God i Soim Pasin Laikim Bilong Em Long Yumi
“Bikpela pasin helpim bai stap olsem king long rot bilong stretpela pasin na em bai kamapim laip oltaim.”—ROM 5:21.
1, 2. Yumi ken skelim wanem tupela presen? Wanem presen i gutpela moa?
WANPELA profesa bilong Yunivesiti Bilong Melbourne, Australia, i bin tok olsem ol lo em gavman Rom i bin kamapim ol i olsem presen i helpim sindaun bilong olgeta manmeri. Tasol Baibel i lainim yumi olsem God i bin givim yumi wanpela presen i gutpela moa. Dispela presen em i rot God i makim we em inap orait long ol man na tingim ol olsem stretpela man long ai bilong em, na em inap kisim bek ol na ol i ken kisim laip oltaim.
2 God i bihainim lo taim em i stretim rot bilong givim dispela presen. Taim Pol i stori long dispela long Rom sapta 5, em i no stori long en long sait bilong lo tasol. Nogat. Long kirap bilong dispela sapta, em i mekim dispela gutpela tok: “Yumi bilip na God i kolim yumi stretpela manmeri. Olsem na yumi mas stap wanbel yet wantaim God long rot bilong Bikpela bilong yumi, Jisas Krais.” Ol man husat i kisim presen God i givim, dispela i kirapim ol long laikim em. Pol em i wanpela bilong ol. Em i tok: “God i bin givim yumi holi spirit, olsem na pasin laikim bilong God i pulap long bel bilong yumi.”—Rom 5:1, 5.
3. Wanem ol askim i kamap?
3 Tasol bilong wanem God i mas givim dispela gutpela presen? Olsem wanem God inap bihainim pasin i fea taim em i givim dispela presen? Na ol man i mas mekim wanem bilong ol i ken kisim dispela presen? Yumi ken skelim ol gutpela bekim bilong ol dispela askim na kisim save long olsem wanem ol i kamapim klia pasin laikim bilong God.
Pasin Laikim Bilong God na Sin
4, 5. (a) Jehova i kamapim pasin laikim bilong em long wanem gutpela rot? (b) Stori bilong husat i helpim yumi long kliagut long Rom 5:12?
4 Jehova i mekim bikpela pasin laikim taim em i salim Pikinini tru bilong em i kam bilong helpim ol manmeri. Pol i stori long dispela samting olsem: “God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.” (Rom 5:8) Tingim dispela trupela tok: “Taim yumi stap sinman yet.” Yumi olgeta i mas save long olsem wanem yumi kamap sinman.
5 Pol i kirap stori long dispela samting olsem: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Yumi inap kliagut long dispela samting, long wanem, God i bin kirapim ol man long raitim stori long olsem wanem ol man i bin kamap long graun. Jehova i wokim Adam na Iv pastaim. Krieta i gutpela olgeta, na namba wan man na meri tu i gutpela olgeta, em ol tumbuna bilong yumi. God i putim wanpela tambu tasol long ol, na em i tokim ol sapos ol i sakim dispela lo, strafe ol bai kisim em dai. (Stt. 2:17) Dispela lo i no putim hevi long ol, tasol ol i bikhet na sakim, na long dispela rot ol i givim baksait long God, em Man Bilong Givim Lo na King.—Lo 32:4, 5.
6. (a) Wanem samting i mekim na ol tumbuna bilong Adam i save dai? Lo Bilong Moses i senisim dispela? (b) Sik pikinini i kisim long papamama i kain olsem wanem samting?
6 Adam i mekim sin na bihain long dispela em i kamapim ol pikinini, olsem na ol pikinini i kisim sin na ol samting nogut sin i kamapim. Tru, ol i no brukim lo bilong God olsem Adam i bin mekim, olsem na God i no kotim ol long dispela sin, na tu, God i no bin givim yet lo long ol man. (Stt. 2:17) Tasol ol tumbuna bilong Adam i kisim sin long em. Olsem na sin na dai i stap olsem king i go inap long taim God i givim lo long ol Israel, na dispela lo i kamapim klia olsem ol i sinman. (Ritim Rom 5:13, 14.) Sin yumi kisim long Adam i kain olsem sampela sik pikinini i kisim long papamama. Tru, long kain famili olsem we sik i stap long blut bilong papamama, i no olsem olgeta pikinini bai kisim dispela sik. Tasol sin i no olsem. I no gat wanpela inap abrusim hevi em sin bilong Adam i kamapim. Olgeta i karim hevi bilong sin. Em i mekim na olgeta i save dai. Na olgeta pikinini i kisim sin long papamama bilong ol. Olsem wanem? I gat rot bilong winim dispela hevi?
