OL YANGPELA​—‘Mekim Olgeta Samting Bai God i Kisim Bek Yupela’

 1. Bilong wanem ol Kristen i mas kisim baptais? (Lukim piksa long kirap bilong stadi.)

LONG olgeta yia, planti tausen Baibel sumatin i kisim baptais. Planti bilong ol em ol yangpela husat i gat 9 i go 18 krismas samting. Ating sampela bilong ol i kamap bikpela long tok i tru. Olsem wanem? Yu wanpela bilong ol? Mipela i laik tok amamas long yu. Em i bikpela samting long ol Kristen i mas kisim baptais bikos dispela bai opim rot long God i ken kisim bek ol.—Mat. 28:19, 20; 1 Pita 3:21.

 2. Bilong wanem yu no ken pret o surik long dediket long God?

² Taim yu kisim baptais, dispela i opim rot long yu inap kisim planti blesing. Na tu, yu gat wok long truim dediket bilong yu. Taim yu kisim baptais, yu tok promis long mekim wanem? Long de bilong baptais, yu bin tok yes long dispela askim: “Long rot bilong ofa bilong Jisas Krais, yu hevi long ol sin yu bin mekim na yu tanim bel na yu dediket pinis long Jehova long bihainim laik bilong em?” Baptais i soim olsem yu dediket pinis long God. Dediket em strongpela promis yu mekim long Jehova olsem yu bai laikim em na putim laik bilong em i stap namba 1 samting long laip bilong yu. Yu mas wok strong long truim dispela tok promis. Olsem wanem? Yu gat tupela tingting long dediket bilong yu? Yu mekim gutpela disisen taim yu givim yu yet long Jehova. Man i lusim Jehova, em i stap aninit long wok bos bilong Satan. Satan i no laik bai God i kisim bek yu. Em bai amamas sapos yu bihainim em na sakim wok bos bilong Jehova na lus long kisim laip oltaim.

 3. Yu inap kisim wanem blesing taim yu dediket long Jehova?

³ Tingim ol blesing yu inap kisim taim yu dediket na kisim baptais olsem wanpela Kristen. Taim yu givim laip bilong yu long Jehova, orait yu ken bilip tru na tok olsem: “Bikpela i stap wantaim mi na mi no inap pret. Ol man i no inap mekim wanpela samting long mi.” (Sng. 118:6) Taim yu stap aninit long lukaut bilong God na em i orait long yu, dispela em nambawan blesing tru.

4, 5. (a) Olsem wanem yu inap truim dediket bilong yu? (b) Wanem ol hevi i save painim ol man i bikpela pinis na ol i kisim baptais?

⁴ Taim yu baptais na kamap wanpela Kristen, yu yet i gat wok long lukautim gut pasin pren bilong yu wantaim Jehova. Dispela i makim tu olsem, maski yu stap aninit long lukaut bilong papamama, yu mas mekim ol samting bilong truim tok promis bilong yu. Bilong wanem dispela em i bikpela samting? Yu no inap save long wanem ol hevi bai painim yu long bihain. Sapos yu kisim baptais taim yu gat 9 i go 12 krismas samting, yu bai karim hevi bilong ol narapela i putim presa long yu, na tingting na laik bilong yu bai senis taim yu kamap tineja. Wanpela sista i gat 18 krismas i tok: “Pikinini i no inap bel hevi olsem em i wanpela Witnes Bilong Jehova na em i no inap kaikai betde keik long skul. Tasol bihain long sampela yia, em inap kisim strongpela laik bilong mekim maritpasin. Olsem na em i bikpela samting long em i mas bilip tru olsem pasin bilong bihainim ol lo bilong Jehova bai lukautim em.”

⁵ Planti yangpela i save bungim kain kain hevi. Na tu, ol lain i bikpela pinis na ol i kisim baptais, planti hevi bai traim bilip bilong ol. Sampela bilong ol dispela traim em ol hevi insait long marit, hevi bilong sik, na wok mani. Maski yumi gat narapela narapela krismas, ol hevi bai painim yumi na traim pasin bilong yumi long i stap gut long Jehova.—Jems 1:12-14.

