Jehova—‘Man Bilong Kisim Bek’ Lain Bilong Em Long Taim Ol i Bin Raitim Baibel
“God . . . yu mas i kam long mi kwiktaim. Bikpela, yu yet yu man bilong helpim mi na kisim bek mi.”—SNG. 70:5.
1, 2. (a) Long wanem taim ol manmeri i lotuim God ol i save askim em long helpim ol? (b) Dispela i kamapim wanem askim? Yumi inap painim bekim bilong en long we?
TAIM papamama bilong wanpela meri marit i gat 23 krismas i holide i stap, ol i harim olsem pikinini meri bilong ol i lus. Ol i saspek olsem wanpela samting nogut i painim em. Kwiktaim ol i lusim ples ol i holide long en na ol i go bek long haus, na long rot ol i wok long beten askim Jehova long helpim ol. Wanpela yangpela Witnes husat i gat 20 krismas em i kisim wanpela sik, na isi isi dispela sik inap mekim em i kamap paralais olgeta. Em i kirap beten strong long Jehova. Wanpela mama wanpis i hatwok long painim wok mani na em i no gat mani inap long baim kaikai bilong lukautim em yet na pikinini meri i gat 12-pela krismas. Em i beten na kamapim olgeta tingting na wari bilong em long Jehova. Yes, taim ol bikpela hevi i painim ol manmeri i lotuim God, ol i save askim em long helpim ol. Olsem wanem long yu? Sampela taim yu bin beten askim Jehova long helpim yu taim yu gat wanpela bikpela hevi tru?
2 Dispela i kamapim wanpela bikpela askim, olsem: Taim yumi askim Jehova long helpim yumi, yu ting em bai harim beten bilong yumi? Yumi inap painim bekim bilong dispela askim long Song 70, na dispela inap strongim bilip bilong yumi. Devit i bin raitim dispela song—em i wanpela gutpela wokboi bilong Jehova na planti taim ol bikpela hevi i bin painim em. Dispela man bilong raitim song i tok long Jehova olsem: “Bikpela, yu yet yu man bilong helpim mi na kisim bek mi.” (Sng. 70:5) Taim yumi skelim Song 70, dispela inap helpim yumi long save bilong wanem yumi tu inap askim Jehova long helpim yumi taim yumi gat hevi, na yumi ken bilip tru olsem em bai stap olsem ‘man bilong kisim bek’ yumi.
‘Yu Man Bilong Kisim Bek’ Lain Bilong Yu
3. (a) Long Song 70, Devit i askim God long helpim em kwiktaim long wanem samting? (b) Long Song 70, Devit i kamapim klia olsem em i bilip long wanem samting?
3 Long namba wan ves na laspela ves bilong Song 70, Devit i askim God long helpim em kwiktaim. (Ritim Song 70:1-5.) Em i askim Jehova long “kam hariap” na kisim bek em “kwiktaim.” Kirap long Song Sapta 70 ves 2 i go long Song Sapta 70 ves 4, Devit i kamapim 5-pela samting bai kamap—3-pela em ol samting em i laik bai Jehova i mekim long ol man husat i laik kilim em i dai. Devit i askim Jehova long daunim ol dispela birua na semim ol long pasin nogut bilong ol. Narapela 2-pela samting em i kolim long Song Sapta 70 ves 4 i tok long ol manmeri bilong God. Devit i beten olsem ol manmeri i go long Jehova, ol i ken amamas na litimapim nem bilong Jehova. Bilong pinisim dispela song, Devit i tokim Jehova: “Yu yet yu man bilong helpim mi na kisim bek mi.” Tingim, Devit i no tok, “Gutpela yu stap olsem,” na i olsem em i askim God long mekim wanpela samting, nogat. Em i tok, “Yu man bilong,” na dispela i kamapim klia bilip bilong em. Devit i bilip olsem God bai helpim em.
4, 5. Song 70 i skulim yumi long wanem pasin bilong Devit? Yumi inap bilip tru long wanem samting?
4 Song 70 i kamapim olsem Devit i gat wanem kain pasin? Taim ol birua i laik kilim em i dai, Devit i no mekim ol samting long tingting bilong em yet, nogat. Em i bilip olsem Jehova bai mekim sampela samting long ol dispela birua, na em bai mekim long taim na long rot em yet i makim. (1 Sml. 26:10) Devit i bilip tru olsem Jehova i save helpim na kisim bek ol manmeri em ol i wok long painim em. (Hi. 11:6) Devit i bilip olsem i gat as na ol manmeri husat i lotu tru long Jehova ol i ken amamas na litimapim nem bilong Em long rot bilong tokim ol arapela long biknem bilong em.—Sng. 5:11; 35:27.
