Givim Bel Tru Long Lotu i Tru

“Planti kaikai tumas i mau pinis long gaden, tasol i no gat planti wokman i stap bilong kisim.”​—MT. 9:37.

 1. Bai yu stori olsem wanem long pasin bilong mekim hariap wanpela wok?

ATING yu gat wanpela pepa wok em yu laik bai wanpela man i mas lukim long dispela de stret. Bai yu mekim wanem? Ating yu bai raitim tok long en olsem: “MEKIM HARIAP!” O ating yu laik go lukim dokta samting, tasol yu leit. Bai yu mekim wanem? Yu bai tokim draiva, “Plis, GO HARIAP!” Yes, taim yu gat wanpela wok yu mas pinisim o man yu mas lukim na taim i wok long sot, bel bilong yu bai i no stap isi. Yu bai taitim bun tru na hariap hariap long mekim wok.

 2. Wanem nambawan bikpela wok ol Kristen long nau i mas mekim hariap?

² Long ol Kristen tru bilong nau, nambawan bikpela wok ol i mas mekim hariap, em wok bilong autim gutnius bilong Kingdom na mekim olgeta lain manmeri i kamap disaipel. (Mt. 24:14; 28:​19, 20) Disaipel Mak i kamapim tok bilong Jisas olsem dispela wok i mas kamap “pastaim,” olsem paslain long pinis i kamap. (Mk. 13:10) I stret dispela wok i mas kamap pastaim. Jisas i tok: “Planti kaikai tumas i mau pinis long gaden, tasol i no gat planti wokman.” Taim kaikai i mau pinis, ol i mas kisim hariap.​—Mt. 9:37.

 3. Planti bratasista i bin mekim wanem bilong insait long wok autim tok em yumi mas mekim hariap?

³ Wok bilong autim tok i bikpela samting tru long yumi, olsem na i stret yumi givim bikpela taim, strong, na tingting olgeta long mekim. Planti bratasista i save mekim olsem. Sampela i bin lusim sampela samting ol i bin holim pastaim bambai ol inap insait long fultaim sevis olsem painia, o misineri, o wok long wanpela haus Betel. Ol i save wok strong tru. Ating ol i bin lusim planti samting ol yet i gat laik long mekim, na ol i mas lain long planti nupela samting. Tasol Jehova i blesim ol, na yumi amamas long dispela. (Ritim Luk 18:​28-30.) Sampela i no inap insait long fultaim sevis, tasol ol i givim bikpela hap taim long mekim dispela wok bilong helpim ol man long kisim laip, na wok bilong helpim ol pikinini bilong yumi long abrusim bagarap i insait tu long dispela wok.​—Lo 6:​6, 7.

 4. Wanem as na ating sampela i no tingim moa olsem taim i sot pinis?

⁴ Taim yumi save pinis long det bilong pinisim wanpela wok na taim i sot pinis, orait yumi save wok hariap hariap long pinisim dispela wok. Yumi stap long taim bilong las de, na i gat planti samting​—ol tok bilong Baibel na ol samting i kamap pinis​—i kamapim klia dispela samting. (Mt. 24:​3, 33; 2 Ti. 3:​1-5) Tasol i no gat wanpela man i save long de stret pinis bai kamap. Taim Jisas i kolim ol samting i olsem “mak” bilong makim pasin bilong “dispela graun i laik pinis,” em i tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.” (Mt. 24:36) Olsem na taim ol yia i wok long kamap na i go, ating sampela i hatwok long holimpas dispela tingting olsem taim i sot pinis, na moa yet sapos ol i bin holim dispela tingting inap longtaim pinis. (Snd. 13:12) Olsem wanem? Sampela taim yu save pilim olsem? Wanem samting bai helpim yumi long kisim o holimpas tingting olsem taim i sot pinis bilong mekim dispela wok em God Jehova na Jisas Krais i laik bai yumi mas mekim?

Tingim Jisas, Man i Stap Gutpela Piksa

 5. Tingting bilong Jisas olsem taim i sot pinis, olsem wanem dispela i kamap klia long wok autim tok bilong em?

⁵ Long olgeta man husat i mekim wok bilong God na ol i kamapim klia olsem taim i sot pinis, Jisas Krais em i nambawan gutpela piksa tru. Wanpela as na em i wok strong long autim tok em olsem, em i mas mekim bikpela wok insait long sotpela taim tasol, olsem 3 na hap yia. Tasol Jisas i bin mekim bikpela wok tru bilong helpim lotu i tru, winim olgeta narapela man. Em i tokaut long nem na laik bilong Papa bilong em, autim gutnius bilong Kingdom, kamapim klia ol pasin na tok giaman bilong ol bikman bilong lotu, na stap gut long wok bos bilong Jehova i go inap long taim em i dai. Jisas i bin raun long olgeta hap, na em i skulim ol man, helpim ol, na oraitim ol sikman. (Mt. 9:35) I no gat wanpela man i bin mekim bikpela wok tru insait long sotpela hap taim tasol olsem Jisas. Em i bin wok strong tru.​—Jo. 18:37.

