Stap Rabis, Tasol Strong Long Sait Bilong Lotu

Taim mi gat 3-pela krismas, gavman i salim papa, ankol, na bubu man i go long ol haus kalabus bikos ol i no laik insait long ami. Papa tasol i stap laip yet bihain long kalabus. Long 1947, bihain long Wol Woa 2, em i kam bek na baksait bun bilong em i bruk. Maski skin bilong em i bagarap, em i stap strong yet long bilip.

Taim mi gat 9-pela krismas, gavman i salim famili bilong mipela na planti handret Witnes bilong Moldova i go kalabus long Saibiria. Long Julai 6, 1949, ol i putim mipela long tren, long hap we ol i save putim ol bulmakau. Mipela i ron inap 6,400 kilomita insait long 12-pela de, na mipela i stop Lebyazhe tren stesin. Ol bikman long dispela hap i wetim mipela. Ol i skelim mipela i go long ol liklik grup, na wantu tasol ol i salim mipela i go long narapela narapela hap bilong dispela ples. Grup bilong mipela i go sindaun long wanpela skul i stap nating. Mipela i pilim taiet na bel hevi tru. Wanpela lapun meri i kirap singim song ol Witnes i bin raitim long taim bilong Wol Woa 2. I no longtaim, olgeta i bungim nek na singsing wantaim em olsem:

“Ol i salim planti brata i go kalabus long ol longwe hap.

Ol i salim ol i go long not na is.

Ol i mekim wok bilong God na ol man i putim hevi long ol na ol i sanap strong maski dai i mas painim ol.”

Bihain, mipela inap go long ol miting bilong Baibel long olgeta Sande long hap i stap longwe long haus bilong mipela inap 13 kilomita. Planti taim mipela i lusim haus long bikmoning taim ples i tudak yet na wokabaut insait long sno i kam antap inap long bel bilong mipela, na ples i kol tru inap 40 digri Selsias aninit long siro mak. Mipela 50 manmeri i paspas insait long wanpela liklik rum sais bilong en inap olsem 19 skwe mita tasol. Pastaim mipela i mekim 2-pela o 3-pela singsing. Wanpela i beten na mipela stori long sampela askim bilong Baibel inap wanpela aua samting. Mipela mekim sampela singsing moa na stori long sampela moa askim bilong Baibel. Dispela i bin strongim tru bilip bilong mipela!

Long 1960, ol i larim mipela ol Witnes i stap fri moa. Maski mipela stap rabis, mi i bin raun i go long Moldova we mi bungim Nina, em papamama na ol bubu bilong em ol i Witnes. I no longtaim mipela marit na go bek sindaun long Saibiria we pikinini meri bilong mipela, Dina, i bon long 1964, na pikinini man bilong mipela, Viktor, long 1966. Tupela yia bihain, mipela i go sindaun long Yukren, long wanpela liklik haus long taun Dzhankoy, i stap 160 kilomita longwe long Yalta, long poin bilong Crimea.

Gavman i putim tambu yet long wok bilong ol Witnes Bilong Jehova long Crimea, wankain olsem long Soviet Yunion. Tasol gavman i no pasim olgeta wok lotu bilong mipela na ol i no mekim nogut long mipela. Olsem na sampela Witnes i lusim pasin bilong ol long givim bel long tok i tru. Ol i tok ol i bin karim bikpela pen na hevi long Saibiria, olsem na i orait long ol i wok strong long kisim ol samting bilong skin long nau.

Long Mas 27, 1991, gavman i givim tok orait long wok bilong mipela long olgeta hap bilong Soviet Yunion long dispela taim. Wantu tasol, ol brata i stretim rot bilong mekim 2-pela de spesel kibung long 7-pela narapela narapela ples long kantri olgeta. Ol i makim mipela long go long kibung bai i kamap long Odessa, Yukren, em bai kirap long Ogas 24. Mi bin go wanpela mun paslain bilong helpim wok bilong redim ol samting long wanpela bikpela soka stediam we kibung bai kamap long en.

Mipela save wok de olgeta, na planti taim mipela i slip long ol fom bilong stediam. Ol wanbilip Witnes meri i klinim pak em stediam i stap long en. Mipela i rausim 70 ton bilong ol pipia. Ol brata long dipatmen bilong rum slip i bin sekim olgeta hap long taun bilong painim ples slip bilong 15,000 manmeri bai kam long kibung. Nau, bikpela hevi i kamap!

Long Ogas 19, em 5-pela de paslain long kibung, ol i arestim presiden bilong Soviet Yunion long dispela taim, em Mikhail Gorbachev, taim em i go holide long ples klostu long Yalta, em klostu long mipela. Ol bikman bilong gavman i no orait moa long mipela i mekim kibung. Ol lain bilong kam long kibung i wok long ringim ofis bilong kibung na askim ol: “Olsem wanem long mani mipela lusim bilong baim bas na tren?” Ol brata i oganaisim kibung i beten strong na tokim ol: “Kam tasol!”

Ol i wok yet long redim kibung na mekim beten. Dipatmen bilong trenspot i go bungim ol bratasista i kam long planti hap bilong Soviet Yunion na kisim ol i go long rum slip bilong ol. Olgeta moning, ol brata i wok long komiti bilong kibung ol i go bung wantaim ol bikman bilong taun. Olgeta nait, ol i kam bek, tasol ol i no kisim tok orait.

Long Fraide, Ogas 23, wanpela de paslain long kibung, ol brata long Komiti Bilong Kibung i kam bek wantaim gutpela nius: Ol bikman i tok orait long kibung i ken kamap! Neks de, mipela i singim fes singsing na mekim beten bilong kirapim kibung na mipela i amamas tru. Taim kibung i pinis long Sarere, mipela i stap i go inap biknait, na stori wantaim ol olpela pren. Mipela i stap namel long ol Kristen em ol i gat strongpela bilip na ol i winim ol bikpela hevi tru.

Insait long 22 yia bihain long dispela kibung, oganaisesen bilong Jehova i mekim bikpela wok tru. Ol i wokim ol Haus Kingdom long olgeta hap bilong Yukren, na tu, namba bilong ol pablisa i autim tok bilong Kingdom long 1991 em 25,000, na nau dispela namba i go antap tru winim 150,000!

Famili bilong mipela i stap yet long wankain haus long Dzhankoy, em taun i gat olsem 40,000 manmeri long en. Long 1968, taim mipela i lusim Saibiria na kam bek, i no gat planti Witnes famili i stap long Dzhankoy, tasol nau i gat 6-pela kongrigesen i stap.

Famili bilong mi tu i go bikpela. Nau mipela 4-pela lain i stap yet na mekim wok bilong Jehova, em ol pikinini bilong mipela, ol tumbuna pikinini bilong mipela, na ol pikinini bilong ol tumbuna pikinini bilong mipela.