Ol Gutnius Apokrifa​—Yu Ting Em Ol Stori Long Jisas i Stap Hait?

“DISPELA em i wanpela bikpela samting. Planti man bai bel hevi long en.” “Dispela bai senisim tingting yumi gat long ol Kristen bilong pastaim.” Em tok bilong sampela saveman taim ol i painim “Gutnius Bilong Judas,” em wanpela rait ol i ting i bin stap lus inap olsem 1600 yia (piksa antap).

Long nau planti man i gat laik tru long kisim save gen long ol gutnius apokrifa. Sampela man i tok ol dispela rait i gat ol stori long ol bikpela samting long laip bilong Jisas na ol tok em i skulim ol man long en, em ol stori i bin stap hait inap longpela taim. Tasol ol gutnius apokrifa i wanem samting tru? Tru tru ol inap skulim yumi long sampela stori bilong Jisas na bilong lotu Kristen, em ol stori i no stap long Baibel?

Gutnius Bilong Baibel na Gutnius Apokrifa

Namel long yia 41 na 98 C.E., Matyu, Mak, Luk, na Jon, ol i raitim “stori long laip bilong Jisas Krais.” (Matyu 1:1) Sampela taim ol i kolim ol dispela stori olsem ol gospel, mining bilong en em “gutnius” i stori long Jisas Krais.—Mak 1:1.

Ating i gat ol stori bilong Jisas em ol man i harim long maus bilong narapela, na tu, i gat ol narapela rait i stori long em, tasol dispela 4-pela Gutnius tasol em ol rait we God i as bilong ol tok bilong en na i stret ol i stap olsem hap bilong Baibel—ol i helpim yumi long “save tru” long laip bilong Jisas long graun na ol tok em i bin skulim ol man long en. (Luk 1:1-4; Aposel 1:1, 2; 2 Timoti 3:16, 17) Dispela 4-pela Gutnius i stap long olgeta lista bilong Ol Skripsa Grik bilong pastaim tru. Olsem na i no gat as na ol man i sutim tok long ol na i ting ol i no hap tru bilong Baibel.

Tasol bihain ol man i kamapim sampela narapela rait, na ol i kolim ol tu olsem ol gutnius—em ol gutnius apokrifa.a

Long yia 200 C.E. samting, Irenaeus bilong Lyon i tok ol man husat i bin bikhet na lusim lotu Kristen ol i gat “planti rait apokrifa na ol giaman rait nabaut,” na tu, ol i gat ol gutnius em “ol yet i bin raitim bilong paulim tingting bilong ol man i no gat save.” Olsem na ol man i ting em i samting nogut tru long holim o ritim ol dispela gutnius apokrifa.

Tasol sampela bruder na man bilong raitim ol kopi bilong ol dispela rait long bipo, ol i raitim planti kopi bambai ol dispela rait i no ken lus. Bihain long yia 1800, planti man moa i laik save long ol dispela rait na ol i painim planti rait na buk i skelim tok bilong ol apokrifa na sampela gutnius moa. Long nau, ol i kamapim planti buk olsem long ol bikpela tokples bilong nau.

Ol Gutnius Apokrifa: Ol Giaman Stori Long Jisas

Planti taim ol gutnius apokrifa i stori long ol man em ol Gutnius bilong Baibel i no stori long ol, o i no stori tumas long ol. O ol i stori long sampela samting em ol i ting i bin kamap long laip bilong Jisas taim em i pikinini. Tingim sampela stori olsem.

◼ “Gutnius Bilong Jems,” em ol i kolim tu olsem “Mama i Karim Maria,” i stori long taim Maria i bon, long taim em i pikinini, na long taim em i marit long Josep. I gat as na ol i tok dispela gutnius i olsem wanpela stori nating bilong lotu na stori tumbuna. Em i strongim dispela tingting olsem Maria i no bin slip wantaim wanpela man long laip olgeta bilong em, na ol i raitim dispela stori bilong litimapim nem bilong Maria.—Matyu 1:24, 25; 13:55, 56.

