saut bilong Sahara. I gat wanpela stretpela hap graun i antap liklik na i gat ol ston long en, na i brukim kantri long namel. Dispela hap i no hat tumas o kol tumas, olsem na graun i gat gris na i gat ol gutpela bus na gras samting i kamap long en. Dispela kantri em Simbabwe, i gat olsem 12 milion manmeri i stap long en.

BILONG WANEM em i gat nem Haus Ston? Long 1867, Adam Renders, em man bilong painim abus bilong bus na raun bilong painim ol nupela ples, em i kamap long wanpela bikpela hap inap olsem 720 hekta i gat ol traipela haus ston long en. Em i bin raun long ples kunai bilong Afrika, we ol asples i save wokim ol liklik haus long graun malumalum, na ol diwai ol i bin katim, na ol i wokim rup long kunai. Orait nau em i kamap long wanpela ples i gat ol pipia ston em bipo em i wanpela bikpela taun tru, nau ol i kolim Bikpela Simbabwe.

Ol dispela hip pipia ston i stap long hap saut bilong wanpela ples nau ol i kolim Masvingo. Sampela hap banis i go antap tru, winim 9-pela mita. Ol i bin slipim narapela ston antap long narapela ston na ol i no pasim long simen. Insait long dispela ples i gat narapela kain raunpela taua i go antap inap 11-pela mita, na braitpela bilong as bilong dispela taua em 6-pela mita. Ol man i no save long as na ol i bin wokim dispela taua. Ol i ting ol i bin wokim dispela taun olsem 800 yia bihain long Krais, tasol i gat ol samting i makim olsem ol lain i bin sindaun long dispela hap sampela handet yia paslain long en.

Long 1980, kantri ol i bin kolim Rodisia i kisim indipendens long Briten na ol i givim nupela nem Simbabwe long en. I gat tupela bikpela lain long dispela kantri​—⁠em ol Shona, ol i bikpela lain moa, na ol Ndebele. Ol dispela lain i save mekim gut long ol man, na ol Witnes Bilong Jehova i bin lukim dispela samting taim ol i autim tok long ol haus. Sampela taim man i paitim dua na kwiktaim em bai harim wanpela nek insait long haus i singaut, “Kam insait” na “Yu ken sindaun.” Planti Simbabwe i save rispek long Baibel na taim ol i toktok wantaim narapela long Baibel, ol i strong long ol pikinini bilong ol i mas kam sindaun na harim.

Tok Bilong Mekim Gut Bel Bilong Ol

Taim ol nius i stori long Simbabwe, planti taim ol i kamapim ol kain tok olsem “AIDS” na “traipela san, no gat ren.” Sik AIDS i go bikpela tru long ol kantri long hap saut bilong Sahara long Afrika, na planti manmeri i dai na bikpela hevi bilong mani i kamap. Planti sikman long ol haus sik ol i gat binatang jem HIV i kamapim sik AIDS. Dispela sik i bagarapim sindaun bilong planti famili.

Bilong helpim ol manmeri long Simbabwe, ol Witnes Bilong Jehova i wok strong long tokim ol man olsem nambawan gutpela rot bilong bihainim, em pasin bilong larim ol lo bilong God i stap long Baibel i stiaim wokabaut bilong ol. Olsem: Baibel i tok, maritpasin em wanpela presen God i givim, tasol em samting ol marit tasol i ken mekim, na God i no orait long man i slip wantaim man, na lo bilong Jehova i tambuim pasin bilong kisim blut na kisim ol drak. (Aposel 15:​28, 29; Rom 1:​24-​27; 1 Korin 7:​2-5; 2 Korin 7:⁠1) Na ol Witnes i save autim wanpela tok ol man inap bilip na wet tru long en, olsem klostu nau Kingdom Bilong God bai pinisim olgeta kain sik.​—⁠Aisaia 33:⁠24.

Kaikai Samting Bilong Helpim Ol

Insait long 10-pela yia i go pinis traipela san i bin kamapim taim nogut tru long Simbabwe. Planti animal bilong bus i dai long hangre na i no gat wara bilong dring. Planti handet tausen bulmakau i dai pinis. Paia i kukim planti hekta bilong bus i gat ol gutpela diwai long en. Planti pikinini na lapun i bin dai long hangre. Na traipela wara Zambizi i laik drai na wara i sot bilong ranim ol bikpela masin bilong wokim pawa.

