Yusim Gut Liklik Mani Yu Holim
OBED em i papa bilong tupela pikinini. Inap 10-pela yia em i bin wok long wanpela nambawan hotel long wanpela bikpela siti long Afrika, na em i no gat hevi long lukautim famili long ol samting ol i nidim. Na sampela taim em i save kisim famili i go long naispela holide na raun lukim ol animal samting long kantri bilong em. Olgeta dispela samting i pinis taim kampani i rausim em long wok bikos namba bilong kastama bilong ol i go daun.
Stephen i wok long wanpela bikpela benk winim 22 yia na bihain em i kamap wanpela bikbos. Em i kisim planti gutpela samting long dispela wok mani bilong em, olsem bikpela haus, kar, ol wokman, na nambawan gutpela skul bilong ol pikinini bilong em. Stephen i no gat wok moa taim benk i senisim ol wok insait long kampani yet. Stephen i tok: “Mi na famili bilong mi i bel hevi stret. Bel bilong mi i bagarap, mi belhat, na mi tingting planti.”
Planti man i bungim kain hevi olsem. Long nau, ol wok bisnis long olgeta hap i wok long pundaun, olsem na planti milion manmeri i no gat wok mani moa. Na planti husat i gat wok mani, ol i kisim liklik pe tasol na ol i mas karim hevi long prais bilong ol samting i go antap moa. Ol bikpela kantri i gat planti mani na ol kantri i stap rabis, olgeta wantaim i wok long karim hevi, long wanem, strong bilong mani i wok long i go pinis.
Mas Bihainim Savetingting
Taim pe yumi kisim i liklik o yumi no gat wok mani moa, em i isi tru long yumi tingting planti na wari. Em tru olsem olgeta man i save tingting planti na wari. Tasol wanpela saveman i bin tok: “Sapos taim nogut i painim yu na bun bilong yu i slek, orait yu no gat strong tru.” (Sindaun 24:10) Yumi no ken larim hevi bilong mani i mekim yumi bel hevi, nogat, yumi mas mekim olsem Baibel i tok: ‘Skelim gut ol pasin yumi mas bihainim.’—Sindaun 2:7.
Maski Baibel i no wanpela buk bilong skulim yumi long pasin bilong stretim ol hevi bilong mani, ol gutpela stiatok bilong en long dispela samting i bin helpim planti manmeri long olgeta hap. Yumi ken skelim sampela stiatok bilong Baibel.
Skelim gut pe bilong ol samting. Tingim tok bilong Jisas long Luk 14:28, olsem: “Sapos wanpela bilong yupela i laik wokim wanpela taua, orait husat bilong yupela bai i no sindaun pastaim na skelim gut pe bilong dispela samting, na bai em i ken save olsem em i gat ol samting inap long pinisim dispela wok o nogat?” Taim yumi bihainim dispela stiatok, bai yumi basetim gut mani na oltaim bihainim dispela baset. Tasol olsem Obed i tok, dispela i gat hatwok bilong en. Em i tok: “Taim mi stap yet long wok, mipela i save go long supamaket na baim planti samting em tru tru mipela i no nidim. Mipela i no save wokim baset, long wanem, mipela i gat planti mani inap long baim wanem wanem samting mipela i laikim.” Pasin bilong basetim gut mani inap helpim yu long yusim gut liklik mani yu holim long baim ol samting em famili i nidim.
Senisim ol samting long sindaun bilong yu. Taim sindaun bilong man i senis, olsem pastaim em i gat planti mani kago, tasol nau em i no gat moa ol dispela samting, dispela senis em i no isi, tasol em i mas lain long en. Wanpela stiatok bilong Baibel i tok: “Man i gat gutpela tingting, em i save olsem, hevi i laik kamap long em na em i abrusim.” (Sindaun 22:3) Stephen i tok: “Bilong seivim mani, mipela famili i muv i go long nupela haus bilong mipela yet, dispela haus i liklik na insait bilong en i no pinis gut yet. Ol pikinini i mas trensfe i go long ol skul we skul fi i liklik, tasol ol i lainim gut ol samting.”
