Mi Laikim Tru God na Mi Sanap Strong na Karim Hevi

EM YIA 1970 long mun Jun samting. Mi slip long bet long bikpela haus sik long Valley Forge, Phoenixville, Pennsylvania long Amerika. Wanpela nes man i wok long sekim presa bilong blut bilong mi long olgeta 30 minit. Mi gat 20 krismas na mi wanpela soldia, na mi kisim bikpela sik. Dispela nes i gat bikpela krismas winim mi, na pes bilong em i soim olsem em i tingting planti. Taim presa bilong blut bilong mi i go daun, mi tokim em, “Ating yu no bin lukim wanpela man i dai long ai bilong yu, a?” Pes bilong em i senis, na em i tok, “Yes, mi no bin lukim wanpela man i dai long ai bilong mi.”

Mi pilim olsem mi no inap stap laip moa. Tasol hau na mi sik na mi stap long haus sik? Bai mi stori long sampela samting i kamap long laip bilong mi.

Mi kisim dispela sik taim mi wok olsem teknisen long rum bilong operetim ol sikman long taim bilong woa long Vietnam. Mi amamas long helpim ol sikman na ol soldia husat i kisim bagarap na mi gat laik tru long kamap dokta bilong operetim ol man. Mi go long Vietnam long Julai 1969. Wankain olsem ol i mekim long olgeta man i kam nupela, inap 1-pela wik ol i larim mi i stap tasol na bai bodi bilong mi inap lain long senis bilong taim na strong bilong san long dispela hap.

Bihain liklik long mi kirap wok long wanpela haus sik bilong operetim ol man long Mekong Delta, long Dong Tam, planti helikopta i bringim ol soldia husat i kisim bagarap. Mi sapotim tru kantri bilong mi na mi amamas long wok, olsem na mi laik kirap kwik long helpim ol soldia. Mipela i save redim ol soldia i kisim bagarap na bringim ol i go kwik long liklik rum insait long metal kontena i gat eakon long en, na operetim ol long dispela hap. Insait long dispela liklik rum, i gat dokta bilong mekim operesen, dokta bilong kilim i dai tingting, nes bilong givim ol tul em dokta bai yusim long katim man, na nes i stap olsem helpim bilong dokta. Olgeta i wok hat tru long helpim ol soldia long i stap laip. Mi lukim olsem sampela kago i stap insait long ol traipela blakpela beg na ol i stap insait yet long helikopta. Bihain, mi kisim save olsem ol dispela beg i gat ol hap hap bodi bilong ol soldia em bom i bagarapim. Em ol namba 1 samting mi lukim long ples em woa i kamap long en.

Taim mi yangpela yet, mi save long sampela tok i tru em ol Witnes Bilong Jehova i skulim ol man long en. Mama bilong mi i stadi long Baibel wantaim ol Witnes, tasol em i no kisim baptais. Mi save amamas long sindaun wantaim mama taim ol Witnes i stadi wantaim em. Wanpela taim, mi wantaim step-papa i abrusim wanpela Haus Kingdom. Mi askim papa, “Em wanem kain haus?” Em i tok, “No ken tru go klostu long ol dispela lain!” Mi save laikim na trastim tru step-papa bilong mi, olsem na mi bihainim tok bilong em. Dispela i mekim na mi no bung moa wantaim ol Witnes Bilong Jehova.

Taim mi lusim Vietnam, mi pilim olsem mi nidim God long laip bilong mi. Tingting bilong mi i pulap tasol long ol samting i mekim mi bel hevi tru. I luk olsem i no gat man i kliagut long ol samting i wok long kamap long Vietnam. Mi tingim ol protes mats i kamap na ol manmeri i kolim ol soldia bilong Amerika olsem lain bilong kilim i dai ol bebi, long wanem, ol ripot i stori olsem ol soldia i kilim i dai planti pikinini long taim bilong woa.

Mi go long kain kain lotu bilong inapim laik bilong mi long save long God. Mi laikim tru God, tasol mi no amamas long ol samting ol lotu i mekim. Bihain, mi go long wanpela Haus Kingdom bilong Ol Witnes Bilong Jehova long Delray Beach, Florida. Em long wanpela Sande long Februeri 1971.

