Helpim Pikinini Bilong Yu Long Karim Hevi Bilong Krai Sori

LONG wanpela stua bilong salim ol buk, wanpela mama i bel hevi na singaut long meri bilong salim ol buk olsem: “Stua bilong yu i gat planti buk, tasol i no gat wanpela buk bilong helpim pikinini bilong mi!” Mama hia i laik painim wanpela buk bilong kisim ol tok bilong stiaim yangpela pikinini man bilong em long karim bel hevi bilong wanpela long famili i dai wantu tasol.

I gat as na dispela mama i bel hevi. Taim wanpela long famili i dai, dispela i bikpela hevi tru long wanpela liklik pikinini! Ol pikinini i save stap gut tru taim famili bilong ol i lukautim ol, tasol indai inap mekim na pikinini i lusim wanpela long famili em i bin pas gut wantaim. Yupela ol papamama, yupela i ken mekim wanem bilong helpim pikinini bilong yupela taim wanpela long famili i laik dai o wanpela i dai pinis?

Tru, sapos wanpela long famili i dai, yu yet i hatwok long karim dispela bel hevi; ating yu wari na tingting planti. Tasol yu no ken lusim tingting olsem yu mas helpim pikinini bilong yu. Nius bilong wanpela haus sik long Minnesota, Amerika, i tok: “Ol pikinini i harim kain kain tok ol narapela i mekim long indai, na ol inap kisim tingting kranki sapos i no gat wanpela i helpim ol long kisim stretpela tingting.” Nius i tok moa: “Yupela i mas tok tru long ol pikinini bilong yupela.” Olsem na ating i gutpela long yupela i kamapim tok tru long ol pikinini bilong yupela long wanpela rot ol inap kliagut long en, na tingim krismas bilong ol. Dispela i hatwok, long wanem, ol pikinini i no wankain long pasin bilong kisimgut insait bilong ol samting i kamap.​—⁠1 Korin 13:⁠11.

Rot Bilong Stori Long Indai

Ol saveman i tok, taim ol papamama i toktok long pikinini long indai, ol i no ken tok tasol olsem man i “slip,” i “lus,” o i “go longwe.” Taim ol i mekim kain tok olsem na ol i no kamapim stret insait bilong en, ating liklik pikinini bai paul. Tru, Jisas i tok piksa olsem man i slip bilong makim olsem man i dai pinis, na i stret em i tok olsem. Tasol tingim, em i no mekim dispela tok long ol pikinini. Na tu, em i kamapim insait bilong dispela tok piksa. Jisas i tokim ol disaipel: “Pren bilong yumi Lasarus i slip.” Tasol ol disaipel, maski ol i bikpela pinis, “i no save olsem Jisas i tok long Lasarus i dai pinis.” Olsem na Jisas i kamapim klia dispela tok olsem: “Lasarus i dai pinis.” (Jon 11:​11-​14) Sapos ol man i bikpela pinis i mas kisim ol tok i klia, ol pikinini tu i mas kisim, a?

Sampela lain bilong raitim buk, Mary Ann Emswiler na James P. Emswiler, ol i tok: “Taim papa o mama i toktok long indai, ating em i save mekim sampela tok i no bagarapim tumas bel bilong pikinini bilong em, tasol taim em i mekim olsem em inap givim sampela tingting long pikinini em i no gat pastaim, na dispela inap pretim o bagarapim em.” Olsem: Sapos yu tokim wanpela liklik pikinini olsem man i dai pinis em i slip tasol, dispela inap mekim pikinini i pret na ting nogut em i go slip long nait na em i no inap kirap long moningtaim. Sapos yu tok tasol olsem man i dai i “go longwe,” ating liklik pikinini bai pilim olsem man hia i no laikim em na lusim em.

Planti papamama i ting, taim ol i toktok long indai long ol pikinini, ol pikinini i save kliagut moa long ol tok i klia na i no hatwok long kisim, winim pasin bilong mekim ol tok bokis samting. (1 Korin 14:⁠9) Ol saveman i tok i gutpela yu kirapim pikinini bilong yu long kamapim ol askim na toktok long ol samting ol i tingting planti long en. Sapos yu toktok planti taim wantaim pikinini, dispela inap stretim tingting bilong pikinini na yu inap luksave long sampela narapela rot long helpim em.

Gutpela Buk Bilong Stiaim Yumi

Taim pikinini bilong yu i krai sori, em bai lukluk i go long yu bilong stiaim, helpim, na bekim ol askim bilong em. Olsem na yu inap painim we ol stretpela save long indai? Planti man i pilim olsem Baibel i gat ol gutpela tok bilong mekim gut bel bilong man na helpim man long wetim ol gutpela samting bai kamap bihain. Baibel i tokaut stret long indai i kamap olsem wanem, na ol man i dai pinis i stap olsem wanem, na wanem samting bai painim ol man i dai pinis. Stretpela save olsem “ol man i dai pinis, ol i no inap save long wanpela samting,” dispela inap helpim pikinini bilong yu long save olsem man i dai pinis i no karim pen na hevi. (Saveman 9:​4, 5) Na tu, long Baibel, God i tok olsem long wanpela paradais long graun bai yumi lukim gen famili bilong yumi i dai pinis.​—⁠Jon 5:​28, 29.

Long rot bilong Baibel, yu ken helpim pikinini bilong yu long lain olsem Baibel i stiaim gut yumi na strongim bel bilong yumi long olgeta hevi i save kamap. Na tu, pikinini bilong yu bai lukim olsem yupela papa o mama i save larim Baibel i stiaim yupela long ol bikpela samting bilong laip.​—⁠Sindaun 22:6; 2 Timoti 3:⁠15.