5 Olsem Devit, yumi ken bilip tru olsem Jehova em i Man Bilong Helpim yumi na ‘man bilong kisim bek’ yumi. Olsem na taim ol bikpela hevi i painim yumi o yumi pilim olsem yumi sot long helpim, i stret yumi ken beten long Jehova i mas kam hariap na helpim yumi. (Sng. 71:12) Orait, Jehova inap mekim wanem taim yumi beten askim em long helpim yumi? Paslain long yumi stori long olsem wanem Jehova inap helpim yumi, yumi ken skelim 3-pela rot we em i bin kisim bek Devit, na em i bin helpim Devit taim ol bikpela hevi i painim em.
Kisim Bek Ol Long Han Bilong Ol Birua
6. Wanem samting i helpim Devit long save olsem Jehova i save kisim bek ol stretpela man?
6 Long rot bilong ol hap bilong Baibel i stap long dispela taim bipo, Devit i save olsem ol stretpela man i ken bilip olsem Jehova bai helpim ol. Taim Jehova i kamapim Bikpela Tait na i bagarapim ol manmeri i givim baksait long God, em i bin lukautim Noa na famili bilong em, em ol i daun long God, na ol i abrusim bagarap. (Stt. 7:23) Taim Jehova i salim paia na ston salfa i kam daun olsem ren na bagarapim ol manmeri bilong Sodom na Gomora, em i bin helpim stretpela man Lot na tupela pikinini meri bilong em long ranawe na abrusim bagarap. (Stt. 19:12-26) Taim Jehova i bagarapim hambakman Fero na lain soldia bilong em long solwara Retsi, Em i lukautim lain bilong em na helpim ol long abrusim bagarap. (Kis. 14:19-28) Olsem na yumi no kirap nogut olsem long narapela song Devit i litimapim nem bilong Jehova olsem “God bilong yumi yet i save helpim yumi na yumi stap gut.”—Sng. 68:20.
7-9. (a) Wanem samting i mekim na Devit i bilip tru olsem God inap kisim bek lain bilong em? (b) Devit i givim biknem long husat olsem man i bin kisim bek em?
7 Na tu, i gat wanpela samting i bin kamap long Devit yet na dispela i mekim na em i bilip tru olsem Jehova inap kisim bek em. Devit i bin lukim klia olsem “oltaim [Bikpela] i holim yumi long han bilong en na i no save lusim yumi.” (Lo 33:27) Planti taim Jehova i bin kisim bek Devit long “han bilong ol birua.” (Sng. 18:17-19, 48) Skelim dispela stori:
8 Devit i save tru long mekim pait, olsem na wanpela taim ol meri Israel i kirap litimapim nem bilong em na dispela i mekim King Sol i jeles stret long Devit, na inap tupela taim em i tromoi spia bilong sutim Devit. (1 Sml. 18:6-9) Long dispela tupela taim Devit i abrusim spia na ranawe. Olsem wanem? Save bilong Devit long mekim pait, dispela tasol i mekim na em i abrusim spia? Nogat. Baibel i stori olsem: “Bikpela i stap wantaim em.” (Ritim 1 Samuel 18:11-14.) Bihain, Sol i wokim rot bambai ol Filistia i kilim i dai Devit, tasol dispela samting i no kamap, na “nau Sol i save gut olsem, Bikpela i stap wantaim Devit.”—1 Sml. 18:17-28.
9 Devit i givim biknem long husat olsem man i bin kisim bek em? Tok i go pas bilong Song 18 i kamapim olsem “Devit i singim dispela song long Bikpela long de Bikpela i kisim bek Devit long han bilong Sol.” Devit i kamapim tingting bilong em long rot bilong singsing, na em i tok: “Bikpela em i strongpela banis bilong mi. Em i olsem ston i haitim mi, na em i save kisim bek mi long han bilong ol birua. God bilong mi em i olsem bikpela ston mi save go long en na hait long ol birua.” (Sng. 18:2) Taim yumi kisim save olsem Jehova i gat strong long kisim bek lain bilong em, dispela i strongim bilip bilong yumi, a?—Sng. 35:10.
Lukautim Em Long Taim Em i Gat Sik
10, 11. Wanem samting i helpim yumi long save long wanem taim Devit i kisim dispela sik em Song 41 i stori long en?
10 Wanpela taim King Devit i kisim wanpela bikpela sik, na Song 41 i toktok long dispela samting. Devit i sik nogut tru na inap sampela haptaim em i slip tasol long bet, olsem na sampela birua bilong em i ting olsem “bai em i dai.” (Buk Song sapta 41 Ves 7, 8) Wanem taim dispela bikpela sik i painim Devit? Ol tok i stap long dispela song inap makim wanpela taim nogut i painim Devit taim pikinini man bilong em, Apsalom, i laik kisim wok king bilong em.—2 Sml. 15:6, 13, 14.