 6. Oltaim Jisas i tingting strong long mekim wanem?

⁶ Wanem samting i kirapim Jisas long wok strong long autim tok na em i no les? Long tok profet Daniel i bin mekim, ating Jisas i bin save olsem haptaim em i mas pinisim wok bilong em, dispela haptaim i mas stret long taim Jehova i makim pinis. (Dan. 9:27) Olsem yumi skelim pinis, wok autim tok bilong em long graun i mas pinis insait long “3 na hap yia.” Bihain liklik long Jisas i go insait long Jerusalem olsem king long 33 C.E., em i tok: “Taim bilong Pikinini Bilong Man i laik kisim biknem, em i kamap pinis nau.” (Jo. 12:23) Jisas i save olsem klostu nau em bai dai, tasol dispela i no nambawan as na em i wok strong long autim tok, nogat. Em i tingting strong long mekim laik bilong Papa bilong em na mekim pasin laikim long ol narapela. Dispela pasin laikim i kirapim em long bungim ol disaipel, skulim ol, na salim ol i go autim gutnius. Em i mekim olsem bambai ol disaipel inap mekim yet dispela wok em i bin kirapim, na ol inap mekim bikpela wok moa, winim wok em yet i bin mekim.​—Ritim Jon 14:12.

7, 8. Taim Jisas i rausim ol man i wok bisnis long tempel, ol disaipel i tingim wanem samting? Bilong wanem Jisas i mekim dispela pasin?

⁷ Wanpela samting long laip bilong Jisas i bin kamapim klia tru pasin bilong em long givim bel tru. Em long taim Jisas i kirap long mekim wok autim tok, long taim bilong Pasova 30 C.E. Jisas na ol disaipel i kam long Jerusalem na insait long banis bilong tempel em i lukim “ol man i wok bisnis long salim ol bulmakau na sipsip na pisin. Na em i lukim ol man bilong senisim mani ol i sindaun i stap.” Jisas i mekim wanem? Na dispela i mekim wanem long ol disaipel bilong em?​—Ritim Jon 2:​13-17.

⁸ Samting Jisas i bin mekim, na tok em i mekim long dispela taim, i bin kirapim ol disaipel long tingim wanpela tok profet bilong Devit, olsem: “Mi laikim tru haus bilong yu, olsem na mi wok strong long mekim dispela haus i stap gut.” (Sng. 69:9) Jisas inap kisim hevi o bagarap long samting em i mekim. Long wanem, ol bikman bilong tempel​—ol pris, ol saveman bilong lo, na ol narapela man​—ol i insait long wok nogut bilong kisim win mani long wok bisnis i kamap insait long banis bilong tempel. Taim Jisas i kamapim na bagarapim wok nogut bilong ol, dispela i mekim na ol dispela bikman bilong lotu i birua long em. Ol disaipel i bin luksave long pasin bilong Jisas olsem em i ‘laikim tru haus bilong God,’ olsem givim bel long lotu i tru. Pasin bilong laikim tru, o givim bel tru, i makim wanem samting? Olsem wanem? Pasin bilong givim bel tru, dispela i narapela long pasin bilong tingim olsem taim i sot pinis?

Pasin Bilong Mekim Hariap Wok na Pasin Bilong Givim Bel Tru

 9. Stori long pasin bilong givim bel tru.

⁹ Narapela tok i wankain liklik long pasin bilong “laikim tru” wanpela samting, em pasin bilong givim bel tru long wanpela samting. Tru tumas, Jisas i givim bel tru long wok autim tok. Wanpela Baibel (Today’s English Version) i tanim dispela ves olsem: “God, mi givim bel tru long haus bilong yu, na dispela i olsem paia i stap long bel bilong mi.” Long sampela tokples bilong Esia, dispela tok givim bel tru inap makim “paia i lait insait long bel.” Dispela i helpim yumi long save long as na ol disaipel i tingim bek tok Devit i bin mekim taim ol i lukim pasin Jisas i bin mekim long tempel. Orait, wanem samting i kirapim Jisas, olsem paia i stap long bel na i kirapim em long mekim dispela pasin?

