Hau Jehova Bai Lukautim Yu

 1. Wai na Jisas i askim Jehova long lukautim ol disaipel bilong em?

LONG laspela nait long laip bilong em olsem wanpela man, Jisas i tingting long ol hevi em ol disaipel bilong em bai karim. Em i laikim tru ol dispela pren bilong em, olsem na Jisas i askim Papa bilong em olsem, “mi ting long dispela man nogut na mi askim yu long lukautim ol.” (Jon 17:14, 15) Jisas i save olsem bihain long em i go bek long heven, Satan bai wok yet long pait long ol manmeri husat i laik lotuim Jehova. I klia tru olsem ol manmeri bilong Jehova bai nidim wanpela long lukautim ol.

 2. Wai na yumi ken bilip tru olsem Jehova bai bekim ol beten bilong yumi?

² Jehova i bin bekim beten bilong Jisas bikos em i laikim tru Pikinini bilong em. Sapos yumi traim bes long amamasim Jehova, em bai laikim yumi tu, na tu, em bai putim yau taim yumi beten askim em long helpim na lukautim yumi. Jehova i stap olsem gutpela Het bilong famili, olsem na em bai wok yet long lukautim gut ol pikinini bilong em. Em bai mekim olsem bikos em i tingim nem bilong em!

 3. Wai na yumi nidim Jehova long lukautim yumi long nau?

³ Yumi nidim Jehova long lukautim yumi long nau winim olgeta taim bipo. Jisas i rausim Satan long heven na tromoi em i kam daun, olsem na Satan “em i belhat nogut tru.” (Rev. 12:12) Satan i kirapim sampela man husat i mekim nogut long yumi long ting olsem “ol i mekim wok bilong God.” (Jon 16:2) Ol narapela husat i no bilip long God, ol i mekim nogut long yumi bikos yumi no insait long ol pasin bilong dispela graun. Maski wanem risen na ol i mekim nogut long yumi, yumi inap sanap strong long bilip. Wai? Bikos Baibel i tok: “Bikpela i save truim tok bilong em, na em bai mekim yupela i stap strong na em bai banisim yupela long dispela man nogut.” (2 Tes. 3:3) Olsem wanem Jehova i save lukautim yumi long nau? Yumi bai stori long 2-pela rot em i mekim olsem.

 4. Olsem Efesus 6:13-17 i kamapim, Jehova i givim wanem samting bilong lukautim yumi?

⁴ Jehova i givim yumi olgeta klos pait bilong lukautim yumi taim Satan i pait long yumi. (Ritim Efesus 6:13-17.) Dispela klos pait i strong tru na inap lukautim gut yumi! Tasol em inap lukautim gut yumi sapos yumi pasim olgeta wan wan hap bilong klos pait—na yumi no rausim ol. Wan wan hap bilong klos pait i makim wanem samting? Yumi ken stori long wan wan bilong ol.

 5. (a) Belt bilong tok i tru i makim wanem samting? (b) Wai na yumi mas pasim belt bilong tok i tru?

⁵ Belt bilong tok i tru i makim olgeta tok i tru i stap long Tok Bilong God, em Baibel. Wai na yumi mas pasim dispela belt? Bikos Satan em i “papa bilong pasin giaman.” (Jon 8:44) Em i mekim ol tok giaman inap planti tausen yia na em i “giamanim olgeta manmeri bilong graun”! (Rev. 12:9) Tasol ol tok i tru i stap long Baibel inap lukautim yumi na bai Satan i no ken giamanim yumi. Olsem wanem yumi inap pasim belt bilong tok i tru? Yumi mekim olsem taim yumi kisim save long tok i tru i stori long Jehova, taim yumi lotuim em “long strong bilong holi spirit na long pasin i tru,” na taim yumi bihainim onest pasin long olgeta samting yumi mekim.—Jon 4:24; Efe. 4:25; Hib. 13:18.

 6. (a) Siot kapa bilong stretpela pasin i makim wanem samting? (b) Wai na yumi mas pasim dispela siot kapa?

