Husat Namel Long Yupela i Gat Gutpela Tingting na Save?

“Ating wanpela man namel long yupela em i gat gutpela tingting na save? Sapos kain man olsem i stap, orait wokabaut bilong en i mas kamap gutpela . . . na ol man bai i lukim gutpela pasin [“pasin isi,” NW] em i mekim.”​—JEM. 3:13.

1, 2. Yumi ken tok wanem long ol man em planti man i ting ol i gat savetingting?

YU TING husat i gat gutpela tingting na save tru? Ating papamama bilong yu, wanpela lapun man, o wanpela profesa bilong yunivesiti? Lain yu kamap bikpela insait long en na i stap bilong yu inap stiaim tingting bilong yu long dispela samting. Tasol ol wokman bilong God i laik kisim tingting bilong em.

² I no olgeta man em ol man bilong dispela graun i ting ol i gat gutpela save na tingting, i gat savetingting long ai bilong God, nogat. Jop i toktok long ol man husat i ting ol i kamapim ol tok i gat savetingting long en, na em i tokim ol: “I no gat wanpela bilong yupela i gat gutpela tingting na save.” (Jop 17:10) Ol man i sakim savetingting i kam long God, aposel Pol i tok long ol olsem: “Ol i hambak na i tok, ‘Mipela i gat save,’ tasol ol i kamap longlong tru.” (Ro. 1:22) Na long rot bilong profet Aisaia, Jehova yet i tok strong olsem: “Bai yupela i bagarap, yupela ol man i save ting, yupela i gat gutpela tingting tru na save.”​—Ais. 5:21.

3, 4. Wanem samting i mekim na man i gat savetingting tru?

³ Tru tumas, yumi mas skelim gut wanem samting i mekim na man i gat savetingting tru na long dispela as God i ken orait long em. Sindaun 9:10 i tok: “Sapos yu laik kisim gutpela tingting, orait pastaim yu mas aninit [“pret,” NW] long Bikpela. . . . Na sapos yu laik kisim gutpela save, orait pastaim yu mas save gut long em.” Ol man i gat savetingting ol i mas pret long God na rispek tru long ol lo bilong em. Yumi bilip olsem God i stap na em i gat ol lo bilong em, tasol dispela samting tasol i no inap. Yumi mas mekim sampela samting moa. Disaipel Jems i kirapim yumi long tingting long dispela. (Ritim Jems 3:13.) Tingim dispela tok: “Wokabaut bilong en i mas kamap gutpela.” Trupela savetingting i mas kamap ples klia long ol pasin na tok yu save mekim long olgeta de.

⁴ Trupela savetingting i makim olsem man i skelim gut ol samting na i mekim wok long save na pasin bilong kliagut long ol samting. Wanem samting bai kamapim klia olsem yumi gat kain savetingting olsem? Jems i kolim planti samting i kamap ples klia long pasin bilong ol man i gat savetingting.a Wanem ol tok bilong em inap helpim yumi long pas gut wantaim ol wanbilip, na ol man i no insait long kongrigesen?

Pasin Bilong Man i Kamapim Klia Em i Gat Savetingting

 5. Man i gat savetingting tru bai bihainim wanem kain pasin?

⁵ Olsem yumi stori pinis, Jems i kamapim olsem savetingting i poroman wantaim gutpela pasin. Man i laik kisim savetingting em i mas pret long Jehova, olsem na man i gat savetingting i save bihainim ol pasin na lo bilong God long wokabaut bilong em. Yumi no bon wantaim savetingting i kam long God. Tasol yumi inap kisim dispela samting long rot bilong stadi oltaim long Baibel na tingim tingim long bel ol tok bilong en. Dispela bai helpim yumi long mekim samting em Efesus 5:1 i tok long en: “Yupela i mas bihainim ol pasin [God] yet i save mekim.” Taim yumi bihainim gut pasin bilong Jehova, bai yumi bihainim savetingting moa yet long ol samting yumi mekim. Ol pasin bilong Jehova i winim tru pasin bilong ol man. (Ais. 55:​8, 9) Taim yumi bihainim pasin bilong Jehova long mekim ol samting, ol man ausait bai lukim olsem pasin bilong yumi i no wankain olsem bilong ol.

 6. Bilong wanem pasin isi i soim olsem man i bihainim pasin bilong God? Olsem wanem man i soim olsem em i gat dispela pasin?

⁶ Jems i tok olsem man i laik bihainim pasin bilong Jehova, em i mas “bihainim gut pasin bilong gutpela tingting na save, na ol man bai i lukim gutpela pasin [“pasin isi,” NW] em i mekim.” Tru, ol Kristen i gat pasin isi, tasol ol i strong tu long bihainim stretpela pasin na ol lo na stiatok bilong Baibel, em dispela i helpim ol long bihainim gutpela tingting. Maski God i gat bikpela strong moa, em i gat pasin isi na yumi no pret long i go klostu long em. Pikinini Bilong God i bihainim gut pasin isi bilong Papa bilong em, olsem na em inap tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.”​—Mt. 11:​28, 29; Fl. 2:​5-8.

