Bilong Wanem God i Laik Ol Man i Lotuim Em Ol i Mas Maritim Wanbilip Tasol?

▪ Lo em God i bin givim long lain Israel i gat dispela tok long samting ol i no ken mekim wantaim ol manmeri bilong ol kantri i stap klostu long ol, olsem: “Yupela i no ken senisim meri wantaim ol.” (Lo 7:3, 4) Wanem as bilong dispela kain tambu?

Namba 1 as em olsem, Jehova i save olsem Satan i laik bagarapim lain bilong Em na pulim ol i go lotuim ol giaman god. God i tokim lain bilong Em olsem, ol haiden bai “pulim ol pikinini bilong yupela i go longwe long [mi] Bikpela na bai ol i lotu long ol giaman god.” Lain Israel inap lus long kisim planti samting. Sapos ol i lotuim ol narapela god, Jehova bai i no orait moa long ol, na em bai i no inap lukautim ol, olsem na em bai isi tru long ol birua i daunim ol. Sapos olsem, lain Israel bai i no gat rot bilong kamapim Mesaia em God i bin tok promis long en. Em long dispela as tasol na Satan i laik pulim lain Israel i go maritim ol man na meri i no bilip long Jehova.

Namba 2 as em olsem, God i save tingim tru olgeta wan wan manmeri long lain bilong em. Em i save olsem olgeta wan wan man bai stap amamas na i gat gutpela sindaun sapos ol yet i pas gut wantaim em olsem God bilong ol. Yu ting i gat as na Jehova i no laik bai lain Israel i maritim wanpela haiden? Tingim stori bilong King Solomon. Em i save long tok lukaut bilong Jehova long samting ol meri haiden bai mekim, na em i tok: “Bai ol i pulim yupela na bai yupela i lusim mi na bihainim ol giaman god bilong ol.” Em i gat bikpela savetingting, olsem na ating em i pilim olsem em i no nidim ol skultok i kam long God. Em i no bihainim ol dispela tok lukaut. Wanem samting i kamap long dispela? “Ol dispela meri bilong en i pulim tingting bilong en i go long ol giaman god.” Bikpela hevi tru i painim em! Solomon i no bin stap gut long Jehova, olsem na Jehova i no orait moa long Solomon na lain bilong em i bruk nabaut.—1 King 11:2-4, 9-13.

Ating sampela bai tok olsem God i bin orait long sampela man Israel em ol i bin maritim ol meri i no bilip long God. Olsem, Malon bilong lain Israel i maritim Rut bilong lain Moap na bihain dispela meri i kamap strongpela bilipmeri. Tasol hevi i bin painim man i maritim meri Moap. Malon i maritim meri Moap na dispela pasin i no stret; em i dai taim em i yangpela man yet, ating paslain long Rut i kirap long lotuim God Jehova. Brata bilong Malon, em Kilion, i bin maritim Orpa, em meri Moap na em i holimpas pasin bilong lotuim “god bilong ol tumbuna bilong en.” Na Boas i bin maritim Rut taim em i kamap wanpela bilipmeri pinis. Bihain ol Juda i tingim em olsem “gutpela meri i bihainim lotu Juda.” Marit bilong Rut na Boas em wanpela gutpela samting tru long Rut na long Boas tu.—Rut 1:4, 5, 15-17; 4:13-17.

Yu ting i stret long kisim tingting olsem stori bilong Malon i maritim Rut, i daunim lo Jehova i putim long ol wokman bilong em i mas maritim wanbilip tasol? Taim man i kisim kain tingting olsem, i olsem em i tok man bilong pilai laki i winim loto, olsem na i stret long pilai laki bilong kisim mani na lukautim famili, tasol yu ting dispela tingting i stret?

Baibel i kirapim ol Kristen long nau long maritim tasol ol man o meri i “bihainim Bikpela.” Baibel i givim tok lukaut long ol Kristen “i no ken pas wantaim ol man i no bilip.” Dispela tok i go long ol Kristen tru long nau em ol i wok long painim poroman bilong maritim. Ol man na meri em ol i maritim pinis wanpela husat i no wanbilip, Baibel i givim gutpela tok bilong helpim ol long stretim ol hevi i kamap namel long ol. (1 Korin 7:12-16, 39; 2 Korin 6:14) Olgeta dispela tok i soim olsem God Jehova, em Man i kamapim marit, em i laik yumi mas i stap amamas olsem ol man na meri i lotuim em, maski yumi stap singel yet o yumi marit pinis.