Dispela taim nogut i mekim na ol Witnes Bilong Jehova i kamapim 8-pela komiti long ol narapela narapela hap bilong kantri bilong helpim ol bratasista long kaikai na wara samting. Ol wasman raun ol i go lukim ol kongrigesen bilong skelim wanem ol samting ol i sot long en. Orait nau ol i givim dispela toksave long komiti i stap long dispela hap. Wanpela wasman raun i tok: “Insait long 5-pela yia i go pinis, mipela i bin tilim wan tausen ton kon, 10-pela ton pis i drai pinis, na 10-pela ton bin i drai pinis. Ol brata Kristen i mekim drai 2-pela ton kaikai bilong gaden, ol i kolim mufushwa. Na mipela i tilim ol traipela hip klos long ol na mani tu.” Narapela wasman raun i tok: “Taim mi tingim bikpela hatwok bilong mipela long kisim ol laisens em gavman bilong Simbabwe na Saut Afrika i tok mipela mas kisim bilong kisim ol dispela samting i kam insait long kantri, na tu, oltaim mipela i sot long bensin bilong karim ol dispela samting i go long ol brata i sot tru, mi gat wanpela tingting tasol. Samting mipela i mekim i kamapim klia olsem tok bilong Jisas i tru, em i tok Papa bilong yumi long heven em i save yumi mas i gat ol dispela samting.”​—⁠Matyu 6:⁠32.

Olsem wanem ol wasman raun yet inap mekim wok bilong ol long ol dispela hap i gat bikpela san? Sampela i save karim kaikai bilong ol yet na bilong ol famili ol i save stap wantaim ol. Wanpela i tok, sampela sista Kristen i wok long skelim olsem ol bai lusim wok autim tok long dispela de bambai ol i ken sanap long lain na kisim hap kaikai em gavman bai givim long ol long dispela de, o nogat. Orait ol i pasim tok olsem ol bai bilip na wetim Jehova na ol bai mekim wok autim tok na lukim wanem samting bai kamap. Long dispela de ol lain bilong gavman i no bringim kaikai i kam.

Long de bihain em taim bilong mekim wanpela miting Kristen, na ol dispela sista i mas skelim gen samting ol bai mekim. Ol bai go long miting o ol bai wetim kaikai em gavman bai salim i kam? Ol i tingim samting i bikpela tru na ol i go long miting long Haus Kingdom. (Matyu 6:33) Orait taim ol i wok long mekim laspela singsing, ol i harim wanpela trak i kam. Em nau, kaikai i kamap stret long ol, em ol brata bilong komiti i salim i kam! Man! Ol Witnes i bin go long dispela miting ol i amamas nogut tru na ol i tenkyu tru.

Pasin Laikim i Strongim Ol

Ol Witnes i bin mekim gutpela pasin long ol manmeri i stap ausait long kongrigesen Kristen na dispela i opim rot bilong autim tok long ol man. Wanpela wasman raun long hap bilong Masvingo, em i autim tok wantaim sampela Witnes bilong dispela ples. Em i lukim wanpela yangpela meri i slip long arere bilong rot. Ol Witnes i luksave olsem em i gat bikpela sik, long wanem, em i no inap toktok gut. Nem bilong yangpela meri em Hamunyari, mining bilong en long tok ples Shona em “Yu No Sem, a?” Ol brata i kisim save olsem ol wanlotu bilong em i lusim em i stap long rot taim ol i wokabaut i go long wanpela bung bilong lotu long hap bilong ol maunten. Ol Witnes i helpim gut yangpela meri na ol i kisim em i go long wanpela liklik ples klostu.

Long dispela ples, sampela manmeri i save long Hamunyari, olsem na ol i askim ol wanblut bilong em long kam kisim em. Ol dispela lain bilong ples i tok long ol Witnes olsem: “Dispela em i trupela lotu. Dispela em i pasin laikim ol Kristen i mas kamapim.” (Jon 13:35) Taim ol brata i laik lusim ol, ol i givim liklik nius long Hamunyari, em Yu Laik Kisim Sampela Save Moa Long Baibel?a

Long wik antap, wasman raun i wok wantaim kongrigesen bilong dispela hap em Hamunyari i sindaun long en. Em i laik save, meri hia i kamap gut long haus o nogat. Famili olgeta i amamas tru long lukim em wantaim ol brata. Papamama bilong meri i tok: “Yupela i save bihainim lotu i tru. Yupela i bin helpim pikinini meri bilong mipela em ol i bin lusim i stap bilong dai long rot.” Ol i bin askim ol wanlotu bilong meri: “Yupela i no sem, olsem nem Hamunyari i makim, long lusim em i stap na bai em i dai, a?” Ol Witnes i kamapim sampela tok bilong Baibel na ol i lusim sampela nius bilong Baibel long famili bilong Hamunyari. Famili i singautim ol brata long kam bek na stadi wantaim ol long Baibel. Sampela bilong dispela famili em pastaim ol i bin biruaim ol Witnes ol i senisim tingting bilong ol. Wanpela man, em tambu bilong Hamunyari, em i wanpela lida bilong lotu long dispela hap. Em i orait long stadi long Baibel.

