“Lukautim Gut Ol Sipsip Bilong God”

‘Lukautim gut ol sipsip bilong God i stap aninit long yupela. No ken mekim olsem wanpela i subim yupela long mekim, nogat, yupela i mas amamas long mekim.’​—1 PITA 5:2.

 1. Wanem ol samting i wok long painim ol Kristen taim Pita i raitim namba wan pas bilong en?

SAMPELA hap taim paslain long Niro i kirap mekim nogut long ol Kristen long Rom, aposel Pita i raitim namba wan pas bilong em. Em i laik strongim ol wanbilip bilong em. Satan i “raun” long painim ol Kristen bilong kaikai. Bilong sakim Satan, ol i mas “holimpas gutpela tingting” na ‘daunim ol yet na stap aninit long strongpela han bilong God.’ (1 Pita 5:​6, 8) Na ol i mas i stap wanbel tu. Ol i no ken ‘kros na pait namel long ol yet,’ nogut ‘ol i bagarapim ol yet.’​—Gal. 5:15.

2, 3. Yumi pait long husat? Bai yumi skelim wanem ol samting long dispela tupela stadi?

² Wankain samting i painim yumi long nau. Satan i wok long painim rot bilong kaikaim yumi. (Rev. 12:12) Na klostu nau bai i gat “traipela hevi tru. Kirap long taim God i wokim graun na i kam inap long nau, kain hevi olsem i no bin kamap, nogat, na bai i no inap kamap gen.” (Mat. 24:21) Ol Kristen bilong pastaim i mas wok strong long ol i no ken tok pait namel long ol yet, na yumi tu i mas wok strong olsem. Bilong mekim olsem, sampela taim yumi nidim helpim i kam long ol elda.

³ Orait yumi ken skelim olsem wanem ol elda i ken pilim tru wok bilong ol long lukautim ‘ol sipsip bilong God i stap aninit long ol.’ (1 Pita 5:2) Bihain long dispela, bai yumi skelim stretpela pasin bilong lukautim ol sipsip. Long stadi i kamap bihain long dispela, bai yumi skelim olsem wanem kongrigesen inap ‘rispektim ol lain husat i wok hat namel long ol na lukautim ol.’ (1 Tes. 5:12) Pasin bilong skelim ol dispela samting bai helpim yumi long sanap strong na sakim nambawan Birua bilong yumi, em dispela man yumi mas pait long em.​—Efe. 6:12.

Lukautim Ol Sipsip Bilong God

4, 5. Ol elda i mas i gat wanem tingting long ol sipsip? Stori long dispela.

⁴ Pita i strongim ol elda long taim bilong ol aposel long tingim ol sipsip i stap long han bilong ol olsem God i save tingim ol. (Ritim 1 Pita 5:​1, 2.) Pita i olsem strongpela pos bilong kongrigesen, tasol em i no toktok long ol elda long pasin we i olsem em i winim ol. Nogat. Em i givim tok long ol elda olsem ol i wanwok bilong em. (Gal. 2:9) Long wankain pasin olsem Pita i bin mekim, Gavening Bodi long nau i kirapim ol elda bilong kongrigesen long wok strong long inapim bikpela wok bilong ol long lukautim ol sipsip bilong God.

⁵ Aposel Pita i tok ol elda i mas ‘lukautim gut ol sipsip bilong God i stap aninit long ol.’ Em i bikpela samting long ol i mas kliagut olsem ol sipsip i bilong Jehova na Jisas Krais. God bai skelim ol pasin ol elda i bihainim bilong lukautim ol sipsip bilong em. Tingim olsem wanpela gutpela pren bilong yu i askim yu long lukautim ol pikinini bilong em taim em i go long wanpela hap. Yu bai lukautim gut ol na givim kaikai long ol, laka? Sapos wanpela i sik, yu bai givim marasin o kisim em i go long haus sik, a? Na olsem tasol, ol elda bilong kongrigesen i “lukautim kongrigesen bilong God. Em kongrigesen em i bin baim long blut bilong Pikinini bilong em yet.” (Apo. 20:28) Ol i tingim olsem God i bin baim olgeta wan wan sipsip long blut bilong Krais Jisas, em dispela blut i dia tumas. God i givim wok long ol elda, olsem na ol i sambai, lukautim, na givim kaikai long ol sipsip.

