Kisim Skul Long Tok Bilong God
Olsem Wanem Yu Inap i Go Klostu Long God?
Dispela atikol i kamapim sampela askim ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.
1. Yu ting God i save harim olgeta beten?
Jehova i singautim ol man bilong olgeta lain long i go klostu long em long rot bilong beten. (Song 65:2) Tasol em i no save harim olgeta beten. Olsem: Taim lain Israel i strong long mekim ol pasin nogut, God i no harim beten bilong ol. (Aisaia 1:15) Na tu, God i no inap harim beten bilong man husat i save mekim nogut long meri bilong em. (1 Pita 3:7) Tasol sapos man i mekim bikpela rong na tanim bel tru, God bai harim beten bilong em.—Ritim 2 Stori 33:9-13.
2. Yumi mas beten olsem wanem?
Beten em i gutpela samting na em i hap lotu bilong yumi, na yumi mas beten long Jehova wanpela tasol. (Matyu 4:10; 6:9) Yumi sinman, olsem na yumi mas beten long nem bilong Jisas, em i “rot” God i bin makim. (Jon 14:6) Jehova i no laik yumi kolim wankain beten planti taim o kolim beten i stap long wanpela buk, em i laik yumi mas mekim ol beten yumi pilim tru long bel.—Ritim Matyu 6:7; Filipai 4:6, 7.
Man Bilong Wokim yumi em i ken harim tu ol beten yumi kolim long tingting. (1 Samuel 1:12, 13) Em i laik yumi beten long olgeta taim, olsem long kirap na pinis bilong de, long taim bilong kaikai, na long taim yumi karim sampela hevi.—Ritim Song 55:22; Matyu 15:36.
3. Bilong wanem ol Kristen i save bung wantaim?
Em i no isi long go klostu long God, long wanem, yumi stap namel long ol man i no bilip long God na ol i save tok bilas long promis bilong God long kamapim bel isi long graun. (2 Timoti 3:1, 4; 2 Pita 3:3, 13) Olsem na yumi mas bung wantaim ol wanbilip bilong strongim narapela narapela.—Ritim Hibru 10:24, 25.
Yu inap i go klostu long God sapos yu pren gut wantaim ol manmeri i save laikim tru God. Ol miting bilong ol Witnes Bilong Jehova i opim rot we bilip bilong ol narapela i ken helpim yu.—Ritim Rom 1:11, 12.
4. Olsem wanem yu inap i go klostu long God?
Yu ken go klostu long Jehova long rot bilong tingim tingim long bel ol tok bilong Baibel yu kisim save pinis long en. Tingim ol wok, ol stiatok, na ol promis bilong em. Pasin bilong beten na tingim long bel ol dispela samting inap helpim yu long pilim tru pasin laikim na savetingting bilong God.—Ritim Josua 1:8; Song 1:1-3.
Yu inap pas gut wantaim God sapos yu bilip tru na trastim em. Tasol bilip i olsem wanpela samting i gat laip na yu inap mekim em i gro. Oltaim yu mas mekim ol samting bilong strongim bilip bilong yu long rot bilong tingim long bel ol samting yu kisim save pinis long en.—Ritim 1 Tesalonaika 5:21; Hibru 11:1, 6.
5. Olsem wanem pasin bilong i go klostu long God inap helpim yu?
Jehova i save tingim ol manmeri husat i laikim em tru. Em i save lukautim ol bambai ol samting nogut i no ken bagarapim bilip na tingting bilong ol long kisim laip oltaim. (Song 91:1, 2, 7-10) Em i givim tok lukaut long yumi long abrusim rot em inap bagarapim helt na amamas bilong yumi. Tru tumas, Jehova i skulim yumi long nambawan gutpela rot bilong laip.—Ritim Song 73:27, 28; Jems 4:4, 8.
Bilong kisim sampela save moa, lukim sapta 17 bilong dispela buk, em ol Witnes Bilong Jehova i wokim. Tru Tru Baibel i tok wanem?