⁶ Siot kapa bilong stretpela pasin i makim ol stretpela lo bilong Jehova. Wai na yumi mas pasim dispela siot kapa? Wankain olsem siot kapa i save lukautim klok bilong soldia, siot kapa bilong stretpela pasin i lukautim yumi na bai ol tingting nogut bilong dispela graun i no ken bagarapim bel na tingting bilong yumi. (Prov. 4:23) Jehova i laik bai yumi mas laikim em na mekim wok bilong em long bel olgeta bilong yumi. (Mat. 22:36, 37) Olsem na Satan i traim long kirapim yumi long givim hap bel tasol long God taim em i kirapim yumi long laikim ol samting bilong dispela graun—em ol samting Jehova i heitim. (Jems 4:4; 1 Jon 2:15, 16) Na sapos em i no inap trikim yumi, orait em bai traim long pretim yumi long mekim ol pasin em Jehova i no orait long en.

 7. Olsem wanem yumi inap pasim dispela siot kapa bilong stretpela pasin?

⁷ Yumi pasim dispela siot kapa bilong stretpela pasin taim yumi kisim save long ol stretpela lo bilong Jehova long wanem pasin i stret na wanem pasin i no stret na taim yumi bihainim ol dispela lo long laip bilong yumi. (Sng. 97:10) Sampela man inap pilim olsem ol lo bilong Jehova i strik tumas. Tasol sapos yumi stop long bihainim ol stiatok bilong Baibel long laip bilong yumi, yumi bai kamap olsem wanpela soldia husat i stap insait yet long wanpela pait na em i rausim siot kapa bilong em bikos em i pilim olsem siot kapa i hevi tumas. Dispela em longlong pasin tru! So long yumi ol manmeri husat i laikim Jehova, “ol lo bilong em i no givim hevi long yumi,” nogat, ol i bilong lukautim gut laip bilong yumi.—1 Jon 5:3.

 8. Yumi mas werim su olsem redi long autim gutnius bilong bel isi, na dispela i makim wanem samting?

⁸ Pol i kirapim yumi long werim su olsem redi long autim gutnius bilong bel isi. Dispela i makim olsem oltaim yumi mas redi long autim gutnius bilong Kingdom. Taim yumi serim tok bilong Baibel wantaim ol narapela, yumi strongim bilip bilong yumi yet. Em gutpela samting tru long lukim olsem ol manmeri bilong Jehova long olgeta hap bilong graun i painim ol rot bilong autim gutnius—ol i mekim olsem taim ol i stap long ples wok, long skul, long bisnis teritori, na taim ol i autim tok long ol haus bilong ol man, long ol stua, taim ol i visitim ol wanblut em ol i no wanbilip, taim ol i toktok wantaim ol man em ol i save long ol, na tu, taim ol i mas stap long haus inap sampela haptaim. Sapos yumi larim pasin bilong pret i stopim yumi long autim tok, yumi bai kamap olsem wanpela soldia husat i rausim su bilong em taim em i insait long pait; em inap kisim bagarap long lek bilong em. Dispela bai mekim na em isi long ol birua inap kilim em i dai, na tu, em bai no inap long bihainim gut ol oda bilong komanda bilong em.

 9. Wai na yumi mas karim hap plang bilong pait?

⁹ Bilip olsem hap plang bilong pait i makim bilip yumi gat long Jehova. Yumi bilip tru olsem Jehova bai inapim olgeta tok promis bilong em. Dispela bilip bai helpim yumi long “mekim i dai olgeta spia paia bilong Satan.” Wai na yumi mas karim dispela hap plang bilong pait? Bikos em bai lukautim yumi na bai ol bilip bilong ol apostet i no ken paulim tingting bilong yumi, na tu, yumi no inap pret taim ol man i mekim ol tok bilong daunim yumi. Sapos yumi no gat bilip, yumi bai no gat strong long sakim ol narapela taim ol i traim long fosim yumi long sakim ol stretpela lo bilong Jehova. Tasol long olgeta wan wan taim yumi sambai long bilip bilong yumi long ples wok o long skul, i olsem yumi karim hap plang bilong pait. (1 Pita 3:15) Long olgeta wan wan taim yumi tok nogat long mekim wok mani i gat gutpela pe bikos em bai pasim yumi long mekim ol wok lotu bilong yumi, i olsem yumi karim hap plang bilong pait. (Hib. 13:5, 6) Na long olgeta wan wan taim yumi mekim wok bilong Jehova maski ol man i mekim nogut long yumi, dispela hap plang bilong pait i wok long lukautim yumi.—1 Tes. 2:2.