11 Olsem: Devit i tok em i gat wanpela pren husat i poroman tru bilong em na em i save kaikai wantaim em, tasol nau dispela pren i laik putim em long han bilong ol birua. (Buk Song 41 Ves 9) Dispela tok inap kirapim yumi long tingim wanpela samting i bin kamap long Devit. Taim Apsalom i mekim pasin bikhet, man i save givim gutpela tingting long Devit, em Ahitofel, em i birua long Devit na i kirap bihainim Apsalom na mekim pasin bikhet long king. (2 Sml. 15:31; 16:15) Tingim, king i sik nogut tru na em i slip tasol, em i no gat strong long kirap, na em i save olsem ol birua i banisim em na ol i laik bai em i dai na ol i ken mekim ol samting nogut ol i tingting pinis long mekim.—Song Sapta 41 Ves 5.
12, 13. (a) Devit i tokaut olsem em i bilip long wanem samting? (b) Ating God i bin mekim wanem bilong strongim Devit?
12 Devit i bilip oltaim long dispela ‘man bilong kisim bek’ lain bilong em. Long wanpela gutpela wokboi bilong Jehova i gat sik, Devit i tok: “Bikpela bai i helpim em long taim hevi i kamap long em. Taim dispela man i gat sik, Bikpela bai i lukautim em. Em bai i mekim orait sik bilong em, na mekim em i kamap strong gen.” (Sng. 41:1, 3) Devit i kamapim bilip bilong em gen long dispela ves, em i tok: “Bikpela bai i lukautim em.” Devit i bilip tru olsem Jehova bai kisim bek em. Jehova bai kisim bek em long wanem rot?
13 Devit i no kisim tingting olsem Jehova bai wokim mirakel na pinisim sik bilong em, nogat. Tasol Devit i bilip tru olsem Jehova bai “lukautim em,” olsem helpim na strongim em taim em i sik na slip i stap. Devit i nidim kain helpim olsem. Sik i pinisim strong bilong em, na ol birua i banisim em na ol i wok long mekim ol tok nogut i daunim em. (Buk Song sapta 41 Ves 5, 6) Ating Jehova i strongim Devit taim em i helpim Devit long tingim bek ol gutpela tok bilong mekim gut bel bilong em. Devit i tok: “Yu bin lukim mi i wokabaut stret, olsem na yu lukautim mi.” (Buk Song sapta 41 Ves 12) Ating Devit i bin kisim strong tu taim em i tingim olsem maski em i no gat strong na ol birua i mekim ol tok nogut long em, Jehova i tingim em olsem man bilong i stap gut long Em. Bihain Devit i kamap orait gen na sik i pinis. Taim yumi kisim save olsem Jehova inap lukautim ol man i gat sik, dispela i strongim bel bilong yumi, laka?—2 Ko. 1:3.
Lukautim Em Long Kaikai Samting
14, 15. Long wanem taim Devit na lain bilong em i sot long kaikai samting? Ol i kisim wanem kain helpim?
14 Taim Devit i kamap king bilong Israel, em i gat ol nambawan gutpela kaikai na dring, na em inap singautim planti arapela tu long i kam kaikai wantaim em. (2 Sml. 9:10) Tasol Devit i save tu long man i save pilim olsem wanem taim em i sot long kaikai na wara samting. Taim pikinini bilong em, Apsalom, i bikhet na i laik kisim wok king bilong em, Devit wantaim sampela man em ol i stap long sait bilong em ol i ranawe lusim Jerusalem. Ol i ranawe i go long graun Gileat long hap is bilong wara Jordan. (2 Sml. 17:22, 24) Devit na lain bilong em ol i stap olsem ol ranaweman na ol i sot tru long kaikai na wara, na ol i laik malolo tu. Tasol i hatwok tru long painim kaikai na wara samting long kain hap olsem.
15 Bihain, Devit na lain bilong em ol i kam kamap long taun Mahanaim. Long dispela hap ol i bungim 3-pela strongpela man—Sobi, Makir, na Barsilai. Ol dispela man i redi long lusim laip bilong ol yet bambai ol i ken helpim dispela king em God i bin makim. Ol inap lusim laip bilong ol, long wanem, sapos Apsalom i kisim wok king em bai givim strafe long olgeta man husat i bin sapotim Devit. Ol dispela 3-pela man i daun long Devit na ol i luksave long hevi bilong em na lain bilong em. Olsem na ol i bringim ol samting ol i nidim, na sampela bilong ol dispela samting em ol bet, wit, bali, wit ol i kukim long paia, ol bin, hani, susu bilong bulmakau, na sampela sipsip. (Ritim 2 Samuel 17:27-29.) Ol dispela 3-pela man i soim olsem ol i stap gut long God na long Devit, na ol i gat pasin bilong mekim gut long ol arapela, olsem na yumi ken ting olsem Devit i bin pilim tru dispela pasin bilong ol. Devit i no inap lusim tingting long dispela gutpela pasin ol i bin mekim.
