Mi Kisim Tok i Tru Long Rot Bilong Painim Ol Popaia
Stori bilong R. Stuart Marshall
Wanpela pris Jesuit i tok, “Mipela i no save toktok wantaim ol Witnes Bilong Jehova. Ol i save mekim wok long Baibel.” Mi kirap nogut long bekim bilong em, long wanem, mi bin askim em long helpim meri bilong mi long luksave olsem sampela tok ol Witnes Bilong Jehova i autim i no stret. Mi wokim tingting olsem mi yet i mas stadi long Baibel wantaim ol Witnes na bai mi inap soim meri bilong mi olsem tok ol i autim i no stret.
LONG dispela taim mi gat 43 krismas, na mi traim long painim rot bilong daunim ol tok ol Witnes Bilong Jehova i autim. Bilong mekim olsem mi mekim wok long save bilong mi long lotu na pasin bilong wokim tingting. Kirap long komiuniti skul i go inap long yunivesiti mi bin stap long ol skul bilong Misin Katolik. Maski mi kisim yunivesiti digri long ol samting bilong mani na wok bisnis long 1969, na tu, mi kisim save long as bilong kain kain samting na ol tok bilong lotu, i no gat wanpela bilong ol Katolik skul mi bin go long en i gat kos bilong stadi long Baibel.
Taim mi pinis skul long yunivesiti, mi maritim Patricia McGinn, em wanlotu bilong mi long lotu Katolik. Mitupela wantaim i kisim digri long Stanford University. Pikinini man bilong mipela, Stuart, i kamap long 1977, na bihain mipela i go sindaun long Sacramento, California, long Amerika. Inap 23 yia, mi wok insait long wanpela lain (Legislative Analyst’s Office) bilong provins California, long skelim ol baset bilong ediukesen. Mi wok strong na mi gat gutpela sindaun. Mi amamas long mekim wok papa na lukautim pikinini man bilong mipela taim em i wok long kamap bikpela. Gutpela meri bilong mi i helpim mi gut tru, na mi helpim em tu.
Wanpela 25-Sen Bekim
Taim pikinini man bilong mipela i gat tupela krismas, Patricia i kisim wanpela Baibel long ol Witnes Bilong Jehova na kirap stadi long Baibel wantaim ol, na tripela yia bihain em i kisim baptais. Mi pilim olsem ol Witnes Bilong Jehova i no gat stretpela tingting long ol holide na pasin bilong kisim blut, tasol mi lukim olsem tok ol i kamapim long sampela samting i stret. Wanpela taim long 1987, mi kirap nogut olsem mi kamapim tingting bilong mi long sampela bilip bilong ol long ai bilong ol man. Ol i singautim mi long wanpela spesel miting bilong ol man i wokim ol lo na i lukautim ol samting bilong ediukesen bilong California, bilong mi ken kamapim as bilong tok mi bin mekim long wanpela lain bilong gavman.
Yunivesiti bilong California i laik kisim mani bilong resis wantaim ol narapela provins bilong winim wanpela wok em gavman i putim na pe bilong en inap siks bilion dola. Dispela wok em bilong wokim wanpela traipela masin bilong mekim wok saiens. Mi bin tokim ol olsem mi no wanbel long dispela samting, long wanem, em bai i no inap helpim tumas provins California long sait bilong mani. Dispela i mekim na yunivesiti i kisim tupela saientis husat i winim prais Nobel long toktok wantaim dispela lain bilong wokim lo. Tupela i stori long save ol saientis inap kisim long rot bilong dispela masin. Wanpela i tok masin inap painim bekim bilong ol askim long olsem wanem heven na graun i bin kamap. Narapela i tok dispela masin inap helpim yumi long save long olsem wanem laip i bin kamap long graun.
Siaman bilong komiti i lukluk long mi.
Na em i askim mi, “Yu ting siks bilion dola i bikpela pe tumas long tromoi bilong kisim bekim bilong ol dispela askim?”
Mi bekim olsem, “Mi wanbel olsem ol dispela askim i bikpela samting, tasol ol Witnes Bilong Jehova i save kam long haus bilong mi long ol Sarere moning, na ol i save tilim wanpela magasin long 25-sen em dispela magasin bai bekim ol wankain askim. Na nogut 25-sen bekim bilong ol i winim ol 6 bilion dola bekim dispela wok inap kamapim.”
Olgeta insait long dispela rum wantaim tupela saientis i bin winim prais Nobel, ol i lap nogut tru. Maski ol lain bilong wokim lo i tok orait long givim mani long dispela wok, no gat wanpela i daunim tok mi bin kamapim.
