“No Ken Larim Gutpela Tingting Bilong Yupela i Paul Hariap”!

1, 2. Bilong wanem planti man i save mekim tok giaman? Planti man i save mekim wanem ol tok giaman long nau? (Lukim piksa long kirap bilong stadi.)

PASIN bilong tok giaman i pulap tru long nau. Yumi no ken kirap nogut long dispela. Baibel i tok Satan i save gut tru long mekim tok giaman na em i bosim graun long nau. (1 Tim. 2:14; 1 Jon 5:19) Klostu nau pasin nogut bilong dispela graun bai pinis, olsem na Satan i belhat moa yet, long wanem, em i gat “sotpela taim tasol bilong i stap.” (Rev. 12:12) Olsem na yumi save olsem ol man em Satan i stiaim ol, pasin giaman bilong ol bai kamap bikpela moa. Ol bai wok strong moa long giamanim ol manmeri husat i lotuim Jehova.

² Taim ol niuslain i stori long ol wokman bilong Jehova na bilip bilong ol, sampela taim ol i no save kolim olgeta tok i stret na sampela taim ol i save mekim tok giaman. Ol het-tok i kamap long niuspepa, televisen, na Intenet i save kirapim ol man long kisim tingting kranki long ol wokman bilong God. Sampela man i no save amamas na ol i save kros tu, long wanem, ol i bilipim ol dispela tok giaman na ol i no painimaut gut sapos ol dispela stori i stret o nogat.

 3. Wanem samting inap helpim yumi long sakim ol tok giaman?

³ Yumi ken amamas olsem yumi gat rot long sakim ol tok giaman bilong Satan. Yumi gat Baibel na tok bilong en i “gutpela long . . . mekim ol samting i kamap stret.” (2 Tim. 3:16) Tok bilong aposel Pol i soim olsem sampela Kristen long Tesalonaika i bilipim ol tok giaman. Pol i tok: “Mipela i laik askim yupela long yupela i no ken larim gutpela tingting bilong yupela i paul hariap.” (2 Tes. 2:1, 2) Yumi inap kisim wanem ol skul long tok lukaut bilong Pol? Olsem wanem yumi ken bihainim ol dispela skultok?

 4. Ol Kristen long Tesalonaika i kisim wanem ol tok lukaut long “de bilong Jehova” bai kam? Yumi kisim dispela tok lukaut long wanem rot?

⁴ Long namba 1 pas Pol i raitim i go long ol Kristen long Tesalonaika, em i tok lukaut long ol olsem “de bilong Jehova” bai kam. Em i no laik bai ol brata bilong em i paul o i no stap redi taim dispela de i kamap. Em i tokim ol olsem ol i “pikinini bilong lait,” na em i tok moa olsem: “Yumi mas was i stap na holim stretpela tingting.” (Ritim 1 Tesalonaika 5:1-6.) Long nau, yumi wet long lukim Bikpela Babilon i bagarap, em olgeta lotu giaman. Taim dispela bagarap i kamap, dispela bai kirapim bikpela de bilong Jehova. Yumi kliagut long olsem wanem Jehova bai truim samting em i tingting pinis long mekim. Long rot bilong kongrigesen, yumi save kisim ol gutpela tok bilong helpim yumi long redi long de bilong Jehova. Ol dispela tok lukaut i save kamap planti taim, na sapos yumi putim gut yau long en, dispela inap strongim yumi long holim “gutpela tingting” na lotuim God.—Rom 12:1.

5, 6. (a) Pol i raitim wanem tok long namba 2 pas bilong em i go long ol Kristen long Tesalonaika? (b) Klostu nau Jisas bai mekim wanem, na yumi mas givim wanem ol askim long yumi yet?