Taim mi go insait long Haus Kingdom, pablik tok i laik pinis, olsem na mi stap long miting bilong Wastaua stadi. Mi no inap tingim samting em dispela stadi i stori long en, tasol mi inap tingim ol liklik pikinini i wok long opim Baibel long painim ol skripsa. Mi kirap nogut taim mi lukim ol pikinini i mekim olsem! Mi sindaun isi tasol na lukluk long ol na putim yau. Taim mi laik lusim Haus Kingdom, wanpela brata i gat 80 krismas samting i kam toktok long mi. Nem bilong em Jim Gardner. Em i soim mi buk, Tok i Tru i Bringim Man Long Laip Oltaim, na askim olsem, “Yu amamas long kisim dispela buk?” Mipela i pasim tok long kirapim fes Baibel stadi long Fonde moning.

Long dispela Sande nait, mi go wok. Mi wok long imejensi rum bilong wanpela praivet haus sik long Boca Raton, Florida. Mi save wok long 11 klok long nait i go inap long 7 klok long moning. I no gat planti nois long nait, olsem na mi ritim buk Tok i Tru. Wanpela nes i kam pulim buk long han bilong mi na em i lukluk long fran pes bilong buk na i singaut olsem, “Yu laik kamap wanpela bilong ol, a?” Mi pulim buk na mi tok, “Mi ritim yet dispela buk, tasol i luk olsem mi bai kamap wanpela bilong ol!” Dispela nes i lusim mi, na mi ritim buk olgeta long dispela nait.

Long namba 1 taim mi kirap stadi wantaim Brata Gardner, mi askim olsem, “Bai yumi stadi long wanem samting?” Em i tok, “Yumi bai stadi long buk mi bin givim long yu.” Mi tokim em, “Mi ritim pinis dispela buk.” Brata Gardner i tok, “Orait, yumi ken skelim namba 1 sapta.” Mi kirap nogut long planti samting mi no bin save long en. Em i kirapim mi long skelim planti skripsa long Baibel bilong mi, em King James Version. Nau mi wok long kisim save long God tru, em Jehova. Taim mi laik toktok long Brata Gardner, mi save kolim em Jim. Long dispela moning, Jim i yusim buk Tok i Tru long stadi wantaim mi, na mipela i stadi long 3-pela sapta olgeta. Long olgeta Fonde moning, mipela i save stadi long 3-pela sapta. Mi save amamas tru long ol dispela stadi. Mi pilim olsem mi kisim gutpela blesing tru—brata husat i stadi wantaim mi, em i wanpela Kristen God i bin makim na em i save gut long Charles T. Russell!

Sampela wik bihain, mi kamap pablisa na mi inap i go autim gutnius. Jim i helpim mi long planti samting, na em i helpim mi tu long sait bilong i go long ol haus bilong ol man na autim tok. (Apo. 20:20) Jim i save wok wantaim mi, na kirap long dispela taim mi laikim wok autim tok. Mi tingim yet wok autim tok olsem gutpela wok tru mi inap mekim. Mi amamas tru long i stap olsem wanwok bilong God!—1 Kor. 3:9.

Nau bai mi stori long wanpela spesel samting i kamap long laip bilong mi—namba 1 taim mi kirap long laikim Jehova. (Rev. 2:4) Mi laikim tru Jehova, olsem na dispela i daunim bel hevi bilong mi long planti samting na ol samting i kamap long taim bilong woa.—Ais. 65:17.

Mi tingim bek wanpela spesel samting i kamap long mi long 1971. Ol i rausim mi long haus em papamama i bin givim tok orait long mi stap long en. Step-papa bilong mi i no laik bai wanpela Witnes Bilong Jehova i stap long banis bilong em! Mi no gat planti mani. Mi wok yet long haus sik na haus sik i save baim mi bihain long olgeta 2-pela wik. Mi tromoi bikpela mani long baim ol gutpela klos na bai mi inap mekim wok autim tok na stap gutpela mausman bilong Jehova. Mi bin seivim sampela mani, tasol dispela mani i stap long wanpela benk long Michigan, em taun mi kamap bikpela long en. Olsem na inap sampela de, mi yusim kar bilong mi olsem haus. Taim mi laik sevim mausgras na yusim toilet, mi save yusim ol toilet i stap long ol sevis stesin.