Bekim Bilong Ol Askim Bilong Yu

Bilong helpim pikinini bilong yu long karim bel hevi, ating sampela samting bai kamap na yu no save yu ken mekim wanem. Yu inap mekim wanem?a Orait nau yumi ken skelim sampela askim i save kamap planti taim.

• I gutpela mi haitim bel hevi bilong mi long ai bilong pikinini bilong mi? Tru, em pasin bilong ol papamama long ol i laik lukautim gut ol pikinini bilong ol. Tasol yu ting i gat rong long pikinini bilong yu i lukim olsem yu krai sori? Planti papamama i ting i gutpela long ol i kamapim bel hevi bilong ol, na dispela i soim pikinini bilong ol olsem i no gat rong long krai sori. Sampela papamama i bin toktok wantaim pikinini bilong ol long sampela stori bilong Baibel we sampela i krai sori long ai bilong ol narapela. Olsem, Jisas i krai taim gutpela pren bilong em Lasarus i dai pinis. Jisas i no haitim bel hevi bilong em.​—⁠Jon 11:⁠35.

• I gutpela long liklik pikinini bilong mi i go long fiuneral o long bung bilong planim man long matmat, o long tok ol i mekim bilong tingim man i dai pinis? Sapos pikinini i kam, i gutpela long tokim em long ol samting bai kamap, na bilong wanem ol i wokim dispela bung. Tru, sampela taim ol papamama inap ting olsem i gat ol gutpela as na pikinini i no ken i stap long fiuneral o long sampela samting bilong fiuneral. Ol pikinini i stap long wanpela fiuneral bilong ol Witnes Bilong Jehova ol inap kisim gutpela helpim long tok bilong Baibel ol i mekim. Na tu, “pasin bilong givim bel” na pasin laikim i stap namel long ol man i stap long fiuneral, dispela inap mekim bikpela samting long pikinini na mekim gut bel bilong em.​—⁠Rom 12:​10, 15; Jon 13:​34, 35.

• I gutpela mi toktok long pikinini bilong mi long famili husat i dai pinis o nogat? Sampela saveman i tok sapos yu no stori liklik long pikinini long man i dai pinis, ating pikinini bilong yu bai ting yu laik haitim sampela samting bilong dispela daiman o yu no laik em i tingim moa dispela man i dai pinis. Julia Rathkey, wanpela meri bilong raitim buk, i tok: “Em i bikpela samting long helpim pikinini long tingim man i dai pinis na no ken pret.” Toktok wantaim pikinini bilong yu long man i dai pinis, na kamapim sampela gutpela pasin bilong daiman, ating dispela bai helpim pikinini long karim bel hevi bilong em. Ol papamama Witnes i save mekim gut bel bilong ol pikinini bilong ol long rot bilong kamapim gutpela tok bilong Baibel long kirap bek long Paradais long graun, we i no gat moa sik na indai.​—⁠KTH 21:⁠4.

• Olsem wanem mi inap helpim pikinini bilong mi taim em i krai sori? Long taim pikinini bilong yu i krai sori, ating em inap kisim sampela sik, o ating pikinini inap kros o tingting planti, long wanem, em i bel hevi o em i pilim olsem em i no inap mekim wanpela samting. No ken kirap nogut sapos pikinini bilong yu i pilim olsem em i gat asua, o em i laik pas strong moa wantaim yu, o em i pret sapos yu kam leit o yu sik. Yu ken mekim wanem bilong helpim pikinini bilong yu long karim bel hevi bilong em? Pikinini bilong yu i no ken ting olsem yu no lukim olsem em i bel hevi. Olsem na tingim gut pikinini bilong yu na was gut, nogut bel bilong em i bagarap tru o em i bel hevi longpela taim tumas. No ken ting indai i no mekim sampela samting long pikinini bilong yu. Long olgeta taim wok strong long mekim gut bel bilong em, kirapim pikinini long kamapim ol askim na toktok gut wantaim em. Long rot bilong “buk bilong God” yu ken strongim pasin bilong pikinini bilong yu long bilip olsem gutpela samting bai kamap long bihain, na yu ken strongim bel bilong yu tu.​—⁠Rom 15:⁠4.

• Long wanem taim mi ken kirapim gen famili long mekim ol wok samting bilong ol wan wan de? Ol saveman i tok, i gutpela long mekim yet planti wok em famili i save mekim long olgeta taim. Pasin bilong mekim ol wok bilong ol wan wan de i gutpela tul bilong helpim famili long karim bel hevi. Namel long ol Witnes Bilong Jehova, planti papamama i luksave olsem pasin bilong mekim ol wok bilong lotu, olsem oltaim mekim famili stadi bilong Baibel na go long ol miting Kristen, dispela inap helpim na strongim famili.​—⁠Lo 6:​4-9; Hibru 10:​24, 25.

I go inap long taim God Jehova i pinisim sik na indai, sampela taim hevi bilong wanpela long famili i dai bai painim ol pikinini. (Aisaia 25:⁠8) Tasol sapos papamama i strongim bel na helpim gut pikinini, ol bai inap karim dispela hevi bilong wanpela long famili i dai.

[Ol Futnot]

[Rait long pes 19]

Kirapim pikinini bilong yu long kamapim ol askim long ol samting em i tingting planti long en

[Piksa long pes 20]

Mekim yet ol samting famili i save mekim long olgeta taim, olsem Baibel stadi bilong famili