No Ken Larim Wanpela Samting i Pasim Yu Long Kisim Glori

1, 2. (a) Long tok Hibru, “biknem” o “glori” i makim wanem samting? (b) Bai yumi bekim wanem ol askim long dispela stadi?

TAIM yu harim dispela tok “biknem” o “glori,” yu save tingim wanem samting? Long Baibel, dispela tok “biknem,” o “glori” long tok Hibru i makim samting i hevi. Long bipo tru, ol i save wokim ol koin long gol na silva. Sapos koin i gat bikpela hevi, orait pe bilong en bai bikpela. Olsem na dispela tok ol i tanim olsem “biknem” o “glori,” inap makim samting i dia tumas o i gutpela tru.

² Planti taim ol man i save givim biknem long ol man i gat nem o namba. Tasol God i save skelim wanem samting long man na em i save givim biknem long em? Sindaun 22:4 i tok: “Sapos yu daunim yu yet na yu stap aninit long Bikpela, bai yu gat planti mani samting na biknem, na bai yu stap gut.” Na disaipel Jems i tok: “Daunim yupela yet long ai bilong Jehova, na em bai i litimapim yupela.” (Jems 4:10) Wanem dispela biknem em Jehova i save givim yumi? Wanem samting inap pasim yumi long kisim dispela biknem? Na olsem wanem yumi inap helpim ol arapela long kisim dispela biknem?

3-5. Olsem wanem Jehova i save givim biknem long yumi?

³ Man bilong raitim Song i save olsem Jehova inap givim biknem long em. (Ritim Song 73:23, 24.)a Olsem wanem Jehova i save givim biknem long ol man? Em i mekim olsem taim em i orait long ol na blesim ol long kain kain rot. Olsem, em i save helpim ol long kliagut long laik bilong en, na em i larim ol i pas gut wantaim em.—1 Kor. 2:7; Jems 4:8.

⁴ Na tu, Jehova i larim yumi i autim gutnius na long dispela rot em i givim biknem long yumi. (2 Kor. 4:1, 7) Taim yumi litimapim nem bilong Jehova long rot bilong wok autim tok, Jehova i save givim biknem long yumi na yumi helpim ol narapela. Na Jehova i tok promis olsem: “Man i litimapim nem bilong mi, orait bai mi givim biknem long em.” (1 Sml. 2:30) Jehova i save givim biknem long ol man husat i mekim wok autim tok long rot bilong givim gutnem long ol, olsem em i orait long ol. Na ol arapela insait long kongrigesen i mekim gutpela tok long ol.—Snd. 11:16; 22:1.

⁵ Wanem samting bai painim ol manmeri husat i bihainim tok bilong Jehova? Baibel i tok promis olsem: “Bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.” (Sng. 37:34) Ol wokman bilong God i bilip na wet long kisim gutpela samting, em laip oltaim.—Sng. 37:29.

6, 7. Bilong wanem planti man i no bilip olsem Jisas em i Mesaia?

⁶ Olsem wanem? I gat sampela samting we inap mekim na Jehova i no givim biknem long yumi? Yes. Olsem, ating yumi tingim tumas tingting bilong ol man em ol i no pas gut wantaim Jehova. Sampela hetman long taim bilong Jisas i bin mekim olsem. Aposel Jon i tok, ol i bilip long Jisas “tasol ol i no tokaut olsem ol i bilip. Ol i pret long ol Farisi, nogut ol i rausim ol long sinagog. Ol i laikim tumas bai ol man i litimapim nem bilong ol na ol i ting dispela i winim pasin bilong God long litimapim nem bilong ol.” (Jon 12:42, 43) Mobeta ol dispela hetman i no bin tingim tumas tingting bilong ol Farisi.

⁷ Jisas i kamapim klia as na planti man i no bin bilip olsem em i Mesaia. (Ritim Jon 5:39-44.) Lain Israel i bin wet long Mesaia bai kam inap planti handret yia. Taim Jisas i kirap autim tok, ating sampela husat i kliagut long tok profet bilong Daniel, ol i luksave olsem Mesaia i kamap pinis. Sampela mun paslain long dispela, planti i bin ting olsem Jon Bilong Baptais em i Mesaia. (Luk 3:15) Tasol taim Mesaia i kam, ol saveman bilong Lo i no bilip long em. Bilong wanem? Jisas i kamapim as bilong dispela taim em i askim ol: “Olsem wanem bai yupela i bilip? Yupela i laik kisim glori long narapela narapela, na yupela i no laik kisim glori i kam long dispela wanpela God.”