Taim mi yusim kar olsem haus, wanpela taim mi go kamap long Haus Kingdom sampela aua paslain long ol bratasista i kam long bung bilong autim tok. Mi pinis wok stret long haus sik na mi kam. Mi sindaun long baksait bilong Haus Kingdom we i no gat man inap lukim mi. Mi tingim bek ol samting nogut i kamap long Vietnam—mi tingim smel bilong bodi bilong man em paia i kukim na mi piksaim blut bilong man na ol hap bodi bilong man i stap nabaut—na dispela i bagarapim tru bel bilong mi. Mi inap piksaim ol yangpela man i krai na askim mi olsem, “Bai mi stap laip o bai mi dai? Bai mi stap laip o bai mi dai?” Mi save olsem ol bai i dai, tasol mi strong long pasim aiwara bilong mi na mi traim bes tru long mekim gut bel bilong ol. Mi sindaun na aiwara tasol i pundaun.

Mi beten na aiwara i pundaun. (Sng. 56:8) Mi kirap long tingim tingim tok promis bilong kirap bek. Mi pilim tru olsem long rot bilong kirap bek, God Jehova bai pinisim tru olgeta hevi mi bin lukim, na tu, em bai pinisim olgeta bel hevi bilong mi na ol narapela. God bai kirapim bek ol dispela yangpela man na ol bai i gat rot long kisim save long tok i tru na save long God. (Apo. 24:15) Dispela i kirapim mi long laikim tru Jehova long bel olgeta. Mi no inap lusim tingting long ol samting i kamap long dispela de. Kirap long dispela taim na i kam inap long nau, long olgeta taim hevi i painim mi, mi save wok strong tru bai mi no ken lusim pasin bilong mi long laikim Jehova olsem long namba 1 taim.

Long taim bilong woa, ol man i mekim ol pasin i nogut tru. Mi tu i bin mekim olsem. Tasol mi tingim tingim 2-pela skripsa mi laikim tumas, na dispela i helpim mi. Namba 1 skripsa em Revelesen 12:10, 11. Dispela skripsa i kamapim olsem tok yumi autim na blut bilong Pikinini Sipsip i gat strong long daunim Satan na winim em. Namba 2 skripsa em Galesia 2:20. Dispela ves i helpim mi long luksave olsem Krais Jisas i dai “bilong helpim mi.” Blut bilong Jisas i opim rot long Jehova inap fogivim ol rong bilong mi. Dispela i mekim na bel bilong mi i no gat tok na mi wok strong long helpim ol narapela long kisim stretpela save long Jehova, em God bilong marimari!—Hib. 9:14.

Taim mi tingim bek ol samting i kamap long laip bilong mi, mi tenkyu tru olsem oltaim Jehova i lukautim mi. Taim Jim i painimaut olsem mi yusim kar olsem haus, em i tokim mi long wanpela sista i gat rent haus. Mi bilip tru olsem Jehova i yusim Jim na dispela sista long givim wanpela gutpela hap mi inap i stap long en. Jehova i gat bikpela pasin helpim! Em i save lukautim gut ol man i lotuim em.

Long Me 1971, mi mas i go long Michigan long mekim sampela wok. Taim mi laik lusim Delray Beach Kongrigesen long Florida, mi pulimapim litresa long kar na bihainim Interstate 75, em bikpela haiwe i go long hap not. Taim mi kamap long Georgia, mi tilim olgeta litresa. Mi givim bel tru long autim gutnius bilong Kingdom long olgeta kain hap. Mi go visitim ol banis kalabus na mi tilim nius tu long ol man mi bungim long ol toilet. Mi tingim yet ol manmeri mi bin autim tok long ol, na mi laik save olsem ol i kisim tok i tru, o nogat.—1 Kor. 3:6, 7.

Mi mas tokaut olsem, taim mi kisim save long tok i tru long namba 1 taim, mi no save bihainim tumas savetingting taim mi autim tok long ol wanblut. Mi laikim tumas Jehova, olsem na taim mi autim tok long ol, mi save tok strong na tok stret long ol. Mi laikim tru ol brata bilong mi, John na Ron, na mi save fosim ol long putim yau taim mi autim tok long ol. Bihain, mi tok sori long ol. Tasol olgeta taim mi save beten yet olsem ol bai kisim tok i tru. Kirap long dispela taim, Jehova i skulim mi na mi bihainim savetingting taim mi autim tok na skulim ol man.—Kol. 4:6.