 6. (a) Yu inap mekim wanem bilong soim olsem yu laik truim promis yu mekim long Jehova? (b) Yu kisim wanem skul long tok i stap long Filipai 4:11-13?

⁶ Yu mas tingim olsem yu gat wok long truim tok promis yu mekim long Jehova, na dispela bai helpim yu long stap gut long bilip maski hevi i painim yu. Yu bin mekim tok promis long King bilong heven na graun olsem yu bai mekim yet wok bilong em maski ol pren o papamama i givim baksait long Em. (Sng. 27:10) Taim ol hevi i painim yu, yu ken beten askim Jehova long helpim yu bambai yu inap sanap strong na truim dediket bilong yu.—Ritim Filipai 4:11-13.

 7. Olsem wanem yumi inap soim olsem yumi “pret na guria” na mekim ol samting bilong God i kisim bek yumi?

⁷ Jehova i laik bai yu kamap pren bilong em. Tasol yu yet i mas wok strong long lukautim gut pasin pren bilong yu wantaim God, na mekim ol samting bilong em i kisim bek yu. Filipai 2:12 i tok: “Wok long mekim olgeta samting yupela inap long mekim bai God i ken kisim bek yupela, na yupela i mas mekim wantaim pret na guria.” Dispela tok i makim olsem yu mas skelim gut olsem wanem yu inap lukautim gut pasin pren bilong yu wantaim Jehova na stap gut long em taim hevi i painim yu. Yu no ken bilip long save bilong yu yet. Sampela wokman bilong God husat i mekim wok bilong em inap longpela taim, ol i lusim em. Kain hevi olsem inap painim yu, olsem na yu inap mekim wanem bilong God i ken kisim bek yu?

 8. (a) Pasin bilong stadi long Baibel i makim wanem samting? (b) Bilong wanem yu mas stadi long Baibel?

⁸ Pasin bilong i stap pren bilong Jehova i makim olsem yumi mas toktok wantaim em, na putim yau taim em i toktok long yumi. Taim yumi stadi long Baibel, dispela em namba 1 rot bilong yumi ken putim yau long Jehova. Pasin bilong stadi long Baibel i makim olsem yumi mas ritim Baibel na ol pablikesen bilong Baibel, na tingim tingim ol tok yumi ritim. Tasol dispela i no wankain olsem skul bilong dispela graun. Ol man i go long skul i tingim ol tok ol i lainim bambai ol i ken winim tes long skul. Tasol pasin bilong stadi gut long Baibel i olsem yu go raun long ol nupela ples na painimaut ol gutpela samting, em ol gutpela pasin bilong Jehova. Dispela bai helpim yu long i go klostu long God, na em bai i kam klostu long yu.—Jems 4:8.

 9. Wanem ol tul inap helpim yu long stadi gut long Baibel?

⁹ Oganaisesen bilong Jehova i kamapim planti tul we inap helpim yumi long stadi gut long Baibel. Olsem, long jw.org aninit long het tok “Teenagers,” dispela seksen “Bible Study Activities” inap helpim yu long kisim gutpela skul long ol stori bilong Baibel. Na tu, ol stadi atikol “Tru Tru Baibel i Tok Wanem?” long tok Inglis inap strongim bilip bilong yu. Ol dispela atikol inap helpim yu long stori gut long bilip bilong yu long ol narapela. Yu inap kisim helpim tu long atikol “Young People Ask . . . How Can I Make Bible Reading Enjoyable?” long Awake! bilong April 2009. Pasin bilong stadi na tingim tingim ol tok yu ritim inap helpim yu long mekim ol samting na God i ken kisim bek yu.—Ritim Buk Song 119:105.

10. Bilong wanem em i bikpela samting long Kristen i mas beten?

¹⁰ Long rot bilong stadi long Baibel, yumi inap putim yau long ol tok bilong Jehova, na long rot bilong beten, yumi inap toktok long em. Ol Kristen i no ken tingim beten olsem samting nating, o tingim beten olsem wanpela rot bilong helpim ol long mekim gut wok. Yumi mas tingim olsem beten em i rot bilong yumi long toktok wantaim Krieta bilong yumi. Jehova i laik bai yu toktok long em. (Ritim Filipai 4:6.) Taim yu bungim hevi na yu tingting planti, yu mas bihainim tok bilong Baibel. Em i tok: “Olgeta hevi yu karim, em yu mas putim long han bilong Bikpela.” (Sng. 55:22) Olsem wanem? Yu bilip long dispela tok? Planti milion bratasista i lukim truim bilong dispela ves, na ol inap helpim yu long bilipim dispela tok. Dispela ves inap helpim yu!