Bihain, mi luksave i gat sampela samting i wok long kamap insait long famili em mi mas mekim samting long en. Inap sikspela yia mi bin toktok wantaim Patricia long ol Witnes Bilong Jehova na Baibel, na mi bel hevi taim em i laik lusim bikpela hap taim moa long wok autim tok. Dispela i makim olsem em i mas lusim sampela wok bilong em long yunivesiti. Meri bilong mi i save wokim gut tingting, olsem na mi bel hevi taim em i putim mak long autim tok moa, na i luk olsem mi no inap mekim wanpela tok o mekim wanpela samting bilong senisim tingting bilong em.
Mi traim long kisim helpim long man i gat planti save moa long Baibel winim mi, em man mi ting em inap soim meri bilong mi olsem ol tok ol Witnes Bilong Jehova i autim i no stret wantaim Baibel. Sapos man hia inap kamapim klia wanpela tok bilong ol i no stret, dispela inap makim olsem ol narapela tok tu i no stret. Em dispela samting tasol mi laik bai meri bilong mi husat i save skelim gut ol samting i mas luksave long en. Mi toktok wantaim pris Jesuit bilong lotu em mi na Patricia i bin go long en long bipo. Laspela tok mipela i mekim em tok i stap long kirap bilong dispela stori. Taim pris i no laik toktok long meri bilong mi, mi save olsem mi tasol i mas painim ol dispela popaia na soim long Patricia, maski dispela bai i kisim sampela hap taim moa.
Mi Wok Long Painim Ol Popaia
Taim mi stadi long Baibel wantaim ol Witnes, samting mi pilim tru em ol tok profet bilong Baibel. Mi ritim ol tok bilong profet Aisaia i stori long Babilon i pundaun, em samting em i bin raitim inap 200 yia paslain long dispela samting i bin kamap. Em i kolim stret nem bilong Sairus, em man husat i pait na kisim taun na ol samting ol i mekim bilong senisim ron bilong wara Yufretis bilong ol i ken daunim Babilon. (Aisaia 44:27–45:4) Sampela yia bipo, long wanpela klas bilong lainim wok ami, mi bin stadi long ol samting i kamap long taim Babilon i pundaun. Mi bin kisim save tu olsem winim 200 yia paslain long samting i bin kamap, profet Daniel i tok profet long ol samting bilong wanpela strongpela king bilong Grik, em wok king bilong em bai bruk i go fopela liklik gavman bihain long em i dai. (Daniel 8:21, 22) Mi tingim dispela trupela stori bilong Bikpela King Aleksander long ol stadi bilong mi long ol samting i bin kamap bipo. Long rot bilong mekim wok painimaut long sampela buk, mi painimaut olsem tru tru ol i bin raitim ol dispela buk bilong Baibel paslain long samting ol i tok profet long en i kamap.
Taim mi stadi wantaim ol Witnes, mi bilip strong moa olsem Baibel em Tok Bilong God, em samting ol skul bilong lotu Katolik mi bin go long en inap planti yia i no bin helpim mi long bilip long en. Bai mi mekim wanem long dispela save? Mi wokim tingting bilong mi long dediketim laip bilong mi long Jehova na kamap wanpela Witnes bilong em. (Aisaia 43:10) Mi baptais long 1991, tupela yia tasol bihain long mi bin toktok wantaim dispela pris. Pikinini man bilong mipela i baptais long yia bihain.
Nau ol narapela samting i bikpela samting long mipela, olsem na mipela i senisim ol mak famili i laik winim. Bihain tasol long mi baptais, mi wokim wanpela faiv yia plen long meri bilong mi na bai em i ken lusim wok tisa long yunivesiti taim em i gat 50 krismas. Em i laik kamap wanpela painia, long dispela taim ol i save lusim olsem 1,000 aua long olgeta yia, o inap olsem 83 aua long olgeta mun, bilong helpim ol narapela long lainim ol tok i tru bilong Baibel. Long 1994, em lusim sampela wok bilong em bambai em inap insait long wok painia. Ol mak mi laik winim pastaim, em mi laik mekim gut moa wok autim tok, na mekim ol samting mi inap mekim bilong helpim kongrigesen, na volantia long stretim ol akaun bilong wok konstraksen bilong wokim ol Haus Kingdom long dispela hap.
