Ol i Mekim i Stap Bilong Ol i Kamap Gutpela Moa—Yu Inap Mekim Olsem?
MARC em wanpela brata long Kanada i wok long wanpela kampani i save wokim ol masin robot samting bilong yusim long ples antap. Em i mekim wok haptaim na mekim wok painia oltaim. Bihain, bos bilong em i laik givim bikpela wok moa long em—em fultaim wok i gat bikpela pe bilong en. Marc i mekim wanem?
Amy em wanpela sista long Filipins i bin mekim wok painia oltaim taim em i stap yet long skul. Taim em i pinisim skul, wanpela kampani i laik givim em fultaim wok i gat bikpela pe bilong en, tasol dispela wok bai i kisim bikpela haptaim bilong em. Amy i mekim wanem?
Marc na Amy i mekim narapela narapela disisen, na ol samting i kamap long disisen ol i mekim i kamapim klia gutpela tingting i stap long tok i go long ol Kristen long Korin bilong bipo. Aposel Pol i tok: “Ol man i save mekim wok long samting bilong graun, ol i mas i stap olsem dispela wok i no bikpela samting long laip bilong ol.”—1 Ko. 7:29-31.
Mekim Wok Long Ol Samting Bilong Graun Tasol No Ken Insait Tumas Long En
Paslain long yumi skelim wanem samting i bin kamap long Marc na Amy, bai yumi skelim mining bilong dispela tok “samting bilong graun” (o, koʹsmos long tok Grik) em Pol i bin yusim long pas em i raitim long ol Korin. Long Baibel, tok koʹsmos i makim ol samting bilong skin olsem haus, kaikai, na klos samting.a Bilong kisim ol dispela samting yumi mas i gat long olgeta de, planti bilong yumi i mas mekim wok mani. Yumi olgeta i mas mekim wok long ol samting bilong dispela graun bilong inapim tok Baibel i mekim bilong lukautim yumi yet na famili bilong yumi long ol samting bilong skin. (1 Ti 5:8) Tasol yumi save tu olsem “olgeta pasin bilong dispela graun . . . bai i pinis.” (1 Jo 2:17) Olsem na yumi mekim wok long ol samting bilong dispela graun inap tasol long skel bilong yumi, yumi mekim olsem ol “dispela wok i no bikpela samting long laip” bilong yumi.—1 Ko 7:31.
Dispela tok bilong Baibel long no ken insait tumas long ol samting bilong dispela graun i bin kirapim planti bratasista long skelim gen sindaun bilong ol. Ol i lusim sampela samting bilong skin ol i holim pinis, na ol i no tromoi bikpela haptaim olsem bipo long mekim wok mani. Bihain long ol i mekim olsem, ol i luksave olsem i stap bilong ol i kamap gutpela moa, long wanem, nau ol i gat planti taim moa long stap wantaim famili bilong ol na long mekim wok bilong Jehova. Na moa yet, dispela kain sindaun we ol i no gat planti samting bilong skin i mekim na ol i bilip moa long Jehova na i no long ol samting bilong dispela graun. Olsem wanem? Yu tu inap lusim sampela samting bilong skin em yu holim pinis bilong yu ken insait moa long helpim ol wok bilong Kingdom Bilong God?—Mt. 6:19-24, 33.
“Mipela i Pilim Olsem Mipela i Go Klostu Moa Long Jehova, Winim Bipo”
Marc, em yumi bin stori long em, em i bihainim ol tok bilong Baibel long em i no ken larim ol samting bilong dispela graun i stap olsem bikpela samting long i stap bilong em. Em i no kisim dispela gutpela wok i gat bikpela pe em ol i laik givim long em. Bihain long sampela de, supavaisa bilong Marc i laik givim bikpela pe moa long em bilong grisim em long kisim dispela wok. Marc i tok: “Dispela em i wanpela traim, tasol mi tok nogat gen long en.” Em i tok long as na em i mekim olsem, na em i tok: “Mi wantaim meri bilong mi Paula i laik lusim taim na strong bilong mipela long mekim wok bilong Jehova inap tru long skel bilong mipela. Olsem na mipela i pasim tok long lusim sampela samting bilong skin. Mipela i beten long Jehova long givim gutpela tingting long mipela na bai mipela i ken winim mak mipela i putim, na mipela i makim stret taim mipela bai i kirap lusim bikpela haptaim moa long mekim wok bilong Jehova.”
Paula i tok: “Mi save wok 3-pela de long wanpela wik long wanpela haus sik olsem seketeri na mi kisim gutpela pe. Na mi mekim tu wok painia oltaim. Tasol, olsem Marc, mi gat laik long mekim wok bilong Jehova long hap i sot long ol man bilong autim tok bilong Kingdom. Tasol taim mi lusim wok, supavaisa bilong mi i tokim mi olsem mi inap tru long kisim bikpela wok olsem nambawan seketeri. Dispela wok seketeri i gat bikpela pe tru bilong en, tasol mi holim strong yet tingting bilong mi long lusim wok. Taim mi tokim supavaisa long as na mi no laik kisim dispela wok, em i mekim gutpela tok amamas long bilip bilong mi.”
