Go Klostu Long God

“Bikpela, . . . Yu Save Tru Long Mi”

“INO gat wanpela hevi i winim bel hevi bilong man i save olsem i no gat wanpela i tingim em o pilim hevi bilong em.”a Olsem wanem? Sampela taim yu tu i pilim olsem? I gat wanpela taim yu pilim olsem i no gat wanpela i tingim yu o kliagut long bel hevi bilong yu? Sapos olsem, orait tok hia inap mekim gut bel bilong yu, olsem: Jehova i save tingim tru ol man i lotuim em, olsem na em i save long olgeta samting i painim ol. Ol tok bilong Devit long Song 139 i ken strongim yumi long bilip long dispela tok i tru.

Devit i bilip tru olsem God i tingim em, na em i tok: “Bikpela, yu skelim pinis bel bilong mi, na yu save tru long mi.” (Ves 1) Devit i mekim wok long wanpela naispela tok piksa. Long tok Hibru dispela tok “skelim pinis” i ken makim pasin bilong digim graun na painim ston i gat ain samting long en (Jop 28:⁠3), lukluk gut long ol hap graun (Hetman 18:⁠2), o painimaut gut as bilong ol tok i kamap long kot (Lo 13:14). Tru tumas, Jehova i save gut tru long yumi na i olsem em i skelim olgeta samting long i stap bilong yumi. Long rot bilong yusim dispela tok “mi,” Devit i skulim yumi olsem God i save tingim tru ol wokman bilong em. Em i skelim pinis na em i save gut long pasin bilong olgeta wan wan.

Devit i kamapim sampela tok moa long pasin bilong God long skelim gut ol man, na em i tok: “Yu save long olgeta samting mi save mekim. Yu stap longwe, tasol yu save long olgeta tingting bilong mi.” (Ves 2) Yumi ken tok, Jehova i “stap longwe,” em i stap long heven. Tasol em i save long taim yumi sindaun, ating long pinis bilong wanpela de, na long taim yumi kirap long moning na mekim ol wok bilong yumi long olgeta wan wan de. Em i save tu long tingting na laik bilong yumi, na ol samting yumi laik mekim. Yu ting Devit i pret olsem Jehova i was gut tru long olgeta liklik samting em i mekim? Nogat tru, Devit i amamas long Jehova i skelim em. (Ves 23, 24) Bilong wanem Devit i pilim olsem?

Devit i save olsem Jehova i gat stretpela tingting taim em i skelim ol man i lotuim Em. Devit i stori long dispela tingting, na i tok: “Yu save lukim mi long taim mi mekim wok na long taim mi slip. Yu save long olgeta pasin bilong mi.” (Ves 3) Long olgeta wan wan de Jehova i lukim ‘olgeta pasin bilong yumi’​—⁠em ol popaia na ol gutpela wok yumi mekim. Yu ting God i save tingim ol popaia o ol gutpela pasin bilong yumi? Long tok Hibru dispela tok “lukim” inap makim “seksekim,” wankain olsem wanpela fama i seksekim wit bilong rausim skin na kisim kaikai bilong en. Dispela tok “yu save” ol i kisim long wanpela tok Hibru em inap makim “tingim tru.” Taim Jehova i skelim ol tok na ol wok em ol man i lotuim em i save mekim long olgeta wan wan de, Jehova i save tingim tru ol gutpela samting ol i mekim. Bilong wanem? Long wanem, em i tingim tru ol hatwok ol i mekim bilong amamasim em.

Song 139 i skulim yumi olsem Jehova i save tingim tru ol man i lotuim em. Em i skelim ol na was gut long ol taim ol i mekim ol wok bilong ol long olgeta wan wan de. Em i save long ol hevi ol i karim, na em i save tu long ol pen na bel hevi ol dispela hevi i kamapim long tingting na bel bilong ol. Olsem wanem? Dispela i kirapim yu long lotuim kain gutpela God olsem? Sapos yu lotuim em, yu ken bilip tru olsem Jehova i no inap “lusim tingting long ol wok yupela i bin mekim na pasin bilong yupela long laikim tru nem bilong em.”​—⁠Hibru 6:⁠10.

Baibel ritim bilong Septemba:

◼ Song 119-150

[Futnot]