 7. Bilong wanem yumi ken tok Moses em i gutpela piksa long mekim pasin isi?

⁷ Baibel i stori long sampela man moa husat i gat pasin isi o pasin bilong daunim ol yet. Moses em wanpela. Em i holim bikpela wok tru, tasol Baibel i tok em i “man bilong daunim em yet, na i no gat wanpela man long dispela graun i save daunim em yet inap olsem Moses.” (Nam. 11:29; 12:3) Na tingim bikpela strong Jehova i bin givim long Moses bambai em i ken mekim laik bilong Em. Jehova i amamas long mekim wok long ol man i gat pasin isi bilong kamapim ol samting Em i tingting pinis long mekim.

 8. Olsem wanem ol man i gat sin inap bihainim savetingting na ol man bai i lukim “pasin isi” ol i mekim?

⁸ Tru tumas, ol man i gat sin ol inap bihainim savetingting na ol man bai i lukim “pasin isi” ol i mekim. Olsem wanem long yumi? Olsem wanem yumi ken kamapim moa yet dispela pasin? Pasin isi em i wanpela bilong ol pasin holi spirit bilong Jehova i save kamapim. (Ga. 5:​22, 23) Yumi ken beten askim em long givim holi spirit long yumi na wok strong long kamapim ol pasin bilong en, na bilip olsem God bai helpim yumi long kamapim gut moa pasin isi. Tok bilong man bilong raitim song i kirapim yumi long mekim olsem: ‘Ol man i stap aninit long God, em i save skulim ol long rot bilong em.’​—Sng. 25:9.

9, 10. Yumi mas mekim wanem bilong kamapim pasin isi? Bilong wanem yumi mas wok strong long mekim olsem?

⁹ Tasol ating yumi mas wok strong tru long kisim pasin isi. Ating lain yumi bin kamap bikpela insait long en i mekim na sampela bilong yumi i no gat pasin isi. Na tu, ating ol man i stap klostu long yumi i gat narapela kain tingting olgeta, ol i tok yumi mas mekim hatpela pasin long ol man i mekim hatpela pasin long yumi. Tasol yu ting dispela em i savetingting? Sapos liklik paia i kamap insait long haus bilong yu, bai yu tromoi kerosin o kolwara antap long en? Sapos yu kapsaitim kerosin long en bikpela hevi bai kamap, tasol sapos yu kapsaitim kolwara long en, ating paia bai i dai. Na olsem tasol, Baibel i tokim yumi olsem: “Sapos man i belhat long yu, orait bekim tok isi long em, na bai belhat bilong en i dai. Tasol sapos yu rabisim narapela man long tok bilong yu, bai yu mekim em i belhat nogut tru long yu.” (Snd. 15:​1, 18) Taim samting bilong skrapim bel bilong yumi i kamap, maski em insait o ausait long kongrigesen, yumi ken soim olsem yumi gat savetingting tru sapos yumi mekim pasin isi.​—2 Ti. 2:24.

¹⁰ Olsem yumi tok pinis, planti man em spirit bilong dispela graun i save stiaim ol, ol i no gat pasin isi na pasin bilong stap wanbel wantaim ol narapela. Nogat. Planti man i gat hatpela pasin na pasin antap. Jems i save long dispela, na em i givim tok lukaut long dispela samting bambai dispela kain pasin i no ken bagarapim ol lain insait long kongrigesen. Yumi ken lainim wanem narapela samting long tok em i bin mekim?

Pasin Bilong Ol Man i No Gat Savetingting

11. Wanem ol pasin i pait wantaim savetingting i kam long God?

¹¹ Jems i kolim stret ol pasin i pait wantaim savetingting i kam long God. (Ritim Jems 3:14.) Pasin bilong bel nogut na pasin bilong tok pait na apim nem em ol pasin bilong olpela bel, ol i no pasin holi spirit i save kamapim. Tingim ol samting i save kamap taim ol man i kamapim tingting bilong olpela bel. Sikspela grup, em ol i tok ol i Kristen, ol i bosim wan wan hap bilong wanpela haus lotu (Church of the Holy Sepulchre) long Jerusalem, em ol i tok ol i bin sanapim long hap we ol man i bin kilim i dai Jisas na planim em. Inap longtaim pinis, pasin bilong pait i bin stap namel long ol. Long 2006, nius Time i stori long wanpela samting i bin kamap, em ol bruder long dispela hap i bin “pait inap planti aua, . . . narapela i bin paitim narapela long ol traipela stik bilong holim ol kandel long en.” Narapela i no trastim liklik narapela, olsem na ol i givim ki bilong dispela haus lotu long wanpela Muslim bilong lukautim.