10. Baibel i stori olsem wanem long dispela tok “laikim tru”?

¹⁰ Dispela tok “laikim tru” long song Devit i bin raitim, ol i kisim long wanpela tok Hibru. Dispela tok i stap long planti hap bilong Baibel na i gat bikpela mining bilong en. (Ritim Kisim Bek 20:5; 34:14; Josua 24:19.) Wanpela dikseneri bilong Baibel i tok planti taim ol i save yusim dispela tok long taim ol i toktok long pasin bilong man na meri marit. Man marit o meri marit i gat rait long poroman marit i mas stap gut long em wanpela tasol. Na olsem tasol God i strongim rait bilong em long lain bilong em i mas lotu long em wanpela tasol. Olsem na long Baibel, pasin bilong laikim tru, o givim bel tru, i no makim tasol pasin bilong laikim o amamas tasol long wanpela samting, olsem planti man i save amamas long wanpela spot, nogat. Pasin bilong Devit long laikim tru haus bilong God i makim olsem em i strong long lotu long God wanpela tasol, em i gat strongpela laik long lukautim gutnem bilong God na bai wanpela samting i no ken bagarapim dispela gutnem.

11. Wanem samting i bin kirapim Jisas long wok strong na givim bel tru long wok?

¹¹ Ol disaipel i lukim pasin Jisas i bin mekim long tempel na ol i tingim bek tok Devit i bin mekim. Jisas i no tingim tasol olsem taim bilong em i sot na em i mas wok strong, nogat. Em i wok strong, long wanem, em i givim bel tru long mekim gut nem bilong Papa bilong em na long mekim gut lotu i tru. Taim em i lukim ol man i bagarapim na tok bilas long gutnem bilong God, em i givim bel tru long stretim dispela samting. Taim Jisas i lukim ol bikman bilong lotu i daunim na kisim samting bilong ol taranguman, pasin bilong givim bel tru i kirapim em long helpim ol dispela man, na tu, em i givim strongpela tok long ol dispela bikman bilong lotu em ol i wok long daunim ol man.​—Mt. 9:36; 23:​2, 4, 27, 28, 33.

Givim Bel Tru Long Lotu i Tru

12, 13. Ol bikman bilong Kristendom long nau ol i bin mekim wanem (a) long nem bilong God? (b) long Kingdom Bilong God?

¹² Pasin na tingting bilong ol lotu long nau i wankain long taim bilong Jisas. Tingim namba wan samting Jisas i bin skulim ol disaipel long beten long en, em olsem ol i mas tingim nem bilong God: “Nem bilong yu i mas i stap holi.” (Mt. 6:9) Olsem wanem? Yu save lukim ol bikman bilong lotu, moa yet em ol pris pasto bilong Kristendom, i skulim ol man long nem bilong God na mekim i stap holi, o givim ona long dispela nem? Nogat. Ol i bin bagarapim gutnem bilong God long rot bilong ol bilip giaman olsem God Triwan, man i gat wanpela spirit i no save dai, na helpaia, na ol i tok yumi no inap kliagut long God, em i stap longwe, em i man nogut, na em i save amamas long givim pen long ol man. Na tu, ol i bagarapim nem bilong God long rot bilong pasin nogut bilong ol na pasin bilong tupela maus. (Ritim Rom 2:​21-24.) Na ol i mekim olgeta samting ol inap mekim bilong haitim nem bilong God, na ol i rausim tu long Baibel bilong ol. Long dispela rot, ol i pasim ol man long go klostu long God na kisim pasin bilong pas gut wantaim em.​—Jem. 4:​7, 8.

¹³ Jisas i lainim ol disaipel bilong em tu long beten long Kingdom Bilong God: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Mt. 6:10) Ol bikman bilong lotu bilong Kristendom ol i save kolim dispela beten long olgeta taim, tasol ol i tokim ol manmeri long sapotim wok politik na ol narapela oganaisesen bilong ol man. Na ol i save daunim ol man husat i wok strong long autim tok na sapotim dispela Kingdom. Olsem na ol man husat i kolim ol yet olsem Kristen, ol i no save stori moa long Kingdom Bilong God, na ol i no bilip long en.