8, 9. Olsem wanem glori i kam long ol man inap kamap bikpela samting moa long yumi winim glori i kam long Jehova? Stori long tok piksa bilong lait.

⁸ Yumi ken skelim glori wantaim lait na bai yumi ken kliagut long as na ol man i ting olsem taim ol i kisim glori long ol arapela, dispela i winim pasin bilong kisim glori i kam long Jehova. Yunives i pulap tru long lait. Ating yu inap tingim wanpela taim long nait yu bin lukluk i go antap long skai i klia na yu lukim planti tausen sta. Ating yu kirap nogut long lukim ol dispela lain sta. (1 Kor. 15:40, 41) Tasol long sampela siti, i gat planti lait tru na i hatwok long lukim ol sta. Bilong wanem? I no olsem ol lait bilong ol rot, ol stediam, na ol bikpela haus i lait moa o ol i luk nais moa winim lait bilong ol sta, nogat. Ol lait bilong siti i klostu moa long ol man na dispela i mekim na i hatwok long ol i lukim ol sta. Olsem na bilong lukim gutpela lait bilong ol sta, ol i mas go long wanpela hap i longwe long ol lait bilong siti.

⁹ Olsem tasol, glori ol man i givim long yumi inap mekim na yumi ting glori i kam long Jehova i no bikpela samting tumas. Planti man i no laik harim gutnius, long wanem, ol i pret long ol pren na ol famili bilong ol bai gat wanem tingting long ol. Ol wokman bilong Jehova tu inap tingting planti long ol arapela bai i gat wanem tingting long ol. Olsem, tingim sapos ol i makim wanpela yangpela brata long autim tok long wanpela hap we em i save long olgeta man. Tasol planti man long dispela hap i no save olsem em i wanpela Witnes Bilong Jehova. Olsem wanem? Bai em i pret na i no autim tok long dispela hap? Narapela eksampel em sapos wanpela i laik mekim bikpela wok moa bilong Jehova, tasol ol arapela i tok bilas long ol mak em i putim. Bai em i harim tok bilong ol lain husat i ting wok bilong Jehova i no bikpela samting? O ating wanpela i mekim wanpela bikpela rong. Bai em i haitim rong bilong en, long wanem, em i pret long lusim ol wok bilong en insait long kongrigesen, o em i no laik bagarapim bel bilong ol famili na ol pren bilong en? Sapos em i tingim pasin pren bilong en wantaim Jehova i bikpela samting, orait em bai askim ol elda long helpim em.—Ritim Jems 5:14-16.

10. (a) Wanem samting inap kamap sapos yumi tingim tumas tingting ol arapela i gat long yumi? (b) Sapos yumi daunim yumi yet, wanem samting bai kamap?

¹⁰ Ating yu wok strong long kamap wanpela gutpela Kristen, tasol planti taim wanpela brata i save stretim yu. Yu inap bihainim dispela tok na dispela bai helpim yu. O yu inap sakim dispela tok, long wanem, yu gat pasin antap na yu tingting long gutnem bilong yu, o yu mekim sampela eskius long samting yu bin mekim. O tingim sapos yu wok wantaim ol arapela bratasista long mekim wanpela wok. Bai yu tingting planti olsem narapela bai kisim nem long ol gutpela wok na ol gutpela aidia bilong yu? Sapos wanpela bilong ol dispela samting i painim yu, tingim olsem, “man i daunim em yet bai i kisim biknem.”—Snd. 29:23.