Samting God i Givim Long Rot Bilong Jisas
7, 8. Olsem wanem samting tupela man i gutpela olgeta i mekim, i kamapim narapela narapela samting?
7 Jehova i stretim rot na bai ol man inap winim hevi bilong sin. Pol i tok dispela inap kamap long wok narapela man i mekim, em man i gutpela olgeta na i kamap bihain, em namba 2 Adam. (1 Kor. 15:45) Tasol samting dispela tupela man i gutpela olgeta i mekim, i kamapim narapela narapela samting. Bilong wanem i olsem?—Ritim Rom 5:15, 16.
8 Pol i tok: “Samting dispela presen i kamapim i no wankain olsem samting dispela rong i kamapim.” Adam i gat asua long dispela rong, na em i kisim strafe i stret long rong em i bin mekim—em i dai. Tasol i no olsem em wanpela tasol i dai. Baibel i tok: “Rong bilong wanpela man i mekim na planti manmeri i dai.” Strafe Adam i kisim i stret tu long ol pikinini bilong em i no gutpela olgeta, na yumi tu i insait long dispela. Tasol yumi amamas long save olsem man i gutpela olgeta, Jisas, em inap kamapim samting i narapela olgeta. Dispela i kamapim wanem samting? Yumi lukim bekim bilong dispela askim long tok Pol i mekim, em i tok: “God i kolim olgeta kain man stretpela man na ol inap kisim laip.”—Rom 5:18.
9. Rom 5:16, 18 i tok God i save kolim ol man stretpela man. Dispela tok i makim wanem samting?
9 Wanem as bilong tok Grik ol i tanim olsem “kolim planti olsem stretpela manmeri” na “kolim olgeta kain man stretpela man”? Wanpela man bilong tanim tok bilong Baibel i tok: “Em pasin bilong kolim ol tok long sait bilong lo. Em i makim olsem i stap bilong man long ai bilong God i senis, i no olsem pasin bilong man i senis . . . Dispela tok i kamapim olsem God em i jas na wanpela man i sanap long kot bilong em, long wanem, em i man nogut. Tasol long dispela kot God i tok olsem man i no gat asua.”
10. Jisas i mekim wanem na God inap kolim ol man olsem stretpela manmeri?
10 Olsem wanem stretpela “Jas bilong olgeta graun” inap tokaut olsem man nogut i no gat asua? (Stt. 18:25) Namba wan bikpela samting God i mekim, em i salim Pikinini tru bilong em long graun. Jisas i bihainim gut olgeta laik bilong Papa, maski ol traim i painim em, ol man i tok bilas nogut long em, na mekim nogut long em. Em i stap gut long God, maski em i mas i dai long diwai pos bilong mekim olsem. (Hib. 2:10) Taim Jisas i givim laip bilong em i gutpela olgeta, em i givim pe we inap baim bek ol tumbuna bilong Adam long sin na dai.—Mat. 20:28; Rom 5:6-8.
11. Wanem pe i stret bilong baim bek ol man?
11 Long narapela hap Pol i kolim dispela samting olsem “pe i stret bilong baim bek ol man.” (1 Tim. 2:6) Dispela pe i stret em wanem samting? Yumi save pinis olsem Adam i mekim na planti bilion manmeri i gat sin na ol i dai, em ol tumbuna bilong em. Na i tru olsem Jisas, man i gutpela olgeta, em inap kamapim lain tumbuna, em planti bilion manmeri i gutpela olgeta.a Olsem na bipo i gat tingting olsem laip bilong Jisas wantaim laip bilong ol lain tumbuna em inap kamapim em ol i gutpela olgeta, dispela i olsem ofa i karamapim sin bilong Adam na ol tumbuna bilong em. Tasol Baibel i no tok olsem ol pikinini em Jisas inap kamapim i insait long dispela pe bilong baim bek ol man. Rom 5:15-19 i soim olsem dai bilong “wanpela man” tasol inap helpim ol manmeri. Yes, laip bilong Jisas i gutpela olgeta i wankain stret olsem laip bilong Adam. Olsem na yumi mas tingim Jisas Krais tasol. Rot i op long olgeta kain man i ken kisim laip na presen God i givim, long wanem, Jisas i mekim “stretpela pasin,” em i bihainim tok na i stap gut long God maski em i mas i dai bilong mekim olsem. (2 Kor. 5:14, 15; 1 Pita 3:18) Olsem wanem dispela samting i kamap?
God i Tok Ol i No Gat Asua
12, 13. Bilong wanem God i mas marimari na mekim pasin laikim long ol man em i kolim ol stretpela man?