 6. Wanem wok bilong wasman bilong ol sipsip long bipo?

⁶ Tingim ol wok bilong ol wasman bilong ol sipsip long taim bilong ol man i bin raitim Baibel. Bilong lukautim ol sipsip, ol i mas karim hevi bilong bikpela san na kol bilong nait. (Stt. 31:40) Ol i redi long i dai tu bilong lukautim ol sipsip. Yangpela wasman bilong sipsip, Devit, i lukautim lain sipsip bilong em na bai ol wel animal, olsem laion na bea, i no ken bagarapim ol. Devit i tok long 2-pela animal olsem, em i ‘holim long gras bilong nek na paitim ol na kilim ol i dai.’ (1 Sml. 17:​34, 35) Em i gat strongpela bel tru! Ating klostu wel animal i kaikaim em! Tasol em no surik long kisim bek ol sipsip.

 7. Olsem wanem ol elda inap rausim sipsip long maus bilong Satan?

⁷ Long nau, ol elda i mas was gut long ol samting Satan, olsem wanpela laion, i mekim bilong bagarapim ol sipsip. Ol i mas i gat strongpela bel bilong mekim olsem, i olsem ol i mas rausim sipsip long maus bilong Satan. Yumi ken tok i olsem ol elda i holim wel animal long gras bilong nek bilong en, na kisim bek ol sipsip. Ol inap toktok gut wantaim ol brata i no was i stap, em ol traim bilong Satan i pulim ol. (Ritim Jut 22, 23.) Ol elda i no inap mekim olsem sapos Jehova i no helpim ol. Ol i mekim pasin isi long sipsip i kisim bagarap, i olsem ol i pasim sua bilong em na givim ol gutpela Tok Bilong God long em.

 8. Ol elda i stiaim ol sipsip i go we? Ol i mekim dispela olsem wanem?

⁸ Wasman bilong sipsip i save stiaim ol sipsip i go long ples i gat gutpela gras na wara. Na olsem tasol, ol elda i stiaim ol sipsip bilong God i go long kongrigesen, ol i kirapim ol long go oltaim long ol miting na bai ol sipsip inap kisim ‘kaikai long taim stret.’ (Mat. 24:45) Ating ol elda i mas lusim sampela hap taim moa bilong strongim ol lain i sik long ol samting bilong spirit long kisim helpim i kam long Tok Bilong God. Ating wanpela sipsip husat i lus, i traim long kam bek insait long lain sipsip. Ol elda i no pretim brata bilong ol, nogat, long pasin isi ol i kamapim ol stiatok bilong Baibel na soim long brata olsem wanem em i ken bihainim ol dispela stiatok.

9, 10. Ol elda i mas mekim wanem bilong helpim ol lain i sik long sait bilong spirit?

⁹ Taim yu sik, yu laik go lukim wanem kain dokta? Yu laik lukim dokta husat i lusim liklik hap taim tasol bilong harim wari bilong yu na i hariap long makim marasin long yu, na bai em i ken lukim narapela sikman? O yu laik lukim dokta husat i putim gut yau, na i stori gut long narapela narapela marasin samting em inap givim long yu?

¹⁰ Na olsem tasol, ol elda inap putim gut yau long man i sik long sait bilong spirit na helpim em long kamap orait, “ol i ken beten long em na long nem bilong Jehova ol i ken welim em long oil.” (Ritim Jems 5:​14, 15.) Olsem gutpela marasin bilong Gileat, Tok Bilong God inap mekim gut bel bilong man i sik long sait bilong spirit. (Jer. 8:22; Ese. 34:16) Taim man i bihainim ol stiatok bilong Baibel, dispela inap helpim em long givim bel gen long wok bilong Jehova. Yes, ol elda i helpim tru man taim ol i putim gut yau long wari bilong em na beten wantaim em.

Ol i Amamas Long Mekim

11. Wanem samting i kirapim ol elda long amamas long lukautim lain sipsip bilong God?

¹¹ Orait nau Pita i kirapim ol elda long tingim olsem wanem ol i mas lukautim ol sipsip, na samting ol i no ken mekim. Ol elda i mas lukautim ol sipsip, ol i no ken mekim ‘olsem wanpela i subim ol long mekim, nogat, ol i mas amamas long mekim.’ Wanem samting i kirapim ol elda long amamas long helpim ol brata bilong ol? Wanem samting i bin kirapim Pita long lukautim na givim kaikai long ol sipsip bilong Jisas? Bikpela samting em pasin bilong em long laikim tumas Bikpela. (Jon 21:​15-17) Pasin laikim i mekim na ol elda ‘i no bihainim laik bilong ol yet, nogat. Ol i bihainim laik bilong dispela man husat i kisim ples bilong ol na i dai.’ (2 Kor. 5:​14, 15) Dispela kain pasin laikim, na pasin bilong ol long laikim tru God na ol brata, i kirapim ol elda long helpim lain sipsip, ol i givim strong, mani samting, na taim bilong ol long mekim olsem. (Mat. 22:​37-39) Ol i amamas long helpim ol sipsip, i no olsem wanpela i subim ol long mekim.