10. (a) Hat kapa bilong God i kisim bek yumi i makim wanem samting? (b) Wai na yumi mas werim dispela hat kapa?

¹⁰ Hat kapa bilong God i kisim bek yumi i makim hop em Jehova i givim long yumi—olsem yumi bilip olsem Jehova bai kisim bek yumi long dai na em bai givim gutpela pe long ol manmeri husat i mekim laik bilong em. (1 Tes. 5:8; 1 Tim. 4:10; Tai. 1:1, 2) Wankain olsem hat kapa i save lukautim het bilong wanpela soldia, bilip bilong yumi olsem God bai kisim bek yumi i lukautim tingting bilong yumi. Long wanem rot? Bilip bilong yumi i helpim yumi long putim tingting long ol tok promis bilong God na i helpim yumi long holim stretpela tingting long ol hevi yumi karim. Olsem wanem yumi inap werim dispela hat kapa? Yumi mekim olsem taim ol tingting bilong yumi i stret wantaim ol tingting bilong God. Olsem, yumi putim bilip bilong yumi long God, na yumi no putim bilip bilong yumi long mani kago samting.—Sng. 26:2; 104:34; 1 Tim. 6:17.

11. (a) Bainat bilong holi spirit i makim wanem samting? (b) Wai na yumi nid long yusim dispela bainat?

¹¹ Bainat bilong holi spirit i makim Tok Bilong God, em Baibel. Dispela bainat i gat strong long katim na rausim olgeta kain tok giaman na inap helpim ol manmeri long i stap fri long ol bilip giaman na ol pasin nogut. (2 Kor. 10:4, 5; 2 Tim. 3:16, 17; Hib. 4:12) Yumi lain long yusim gut dispela bainat long rot bilong pesenel stadi na long rot bilong trening yumi kisim long oganaisesen bilong God. (2 Tim. 2:15) Jehova i givim yumi ol klos pait, na tu, em i givim yumi narapela strongpela samting bilong lukautim yumi. Em wanem samting?

12. Yumi nidim wanem narapela samting long lukautim yumi, na bilong wanem?

¹² Wanpela soldia i gat ekspiriens i save olsem em i no inap pait na daunim wanpela bikpela lain ami long strong bilong em yet, nogat; em i nidim helpim bilong ol wanlain soldia bilong em. Olsem tasol, yumi no inap pait na daunim Satan na lain bilong em long strong bilong yumi yet, nogat, yumi nidim sapot bilong ol bratasista bilong yumi. Jehova i givim yumi ol “wanbilip” em ol i stap long olgeta hap bilong graun, na ol i ken helpim yumi.—1 Pita 2:17.

13. Olsem Hibru 10:24, 25 i kamapim, yumi kisim wanem helpim taim yumi go long ol miting?

¹³ Wanpela rot yumi kisim helpim em taim yumi go long ol miting. (Ritim Hibru 10:24, 25.) Taim yumi bel hevi—em samting yumi olgeta i save pilim long sampela taim—ol miting inap givim nupela strong long yumi. Yumi kisim strong taim yumi harim ol gutpela komen bilong ol bratasista bilong yumi. Ol tok em Baibel i as bilong en na ol soim em yumi lukim long miting i strongim tingting bilong yumi long mekim wok bilong Jehova. Na ol gutpela tok yumi mekim long narapela narapela paslain na bihain long miting inap strongim yumi. (1 Tes. 5:14) Na tu, ol miting i opim rot long yumi inap helpim ol narapela na dispela i givim amamas long yumi. (Apo. 20:35; Rom 1:11, 12) Ol miting bilong yumi i helpim yumi long ol narapela rot tu. Ol i helpim yumi long kamap gutpela moa long save bilong yumi long mekim wok autim tok. Olsem, yumi kisim save long hau yumi inap yusim gut Ol Tul Bilong Skulim Man. So redim gut ol miting paslain long ol kongrigesen miting. Long taim bilong miting, putim gut yau. Bihain long miting, traim long bihainim trening yu bin kisim. Taim yu mekim olsem, yu bai stap olsem “wanpela gutpela soldia bilong Krais Jisas.”—2 Tim. 2:3.