⁵ Pol i raitim namba 2 pas i go long ol Kristen long Tesalonaika. Long dispela pas, em i stori long bikpela hevi bai kamap na Jisas bai givim strafe bilong God long “ol lain husat i no save long God na long ol lain husat i no bihainim tok bilong gutnius.” (2 Tes. 1:6-8) Long sapta 2 bilong dispela pas, Pol i tok sampela long kongrigesen i bin “kirap nogut” long de bilong Jehova, olsem na ol i bilip olsem dispela de i stap klostu pinis. (Ritim 2 Tesalonaika 2:1, 2.) Ol Kristen bilong pastaim ol i no kliagut olgeta long olsem wanem Jehova bai inapim samting em i tingting pinis long mekim. Bihain, Pol i tokaut long dispela samting na em i tok: “Yumi gat hap hap save tasol, na yumi save autim ol hap hap tok profet tasol. Tasol taim dispela samting i inap tru i kamap, ol dispela hap hap samting bai pinis.” (1 Kor. 13:9, 10) Tasol ol inap stap gut long Jehova sapos ol i putim yau long ol tok lukaut em Jehova i kamapim long rot bilong Pol, aposel Pita, na ol arapela Kristen God i bin makim.

⁶ God i laik stretim tingting bilong ol, olsem na em i kirapim Pol long kamapim klia olsem paslain long de bilong Jehova i kamap, planti man bai givim baksait long lotu i tru na “man bilong sakim lo” bai kamap.a Bihain, long taim God yet i makim, Jisas bai “bagarapim” olgeta man husat i bilipim ol tok giaman bilong man bilong sakim lo. Pol i tok dispela bagarap bai painim ol, long wanem, “ol i no kamapim olsem ol i laikim tru tok i tru.” (2 Tes. 2:3, 8-10) Yumi mas askim yumi yet olsem: ‘Mi laikim tok i tru? Mi save stadi long dispela magasin na ol narapela buk na nius em lain bilong God i kisim long olgeta hap bilong graun, na bai mi inap save long ol nupela save bilong Baibel?’

7, 8. (a) Wanem sampela samting inap nogutim ol Kristen bilong pastaim? (b) Wanem samting inap nogutim ol Kristen long nau?

⁷ Tok bilong ol apostet inap nogutim ol Kristen, na tu, i gat ol narapela samting we inap nogutim ol. Taim Pol i raitim pas i go long Timoti, em i tok “pasin bilong laikim tumas mani em i as bilong olgeta kain pasin nogut.” Em i tok tu olsem “sampela i bin laikim tumas mani, na dispela i pulim ol na ol i lusim bilip, i olsem ol i sutim ol yet long ol samting i givim pen long ol.” (1 Tim. 6:10) “Ol pasin em laik nogut bilong bel i kamapim,” oltaim dispela tu inap nogutim ol Kristen.—Gal. 5:19-21.

⁸ Pol i givim strongpela tok lukaut long ol Kristen long Tesalonaika olsem ol i mas abrusim ol man husat i stap olsem ol “giaman aposel.” Sampela bilong ol i “mekim ol tok kranki bilong pulim ol disaipel i go bihainim ol.” (2 Kor. 11:4, 13; Apo. 20:30) Jisas i tok amamas long kongrigesen long Efesus, long wanem, ol i no larim “ol man nogut” i stap insait long kongrigesen. Kongrigesen i painimaut olsem ol dispela man em ol giaman aposel na ol man bilong tok giaman. (Rev. 2:2) Long namba 2 pas Pol i raitim i go long ol Kristen long Tesalonaika, em i givim dispela tok kaunsel long ol, em i tok: “Ol brata, long nem bilong Bikpela Jisas Krais, mipela i givim tok long yupela olsem, yupela i mas stap longwe long ol brata husat i no wokabaut stret.” Bihain, em i stori long ol Kristen husat “i no laik wok.” (2 Tes. 3:6, 10) Olsem na sapos ol Kristen i mas abrusim ol man husat i les na ol i no laik mekim wok, orait em i bikpela samting moa long ol i mas abrusim ol man husat i kirap long bihainim pasin apostet. Sapos ol Kristen i bung wantaim ol kain man olsem long dispela taim bipo, dispela inap pulim ol long lusim bilip, olsem na ol i mas abrusim dispela lain. Wankain samting tu inap kamap long nau.—Snd. 13:20.

 9. Bilong wanem yumi mas abrusim man husat i ges long ol samting we Baibel i no stori long en o em i sutim tok long oganaisesen bilong Jehova?

