Wan Handret Yia Bilong Kingdom!

 1. Wanem samting i stap nambawan samting long laip bilong Jisas?

OLGETA taim Jisas i amamas long stori long ol man long Kingdom Bilong God. Baibel i stori olsem Jisas i toktok long Kingdom planti taim moa winim olgeta narapela samting—winim 100 taim em i stori long Kingdom taim em i autim tok. Kingdom i stap nambawan samting long laip bilong Jisas.—Ritim Matyu 12:34.

 2. (a) Hamas manmeri i bung taim Jisas i tokim ol long mekim wok em Matyu 28:19, 20 i stori long en? (b) Bilong wanem yumi inap tok olsem?

² Bihain liklik long Jisas i kirap bek, winim 500 manmeri i bung na Jisas i go toktok wantaim ol. (1 Kor. 15:6) Ating long dispela taim em i tokim ol manmeri long autim tok bilong Kingdom long “olgeta lain man”—em bikpela wok tru!a Jisas i tok profet olsem ol disaipel bai mekim dispela wok “i go inap long pinis bilong dispela taim,” na tru tumas ol i mekim olsem. Ating yu tu i insait long dispela wok na truim tok profet bilong Jisas.—Mat. 28:19, 20.

 3. God i givim wanem ol samting bilong redim yumi long autim gutnius?

³ Bihain long Jisas i tokim ol disaipel long autim tok, em i promisim ol olsem: “Mi stap wantaim yupela.” (Mat. 28:20) Olsem na Jisas yet bai stiaim wok autim tok i kamap long olgeta hap. God i givim “olgeta gutpela samting” bilong redim yumi long mekim gut dispela wok. (Hib. 13:20, 21) Long dispela stadi, yumi bai skelim 3-pela samting em i bin givim. Namba 1: Ol tul bilong autim tok. Namba 2: Ol rot bilong autim tok. Namba 3: Ol skul bilong givim trening. Pastaim, yumi ken stori long ol tul yumi bin yusim insait long 100 yia i go pinis.

 4. Bilong wanem yumi yusim kain kain tul long mekim wok autim tok?

⁴ Jisas i tok piksa olsem “tok bilong Kingdom” i olsem sid ol i planim long kain kain graun. (Mat. 13:18, 19) Man bilong wokim gaden bai yusim kain kain tul long redim graun bilong planim sid. Olsem tasol, inap planti yia nau King i givim ol tul yumi nidim long redim bel bilong planti milion manmeri long harim tok bilong Kingdom. Lain bilong yumi i bin yusim sampela tul inap 10-pela yia samting na ol i no yusim moa, tasol sampela tul i stap yet na yumi yusim long nau. Tasol olgeta dispela tul i helpim yumi long kisim pasin bilong mekim gut wok autim tok.

 5. (a) Ol pablisa i yusim wanem kain kat long mekim wok autim tok? (b) Olsem wanem ol i yusim dispela kat?

⁵ Long 1933, ol pablisa i kirap long yusim wanpela kat i gat ol tok bilong Baibel long en. Ol i kolim dispela kat olsem “testimoni kat,” na em i helpim planti pablisa taim ol i kirap nupela long autim tok. Longpela bilong en inap olsem 12 sentimita, na braitpela bilong en inap olsem 7 sentimita, na ol i raitim sotpela hap tok bilong Baibel antap long en. Sampela taim, ol pablisa i save kisim nupela kat bilong yusim long mekim wok autim tok. I no hatwok long yusim dispela kat! Brata C. W. Erlenmeyer i gat 10-pela krismas taim em i kirap nupela long yusim dispela kat. Em i tok: “Mipela i save tokim ol man olsem, ‘Plis inap yu ritim dispela kat?’ Bihain long man i ritim kat, mipela i save tilim ol nius long em na lusim em.”

 6. Olsem wanem kat bilong autim tok i helpim ol pablisa?

⁶ I gat planti rot bilong yusim dispela kat. Sampela pablisa i gat bikpela laik tru long mekim wok autim tok, tasol ol i sem na ol i no save long tok ol bai mekim. Sampela i laik mekim planti toktok. Insait long sampela minit tasol, ol i save tokim man long olgeta samting ol i save long en, tasol sampela taim ol i no save bihainim stretpela rot bilong autim tok! Tasol kat bilong autim tok i gat sotpela tok em man inap ritim, na i no gat wok long pablisa i toktok.