12 God Jehova i orait long kisim ofa bilong Pikinini bilong em long baim bek ol man. (Hib. 9:24; 10:10, 12) Maski i olsem, ol disaipel bilong Jisas long graun, na ol gutpela aposel bilong en tu, ol i stap yet olsem sinman. Ol i wok strong long sakim pasin nogut, tasol sampela taim ol i pundaun. Bilong wanem? Long wanem, sin i stap yet long skin bilong ol. (Rom 7:18-20) Tasol God inap mekim samting bilong helpim ol, na em i mekim olsem. Em i orait long kisim “pe i stret bilong baim bek ol man” na em i amamas long mekim wok long en bilong helpim ol wokboi bilong em long graun.
13 Maski ol aposel na ol arapela man i bin mekim ol gutpela wok, dispela i no as na God i mas mekim wok long pe bilong baim bek ol man na helpim ol. Nogat. Pasin marimari na bikpela pasin laikim bilong God i kirapim em long mekim wok long pe bilong baim bek ol man bilong helpim ol. Em i tok ol aposel na ol arapela man i no gat asua, em i no tingim moa ol rong bilong ol. Pol i kamapim klia dispela samting, em i tok: “Long rot bilong dispela bikpela pasin helpim God i kisim bek yupela, long wanem, yupela i bilip. Na dispela i no samting yupela yet i mekim, nogat, em i presen i kam long God.”—Efe. 2:8.
14, 15. Ol man em God i kolim ol stretpela man, wanem gutpela samting bai painim ol? Tasol ol i mas mekim yet wanem samting?
14 Em i wanpela gutpela presen tru i kam long God i Gat Olgeta Strong, long em i lusim sin man i kisim long Adam na ol rong man i bin mekim! Yumi no inap kaunim hamas sin man i bin mekim paslain long em i kamap wanpela Kristen, tasol long rot bilong pe bilong baim bek man, God i fogivim ol dispela sin. Pol i tok: “Dispela presen God i givim, em i givim long wanem, ol manmeri i mekim pinis planti rong, dispela i opim rot long em i kolim planti olsem stretpela manmeri.” (Rom 5:16) Ol aposel na ol narapela husat i kisim dispela gutpela presen—olsem God i kolim ol stretpela man—ol i mas wok yet long bilip na lotuim God tru. Wanem gutpela samting bai painim ol bihain? Baibel i tok: “Bikpela pasin helpim na dispela presen bilong stretpela pasin ol i bikpela moa na i win tru. Ol man i kisim dispela samting ol bai stap laip na mekim wok king long rot bilong wanpela man, em Jisas Krais.” Tru tumas, presen bilong stretpela pasin i mekim narapela kain wok olgeta. Dispela presen i givim laip.—Rom 5:17; ritim Luk 22:28-30.
15 Ol man husat i kisim dispela presen, olsem God i kolim ol stretpela man, ol bai kamap olsem ol pikinini bilong God long spirit. Ol i wanlain bilong Krais, olsem na ol bai kirap bek na go long heven olsem ol pikinini spirit bilong “mekim wok king” wantaim Jisas Krais.—Ritim Rom 8:15-17, 23.
God i Kamapim Pasin Laikim Long Ol Arapela
16. Ol lain i wet long kisim laip long graun, olsem wanem ol inap kisim presen?
16 Ol Kristen husat i bilip na mekim wok bilong God na i stap gut long em, i no olgeta i gat tingting olsem ol bai “mekim wok king” wantaim Krais long heven. Planti ol i bilip na wet long kisim wankain samting olsem ol wokboi bilong God paslain long taim bilong ol Kristen i bin wetim. Ol i wet long kisim laip oltaim long Paradais long graun. Olsem wanem? Long nau tu ol inap kisim wanpela gutpela presen i kam long God, olsem God i tingim ol olsem stretpela man husat bai kisim laip long graun? Tok Pol i raitim long ol Rom i soim olsem bekim bilong dispela askim em yes!
17, 18. (a) Abraham i bilip na God i gat wanem tingting long em? (b) Olsem wanem Jehova inap tingim Abraham olsem stretpela man?
17 Pol i stori long wanpela man i stap gutpela piksa tru, em Abraham. Em i wanpela bilipman husat i bin stap paslain long Jehova i givim lo long lain Israel, na paslain long Krais i opim rot long ol man i ken kisim laip long heven. (Hib. 10:19, 20) Pol i tok: “Pasin bilong bihainim lo i no as na Abraham na ol tumbuna bilong en i bin kisim promis olsem em bai kisim nupela graun, nogat. Abraham i bilip na God i tingim em olsem stretpela man, dispela em i as na em i kisim dispela promis.” (Rom 4:13; Jems 2:23, 24) Em nau, God i tingim Abraham olsem stretpela man.—Ritim Rom 4:20-22.