⁹ Yumi wok long i go klostu moa long taim bilong traipela hevi tru na pinis bilong ol pasin nogut bilong nau. Olsem na long nau em i bikpela samting moa long yumi mas bihainim ol tok lukaut em Jehova i bin givim long ol Kristen long taim bilong ol aposel. Yumi mas “kisim bikpela pasin helpim bilong [God] na no ken lusim tingting long wok bilong en,” nogut yumi no inap kisim laip oltaim. (2 Kor. 6:1) Sapos wanpela man i kam long miting na em i laik kirapim yumi long ges long ol samting we Baibel i no stori long en, o em i laik kirapim yumi long sutim tok long ol elda na ol arapela husat i mekim wok bilong God, orait yumi mas abrusim kain man olsem.—2 Tes. 3:13-15.

10. Pol i kirapim ol Kristen long Tesalonaika long bihainim yet wanem ol samting?

¹⁰ Pol i kirapim ol bratasista long Tesalonaika long “sanap strong” na wok yet long mekim ol samting ol i bin lainim. (Ritim 2 Tesalonaika 2:15.) Ol i bin lainim wanem “ol samting”? Ol i bin lainim ol tok Jisas i bin skulim ol long en na ol tok em God i kirapim Pol na ol arapela long raitim. Pol i no tok long ol samting em ol lotu giaman i lainim ol man long en. Pol i tok amamas long ol bratasista long kongrigesen long Korin, em i tok: “Yupela i save tingim mi long olgeta samting na yupela i holimpas ol tok mi bin givim long yupela.” (1 Kor. 11:2) Ol tok em Pol i skulim ol long en, em ol tok i kam long God na ol inap bilip tru long en.

11. Wanem ol samting inap kamap sapos ol man i bilipim ol tok giaman?

¹¹ Taim Pol i raitim pas i go long ol Kristen long Hibru, em i kolim 2-pela rot we ol Kristen inap lusim bilip na i no stap gut moa long Jehova. (Ritim Hibru 2:1; 3:12.) Pol i tok sampela Kristen inap lusim Jehova isi isi na ol yet i no luksave long dispela, na sampela inap lusim em long laik bilong ol yet. I hatwok long luksave sapos wanpela kanu i trip isi isi i go lusim nambis. Isi isi kanu inap trip i go longwe tru long biksolwara. Na tu, man yet inap pusim kanu bilong em i go aut long biksolwara. Dispela 2-pela eksampel i soim samting inap kamap sapos man i bilipim ol tok giaman na em i no bilip strong moa long tok i tru.

12. Wanem samting inap bagarapim pasin bilong yumi long stap pren bilong Jehova?

¹² Ating sampela Kristen long Tesalonaika i bin bilipim ol tok giaman. Yu ting kain samting olsem inap kamap long nau? Planti samting inap pulim taim bilong yumi. Tingim bikpela haptaim yu lusim long mekim ol samting yu save amamas long en, lukim ol Web sait long Intenet, ritim na bekim ol teks mesis, na sekim nius bilong spots. Ol dispela kain samting inap pulim tingting bilong ol Kristen na ol i no givim bel moa long mekim wok bilong Jehova. Wanem samting inap kamap? Ating Kristen bai i no pilim tru ol beten em i mekim. Ating em bai i no inap lusim bikpela haptaim moa long stadi long Baibel, go long ol miting, na autim gutnius. Yumi inap mekim wanem na bai yumi no ken larim gutpela tingting bilong yumi i paul hariap?

13. Olsem Baibel i tok profet long en, planti manmeri i holim wanem tingting? Wanem samting inap lukautim bilip bilong yumi?

¹³ Yumi mas tingim olsem pinis bilong graun bilong Satan i kam klostu pinis, na yumi inap kisim hevi sapos yumi poromanim ol man husat i ting olsem yumi no stap long “taim bilong las de.” Aposel Pita i stori long taim bilong yumi, na em i tok: “Ol man bilong tok bilas bai kamap na mekim ol tok bilas, na ol bai bihainim laik bilong ol yet na tok olsem: ‘Em i bin tok promis olsem em bai kam i stap, tasol em i stap we? Kirap long taim ol tumbuna bilong yumi i bin i dai na i kam inap nau, olgeta samting i stap wankain olsem bipo tru taim God i mekim ol samting i kamap.’” (2 Pita 3:3, 4) Pasin bilong ritim na stadi long Baibel long olgeta de bai helpim yumi long tingim olsem yumi stap long “taim bilong las de.” Pasin apostet em Baibel i tok profet long en, dispela i bin kirap long bipo yet na i stap yet i kam inap long nau. “Man bilong sakim lo” i stap yet long nau na em i birua long ol wokman bilong God. Olsem na yumi no ken tru lusim tingting olsem de bilong Jehova i kam klostu pinis.—Sef. 1:7.