16. Husat tru i bin lukautim Devit na lain bilong em long kaikai samting?
16 Tasol husat tru i bin lukautim Devit na lain bilong em long kaikai samting? Devit i bilip tru olsem Jehova i save lukautim ol manmeri bilong em. Jehova inap kirapim ol arapela wokboi bilong em long helpim wanpela wanbilip husat i sot long ol samting. Taim Devit i tingim gen ol samting i bin kamap long graun Gileat, em i luksave olsem pasin helpim bilong ol dispela 3-pela man i kamapim klia gutpela pasin bilong Jehova. Klostu long taim em i dai, Devit i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.” (Sng. 37:25) Yumi save olsem Jehova bai lukautim ol wokboi bilong em long ol samting ol i sot long en, na dispela i mekim gut bel bilong yumi, a?—Snd. 10:3.
“Bikpela i Save Long Rot Bilong Kisim Bek Ol” Man
17. Planti taim Jehova i bin kamapim klia olsem em inap mekim wanem?
17 Long taim ol man i bin raitim Baibel, Jehova i bin kisim bek planti manmeri husat i lotuim em, na Devit em i wanpela bilong ol. Kirap long taim bilong Devit na i kam, planti taim God i bin kamapim klia olsem tok bilong aposel Pita em i tru, olsem: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim.” (2 Pi. 2:9) Skelim tupela stori moa i kamapim klia dispela samting.
18. Long taim bilong Hesekia, Jehova i bin mekim wanem bilong kisim bek ol gutpela wokboi bilong em?
18 Taim strongpela ami bilong ol Asiria i kam insait long Juda na tok long bagarapim Jerusalem long yia 732 B.C.E. samting, King Hesekia i beten olsem: “God, Bikpela bilong mipela, nau mi laik bai yu helpim mipela na kisim bek mipela . . . na bai olgeta lain manmeri bilong graun i ken save gut olsem, yu tasol yu Bikpela.” (Ais. 37:20) Namba wan tingting bilong Hesekia em olsem, em i no laik bai wanpela samting i bagarapim gutnem bilong God. Jehova i harim dispela beten, na long wanpela nait tasol wanpela ensel i kilim i dai 185,000 soldia bilong Asiria, na long dispela rot Jehova i kisim bek ol gutpela wokboi bilong em.—Ais. 37:32, 36.
19. Ol Kristen long taim bilong ol aposel, ol i bin bihainim wanem tok lukaut na ol i abrusim bagarap?
19 Sampela de paslain long Jisas i dai, em i mekim wanpela tok profet i olsem tok lukaut bilong helpim ol disaipel bilong em i stap long Judia. (Ritim Luk 21:20-22.) Planti yia bihain, long yia 66 C.E., ol Juda i bikhet long gavman na dispela i kirapim lain ami bilong Rom long i kam pait long Jerusalem. Ol lain soldia i stap aninit long Sestius Galus, ol i tekewe graun aninit long wanpela hap bilong banis, tasol wantu ol i lusim Jerusalem na i go bek. Ol gutpela Kristen i luksave olsem dispela em rot bilong ol long abrusim bagarap em Jisas i bin tok profet long en, olsem na ol i ranawe i go long ol ples maunten. Ol lain ami bilong Rom i kam bek gen long yia 70 C.E. Long dispela taim ol i no lusim Jerusalem na i go bek, nogat, ol i bagarapim tru Jerusalem. Ol Kristen husat i bin bihainim tok lukaut bilong Jisas ol i abrusim dispela bikpela bagarap.—Lu. 19:41-44.
20. Bilong wanem yumi ken bilip olsem Jehova em i ‘man bilong kisim bek’ yumi?
20 Taim yumi skelim ol stori i kamapim klia olsem Jehova i save helpim ol manmeri bilong em, dispela i strongim tru bilip bilong yumi. Ol samting em i bin mekim long bipo i olsem as na yumi ken bilip tru long Jehova. Maski wanem ol hevi i painim yumi long nau o long bihain, yumi tu inap bilip tru long Jehova olsem em i ‘man bilong kisim bek’ yumi. Tasol Jehova inap kisim bek yumi long wanem ol rot? Na olsem wanem long ol dispela lain em yumi bin stori long ol long kirap bilong dispela stadi? Wanem samting i kamap long ol? Stadi i kamap bihain long dispela bai stori long dispela samting.
Yu Inap Tingim?
• Olsem wanem Song 70 i strongim bilip bilong yumi?
• Olsem wanem God i bin lukautim Devit taim em i gat sik?
• Wanem ol stori i soim olsem Jehova inap kisim bek ol manmeri bilong em long han bilong ol birua?
[Piksa long pes 6]
Jehova i bin harim beten bilong Hesekia