18 Dispela i no makim olsem insait long planti yia we Abraham i mekim wok bilong Jehova, em i no gat sin. Nogat. Em i gat sin maski God i tingim em olsem stretpela man. (Rom 3:10, 23) Tasol Jehova i gat bikpela savetingting, olsem na em i tingim strongpela bilip bilong Abraham na ol gutpela wok em bilip bilong em i kirapim em long mekim. Na tu, Abraham i bilip long “pikinini” bilong promis husat bai kamap long lain bilong em. Dispela Pikinini em Mesaia, o Krais. (Stt. 15:6; 22:15-18) Long wok bilong “Krais Jisas long givim pe bilong baim bek man,” God i mekim wok jas na em inap lusim ol sin ol man i bin mekim long bipo. Olsem na Abraham na ol narapela man i bin stap paslain long taim bilong ol Kristen, ol bai kirap bek.—Ritim Rom 3:24, 25; Sng. 32:1, 2.
Stap Stretpela Man Long Ai Bilong God Long Nau
19. Olsem wanem tingting bilong God long Abraham i mekim gut bel bilong planti man long nau?
19 God bilong pasin laikim i tingim Abraham olsem stretpela man, na dispela i mas mekim gut bel bilong ol Kristen tru long nau. Jehova i no kolim em stretpela man olsem em i kolim ol lain em i makim long holi spirit bilong “kamap wanlain wantaim Krais.” God i makim dispela liklik lain i “kamap manmeri holi” na ol i kamap “pikinini bilong God.” (Rom 1:7; 8:14, 17, 33) Tasol Abraham i kamap “pren bilong Jehova,” na dispela i kamap paslain long taim Jisas i givim ofa bilong baim bek ol man. (Jems 2:23; Ais. 41:8) Orait olsem wanem long ol Kristen tru husat i wet long kisim laip long Paradais long graun?
20. Ol lain em God i tingim ol olsem stretpela man, olsem Abraham, em i laik bai ol i mas mekim wanem?
20 Dispela lain i no bin kisim “dispela presen bilong stretpela pasin,” na ol bai no kisim laip long heven “long wok bilong Krais Jisas long givim pe bilong baim bek man.” (Rom 3:24; 5:15, 17) Tasol ol i bilip tru long God na ol samting em i givim, na ol i mekim ol gutpela wok i kamapim klia bilip bilong ol. Wanpela gutpela wok olsem em wok bilong ‘autim tok long kingdom bilong God na skulim ol man long ol samting bilong Bikpela Jisas Krais.’ (Apo. 28:31) Olsem na Jehova inap tingim ol olsem stretpela man, wankain olsem em i bin mekim long Abraham. Presen dispela lain i kisim—olsem ol i stap pren bilong God—i no wankain olsem “presen” ol Kristen God i bin makim ol i kisim. Tasol em i wanpela presen ol i amamas tru long kisim.
21. Pasin laikim na stretpela pasin bilong Jehova i opim rot long yumi ken kisim wanem samting?
21 Sapos yu laik kisim laip oltaim long graun, yu mas save olsem wok bilong wanpela bikman bilong graun i no opim rot long yu long kisim dispela samting. Nogat. Em samting King Bilong Heven na Graun i gat laik long mekim. Jehova i bin stretim rot bilong kamapim ol samting em i tingting pinis long mekim. Em i bihainim stretpela pasin na mekim ol dispela samting. Na tu, ol dispela samting i kamapim klia bikpela pasin laikim bilong God. I gat as tru na Pol inap tok olsem: “God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.”—Rom 5:8.
[Futnot]
a Dispela tingting long lain tumbuna i stap long Wastaua bilong Mas 15, 2000, pes 4, paragraf 4 na long buk Insight on the Scriptures, Volium 2, pes 736, paragraf 4 na 5.
Yu Inap Tingim?
• Lain tumbuna pikinini bilong Adam i kisim wanem samting long em? Dispela i kamapim wanem samting?
• Olsem wanem Jehova i stretim rot na bai i gat pe i stret bilong baim bek ol man? Olsem wanem em pe i stret?
• Dispela presen olsem God i kolim ol man olsem stretpela man i opim rot long yu ken kisim wanem?
[Piksa long pes 13]
Adam i gutpela olgeta, em i mekim sin. Jisas i gutpela olgeta, em i givim “pe i stret bilong baim bek ol man”
[Piksa long pes 15]
Em gutpela nius tru—long rot bilong Jisas, God inap kolim yumi stretpela manmeri!