14. Taim yumi lusim bikpela haptaim long mekim wok bilong God, olsem wanem dispela i lukautim yumi?

¹⁴ Narapela rot bilong yumi long lukautim yumi yet na bai gutpela tingting bilong yumi i no ken paul hariap em olsem, yumi mas autim gutnius long olgeta taim. Olsem na taim Krais Jisas i tokim lain bilong em long kamapim ol disaipel long olgeta lain man na skulim ol long bihainim ol tok em i bin skulim ol long en, em i givim skultok we inap lukautim lain bilong em. (Mat. 28:19, 20) Bilong bihainim dispela tok, yumi mas givim bel tru long autim tok. Yu ting ol bratasista long Tesalonaika i autim tok na skulim ol man, na tingim dispela olsem wanpela wok nating? Tingim tok em Pol i bin givim long ol, em i tok: “No ken kilim i dai paia bilong holi spirit. No ken rabisim ol tok profet.” (1 Tes. 5:19, 20) Ol tok profet yumi stadi long en na autim long ol narapela, dispela em i gutpela samting tru!

15. Long taim bilong famili lotu, yumi ken skelim wanem ol samting?

¹⁵ Yumi olgeta i laik helpim ol famili bilong yumi long mekim gut moa wok bilong autim gutnius. Bilong mekim olsem, planti bratasista i save yusim haptaim bilong famili lotu long prektisim ol tok ol bai autim long ol man. Ating yu ken redim ol tok bilong mekim ol gobek. Yu tingting long stori long wanem samting? Yu ken mekim wanem tok long man bilong haus na dispela bai kirapim laik bilong em long kisim sampela save moa? Wanem taim em gutpela taim bilong mekim ol gobek? Planti bratasista i save yusim haptaim bilong famili lotu long redim tu ol tok bilong miting. Yu ting famili bilong yu inap mekim olsem? Sapos yu bekim tok long ol miting, dispela bai strongim bilip bilong yu na bai yu no ken larim gutpela tingting bilong yu i paul. (Sng. 35:18) Famili lotu bai lukautim yumi na yumi no inap ges nating long ol samting em Baibel i no stori long en na yumi no inap holim 2-pela tingting.

16. Wanem samting i strongim ol Kristen God i bin makim na ol i no larim gutpela tingting bilong ol i paul?

¹⁶ Inap planti yia nau, Jehova i blesim lain bilong em na helpim ol long kliagut moa long ol tok profet bilong Baibel. Dispela i strongim bilip bilong yumi olsem yumi bai kisim gutpela pe long bihain. Ol Kristen God i bin makim ol i bilip na wet long wok wantaim Krais long heven. Dispela i strongim ol long was gut na ol i no ken larim gutpela tingting bilong ol i paul! Tok em Pol i raitim i go long ol Kristen long Tesalonaika, long nau dispela tok i stret tu long ol Kristen God i bin makim. Pol i tok: “Oltaim mipela i mas tok tenkyu long God long yupela ol brata em Jehova i laikim, long wanem, . . . God i bin makim yupela . . . taim em i bin mekim yupela i kamap holi long holi spirit bilong en na long rot bilong bilip bilong yupela long tok i tru.”—2 Tes. 2:13.

17. Tok bilong 2 Tesalonaika 3:1-5 i strongim yu olsem wanem?

¹⁷ Ol lain husat i wet long kisim laip oltaim long graun, ol i mas wok strong na no ken larim wanpela samting i mekim na gutpela tingting bilong ol i paul. Sapos yu bilip na wet long kisim laip oltaim long graun, orait oltaim yu mas bihainim gutpela tok em Pol i raitim i go long ol Kristen long Tesalonaika, em ol Kristen God i bin makim. (Ritim 2 Tesalonaika 3:1-5.) Yumi mas pilim tru ol dispela gutpela tok. Ol pas Pol i raitim i go long ol Kristen long Tesalonaika i helpim yumi long abrusim pasin bilong ges nating long ol samting em Baibel i no stori long en na yumi no bilipim ol giaman toktok. Yumi stap klostu tru long taim bilong pinis, olsem na yumi mas pilim tru ol dispela tok lukaut.