12. Taim ol man i no gat savetingting, wanem samting inap kamap?

¹² Kain pasin olsem bilong tok pait i no ken kamap insait long kongrigesen Kristen tru. Tasol sin i mekim na sampela i strong long holimpas tingting bilong ol yet. Dispela inap kamapim tok pait na kros. Aposel Pol i lukim dispela pasin insait long kongrigesen Korin, olsem na em i tok: “Pasin bilong bel nogut long ol brata na tok pait, em i stap yet long yupela. Na ol dispela pasin yupela i save mekim, ol i pasin bilong olpela bel. Ol i pasin bilong ol man bilong graun tasol.” (1 Ko. 3:3) Dispela pasin nogut i bin i stap insait long dispela kongrigesen long taim bilong ol aposel. Olsem na yumi mas was gut, nogut kain pasin olsem i kam insait long kongrigesen long nau.

13, 14. Kamapim sampela eksampel long olsem wanem pasin bilong olpela bel inap kamap ples klia.

¹³ Olsem wanem kain pasin olsem inap kam insait long kongrigesen? Ol liklik samting inap kirapim dispela. Olsem: Taim ol i sanapim wanpela Haus Kingdom, ating ol brata i gat narapela narapela tingting long pasin bilong mekim ol samting. Wanpela brata inap kirap tok pait sapos ol narapela i no bihainim tingting bilong em, na ating em i toktok planti long ol disisen ol brata i mekim. Em inap tok olsem em i no laik insait moa long wok bilong sanapim dispela Haus Kingdom! Brata i mekim kain pasin olsem i lusim tingting olsem pasin wanbel insait long kongrigesen i helpim ol long inapim wanpela wok, na wanem pasin ol i bihainim bilong mekim dispela wok i no nambawan bikpela samting. Jehova i save laikim pasin isi, pasin bilong tok pait, nogat.​—1 Ti. 6:​4, 5.

¹⁴ Narapela samting inap kamap, em ol elda bilong kongrigesen i luksave olsem wanpela elda, maski em i bin mekim dispela wok inap planti yia pinis, em i no winim moa ol mak Baibel i kolim bilong mekim dispela wok. Wasman sekit i visitim kongrigesen na em i luksave olsem ol i bin givim tok kaunsel long dispela elda, tasol em i no stretim pasin bilong em, olsem na wasman sekit i wanbel long tingting bilong ol elda long ol i mas pinisim wok elda bilong em. Orait dispela elda bai ting wanem? Em bai stap isi na daunim em yet na wanbel long disisen bilong ol elda na tok kaunsel ol i givim long em long Baibel, na tingting strong long winim gen ol mak Baibel i kolim bambai em i ken mekim wok insait long kongrigesen? O em bai bel nogut na jeles, long wanem, em i no holim moa wok elda? I no gat as na brata i mekim pasin olsem em i winim mak bilong mekim wok elda, tasol tru tru em i no winim dispela mak, a? Em i savepasin tru long mekim pasin daun na harim tok!

15. Bilong wanem yu ting tok kaunsel i stap long Jems 3:​15, 16 i bikpela samting tru?

¹⁵ Tru, i gat ol narapela rot we dispela kain tingting inap kamap ples klia. Tasol maski wanem samting i kamap, yumi mas wok strong long abrusim ol kain pasin olsem. (Ritim Jems 3:​15, 16.) Disaipel Jems i tok ol kain tingting olsem ol i “samting bilong dispela graun,” long wanem, savetingting i kam long God i no as bilong en. Ol i bilong “olpela bel” na i kamapim ol laik nogut bilong skin, wankain olsem ol pasin ol animal i no gat tingting i save mekim. “Satan em i papa” bilong ol kain tingting olsem, long wanem, ol i kamapim pasin bilong ol spirit nogut i birua long God. I no stret liklik long Kristen i kamapim ol dispela pasin, a?

16. Ating yumi mas mekim wanem sampela senis? Wanem samting inap helpim yumi long mekim olsem?

¹⁶ I gutpela long olgeta wan wan insait long kongrigesen i skelim ol yet na wok long rausim ol dispela kain tingting. Ol wasman i mekim wok tisa insait long kongrigesen, olsem na ol i mas rausim ol tingting nogut. Em i no isi long mekim olsem, long wanem, yumi gat sin na pasin bilong dispela graun inap pulim yumi. Bilong mekim olsem em i kain olsem yumi traim long i go antap long wanpela maunten i gat graun malumalum na i wel. Sapos i no gat wanpela samting bilong holim, yumi inap wel i go bek. Tasol taim yumi holim strong tok bilong Baibel, na kisim helpim em kongrigesen bilong God long graun i laik givim long yumi, yumi inap wokabaut i go het.​—Sng. 73:​23, 24.