 7. Sampela pablisa i bungim wanem ol hevi taim ol i yusim kat long mekim wok autim tok?

⁷ Dispela rot bilong autim tok i gat ol hatwok bilong en. Grace A. Estep em wanpela sista i stap longpela taim long tok i tru, na em i tok: “Sampela taim ol man i askim mipela olsem, ‘Dispela kat i tok wanem? Inap yu tokim mi?’” Tasol sampela man i no save long rit, olsem na ol i no inap ritim tok i stap long dispela kat. Sampela i ting ol pablisa i givim dispela kat long ol, olsem na ol i save kisim na pasim dua. Sapos man i birua long lain bilong yumi, em i save brukim dispela kat. Maski i olsem, ol brata i lain long i go toktok wantaim ol manmeri na kamapim klia long ol olsem ol i wokman bilong Kingdom.

 8. Olsem wanem masin pikap i helpim ol pablisa long mekim wok autim tok? (Lukim piksa long kirap bilong stadi.)

⁸ Long ol yia namel long 1930 na 1945, ol brata i yusim masin pikap long autim tok. Sampela brata i kolim nem bilong dispela masin olsem Aaron bikos dispela masin i makim maus bilong pablisa na autim tok. (Ritim Kisim Bek 4:14-16.) Sapos man i tok orait, pablisa i save pilaim rekoding bilong wanpela tok bilong Baibel, na rekoding em longpela inap 4 na hap minit, na bihain pablisa i save tilim sampela nius long man. Sampela taim, famili olgeta i bung na harim rekoding! Long 1934, Was Taua Sosaiti i stat long wokim ol masin pikap we ol pablisa inap karim raun wantaim ol long mekim wok autim tok. Isi isi ol i redim 92 rekoding i stori long narapela narapela tok.

 9. Olsem wanem masin pikap i helpim wok autim tok?

⁹ Hillary Goslin em wanpela man husat i harim tok ol i bin pilaim long masin pikap. Bihain long em i harim tok, em i askim pablisa long lusim masin pikap wantaim em bambai em inap pilaim rekoding na helpim ol neiba bilong em long kisim save long tok bilong Kingdom. Taim pablisa i go lukim em, pablisa i luksave olsem sampela man i laik kisim sampela save moa na ol i wetim em. Bihain, sampela bilong ol dispela manmeri i dediketim laip bilong ol long Jehova. Na tu, 2-pela pikinini meri bilong Hillary i go long Skul Gileat na ol i kisim asainmen long mekim wok misineri long narapela kantri. Wankain olsem kat bilong autim tok, masin pikap tu i helpim planti manmeri long kirap long mekim wok autim tok. Bihain, King bai yusim Skul Tiokratik Bilong Autim Tok long putim ol tok long maus bilong ol pablisa.

10, 11. (a) Olsem wanem ol brata i yusim ol niuspepa na redio long autim tok i tru bilong Baibel? (b) Bilong wanem niuspepa na redio em gutpela rot bilong autim tok?

¹⁰ King i stiaim ol manmeri bilong God na ol i yusim kain kain rot long autim gutnius long planti man moa long olgeta hap. Ol dispela rot i helpim ol long mekim gut wok autim tok insait long haptaim we “i no gat planti wokman.” (Ritim Matyu 9:37.) Bihain tasol long yia 1900, ol i yusim ol niuspepa long autim tok long planti man moa long ol hap i no gat planti wokman bilong Jehova. Long olgeta wik, taim Charles Taze Russell i mekim wanpela tok, em i save yusim telegraf long salim tok i go long wanpela kampani bilong wokim niuspepa. Long dispela rot, kampani i save prinim tok bilong Brata Russell long niuspepa na salim i go long Amerika, Kanada, na Yurop. Kirap long 1900 i go inap long 1913, inap olsem 15 milion manmeri i ritim tok bilong Brata Russell long 2 tausen narapela narapela niuspepa!