14. Olsem wanem ol bikman bilong Kristendom i lusim pasin bilong skulim ol man Tok Bilong God?

¹⁴ Jisas i bin beten long God na em i tok: “Tok bilong yu i tru olgeta.” (Jo. 17:17) Na paslain long em i go long heven, Jisas i tok em bai makim “wokboi i gat gutpela tingting” bilong givim kaikai bilong spirit long lain bilong em. (Mt. 24:45) Ol bikman bilong Kristendom i tok ol i wokboi bilong Tok Bilong God. Tasol olsem wanem? Ol i kamapim olsem ol i mekim gut wok em Bikman i bin tokim ol long mekim? Nogat. Ol i tok ol stori bilong Baibel em ol tok piksa o stori nating tasol. Ol i no skulim ol long tok bilong God, na mekim gut bel bilong ol na helpim ol long kliagut long tok bilong God, nogat. Ol pris pasto i kamapim ol kain kain save bilong ol man bilong graun em ol man i save amamas long harim. Na tu, ol i lusim lo bilong God long stretpela pasin na kamapim ol lo bilong ol yet we i no hatwok long bihainim. Ol i mekim olsem bambai ol i no putim hevi long lain bilong ol husat i ting ol i bihainim stretpela pasin, maski ol i no bihainim stretpela lo bilong God.​—2 Ti. 4:​3, 4.

15. Yu ting olsem wanem long ol pasin ol bikman bilong lotu i mekim long nem bilong God?

¹⁵ Long rot bilong ol dispela pasin ol i bin mekim​—em ol i tok ol i mekim long nem bilong God bilong Baibel​—planti man i gat gutpela bel ol i no amamas na ol i no bilip moa long God na long Baibel. Satan na pasin nogut bilong dispela graun i bin giamanim ol. Taim yu lukim na harim stori bilong ol kain samting i wok long kamap long olgeta de, yu save pilim olsem wanem? Yu wanpela wokman bilong Jehova, na taim yu lukim ol man i bagarapim na tok bilas long gutnem bilong Jehova, yu pilim olsem yu laik mekim samting bilong stretim dispela pasin i no stret? Taim yu lukim ol man i gat gutpela bel i karim hevi long ol narapela i giamanim na pulim ol samting bilong ol, olsem wanem? Bel bilong yu i kirap long mekim gut long ol man i bin karim hevi long narapela i daunim ol? Taim Jisas i lukim ol manmeri long taim bilong em “ol i stap nogut tru, olsem ol sipsip i no gat wasman,” em i no sori tasol long ol, nogat. Em i “em i stat long givim planti tok long ol.” (Mt. 9:36; Mk. 6:34) Olsem na i gat as tru na yumi mas givim bel tru long lotu i tru, olsem Jisas i bin mekim.

16, 17. (a) Wanem samting i mas kirapim yumi long wok strong long autim tok? (b) Bai yumi stori long wanem samting long stadi i kamap bihain?

¹⁶ Taim yumi gat kain tingting olsem long wok autim tok, bai yumi pilim tru tok bilong Pol i stap long 1 Timoti 2:​3, 4. (Ritim.) Yumi wok strong long autim tok, long wanem, yumi stap long taim bilong las de, na tu, yumi save em laik bilong God. Em i laik bai olgeta man i mas kisim save long tok i tru na bai ol tu i ken lain long lotu long God na mekim wok bilong em na kisim blesim. Taim i sot pinis, tasol dispela i no nambawan as na yumi wok strong long autim tok, nogat; yumi laik givim biknem long God na helpim ol man long kisim save long laik bilong em. Yumi givim bel tru long lotu i tru.​—1 Ti. 4:16.

¹⁷ Yumi lain bilong Jehova, olsem na em i mekim gut long yumi na yumi save long tok i tru bilong ol samting God i tingting pinis long mekim long ol manmeri na long graun. Yumi gat ol samting bilong helpim ol man long kisim amamas na wetim gutpela samting bai kamap tru long bihain. Yumi ken soim ol long rot bilong ol i ken stap gut taim bagarap i painim dispela graun bilong Satan. (2 Te. 1:​7-9) Olsem na yumi no ken givap taim de bilong Jehova i no kam hariap, nogat. Yumi mas amamas olsem i gat taim yet long yumi olgeta inap givim bel tru long lotu i tru. (Mai. 7:7; Hab. 2:3) Olsem wanem yumi inap kisim pasin bilong givim bel tru? Bai yumi stori long dispela long stadi i kamap bihain.

Yu Inap Stori Long Dispela?

• Wanem samting i kirapim Jisas long wok strong long autim tok na em i no les?

• Baibel i stori olsem wanem long dispela tok “laikim tru”?

• Yumi lukim wanem samting long nau na dispela i kirapim yumi long givim bel tru long lotu i tru?

[Piksa long pes 8]

Jisas i tingting strong long mekim wok bilong Papa na mekim pasin laikim long ol narapela

[Piksa long pes 10]

I gat as na yumi mas givim bel tru long lotu i tru