Mi tingim tru pasin bilong mi long laikim Jehova na mi tingim tu ol narapela mi save laikim. Na tu, mi laikim naispela meri bilong mi Susan. Mi save olsem mi laikim wanpela poroman husat inap helpim mi long mekim wok bilong Kingdom. Susan i gat strongpela bilip na em i save tingim tru wok bilong God. Mi inap tingim yet wanpela taim mi go visitim em taim mitupela i stap pren. Susan i sindaun long veranda long fran bilong haus bilong papamama bilong em long Cranston, long Rhode Island. Em i ritim Wastaua na skelim tok bilong en long Baibel. Mi kirap nogut long lukim olsem em i ritim wanpela bilong ol atikol we i no bilong kongrigesen long stadi long en, na em i skelim ol skripsa long Baibel. Mi kisim tingting olsem, ‘Dispela meri i tingim tru Tok Bilong God!’ Mitupela i marit long Disemba 1971, na mi amamas tru olsem oltaim em i save sambai long mi na helpim mi. Mi laikim em tru, long wanem, em i laikim mi, tasol em i laikim Jehova moa yet.

Mitupela Susan i gat 2-pela pikinini man, em Jesse na Paul. Taim ol i kamap bikpela, Jehova i stap wantaim ol. (1 Sml. 3:19) Ol yet i mekim disisen long bihainim tok i tru, olsem na ol i givim biknem long mitupela Susan. Ol i mekim yet wok bilong Jehova, long wanem, ol i tingim namba 1 taim ol yet i kirap long laikim Jehova. Tupela wantaim i insait long fultaim sevis winim 20 yia. Na tu, mi amamas tru long 2-pela tambu pikinini meri bilong mi, em Stephanie na Racquel, na mi tingim ol olsem ol pikinini meri bilong mi yet. Tupela pikinini man bilong mi i maritim ol meri husat i laikim tru God Jehova long bel olgeta na laip olgeta bilong ol.—Efe. 6:6.

Bihain long mi kisim baptais, mi stap long Rhode Island na mekim wok bilong God inap 16 yia, na mi kisim ol gutpela pren long dispela hap. Mi gat planti memori long ol gutpela elda husat i bin wok wantaim mi. Na tu, mi amamas tru long ol wasman raun, na planti bilong ol i stap olsem ol gutpela piksa na pasin bilong ol i bin stiaim mi. Em gutpela blesing tru long wok wantaim ol man husat i holim yet pasin bilong ol long laikim Jehova olsem ol i bin mekim long namba 1 taim! Long 1987, mipela i go long North Carolina long helpim wok long ol hap i sot tru long ol pablisa, na long dispela hap tu mipela i kisim planti gutpela pren.a

Long Ogas 2002, mi na Susan i kisim invatesen na mitupela i go joinim famili Betel long Patterson, Amerika. Mi wok long Sevis Dipatmen, na Susan i wok long londri. Em i laikim tru asainmen bilong em! Long Ogas 2005, ol i invaitim mi long kamap memba bilong Gavening Bodi. Mi pilim olsem mi no gutpela tumas long mekim dispela wok. Meri bilong mi i pilim olsem dispela wok i bikpela tru na mipela bai i gat wok long raun planti taim. Susan i no save amamas tumas long flai long balus, tasol planti taim mipela i mekim olsem! Susan i tok, ol meri bilong ol narapela memba bilong Gavening Bodi i mekim ol gutpela tok na dispela i strongim tingting bilong em long sambai long mi long olgeta taim. Mi laikim em tumas long dispela gutpela pasin bilong em.

Ofis bilong mi i gat planti piksa bilong ol lain mi laikim tru! Ol i helpim mi long tingim ol gutpela samting i kamap long laip bilong mi. Mi kisim pinis planti gutpela blesing, long wanem, mi bin wok strong long tingim pasin bilong mi long laikim Jehova wankain olsem mi bin mekim long namba 1 taim!