11. Bilong wanem yu mas tok tenkyu long Jehova long olgeta taim?

¹¹ Beten i opim rot long yu inap askim Jehova long helpim yu, na tu, yu inap tok tenkyu long em. Baibel i tok: “Yupela i mas kamapim tenkyu bilong yupela.” (Kol. 3:15) Sampela taim ol hevi i daunim tru yumi na yumi no luksave long ol blesing yumi kisim. Long olgeta de, yu ken tingim 3-pela blesing yu kisim, na beten long Jehova na tok tenkyu long dispela. Abigail i kisim baptais taim em i gat 12 krismas, na em i tok: “Mi pilim olsem Jehova em nambawan man yumi mas tok tenkyu long em, winim olgeta lain i stap long heven na long graun. Oltaim yumi mas tok tenkyu long em long ol gutpela presen em i givim long yumi. Mi tingim wanpela gutpela skultok: Sapos yumi kirap long tumora na yumi tok tenkyu long Jehova long ol samting yumi kisim long dispela de, yumi bai pilim olsem yumi gat olgeta samting yumi nidim.”a

12, 13. Olsem wanem Jehova i mekim gut long yu?

¹² King Devit bilong bipo i luksave long olsem wanem God i lukautim em taim em i karim planti hevi. Olsem na em i tok: “Bikpela i save mekim gutpela pasin long yumi. Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru.” (Sng. 34:8) Dispela ves i kamapim klia olsem yumi inap kisim skul long stori bilong ol bilip manmeri long bipo. Taim yu ritim Baibel, ol pablikesen bilong yumi, na go long ol miting Kristen, yu bai harim ol gutpela ekspiriens long olsem wanem God i helpim ol narapela wanbilip taim hevi i painim ol. Taim yu wok long kamap strong long bilip, yu yet i mas luksave long olsem wanem Jehova i lukautim yu. Olsem wanem? Yu bin traim na lukim olsem Jehova i gutpela?

¹³ Wanpela rot em olgeta Kristen i traim na lukim olsem Jehova i gutpela em olsem, ol i bihainim dispela singaut bilong i go klostu long God na Pikinini bilong em. Jisas i tok: “I no gat man inap kam long mi sapos Papa, husat i bin salim mi i kam, i no kirapim em long kam long mi.” (Jon 6:44) Olsem wanem? Dispela tok i stret long yu? Wanpela yangpela inap kisim kain tingting olsem, ‘Jehova i kirapim papamama long i go long em, na mi bihainim ol tasol.’ Taim yu dediket long Jehova na kisim baptais, yu kamapim klia olsem yu pas gut wantaim em, na dispela em wanpela gutpela blesing. Nau God i save gut long yu. Baibel i tok: “Sapos man i laikim tumas God, orait God i save long em.” (1 Kor. 8:3) Oltaim yu mas wok strong long tingim gutpela blesing yu kisim taim yu stap insait long oganaisesen bilong Jehova.

14, 15. Olsem wanem wok autim tok inap strongim bilip bilong yu?

¹⁴ Taim yu autim bilip bilong yu long ol narapela na yu luksave olsem Jehova i sambai long yu, dispela i makim olsem yu traim na lukim olsem Jehova i gutpela. Yu inap autim bilip bilong yu taim yu autim tok long ol haus, na long taim yu stap long skul. Sampela yangpela i pilim hatwok long autim tok long ol wanskul. Ating ol i gat tupela tingting long ol narapela bai i gat wanem tingting long tok ol i autim. Na tu, ol i pilim hatwok long autim tok long planti wanskul, tasol em isi moa long ol i autim tok taim wanpela i stap em yet. Wanem samting inap helpim ol yangpela?