14. Yumi inap kisim wanem narapela helpim?

¹⁴ Na tu, yumi gat sapot bilong planti milion strongpela ensel. Tingim samting em wanpela ensel tasol inap long mekim! (Ais. 37:36) Nau tingim samting em bikpela lain ami bilong ol ensel inap long mekim. I no gat wanpela man o wanpela spirit nogut inap winim strongpela lain ami bilong Jehova. Maski yu wanpela na Jehova i stap wantaim yu, yu bai strong moa winim bikpela lain i agensim yu. (Het. 6:16) Dispela tok em i tru olgeta! Tingim gut ol dispela tok taim wanpela wanwok, wanskul, o wanblut husat i no wanbilip i mekim sampela tok o mekim sampela samting bilong pretim yu. Tingim, yu no inap pait long strong bilong yu yet. Yu wok long bihainim tok bilong Jehova.

15. Olsem Aisaia 54:15, 17 i kamapim, bilong wanem i no gat man bai stopim lain bilong God long autim tok?

¹⁵ Dispela graun i stap aninit long kontrol bilong Satan, olsem na i gat planti risen na ol manmeri i heitim yumi. Yumi no save sapotim wanpela politikol pati na yumi no save insait long ol woa. Yumi save autim tok na tokim ol man long nem bilong God, na yumi tokim ol man olsem Kingdom Bilong God tasol bai kamapim bel isi, na yumi bihainim ol stretpela lo bilong Jehova. Na tu, yumi pruvim olsem hetman bilong dispela graun em man bilong mekim ol tok giaman na em i wanpela kilman. (Jon 8:44) Na yumi tokaut olsem klostu nau dispela graun bilong Satan bai bagarap na pinis olgeta. Maski i olsem, Satan na lain bilong em i no inap tru long stopim yumi long autim tok, nogat. Yumi bai wok yet long preisim Jehova long olgeta kain rot we yumi inap long mekim olsem! Maski Satan i gat strong, em i no inap long pasim ol manmeri long olgeta hap bilong graun long harim gutnius bilong Kingdom. Yumi ken save tru olsem dispela samting i kamap bikos Jehova i lukautim yumi.—Ritim Aisaia 54:15, 17.

16. Hau bai Jehova i kisim bek ol manmeri bilong em long taim bilong traipela hevi tru?

¹⁶ Klostu nau wanem samting bai kamap? Long taim bilong traipela hevi tru, Jehova bai kisim bek yumi long 2-pela narakain rot. Namba 1: Em bai kisim bek ol gutpela wokman bilong em insait long dispela haptaim we em i kirapim ol king bilong graun long bagarapim Bikpela Babilon, em olgeta lotu giaman. (Rev. 17:16-18; 18:2, 4) Namba 2: Em bai kisim bek ol manmeri bilong em taim em i bagarapim olgeta narapela samting long dispela graun bilong Satan long pait bilong Armagedon.—Rev. 7:9, 10; 16:14, 16.

17. Yumi kisim wanem helpim taim yumi stap klostu yet long Jehova?

¹⁷ Taim yumi stap klostu yet long Jehova, Satan bai no inap tru long mekim wanpela samting bilong nogutim yumi inap oltaim. Satan yet bai bagarap na pinis olgeta. (Rom 16:20) So pasim olgeta klos pait—na no ken tru rausim! No ken traim long pait long strong bilong yu yet. Sapotim ol bratasista bilong yu. Na bihainim tok bilong Jehova. Taim yu mekim olsem, yu ken bilip tru olsem gutpela Papa bilong yu long heven, em bai strongim yu na lukautim yu.—Ais. 41:10.