Yu Wokim Haus Long Wesan o Antap Long Ston?
OLSEM WANEM? Yu save amamas long ritim Baibel? Yu makim hap taim long ol Witnes Bilong Jehova i stadi wantaim yu long Baibel? Sapos olsem, ating yu pilim olsem save yu bin kisim i helpim yu long save gut long as na planti hevi i pulap long graun long nau. (KTH 12:9, 12) Na tu, planti tok bilong Baibel i bin mekim gut bel bilong yu taim hevi i painim yu na i helpim yu long wetim gutpela samting i kamap bihain.—Song 145:14; 147:3; 2 Pita 3:13.
Nambawan samting em ol man i laik kamap disaipel bilong Krais i mas mekim, ol i mas kisim stretpela save long Baibel. Yu ting em dispela samting tasol man i mas mekim? Nogat. Bilong i stap trupela Kristen—moa yet long taim wanpela samting i traim bilip—man i lainim tok bilong Baibel i mas mekim narapela bikpela samting. Em wanem samting? Bilong painimaut dispela samting, bai yumi skelim Bikpela Tok Long Maunten, em wanpela tok Jisas i mekim antap long wanpela maunten long hap bilong Galili.—Matyu 5:1, 2.
Traim Strong Bilong Tupela Haus
Olsem wanem? Yu save long ol tok Jisas i bin kamapim long Bikpela Tok Long Maunten? Yu inap lukim dispela tok long Gutnius em Matyu na Luk i raitim. (Matyu 5:1–7:29; Luk 6:20-49) Yu inap ritim dispela tok olgeta insait long 20 minit tasol. Tasol insait long dispela tok, Jisas i kolim 20 skripsa bilong Ol Skripsa Hibru na em i mekim planti tok piksa, winim 50 samting. Wanpela tok piksa i stori long pasin bilong wokim tupela haus, dispela tok piksa i bikpela samting, long wanem, Jisas i mekim wok long en olsem pinis bilong tok bilong em. Sapos yu kliagut long bikpela samting bilong dispela tok piksa, dispela bai helpim yu long save long samting yu ken mekim bilong sanap strong yet olsem wanpela disaipel bilong Krais, maski wanem samting i kamap bilong traim bilip bilong yu.
Jisas i tok: “Man i harim dispela tok bilong mi na i bihainim, em i olsem wanpela man i gat gutpela tingting, na em i wokim haus bilong en antap long ples ston. Na ren i kam daun, na tait bilong wara i kamap, na win i kirap strong, na ol dispela samting i sakim dispela haus. Tasol em i no pundaun, long wanem, simen bilong dispela haus em i pas strong tru long bikpela bikpela ston insait long graun. Tasol man i harim dispela tok bilong mi na i no bihainim, em i olsem wanpela longlong man i sanapim haus bilong en antap long wesan tasol. Na ren i kam daun, na tait bilong wara i kamap, na win i kirap strong. Na ol dispela samting i sakim dispela haus, na em i pundaun. Yes, em i pundaun nogut tru.”—Matyu 7:24-27.
Man “i Wokim Hul i Go Daun” Tru
Long rot bilong dispela tok piksa bilong tupela man bilong wokim haus, Jisas i kamapim wanem bikpela tok long ol disaipel? Bilong kisim save long dispela, yumi ken skelim gut tok bilong Jisas. Yu luksave long wanem samting bilong dispela tupela haus? Tupela wantaim inap kisim wankain bagarap long bikpela win na ren samting. Ating tupela haus wantaim i luk wankain. Ating tupela i sanap long wanpela hap tasol—klostu long narapela narapela. Tasol wanpela haus ol i wokim antap long wesan, na narapela ol i wokim antap long ston. Olsem wanem na i olsem? Gutnius Luk i Raitim i tok, man i gat gutpela tingting em i “wokim hul i go daun” tru na i kamap long ol bikpela bikpela ston. (Luk 6:48) Long dispela as, haus bilong man i gat gutpela tingting i sanap strong.
Orait, Jisas i laik kamapim klia wanem bikpela poin? Jisas i no mekim dispela tok piksa bilong stori long tupela haus i luk olsem wanem o wanem kain ples ol haus i sanap long en, o bikpela strong bilong bikpela win na ren samting, nogat. Em i mekim dispela tok piksa bilong kamapim pasin bilong dispela tupela man bilong wokim haus. Wanpela i wokim hul i go daun tru na narapela i wokim antap tasol. Olsem wanem yu ken kamap wankain olsem dispela man i gat gutpela tingting i wokim hul i go daun tru? Jisas i kamapim bikpela poin bilong dispela tok piksa na em i tok: “Bilong wanem yupela i save kolim mi ‘Bikpela, Bikpela,’ na yupela i no bihainim tok bilong mi? Sapos wanpela man i kam long mi, na i harim tok bilong mi na i bihainim, orait mi ken tokim yupela long pasin bilong dispela kain man. Dispela man em i olsem wanpela man . . . i wokim hul i go daun, na em i putim simen i go pas tru long bikpela bikpela ston insait long graun.”—Luk 6:46-48.