¹⁵ Pastaim, yu mas skelim gut risen na yu gat strongpela bilip. Sapos ol stadi atikol long jw.org i stap long tokples bilong yu na yu no kliagut, orait lusim sampela haptaim long skelim ol dispela atikol. Ol dispela atikol bai helpim yu long skelim bilip bilong yu, risen na yu bilip, na olsem wanem yu inap stori long bilip bilong yu long ol narapela. Taim yu kliagut long samting yu bilip long en na yu redi gut, dispela bai kirapim yu long autim nem bilong Jehova long ol narapela.—Jer. 20:8, 9.

16. Wanem samting inap helpim yu long daunim pasin bilong pret long autim bilip bilong yu?

¹⁶ Maski yu redi gut, yu inap pilim olsem yu hatwok long autim bilip bilong yu. Wanpela sista i gat 18 krismas na em i kisim baptais taim em i gat 13 krismas. Em i tok: “Mi save long samting mi bilip long en, tasol sampela taim mi hatwok long tokim ol narapela long bilip bilong mi.” Em i mekim wanem? Em i tok: “Mi save stori long ol narapela samting. Ol wanklas i save amamas long stori long ol samting ol i mekim. Mi bihainim wankain pasin. Taim mi stori wantaim ol, mi save mekim kain tok olsem, ‘Long asde mi wok long skulim wanpela long tok bilong Baibel, na . . . ’ Bihain mi pinisim stori bilong mi. Mi no save stori wantaim ol long ol tok bilong Baibel, tasol planti i laik save mi mekim wanem taim mi skulim ol narapela long Baibel. Sampela taim ol i askim mi long wok mi mekim. Mi bihainim dispela pasin inap planti taim, na mi amamas tru olsem gutpela samting i kamap!”

17. Olsem wanem pasin yu bihainim bai helpim yu long autim bilip bilong yu?

¹⁷ Sapos yu soim rispek long ol narapela na soim olsem yu tingim ol, ol tu bai mekim wankain pasin long yu. Olivia i gat 17 krismas na em i kisim baptais paslain long em i kamap tineja. Em i tok: “Mi save tingting planti olsem sapos mi kamapim tok bilong Baibel taim mi stori wantaim ol narapela, ol bai ting olsem mi strong long ol i mas bihainim bilip bilong mi.” Tasol bihain em i senisim tingting bilong em. Em i tok moa: “Planti yangpela i no save long ol Witnes Bilong Jehova ol i husat. Ol i save tasol long mipela ol pikinini Witnes. Olsem na pasin mipela i bihainim inap kirapim ol long putim yau o les long harim tok mipela i autim. Sapos yumi sem o pret long tokim ol narapela long bilip bilong yumi, ol bai ting olsem yumi no amamas long stap olsem ol Witnes. Na tu, ol inap mekim ol tok bilong bagarapim bel bilong yumi sapos yumi no strongim bel. Olsem na taim yumi stap isi na toktok gut wantaim ol long bilip bilong yumi, ol bai rispektim yumi.”

18. Yu ken mekim wanem bambai God i kisim bek yu?

¹⁸ Olsem yumi stori pinis, yumi yet i mas mekim ol samting na bai God i ken kisim bek yumi. Yu mas ritim Baibel na tingim tingim ol tok bilong en, beten long Jehova, na tingim ol rot em i blesim yu. Dispela bai strongim pasin pren bilong yu wantaim Jehova na kirapim yu long tokaut long bilip bilong yu.—Ritim Song 73:28.

19. Bilong wanem ol samting yu mekim bilong God i kisim bek yu i no lus nating?

¹⁹ Jisas i tok: “Sapos wanpela man i laik bihainim mi, orait em i mas givim baksait long ol laik bilong em yet na karim diwai pos bilong en na oltaim bihainim mi.” (Mat. 16:24) Sapos yumi laik stap olsem Kristen tru, yumi mas dediket na baptais, na bihainim pasin bilong Jisas long putim laik bilong God i stap namba 1. Dispela i opim rot long yumi inap kisim planti blesing long nau na kisim laip oltaim long nupela taim. Olsem na yu mas wok strong yet long mekim ol samting bambai God i kisim bek yu!