11. Taim ol arapela i givim biknem long yumi, yumi mas i gat wanem tingting? Bilong wanem?

¹¹ Ol elda na ol brata husat i wok hat long kisim sampela wok moa insait long kongrigesen, ol i mas was gut, nogut ol i laik bai “ol man i givim biknem” long ol. (1 Tes. 2:6; 1 Tim. 3:1) Sapos ol i givim biknem long wanpela brata long wanpela wok em i bin mekim, orait brata i ken mekim wanem? Tru, em i no inap sanapim wanpela ston bilong em yet, olsem King Sol i bin mekim. (1 Sml. 15:12) Tasol olsem wanem? Em i save tokaut olsem em inap mekim gut dispela wok, long wanem, Jehova i bin helpim em? Na em i save tokaut olsem wok bilong em bai kamap gutpela long bihain tu sapos Jehova i wok yet long blesim na helpim em? (1 Pita 4:11) Samting yumi pilim long bel taim ol arapela i givim biknem long yumi i kamapim ples klia wanem kain biknem yumi laik kisim.—Snd. 27:21.

12. Bilong wanem sampela Juda i no laik harim tok Jisas i autim?

¹² Narapela samting inap mekim na Jehova i no givim biknem long yumi, em ol laik nogut bilong yumi. Ol laik nogut inap mekim na yumi no laik putim yau long tok i tru. (Ritim Jon 8:43-47.) Jisas i bin tokim sampela Juda olsem ol i no laik harim tok em i autim, long wanem, ol i laik bihainim laik bilong Papa bilong ol, em Satan.

13, 14. (a) Ol saveman i tok wanem long kru bilong yumi na long pasin bilong yumi long harim toktok? (b) Bai yumi harim tok bilong husat?

¹³ Sampela taim yumi laik harim tasol ol samting yumi laikim. (2 Pita 3:5) Jehova i wokim kru bilong yumi i narakain tru na kru inap pasim yumi long harim ol nois yumi no laik harim. Orait nau, putim yau long ol nois yu inap harim. Ating pastaim yu no bin harim planti bilong ol dispela nois. Bilong wanem i olsem? Kru bilong yu inap harim olgeta dispela nois, tasol em i bin helpim yu long putim tingting long wanpela samting tasol. Tasol i hatwok moa long kru i mekim olsem taim yumi harim planti man i toktok. Ol saveman i painimaut olsem yumi inap putim yau long toktok bilong wanpela man tasol. Dispela i makim olsem taim 2-pela man i toktok long yu long wankain taim, yu yet i mas makim husat man yu bai putim yau long tok bilong en. Yu bai makim man em yu laik harim tok bilong en. Ol Juda long taim bilong Jisas i laik bihainim laik bilong papa bilong ol, Satan, olsem na ol i no laik harim tok bilong Jisas.

¹⁴ Baibel i tok olsem, “gutpela tingting” na “longlong pasin” i laik bai yumi harim tok bilong ol. (Snd. 9:1-5, 13-17) Yumi yet i mas makim. Bai yumi harim tok bilong husat? Bekim bilong yumi bai kamapim ples klia husat yumi laik amamasim. Sapos yumi ol sipsip bilong Jisas, bai yumi harim tok bilong en na bihainim em. (Jon 10:16, 27) Jisas i tok olsem ol sipsip bilong en i “stap long sait bilong tok i tru.” (Jon 18:37) “Ol i no save long nek bilong” ol man em ol i no save long ol. (Jon 10:5) God bai i givim biknem long ol lain i gat pasin daun na i bihainim Jisas.—Snd. 3:13, 16; 8:1, 18.

15. Bilong wanem Pol i tok olsem ol pen na hevi em i karim i givim biknem long ol Efesus?

¹⁵ Olsem wanem yumi ken helpim ol arapela long kisim biknem i kam long God? Wanpela rot em long pasin bilong yumi long sanap strong na karim hevi. Pol i raitim pas i go long kongrigesen long Efesus na em i tok: “Mi askim yupela long no ken larim ol pen na hevi mi karim bilong helpim yupela i mekim yupela i givap. Long wanem, ol pen na hevi mi karim i givim biknem long yupela.” (Efe. 3:13) Bilong wanem Pol i tok olsem ol pen na hevi em i karim i givim biknem long ol Efesus? Taim Pol i helpim ol brata maski em i gat hevi, Pol i kamapim klia olsem pasin bilong mekim wok bilong God i mas i stap olsem nambawan gutpela samting long ol Kristen. Sapos Pol i bin givap taim ol hevi i painim em, ating ol brata bai ting olsem pasin bilong ol long pas gut wantaim Jehova, wok autim tok, na ol samting ol i bilip na wetim, ol i no bikpela samting. Pasin bilong Pol long sanap strong na karim hevi, i kamapim klia long ol brata olsem pasin bilong i stap olsem wanpela disaipel bilong Krais i winim olgeta hevi ol inap karim.