¹¹ Bihain long taim Brata Russell i dai, ol i bihainim narapela gutpela rot long autim gutnius. Long Epril 16, 1922, em namba 1 taim bilong Joseph F. Rutherford long i go long redio stesin na mekim tok bilong em, na 50 tausen manmeri inap harim dispela tok. Long Februeri 24, 1924, oganaisesen i kamapim namba 1 redio stesin, em WBBR. Was Taua (long tok Inglis) bilong Disemba 1, 1924 i stori long pasin bilong yusim redio long autim tok, na Was Taua i tok: “Mipela i bilip olsem redio bai opim rot long planti manmeri moa inap harim tok i tru, na mipela i no inap tromoi bikpela mani.” Wankain olsem niuspepa, redio i helpim planti manmeri moa long harim tok i tru, em ol manmeri i stap long ol hap i no gat planti pablisa long en.

12. (a) Yu amamas moa long bihainim wanem ol rot bilong autim tok? (b) Wanem samting inap helpim yumi long daunim pret taim yumi autim tok long pablik ples?

¹² Long nau, oganaisesen i kirapim yumi long wok strong moa long autim tok long pablik ples: bas stop, ples bilong putim ol kar, ples bung, na maket. Sapos yu pret taim yu autim tok long ol kain hap olsem, orait beten na skelim tok bilong wanpela brata i mekim wok wasman raun inap planti yia, em Angelo Manera. Em i tok: “Mipela i tingim olgeta nupela rot bilong autim tok olsem narapela wei bilong mekim wok bilong Jehova, na em narapela rot bilong soim olsem mipela i stap gut long em, na mipela i redi tasol long mekim olgeta samting em i tokim mipela long mekim.” Sapos yumi bihainim nupela rot bilong autim tok maski yumi pret liklik, dispela bai strongim bilip bilong yumi na yumi bai trastim Jehova moa yet, na pas gut moa wantaim Em.—Ritim 2 Korin 12:9, 10.

13. (a) Olsem wanem Web-sait bilong yumi i helpim wok autim tok? (b) Stori long ekspiriens yu kisim taim yu stiaim ol man long lukim Web-sait bilong yumi.

¹³ Planti pablisa i amamas long tokim ol manmeri long web-sait bilong yumi, jw.org, na tokim ol long daunlodim ol litresa na ritim long winim 7 handret tokples. Long olgeta wan wan de, winim 1.6 milion manmeri i save lukim web-sait bilong yumi. Wankain olsem redio i helpim wok autim tok long bipo, long nau web-sait bilong yumi i helpim planti manmeri moa long kisim save long gutnius maski ol i stap longwe long taun.

14. (a) Ol pablisa bilong Kingdom i nidim wanem kain trening? (b) Wanem skul i helpim ol long mekim gut wok tisa?

¹⁴ Yumi stori pinis long sampela tul na ol rot bilong autim gutnius. Tasol yumi kisim wanem trening? Bai yu mekim wanem sapos man i no amamas long tok em i harim long masin pikap o sapos em i soim olsem em i laikim ol tok i stap long kat bilong autim tok? Pablisa i mas save long olsem wanem em inap stretim tingting bilong man i sutim tok long yumi, na skulim ol man i gat gutpela bel. Spirit bilong God i kirapim Nathan H. Knorr long luksave olsem ol i mas trenim ol pablisa long kisim pasin bilong toktok wantaim ol man taim ol i autim tok. Orait, hau bai ol i givim trening long ol pablisa? Kirap long 1943, ol i stretim rot long olgeta kongrigesen bai i gat Skul Tiokratik Bilong Autim Tok. Dispela skul i helpim yumi long mekim gut wok tisa.

15. (a) Sampela i pilim olsem wanem taim ol i insait long Skul Tiokratik Bilong Autim Tok? (b) Wanem samting i helpim yu long luksave olsem Jehova i truim tok promis bilong em long Song 32:8?