Famili i mas toktok gut wantaim bambai ol inap amamas long nupela sindaun bilong ol. Austin husat i wok long wanpela fainens kampani inap 9-pela yia paslain long ol i pinisim em long wok, em i tok: “Mi na meri bilong mi i save sindaun na raitim ol samting mipela i nidim tru. Mipela i mas daunim mani mipela i save yusim bilong baim ol kaikai i gat bikpela pe, ol holide i save pulim bikpela mani, na ol nupela klos we mipela i no nidim. Mi amamas olsem famili bilong mi i helpim gut narapela narapela taim ol dispela senis i kamap.” Ating ol pikinini i no inap kliagut long as na yupela i mekim ol dispela senis, tasol yupela ol papamama inap helpim ol long kliagut long dispela samting.
Redi long kisim ol nupela kain wok. Sapos yu lain pinis long wok insait tasol long ofis, ating yu bai les long wok ausait we yu mas yusim strong bilong yu. Austin i tok: “Mi pilim olsem i hatwok long mekim ol wok i no gat nem long en, long wanem, mi lain pinis long mekim wok bos insait long bikpela kampani.” Yumi no kirap nogut long dispela taim yumi skelim wantaim tok bilong Baibel long Sindaun 29:25, olsem: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet.” Sapos oltaim yu wari long ol narapela bai gat wanem tingting long yu, dispela i no inap givim mani long yu long lukautim famili. Orait wanem samting inap helpim yu long daunim dispela kain tingting?
Pasin daun em i bikpela samting. Taim ol i pinisim Obed long wok bilong em long bikpela hotel, wanpela olpela wanwok bilong em i gat woksop bilong stretim ol kar na em i singautim Obed long wok wantaim em. Bilong mekim dispela wok, em i mas wokabaut long longpela rot i gat das bilong i go baim ol peint na ol narapela samting bilong kar. Obed i tok: “Mi no laikim dispela wok, tasol mi no inap painim narapela wok. Pasin daun i helpim mi long lain long mekim wok we i no gat bikpela pe, tasol em inap lukautim famili bilong mi long ol samting mipela i nidim.” Yu ting kain tingting olsem inap helpim yu?
Amamas long ol samting yu gat pinis. Sapos man i gat bikpela hevi bilong mani, ating em bai hatwok long amamas long ol samting em i gat pinis. Tasol tingim tok bilong aposel Pol, em wanpela misineri husat i no gat planti mani kago, em i tok: “Mi lain pinis olsem maski mi stap olsem wanem, samting mi gat em inap long mi. Maski mi stap rabis o mi gat planti samting, mi lain pinis long stap olsem.”—Filipai 4:11, 12.
Ating yumi gat gutpela sindaun, tasol long dispela taim we ol samting i wok long senis, bikpela hevi moa inap painim yumi. Tasol yumi inap long i stap gut sapos yumi bihainim tok bilong Pol, olsem: “Tru tumas, pasin bilong givim bel tru long God na tingting olsem ol samting yu holim pinis em inap long yu, dispela em i rot bilong kisim planti samting. Olsem na sapos yumi gat kaikai na laplap na haus samting, orait yumi ken ting ol dispela samting em inap long yumi.” Pol i no tok long yumi mas i stap olsem lesman tasol, nogat, em i tok long yumi mas i gat stretpela tingting long ol samting bilong skin yumi nidim.—1 Timoti 6:6, 8.
As Bilong Amamas Tru
Amamas tru i no save kamap long pasin bilong bungim olgeta samting yumi gat laik long kisim na holim planti mani kago, nogat. Jisas yet i bin tok: “Amamas bilong givim samting i winim amamas bilong kisim samting.” Yes, pasin bilong amamas na belgut long ol samting yumi gat, dispela pasin i save kamap taim yumi yusim ol samting bilong yumi yet long helpim na strongim ol narapela.—Aposel 20:35.
Man Bilong Wokim yumi em God Jehova, em i save gut tru long olgeta samting yumi sot long en. Olsem na long rot bilong Baibel, em i givim yumi ol gutpela stiatok na dispela i bin helpim planti manmeri long mekim sindaun bilong ol i kamap gutpela na daunim pasin bilong wari na tingting planti. Tasol dispela i no inap pinisim hariap hevi em man i gat long sait bilong mani. Jisas i strongim ol manmeri husat i wok yet long “painim Kingdom pastaim na stretpela pasin bilong God” olsem God bai inapim ol long olgeta samting ol i nidim.—Matyu 6:33.