Ol Pasin Ol Man i Gat Savetingting i Laik Kamapim

17. Ol man i gat savetingting i save mekim wanem taim pasin nogut i traim ol?

¹⁷ Ritim Jems 3:17. Taim yumi skelim sampela pasin em “gutpela tingting na save i kam long God” i kamapim, dispela inap helpim yumi. Klinpela tingting i makim olsem ol pasin bilong yumi i klin na tingting i kirapim yumi long mekim ol samting em tu i klin. Wantu yumi mas sakim ol samting nogut. Em samting yumi mas mekim wantu tasol na yumi no gat wok long tingting long en. Ating sampela taim pinga bilong narapela man i laik sutim ai bilong yu. Wantu yu surikim het bilong yu o yu blokim han bilong man. Yu bai mekim wantu tasol; yu no gat wok long wokim tingting. Na olsem tasol taim samting i laik pulim yumi long mekim pasin nogut. Klinpela pasin na maus bilong bel em Baibel i skulim pinis i mas kirapim yumi long sakim wantu tasol pasin nogut. (Ro. 12:9) Baibel i stori long sampela husat i bin mekim olsem, kain olsem Josep na Jisas.​—Stt. 39:​7-9; Mt. 4:​8-​10.

18. Olsem wanem yumi ken (a) stap wanbel wantaim ol narapela? (b) kamapim pasin bilong stap wanbel?

¹⁸ Savetingting i kam long God i makim tu olsem yumi mas i stap wanbel wantaim ol narapela. Bilong mekim olsem yumi no ken i gat pasin bilong kros na kirapim pait, o mekim ol samting i bagarapim pasin wanbel. Jems i stori long dispela samting olsem: “Sapos yumi stap wanbel, dispela em i olsem yumi planim ol pikinini kaikai. Na long dispela pasin bilong wanbel, ol stretpela pasin i kamap long laip bilong yumi olsem gutpela kaikai i kamap long gaden.” (Jem. 3:18) Baibel i tok ‘stap wanbel i olsem yumi planim kaikai.’ Olsem wanem? Insait long kongrigesen yumi gat nem olsem yumi man bilong planim o man bilong kamautim pasin bilong stap wanbel? Planti taim yumi save tok pait wantaim ol narapela, na bel bilong yumi i save bagarap hariap o yumi yet i save bagarapim bel bilong ol narapela? Yumi strong long ol narapela i mas orait long yumi maski yumi gat wanem kain pasin, o long pasin daun yumi wok long rausim ol pasin ol narapela i no laikim? Yumi gat nem olsem yumi wok strong long kamapim pasin wanbel, na yumi save fogivim hariap rong bilong narapela na lusim tingting long en? Pasin bilong skelim yumi yet inap helpim yumi long luksave olsem yumi mas wok strong long kamapim moa yet savetingting i kam long God long dispela samting o nogat.

19. Olsem wanem yumi ken kisim nem olsem man bilong isi long ol narapela?

¹⁹ Jems i tok pasin bilong isi long ol man i kamapim savetingting i kam long God. Olsem wanem? Yumi gat nem olsem yumi man bilong redi long bihainim laik bilong narapela sapos dispela i no brukim sampela stiatok bilong Baibel, na yumi no strong long ol narapela i mas bihainim tingting bilong yumi? Yumi gat nem olsem man bilong pasin isi na ol narapela i no hatwok long toktok wantaim yumi? Ol kain pasin olsem i soim olsem yumi lain pinis long isi long ol man.

20. Wanem samting bai kamap taim yumi kamapim ol pasin bilong God nau yumi bin skelim?

²⁰ Kongrigesen inap stap gutpela tru taim ol brata na sista i wok strong long kamapim ol pasin bilong God em Jems i bin tok long en! (Sng. 133:​1-3) Taim yumi mekim pasin isi, stap wanbel wantaim ol narapela, na isi long ol man, dispela bai mekim na yumi stap gut wantaim ol narapela na i soim olsem yumi gat “gutpela tingting na save i kam long God.” Long stadi i kamap bihain long dispela, bai yumi skelim olsem wanem pasin bilong tingting long ol narapela olsem Jehova i save tingting long ol, i helpim yumi long mekim pasin isi na stap wanbel wantaim ol narapela.

[Futnot]

Yu Inap Stori Long Dispela?

• Wanem samting i mekim na Kristen i gat savetingting tru?

• Olsem wanem yumi ken kamapim gut moa savetingting i kam long God?

• Ol man i no gat “gutpela tingting na save i kam long God” ol i gat wanem kain pasin?

• Yu tingting strong long kamapim moa yet wanem ol pasin?

[Piksa long pes 23]

Olsem wanem kros inap kamap long nau?

[Piksa long pes 24]

Yu save sakim wantu pasin nogut?