Bihain tasol long dispela, Marc na Paula i kisim asainmen bilong mekim wok painia salim long wanpela liklik kongrigesen long wanpela longwe ples long Kanada. Wanem samting i kamap long disisen ol i mekim? Marc i tok: “Taim mi lusim dispela wok i gat gutpela pe bilong en em mi bin mekim inap longpela taim pinis, mi pret na tingting planti long wanem samting bai painim mi bihain, tasol Jehova i blesim tru wok autim bilong mipela. Mipela i pilim tru bikpela amamas i kamap long pasin bilong helpim ol narapela long kirap mekim wok bilong God. Fultaim sevis i bin helpim tu marit bilong mipela. Taim mipela i toktok wantaim, nambawan samting mipela i toktok long en em ol samting long wok bilong Jehova mipela i mekim. Mipela i pilim olsem mipela i go klostu moa long Jehova, winim bipo.” (Ap. 20:35) Paula i tok: “Taim yu lusim wok na ol gutpela samting long sindaun bilong yu, yu mas bilip strong long Jehova. Mipela i mekim olsem na Jehova i blesim mipela. Ol gutpela bratasista long nupela kongrigesen bilong mipela i mekim na mipela i pilim olsem ol i laikim mipela tru. Strong mi bin yusim long mekim wok skin, nau mi yusim dispela strong long helpim ol man long save long God. Mi amamas tru long insait long dispela asainmen.”
‘I Gat Olgeta Samting, Tasol No Gat Amamas’
Amy, em yumi stori pinis long em, em i makim narapela rot bilong bihainim. Em i kisim dispela gutpela wok i gat bikpela pe bilong en. Amy i tok: “Long namba wan yia, mi mekim yet wok autim tok, tasol mi luksave olsem isi isi mi lusim wok bilong Jehova na mi wok strong long kisim promosen long wok. Taim mi wok strong moa bilong mi ken kisim wok i bikpela moa na i gat bikpela pe long en, haptaim mi lusim long mekim wok autim tok i wok long i go liklik. Bihain mi no moa mekim wok autim tok.”
Amy i tingim bek dispela taim na em i tok: “Mi gat planti mani. Dispela wok mani bilong mi i mekim na mi raun planti na mi pilim olsem mi samting tru. Tasol mi no amamas. Maski mi gat mani, mi gat planti hevi. Mi wok long tingting planti, i gat wanem as na mi no amamas. Bihain mi luksave olsem, pasin bilong mi long insait tru long wok skin dispela i mekim na klostu ‘dispela pasin i pulim’ mi long lusim bilip. Ol samting dispela i kamapim i stret wantaim tok Baibel i mekim, mi ‘karim bikpela hevi moa.’ ”—1 Ti. 6:10.
Amy i mekim wanem? Em i tok: “Mi askim ol elda long helpim mi long pas gut gen wantaim God na mi kirap kam long ol miting. Wanpela taim long taim bilong singsing, mi kirap krai. Mi tingim bek bikpela amamas bilong mi insait long 5-pela yia taim mi bin mekim wok painia, maski mi bin sot long sampela samting bilong skin long dispela taim. Mi save olsem mi mas lusim pasin bilong westim taim long painim planti mani na mi mas putim wok bilong Kingdom i go pas long ol narapela samting. Long ples wok, mi lusim dispela wok i gat bikpela pe na mi kisim wanpela wok i no bikpela tumas, maski ol i mas katim 50 pesen bilong pe bilong mi, na mi insait gen long wok autim tok.” Amy i tok moa: “Mi amamas long mekim wok painia inap sampela yia. Mi pilim yet dispela amamas, em wanpela amamas mi no bin kisim taim mi bin lusim bikpela haptaim tru long mekim wok mani.”
Inap yu stretim sampela samting long sindaun bilong yu na lusim sampela samting bilong skin yu holim? Taim yu mekim olsem, bai yu gat bikpela haptaim moa, na sapos yu yusim dispela taim bilong mekim wok bilong Kingdom, dispela bai helpim i stap bilong yu tu i kamap gutpela moa.—Snd. 10:22.
[Futnot]
a Lukim buk Insight on the Scriptures, Volium 2, pes 1207-8.
[Rait long pes 19]
Inap yu stretim sampela samting long sindaun bilong yu na lusim sampela samting bilong skin yu holim?
[Blok/Piksa long pes 19]
“Mi Laikim Tru Dispela Wok!”
David, wanpela elda Kristen long Yunaitet Stets, i gat laik tru long mekim wok painia wantaim meri na pikinini bilong em. Em i stretim rot na em i kisim haptaim wok long kampani em i wok long en, na em i kirap mekim wok painia oltaim. Olsem wanem? Dispela senis i bin mekim i stap bilong em i kamap gutpela moa? Sampela mun bihain, David i raitim pas long wanpela pren bilong em, na em i tok: “Pasin bilong insait tru long mekim wok bilong Jehova wantaim famili bilong mi i givim bikpela amamas tru long mi. Mi ting sampela taim i mas lus pastaim na bai mi laikim wok painia, tasol nogat, wantu mi laikim tru dispela wok! Dispela i givim nupela strong long mi.”
[Piksa long pes 18]
Marc na Paula long wok autim tok