Sampela taim rot i op long mi inap autim tok bilong Baibel long ples wok. Nupela wokmeri bilong skelim ol baset bilong dispela lain (Legislative Analyst’s Office) em i wanpela Witnes husat i no strong moa long bihainim samting em i bilip long en. Em i gat tupela tingting long Baibel na dispela i mekim na bilip bilong em i no strong moa. Mi bin amamas long helpim em long kamap strong gen long bilip. Em i go bek long ples bilong em na kirap mekim wok painia.
Long 1995, mi go long wanpela spesel miting bilong ol komiti bilong ediukesen long harim tok long wanpela wok painimaut em gavman i givim mani long en. Siaman bilong komiti i askim mausman bilong gavman long wanem samting i bin kamap long dispela 6 bilion dola wok bilong wokim masin bilong ol saientis. Bilong bekim askim, mausman bilong gavman i tok olsem ol i bin givim dispela wok long provins Texas, tasol i gat tripela as na ol i no pinisim wok. Namba wan, pe bilong dispela wok i go antap long 9 bilion dola paslain long wok i kirap. Namba tu, gavman i laik mekim wok long dispela mani long narapela samting, moa yet long pait bilong Irak long 1991. Namba tri, ol i painimaut olsem ol inap kisim bekim bilong ol askim bilong laip long ol Witnes Bilong Jehova long 25-sen tasol! I luk olsem ol man i bin kolim gen tok mi bin kamapim na nau ol i kolim gen long miting bilong ol komiti bilong ediukesen.
Taim olgeta i lap, sampela memba bilong komiti i lukluk long mi. Mi tokim ol long senis i kamap olsem, “Nau yupela i ken kisim fri bekim bilong ol askim sapos yupela i ritim ol nius.”
Laip i Gat As Tru Bilong En
Taim meri bilong mi i pinis long wok, mipela i wokim wanpela faiv yia plen bilong mi. Mi go askim ol narapela lain sapos ol i gat wok haptaim, long wanem, nau mi laik lusim bikpela hap taim moa long lainim ol man long ol tok i tru bilong Baibel. Tasol dispela lain (Legislative Analyst’s Office) i orait long mi ken mekim wok haptaim. Olsem na long 1998, mi kamap wanpela painia tu.
Wanpela moning, taim mi na meri bilong mi i redi long go autim tok, brens ofis bilong ol Witnes Bilong Jehova long Brooklyn, New York, long Amerika, i ringim mi. Pastaim ol i bin askim ol bratasista i gat save long mekim sampela wok sapos ol i laik helpim wok long brens, na dispela brata i ring i askim mi sapos mi laik helpim wanpela wok long Brooklyn brens. Mi tok yes. Long dispela rot mipela i wok long hetkota inap 18 mun. Mi pinis long wok bilong gavman bilong California bambai mi inap pinisim dispela wok. Bihain long dispela, mipela i volantia long helpim wok bilong wokim Haus Kibung bilong ol Witnes Bilong Jehova long Fairfield, long California. Mipela i salim haus bilong mipela long Sacramento na go stap long wanpela liklik flet long Palo Alto. Taim mi pinis long wok, rot i op long mipela i ken kisim sampela blesing moa. Mitupela i bin wok long ol projek long ol brens ofis bilong ol Witnes Bilong Jehova long Naijiria, Saut Afrika, Kanada, Briten, na Jemani.
Wankain olsem ol Witnes husat i bin helpim mipela, mi na meri bilong mi i amamas long helpim ol narapela long lainim ol tok i tru bilong Baibel. Tru tru mi pilim olsem skul i kam long Jehova em i gutpela samting tru, winim olgeta bikpela skul mi bin go long en. Em i winim tru olgeta narapela skul bilong graun, em i skulim ol man long kain kain samting na long rot ol man inap kliagut long en. Jehova i bin lainim ol Witnes bilong em long skulim ol man long Baibel long rot em ol man i pilim tru long tingting na bel. Dispela i kirapim mi long wok yet long lain. Mi na meri bilong mi i tenkyu tru long laip nau mipela i gat, na long mipela inap mekim wok long save mipela i bin kisim long mekim wok bilong King bilong heven na graun, em God Jehova.
[Rait long pes 27]
Taim mi stadi long Baibel wantaim ol Witnes, samting mi pilim tru em ol tok profet bilong Baibel
[Piksa long pes 27]
Mi wantaim Patricia long de mitupela i marit
[Piksa long pes 29]
Mi na Patricia i helpim ol narapela long lainim ol tok i tru bilong Baibel