16. Wanem samting i painim Pol long Listra?

¹⁶ Tingim hau pasin bilong Pol long givim bel long mekim wok na karim hevi i bin helpim ol brata. Aposel 14:19, 20 i stori long samting i bin painim Pol long taun Listra: “Sampela Juda bilong Antiok na Aikoniam, ol i kam na pulim tingting bilong ol manmeri, olsem na ol i tromoi ston long Pol. Na taim ol i ting em i dai pinis, ol i pulim bodi bilong en i go ausait long taun. Tasol taim ol disaipel i kam sanap raunim em, em i kirap sanap na i go insait long taun. Na long de bihain em i go wantaim Barnabas long taun Derbe.” Long de bihain stret long ol i bin stonim Pol na klostu em i dai, em i wokabaut inap olsem 100 kilomita i go long narapela taun. Man! Tingim bikpela pen Pol i pilim taim em i wokabaut i go.

17, 18. (a) Olsem wanem Timoti i save long hevi i bin painim Pol long Listra? (b) Olsem wanem pasin bilong Pol long sanap strong na karim hevi i bin helpim Timoti?

¹⁷ Olsem wanem? Timoti i bin stap long taim ol i bin tromoi ston long Pol? Ating. Stori i stap long buk Aposel i no kamapim klia sapos Timoti i bin stap o nogat. Tasol Timoti i save long samting i bin painim Pol. Long namba 2 pas Pol i raitim i go long Timoti, em i tok: ‘Yu bin tingim gut skul bilong mi, na wokabaut bilong mi.’ Timoti i save olsem ol i bin tromoi ston long Pol long Listra, na tu, em i save olsem ol Juda i bin rausim Pol long Antiok na sampela i bin traim long tromoi ston long em long Aikoniam.—2 Tim. 3:10, 11; Apo. 13:50; 14:5, 19.

¹⁸ Timoti i save olsem Pol i bin sanap strong na karim olgeta dispela hevi. Ating Timoti i bin lainim planti samting long pasin bilong Pol. Bihain, taim Pol i go bek long Listra, em i kisim save olsem Timoti i stap gutpela piksa insait long kongrigesen na “ol brata long Listra na Aikoniam i save tok olsem Timoti i gutpela man.” (Apo. 16:1, 2) Bihain, Timoti i winim ol mak bilong kisim sampela bikpela wok.—Fili. 2:19, 20; 1 Tim. 1:3.

19. Olsem wanem pasin bilong yumi long sanap strong na karim hevi inap helpim ol arapela?

¹⁹ Sapos yumi mekim yet laik bilong God, dispela bai helpim ol yangpela long kamap ol gutpela wokman bilong God. Ol yangpela i save lukluk na lain long pasin yumi mekim taim yumi toktok wantaim ol manmeri long autim tok, na moa yet long ol samting yumi mekim taim hevi i painim yumi. Pol i tok olsem, em i bin sanap strong na karim hevi na long dispela rot em inap helpim ol arapela long kisim laip oltaim.—2 Tim. 2:10.

20. Bilong wanem yumi mas wok yet long kisim biknem o glori i kam long God?

²⁰ I gat planti gutpela as na yumi laik wok yet long “kisim glori i kam long dispela wanpela God.” (Jon 5:44; 7:18) Jehova bai givim laip oltaim long ol man husat i laik kisim glori. (Ritim Rom 2:6, 7.) Na tu, pasin bilong yumi long sanap strong na karim hevi bai helpim ol arapela long i stap gut long God na kisim laip oltaim. Olsem na no ken larim wanpela samting i pasim yu long kisim biknem o glori i kam long God.