Wokim Ol Haus Bilong Mekim Lotu

Long bipo yet wanpela man i raitim song olsem: “God, . . . mi wok strong long painim yu . . . long ples drai i no gat wara long en.” (Song 63:⁠1) Dispela samting i bin painim planti manmeri long Simbabwe! Ol i karim hevi bilong bikpela san na no gat ren, na long ol samting bilong spirit, nek bilong ol i drai long painim God na ol gutpela pasin bilong em. Yumi inap lukim dispela long ol samting i bin kamap long wok Kristen bilong autim tok ol Witnes Bilong Jehova i mekim. Taim Simbabwe i kisim indipendens long 1980, i gat olsem 10,000 Witnes i stap long 476 kongrigesen. Long nau, inap 27 yia bihain long dispela, i gat olsem 30,000 Witnes i save autim tok, na i gat klostu 900 kongrigesen i stap.

Planti bilong ol dispela kongrigesen i no gat haus lotu bilong ol yet. Long Janueri 2001, winim 800 kongrigesen i stap long Simbabwe, tasol 98 kongrigesen tasol i gat haus lotu​—⁠olsem Haus Kingdom​—⁠bilong bung long en. Planti kongrigesen i bin mekim ol miting bilong ol aninit long ol diwai o long ol liklik haus ol i wokim long ol diwai na putim graun malumalum long banis bilong en na rup ol i wokim long kunai.

Ol brata Kristen i stap long olgeta hap ol i bin givim planti mani na ol i givim bel long mekim wok volantia, olsem na ol Witnes bilong Simbabwe i kirapim wanpela wok em i helpim sampela kongrigesen moa long kisim gutpela Haus Kingdom. Planti Witnes bilong ol narapela kantri i gat save long wokim haus, ol i bin stretim ol samting bilong ol bambai ol i ken i go long Simbabwe na wok wantaim ol volantia bilong dispela hap yet. Wanpela Witnes bilong dispela hap i tok: “Mipela i laik tok tenkyu tru long olgeta brata na sista bilong planti kantri ol i bin kam long Simbabwe bilong helpim mipela long wokim ol naispela Haus Kingdom. Na mipela i laik tok tenkyu long yupela ol narapela i bin putim mani long bokis kontribiusen i bilong wokim ol Haus Kingdom na nau mipela inap mekim dispela wok.”

Long hap is bilong kantri, ol brata i mekim ol miting aninit long traipela diwai baobab inap 50 yia. Taim ol elda Kristen i kisim tok olsem ol bai wokim wanpela haus lotu tru tru, wanpela elda i krai. Long wanpela kongrigesen klostu, wanpela elda i gat 91 krismas i tok: “Inap longtaim tru mi bin krai long Jehova long dispela samting i mas kamap!”

Planti man i toktok long pasin bilong ol Witnes long wokim hariap ol dispela naispela haus. Wanpela man i tok: “Yupela ol man i save mekim wok long san, tasol ating God i save mekim wok long nait!” Na ol man i lukim pasin wanbel na amamas i stap namel long ol wokman. Inap long nau, ol i wokim pinis inap 350 nupela Haus Kingdom long Simbabwe. Olsem na 534 kongrigesen inap mekim miting bilong ol long ol Haus Kingdom ol i bin wokim gut long brik.

Bikpela wok bilong autim gutnius i wok long kamap yet long Simbabwe. Taim yumi tingim ol bikpela wok tru i bin kamap, yumi mas tenkyu long Jehova, em yet i as bilong ol dispela gutpela samting. Tru tumas, “sapos Bikpela i no wokim haus, ol kamda i wok nating.”​—⁠Song 127:⁠1.

[Futnot]

[Ol Mep long pes 9]

(Bilong save ol dispela rait i stap we long pes, lukim buk o magasin)

SIMBABWE

HARARE

Masvingo

Bikpela Simbabwe

[Piksa long pes 9]

Raunpela taua

[Piksa long pes 12]

Nupela Haus Kingdom, Concession Kongrigesen

[Piksa long pes 12]

Sampela bilong Lyndale Kongrigesen ausait long nupela Haus Kingdom bilong ol

[Ol Piksa Kredit Lain long pes 9]

Ruins with steps: ©Chris van der Merwe/AAI Fotostock/age fotostock; tower inset: ©Ingrid van den Berg/AAI Fotostock/age fotostock