Askim

Aposel Pol i tok “God bai i kisim bek olgeta Israel.” (Ro. 11:26) Olsem wanem? Tok bilong em i makim olsem sampela taim bihain olgeta Juda bai tanim bel na kam insait long lotu Kristen?

Nogat, Pol i no tok olsem. Olsem wanpela lain olgeta, ol tumbuna pikinini bilong Abraham ol i no bilip olsem Jisas em i Mesaia. Long ol yia bihain long dai bilong Jisas, ol samting i kamapim klia olsem lain Juda olgeta bai i no tanim bel na kam insait long lotu Kristen. Tasol tok Pol i mekim olsem “God bai i kisim bek olgeta Israel,” em i tru. Olsem wanem dispela tok em i tru?

Jisas i tokim ol hetman bilong lotu Juda long taim bilong em, olsem: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Mt. 21:43) Lain Israel i bin sakim Jisas, olsem na Jehova i kirap kisim wanpela nupela lain em i makim ol long holi spirit. Pol i kolim dispela lain olsem “Israel tru bilong God.”​—⁠Ga. 6:⁠16.

Ol narapela hap bilong Ol Skripsa Grik i kamapim olsem lain “Israel tru bilong God” em ol 144,000 Kristen em God i bin makim ol. (Ro. 8:​15-​17; KTH 7:⁠4) Kamapim Tok Hait 5:​9, 10 i kamapim olsem ol man i no bilong lain Juda ol tu i insait long dispela lain. Dispela tok i soim olsem ol Kristen God i bin makim ol i “bilong olgeta lain man, na bilong olgeta tok ples, na bilong olgeta kain skin, na bilong olgeta kantri.” God i bin makim lain Israel bilong spirit bilong kamap ‘pris na king, na bosim ol manmeri bilong graun.’ Maski Jehova i sakim lain Israel olsem lain em i bin makim bilong em yet, wan wan bilong ol inap kamap wanbel wantaim em, olsem ol aposel na planti narapela Kristen bilong bipo i bin mekim. Tru, wankain olsem olgeta narapela man, blut bilong Jisas Krais i mas baim bek ol dispela Juda tu.​—⁠1 Ti. 2:​5, 6; Hi. 2:9; 1 Pi. 1:​17-​19.

Bikpela hap bilong lain Juda long taim bilong ol aposel ol i no inap mekim wok king wantaim Jisas. Tasol dispela i no pasim God long kamapim samting em i tingting pinis long mekim, long wanem, long rot bilong profet bilong em, Jehova i tok: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”​—⁠Ais. 55:⁠11.

Dispela tok i stret wantaim samting God i tingting pinis long mekim, olsem 144,000 bai wok king wantaim Pikinini bilong em long heven. Baibel i kamapim klia olsem God i makim olgeta bilong lain 144,000. Em i no inap lusim wanpela!​—⁠KTH 14:​1-5.

Olsem na taim Pol i tok “God bai i kisim bek olgeta Israel,” em i no tok profet olsem bihain bai lain Juda olgeta i tanim bel na kam insait long lotu Kristen, nogat. Tasol em i tok God i laik inapim samting em i tingting pinis long mekim, olsem 144,000 manmeri bilong lain Israel bilong spirit bai wok king wantaim Pikinini bilong em, Jisas Krais, long heven. Long taim God i makim em bai kisim bek olgeta bilong lain 144,000​—⁠olgeta Israel bilong spirit​—⁠na bihain ol bai mekim wok king na pris long Kingdom Bilong Mesaia.​—⁠Ef. 2:⁠8.

[Piksa long pes 28]

Ol Kristen God i bin makim ol i ‘bilong olgeta lain man, tok ples, skin, na kantri’