12. Aposel Pol i redi long helpim ol sipsip inap long wanem mak?

¹² Ol elda i mas redi long helpim ol sipsip inap long wanem mak? Bilong lukautim ol sipsip, ol i bihainim pasin bilong aposel Pol, wankain olsem Pol i bin bihainim pasin bilong Jisas. (1 Kor. 11:1) Pol na ol poroman bilong em i laikim tumas ol brata bilong Tesalonaika, olsem na ol i amamas long ‘givim gutnius bilong God long ol na laip bilong ol tu bilong helpim ol.’ Taim ol i mekim olsem, ol i mekim pasin isi, “olsem wanpela mama i tingim tru pikinini bilong en na i givim susu long em.” (1 Tes. 2:​7, 8) Pol i kliagut olsem mama i givim susu, em i save tingim tru pikinini bilong em. Em bai mekim olgeta samting bilong helpim em, em bai kirap tu long biknait long givim susu long em.

13. Ol elda i mas balensim wanem ol wok?

¹³ Ol elda i mas balensim wok bilong lukautim kongrigesen na wok bilong ol long lukautim famili bilong ol yet. (1 Tim. 5:8) Hap taim ol elda i lusim bilong helpim kongrigesen, em hap taim ol inap i stap wantaim famili bilong ol. Wanpela rot bilong balensim dispela tupela wok, em ol elda i ken singautim ol narapela long insait long Famili Lotu bilong ol long sampela taim. Insait long sampela yia, Masanao, wanpela elda long Japan, i singautim ol singel na ol famili i no gat papa insait long tok i tru, long insait long Baibel stadi bilong famili bilong em. Bihain, sampela bilong ol i bin kamap elda na i bihainim gutpela pasin bilong Masanao.

No Ken Mekim Bilong Kisim Samting

14, 15. Bilong wanem ol elda i mas was gut, nogut ol i mekim wok ‘bilong kisim ol samting bilong helpim ol yet’? Olsem wanem ol inap bihainim pasin bilong Pol long dispela samting?

¹⁴ Pita i kirapim ol elda long lukautim gut ol sipsip bilong God, ol i ‘no ken mekim bilong kisim ol samting bilong helpim ol yet, nogat, ol i mas i gat bikpela laik long mekim dispela wok.’ Ol elda i save lusim bikpela hap taim bilong mekim wok elda, tasol ol i no ting ol i mas kisim mani long dispela wok. Pita i luksave olsem em i mas givim tok lukaut long ol wanwok elda, long ol i no ken lukautim ol sipsip ‘bilong kisim ol samting bilong helpim ol yet.’ Ol bikman bilong “Bikpela Babilon” i save mekim olsem, ol i gat gutpela sindaun tru, na long wankain taim planti man i stap rabis. (Rev. 18:​2, 3) I gat as tru na ol elda long nau i mas was gut, nogut ol i bihainim dispela pasin.

¹⁵ Pol i stap gutpela piksa tru ol elda Kristen i ken bihainim. Maski em i wanpela aposel na em inap “putim hevi” long ol Kristen long Tesalonaika long lukautim em, em i no bin “kisim nating kaikai long wanpela man, nogat.” ‘Long san na long nait em i bin hatwok na taitim bun tru.’ (2 Tes. 3:8) Planti elda long nau, na ol wasman raun tu, ol i stap gutpela piksa long dispela samting. Ol i amamas long ol wanbilip i givim kaikai samting long ol, tasol ol no ‘givim hevi long ol long lukautim ol.’​—1 Tes. 2:9.

16. Ol wasman “i gat bikpela laik” long lukautim ol sipsip, dispela i makim wanem samting?

¹⁶ Ol elda “i gat bikpela laik” long lukautim ol sipsip. Dispela i kamap klia long pasin bilong ol long daunim laik bilong ol yet bilong helpim lain sipsip. Tasol dispela i no makim olsem ol i subim ol sipsip long mekim wok bilong Jehova, na tu, ol gutpela elda i no kirapim ol long mekim wok bilong God bilong resis wantaim ol arapela. Nogat. (Gal. 5:26) Ol elda i save olsem ol sipsip i no wankain. Ol i gat bikpela laik long helpim ol brata bilong ol long amamas long mekim wok bilong Jehova.