◼ “Nupela Gutnius Bilong Tomas” i stori long Jisas taim em i gat 5-pela i go 12-pela krismas, na i stori olsem Jisas i bin mekim sampela narakain mirakel. (Lukim Jon 2:11.) Rait i stori long Jisas olsem em i wanpela pikinini nogut husat i save bikhet, belhat, na yusim strong bilong em long wokim ol mirakel bilong bekim rong long ol tisa, ol neiba, na ol narapela pikinini—em i mekim sampela i kamap aipas, han lek nogut, na kilim sampela i dai.

◼ Sampela gutnius apokrifa, olsem “Gutnius Bilong Pita,” i stori long ol samting i bin kamap long taim bilong kot, indai, na kirap bek bilong Jisas. Sampela narapela gutnius, olsem “Wok Bilong Pailat,” em wanpela hap bilong “Gutnius Bilong Nikodemus,” i stori long ol man i bin stap long taim ol dispela samting i bin kamap. Ol dispela rait i stori long ol samting i no tru na long ol man em ol i no bin stap tru, olsem na i no gat as long bilip long ol. “Gutnius Bilong Pita” i tokaut olsem Pontius Pailat i no gat asua, na i bilasim stori long kirap bek bilong Jisas.

Ol Gutnius Apokrifa na Lusim Lotu Kristen

Long Disemba 1945, klostu long Nag Hammadi, long Isip, sampela man i painim 13 manuskrip i gat 52 rait long en. Ol i tok ol i raitim ol dispela manuskrip bihain long yia 300 na ol i bilong wanpela lain lotu em ol i kolim Nostik. Ol i miksim ol bilip hait, ol kain kain bilip haiden, tingting bilong ol Grik, lotu Juda, na lotu Kristen, na dispela i bin bagarapim bilip bilong sampela manmeri em ol i tok ol i Kristen.—1 Timoti 6:20, 21.

Ol gutnius olsem “Gutnius Bilong Tomas,” “Gutnius Bilong Filip,” na “Gutnius Bilong Tok i Tru,” i stap long ol dispela manuskrip ol i bin painim long Nag Hammadi. Ol dispela gutnius i kamapim ol narakain tingting Nostik na ol i mekim olsem ol dispela tingting i kam long Jisas. I no longtaim i go pinis na ol i painim “Gutnius Bilong Judas” na dispela tu i hap bilong ol gutnius Nostik. Dispela rait i stori long Judas olsem em i gutpela man na em tasol i bin save gut long Jisas. Wanpela saveman i tok dispela gutnius i stori long Jisas olsem em i “wanpela tisa na man i kamapim ol savetingting na save, na em i no man husat i dai bilong kisim bek ol man long sin bilong ol.” Tasol ol Gutnius bilong Baibel i skulim ol man olsem Jisas i dai bilong baim bek ol manmeri long sin bilong ol. (Matyu 20:28; 26:28; 1 Jon 2:1, 2) I klia tru olsem astingting bilong ol gutnius Nostik em bilong daunim bilip em ol man i gat long Baibel na i no bilong strongim bilip long Baibel.—Aposel 20:30.

Ol Gutnius Bilong Baibel i Stret Olgeta

Sapos yumi skelim gut ol gutnius apokrifa yumi kisim save olsem em ol rait giaman. Na taim yumi skelim ol wantaim ol Gutnius bilong Baibel, i klia tru olsem God i no as bilong ol tok bilong en. (2 Timoti 1:13) Ol man husat i raitim ol dispela tok, ol i no bin save long Jisas na ol aposel bilong em, na ol i no kamapim ol stori hait long Jisas na lotu Kristen. Nogat. Ol i kamapim ol stori giaman na stori nating em ol i no helpim ol man long kisim save long Jisas na ol tok bilong em.—1 Timoti 4:1, 2.

Tasol Matyu na Jon ol i bin insait long ol 12-pela aposel; Mak na Luk ol i gutpela pren bilong aposel Pita na aposel Pol. Holi spirit bilong God i givim tingting long ol na ol i raitim ol tok bilong ol Gutnius. (2 Timoti 3:14-17) Long dispela as, 4-pela Gutnius i gat olgeta tok em man i mas save long en bilong bilip long “Jisas em i Krais, Pikinini bilong God.”—Jon 20:31.

[Futnot]

[Piksa Kredit Lain long pes 18]

Kenneth Garrett/National Geographic Stock