¹⁵ Planti bratasista i pret long toktok long ai bilong planti man, olsem na sampela haptaim i lus paslain long ol i lain long mekim olsem. Brata Julio S. Ramu i tingim bek namba 1 tok bilong em long 1944. Em i kisim asainmen long stori long wanpela man, nem bilong em Doek—5-pela ves tasol long Baibel i stori long em! Julio i tok: “Tupela lek bilong mi i guria nogut tru, ol han bilong mi i seksek, na maus bilong mi i guria.” Julio i tok moa olsem, em i yusim ol dispela 5-pela ves tasol long mekim tok bilong em. Em i tok: “Mi mekim tok bilong mi insait long 3-pela minit. Dispela em namba 1 taim bilong mi long mekim tok long pletfom, tasol mi no givap.” Ol pikinini tu i joinim dispela skul, maski sampela bilong ol i hatwok long mekim tok long ai bilong planti manmeri long kongrigesen. Angelo Manera, em yumi stori pinis long em, em i tingim bek wanpela yangpela husat i bin mekim namba 1 tok bilong em taim em i kirap long i go long skul. Angelo i tok: “Dispela yangpela i pret nogut tru, olsem na em i krai taim em i stat long toktok. Tasol em i tingting strong long mekim dispela tok, olsem na em i krai wantaim na mekim dispela tok i go inap long em i pinisim tok bilong em.” Olsem wanem? Yu pret long bekim tok long miting o insait long ol narapela hap bilong miting, long wanem, yu pilim sem o sampela samting i pasim yu? Askim Jehova long helpim yu long daunim pasin bilong pret. Yu bai luksave olsem God bai helpim yu wankain olsem em i bin helpim ol sumatin em ol i fes lain long insait long Skul Tiokratik Bilong Autim Tok long bipo.—Ritim Song 32:8.

16. (a) Husat lain i go long Skul Gileat long bipo? (b) Kirap long 2011, husat lain inap i go long Skul Gileat?

¹⁶ Ol manmeri bilong Jehova i kisim trening tu long ol narapela skul. Ol misineri na ol narapela i kisim bikpela helpim taim ol i go long Skul Gileat. Wanpela tisa bilong Skul Gileat i tok, dispela skul i bilong “kirapim ol sumatin long kisim strongpela laik bilong mekim wok autim tok.” Skul Gileat i kirap long 1943. Kirap long dispela taim na i kam inap long nau, winim 8,500 manmeri i bin i go long dispela skul. Ol misineri husat i go long dispela skul i mekim wok autim tok long 170 kantri. Kirap long 2011, ol lain i go long dispela skul em ol lain i stap pinis long fultaim sevis, em ol spesel painia, ol wasman raun, ol bratasista i wok long Betel, na ol misineri husat i no go yet long Skul Gileat.

17. Olsem wanem trening bilong Skul Gileat i helpim tru wok autim tok?

¹⁷ Olsem wanem dispela trening i helpim tru wok autim tok? Skelim dispela eksampel. Long Ogas 1949, namba bilong ol pablisa long Japan i aninit long 10. Long pinis bilong 1949, inap 13 misineri i givim bel tru long autim tok long Japan—ol dispela misineri i bin kisim trening long Skul Gileat. Long nau, namba bilong ol pablisa long Japan em inap olsem 216 tausen, na inap 42 pesen bilong ol i mekim wok painia!

18. Kolim nem bilong sampela moa skul we i helpim ol Witnes long kamap strong long bilip.

¹⁸ I gat ol narapela skul tu: Skul Bilong Wok Kingdom, Skul Bilong Wok Painia, Skul Bilong Ol Kingdom Evanselis, Skul Bilong Ol Wasman Sekit na Meri Bilong Ol, na Skul Bilong Ol Brens Komiti na Meri Bilong Ol. Ol dispela skul i strongim tru ol manmeri bilong Jehova long sait bilong bilip na em i helpim wok autim tok bilong ol long kamap gutpela moa. Dispela i soim klia olsem King i wok yet long trenim ol manmeri i stap daun long wok bos bilong em!

19. (a) Charles Taze Russell i tok wanem long sait bilong wok autim tok? (b) Olsem wanem tok bilong em i kamap tru?

¹⁹ Kingdom Bilong God i mekim wok inap 100 yia nau. Jisas Krais em King bilong yumi, na em i wok yet long trenim yumi. Long 1916, paslain liklik long Charles Taze Russell i dai, em i tok olsem wok autim tok bai i kamap bikpela tru long bihain. Em i toktok wantaim wanpela brata husat i wok gut wantaim em, na em i tok: “Wok autim tok i wok long i go bikpela hariap tru, na em bai i kamap bikpela moa yet, long wanem, yumi mas ‘autim gutnius bilong kingdom’ long olgeta hap bilong graun.” (Buk Faith on the March, em A. H. Macmillan i raitim, p. 69) Tok bilong em i stret olgeta! Yumi amamas tru olsem God bilong bel isi i wok yet long inapim yumi long mekim dispela gutpela wok! Em i givim yumi “olgeta gutpela samting” yumi nidim bilong mekim laik bilong em!