Ol Man i Askim . . .
Bilong Wanem God i Laik Givim Laip Oltaim Olsem Presen Long Ol Man?
▪ Baibel i tok God i laik givim yumi “laip i stap gut oltaim oltaim.” (Jon 6:40) Tasol wanem samting i kirapim em long mekim olsem? Yu ting stretpela pasin tasol i kirapim em long mekim dispela?
Stretpela pasin i makim olsem narapela i mekim pasin i stret long narapela. Olsem wanem? I stret yumi kisim laip? Nogat. Baibel i tok: “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” (Saveman 7:20) Sin i gat pe bilong en. God i bin givim tok lukaut long namba wan man, Adam, olsem long de em i mekim sin, em bai i dai. (Stat 2:17) Bihain, holi spirit i kirapim aposel Pol long tok: “Sin i save givim pe long ol wokboi bilong en. Dispela pe em dai tasol.” (Rom 6:23) Sapos i stret long olgeta pikinini bilong Adam i dai, bilong wanem God i laik givim laip oltaim long ol?
Laip oltaim em i presen “God i givim nating” long yumi. Dispela presen i kamapim bikpela pasin laikim na marimari bilong God, na i no gat pinis bilong en. Baibel i tok: “Yumi olgeta man yumi bin mekim sin, . . . tasol God i marimari long yumi, na long wok Krais Jisas i mekim bilong baim bek yumi, God i save kolim yumi stretpela manmeri. Yumi no kamap stretpela manmeri long wok yumi yet i mekim. Nogat. God i givim nating long yumi long han bilong Krais Jisas.”—Rom 3:23, 24.
I stret yumi olgeta i dai, tasol God i laik givim laip oltaim long ol man husat i laikim em. Yu ting dispela pasin i no stret? Baibel i tok: “Bai yumi tok wanem? Ating bai yumi tok God i mekim pasin i no stret, a? Nogat tru. God i bin tokim Moses olsem, ‘Sapos mi laik marimari long wanpela man, orait bai mi marimari long en. Na sapos mi laik sori long wanpela man, orait bai mi sori long en.’ . . . Tasol yu man, yu husat na yu inap krosim God long pasin em i mekim?”—Rom 9:14-20.
Long sampela hap bilong graun, wanpela bikman bilong gavman o jas inap lusim rong bilong raskol husat i kalabus i stap inap planti yia. Sapos raskol i redi long bihainim ol tok bilong jas na em i soim olsem pasin na tingting bilong em i senis, orait jas o presiden inap lusim rong bilong em na sotim ol yia em i mas kalabus o larim em i go fri. Ating i stret raskol i mas kalabus, tasol jas i marimari long em.
Na olsem tasol, Jehova tu inap wokim disisen olsem em bai no givim strafe long olgeta sinman, maski i stret long ol i kisim. Pasin laikim i kirapim em long givim laip oltaim long ol man husat i laikim em na i bihainim ol lo bilong em. Baibel i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Nambawan bikpela pasin laikim em Jehova i bin mekim bilong helpim yumi, em i salim Pikinini bilong em i kam long kisim pen na i dai. Jisas i stori long Papa bilong em olsem: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
God i orait long olgeta man husat i laikim em tru na mekim laik bilong em, maski ol i bilong wanem kain lain na sindaun. Olsem na pasin marimari na bikpela pasin laikim bilong God i kirapim em long givim laip oltaim long ol man.
[Rait long pes 29]
Pasin marimari na bikpela pasin laikim bilong God i kirapim em long givim laip oltaim long ol man