Tru tumas, pasin bilong putim yau long tok bilong Baibel o ritim Baibel long haus, i kain olsem man i wokim haus long wesan—i no gat wok long wokim hul. Tasol bilong mekim, o bihainim ol tok bilong Krais, em samting yumi mas wok strong long mekim. Dispela i makim olsem yumi mas wokim hul i go daun tru bilong kamap long ol bikpela ston.
Olsem na bilong sanap strong long bilip olsem wanpela disaipel bilong Krais, yu mas bihainim ol tok yu harim. Long olgeta de taim yu bihainim ol tok yu bin lainim long Baibel, yu olsem dispela man i gat gutpela tingting husat i wokim hul i go daun tru. Olsem na man i lainim tok bilong Baibel i mas askim em yet, olsem: ‘Mi man bilong harim nating tasol, o mi man bilong bihainim tok? Mi save stadi na ritim nating tasol Baibel, o mi save bihainim ol tok bilong Baibel taim mi mas mekim ol disisen?’
Gutpela Samting i Kamap Long Pasin Bilong Bihainim Tok
Tingim stori bilong José. Papamama i bin skulim em long rispek long ol stretpela lo bilong Baibel, tasol em yet i no bin lainim Tok Bilong God. José i tok: “Taim mi lusim papamama na i go i stap mi yet, mi traim long mekim gutpela pasin, tasol mi gat planti poroman nogut. Mi kirap long kisim drak, mekim pasin pamuk, na mi save pait wantaim ol narapela.”
Bihain, José i wokim disisen long senisim sindaun bilong em na em i wok strong long lainim gut tok bilong Baibel. Em i tok: “Wanpela samting i bin kirapim mi tru long senis, em mi bin ritim na kisimgut insait bilong Bikpela Tok Long Maunten em Jisas i bin mekim. Tasol longpela taim i bin lus bambai mi ken senisim ol pasin na sindaun bilong mi. Pastaim mi pret long ol poroman nogut bilong mi bai ting olsem wanem long mi, tasol mi daunim dispela pret. Mi lusim pasin bilong tok giaman na mekim ol tok doti, na mi kirap long go long ol miting bilong ol Witnes Bilong Jehova. Olsem Jisas i bin tok promis—mi kisim save olsem pasin bilong i no gat planti samting na bihainim ol tok bilong Baibel, dispela i save mekim man i stap amamas inap oltaim.”—Matyu 5:3-12.
Wanem samting bai kamap taim yu wokim hul i go daun tru na wokim haus antap long ol bikpela ston—olsem, taim yu bihainim gut ol tok yu ritim long Baibel? Jisas i tok: “Taim tait i kamap na wara i sakim dispela haus, haus i no pundaun, long wanem, dispela man i bin wokim gutpela strongpela haus.” (Luk 6:48) Tru tumas, sapos yu wokim gut haus, olsem bihainim gut ol tok yu lainim, ol traim olsem strongpela win, i no inap brukim haus bilong yu na em i no inap pundaun. Dispela tok i mekim gut bel bilong yumi, laka?
Brata bilong Jisas, em disaipel Jems, em i kolim narapela blesing bilong ol man husat i lainim tok bilong Baibel na ol i no harim nating tasol, nogat, ol i save bihainim tru. Jems i tok: “Dispela tok yupela i kisim, em yupela i mas bihainim. Yupela i no ken harim nating tasol? Nogat. . . . Dispela lo i save brukim strong bilong sin na mekim yumi i stap fri, em i stret olgeta. Na sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru. Tasol em i no ken harim nating na lusim tingting hariap.”—Jems 1:22-25.
Tru tumas, ol man husat i bihainim ol tok bilong Baibel ol i stap amamas tru. Kain amamas olsem, i strongim ol disaipel bilong Krais long sanap strong long ol hevi i olsem strongpela win i traim bilip na pasin bilong ol long givim bel tru long God.
Bai Yu Mekim Wanem?
Taim Jisas i mekim Bikpela Tok Long Maunten, em i kamapim klia olsem, bilong mekim wok bilong God Jehova, yumi mas makim stret samting yumi laik mekim. Olsem: Jisas i skulim ol man olsem, ai bilong man i mas i stap gutpela o ai bilong em i nogut, em i stap wokboi bilong God o wokboi bilong mani, na em i wokabaut long liklik rot i gat hatwok long en o long bikpela rot em i isi long bihainim. (Matyu 6:22-24; 7:13, 14) Long dispela tok piksa bilong tupela man bilong wokim haus em Jisas i bin mekim long pinis bilong tok bilong em, em i givim rot long ol disaipel bilong em long makim: Ol bai bihainim pasin bilong man i gat gutpela tingting o pasin bilong longlong man.
Sapos yu wok yet long givim bel long bihainim ol tok yu lainim long Baibel, orait yu bihainim gutpela tingting. Yes, taim yu wokim hul i go daun tru bilong wokim haus antap long ol bikpela ston, dispela bai helpim yu long kisim ol blesing long nau na long bihain.—Sindaun 10:25.
[Ol Piksa long pes 30]
Bilong yumi sanap strong long bilip, yumi mas bihainim ol tok bilong Baibel yumi lainim