No Ken Strong Long Bosim Ol, Stap Gutpela Piksa

17, 18. (a) Bilong wanem sampela taim ol aposel i hatwok long kliagut long tok bilong Jisas long ol i mas mekim pasin daun? (b) Wanem samting inap painim yumi tu?

¹⁷ Olsem yumi stori pinis, ol elda i mas tingim olsem lain sipsip ol i lukautim i bilong God, na i no bilong ol. Ol i save was gut, nogut ol i “strong long bosim ol manmeri bilong God.” (Ritim 1 Pita 5:3.) Sampela taim tingting kranki i kirapim ol aposel bilong Jisas long mekim sampela wok. Olsem ol king i bosim ol kantri, ol aposel i laik kisim bikpela namba.​—Ritim Mak 10:​42-45.

¹⁸ Long nau, ol brata husat i “laik kamap wasman,” ol i mas skelim ol yet long i gat wanem as na ol i laik kisim dispela wok. (1 Tim. 3:1) Na ol brata husat i mekim wok elda long nau, ol i ken askim ol yet olsem ol i gat laik long kisim namba o biknem o nogat, olsem sampela aposel i bin mekim. Sapos ol aposel i gat hevi long dispela samting, orait ol elda i ken save olsem ol tu i mas wok strong long sakim pasin bilong ol man bilong graun long amamas long holim namba bilong bosim ol narapela.

19. Ol elda i mas tingim wanem samting taim ol i mekim ol samting bilong lukautim lain sipsip?

¹⁹ Tru, sampela taim ol elda i mas strong long mekim samting, olsem long taim ol i lukautim lain sipsip long “ol wulf nogut.” (Apo. 20:​28-30) Pol i tokim Taitus long em i mas wok yet long ‘givim tok long ol man na stretim ol.’ (Tai. 2:15) Tasol taim ol elda i stretim ol sipsip, ol i wok strong long mekim pasin rispek long ol. Ol i save olsem pasin bilong mekim hatpela tok i daunim man, dispela i no helpim em, nogat. Pasin bilong isi long man i gutpela rot moa long helpim narapela long pilim tok na kirapim em long bihainim pasin i stret.

20. Olsem wanem ol elda i ken bihainim pasin bilong Jisas na stap gutpela piksa?

²⁰ Gutpela pasin Krais i mekim i kirapim ol elda long laikim tru ol sipsip. (Jon 13:​12-15) Taim yumi ritim stori long olsem wanem Jisas i skulim ol disaipel bilong em long autim tok na kamapim ol disaipel, yumi pilim tru dispela long bel. Ol disaipel i pilim tru pasin daun bilong Jisas, na dispela i kirapim ol long ‘daunim ol yet na tingim olsem ol arapela i winim ol.’ (Fili. 2:3) Ol elda long nau tu i laik bihainim pasin bilong Jisas, na tu, ol i laik stap ‘gutpela piksa bilong ol sipsip.’

21. Ol elda bai kisim wanem gutpela samting long bihain?

²¹ Taim Pita i laik pinisim ol tok em i givim long ol elda, em i stori long wanpela gutpela samting ol bai kisim. (Ritim 1 Pita 5:4.) Ol wasman God i bin makim ol long holi spirit ol “bai kisim dispela prais i save stap gut oltaim” wantaim Krais long heven. Ol wasman husat i bilong lain “arapela sipsip” ol bai holim gutpela wok long lukautim ol sipsip bilong God long graun, na ol bai stap aninit long wok bos bilong “nambawan wasman.” (Jon 10:16) Stadi i kamap bihain long dispela bai stori long ol rot we ol bratasista bilong kongrigesen i ken sapotim ol man i go pas long wok.

Sampela Askim

• Bilong wanem i stret Pita i givim tok long kirapim ol elda long lukautim ol sipsip bilong God?

• Ol elda i mas mekim wanem bilong helpim ol lain i gat sik long sait bilong spirit?

• Wanem samting i kirapim ol elda long lukautim ol sipsip bilong God i stap long han bilong ol?

[Piksa long pes 21]

Olsem ol wasman bilong ol sipsip long bipo, ol elda long nau i mas lukautim “ol sipsip” i stap long han bilong ol