Taim Wanpela Long Famili i Lusim Jehova

 1. Ol narapela long famili i save pilim olsem wanem taim wanpela long famili i raus?

OLSEM WANEM? Wanpela long famili bilong yu i bin raus long kongrigesen? Dispela samting i ken bagarapim tru bel bilong yu! Wanpela sista nem bilong em Hilda,b em i tok: “Taim poroman marit bilong mi i dai bihain long mitupela i bin marit inap 41 yia, mi pilim olsem dispela em wanpela bikpela hevi tru long mi. Tasol taim pikinini man bilong mi i lusim kongrigesen, lusim meri na tupela pikinini bilong em, dispela samting i nogut moa na i givim bikpela bel hevi long mi.”

2-3. Olsem Buk Song 78:40, 41 i kamapim, Jehova i pilim olsem wanem taim ol wokman bilong em i lusim em?

² Tingim, Jehova i bin pilim bikpela bel hevi tru taim ol lain insait long famili bilong em, em ol ensel i givim baksait long em! (Jut 6) Na tingim bikpela bel hevi em i bin pilim taim em i lukim lain bilong em, em lain Israel i bikhet long em planti taim. (Ritim Buk Song 78:40, 41.) Yu ken save tru olsem Papa bilong yumi long heven i bel hevi tru taim em i lukim wanpela long famili bilong yu i lusim em. Em i pilim dispela bikpela bel hevi em yu pilim. Long gutpela pasin sori, em bai strongim yu na sapotim yu.

³ Long dispela atikol, yumi bai stori long samting yumi ken mekim bilong kisim helpim i kam long Jehova taim yumi karim hevi long wanpela long famili i raus. Na tu, yumi bai stori long samting yumi ken mekim bilong helpim ol narapela insait long kongrigesen husat i karim wankain hevi olsem yumi. Tasol pastaim, yumi bai stori long wanpela tingting em yumi mas sakim.

 4. Ol papamama i save pilim olsem wanem taim pikinini man o pikinini meri i lusim Jehova?

⁴ Taim pikinini man o pikinini meri i lusim Jehova, planti papamama i save pilim olsem ating ol i no mekim ol samting inap long ol i ken helpim pikinini long stap bek insait long tok i tru. Wanpela brata nem bilong em Luke, em pikinini man bilong em i bin raus, em i tok: “Mi sutim tok long mi yet. Planti taim mi driman nogut. Na sampela taim, mi save krai na bel bilong mi i pen tru.” Elizabeth, em narapela sista husat i gat wankain hevi, em tu i pilim bikpela bel hevi, em i tok: “Mi mekim wanem samting rong? Mi pilim olsem mi no mekim gut wok mama long putim tok i tru i go daun long bel bilong pikinini man bilong mi.”

 5. Taim wanpela i lusim Jehova, em asua bilong husat?

⁵ Yumi olgeta i ken tingim olsem Jehova i givim yumi pasin bilong i stap fri long makim wanem samting yumi laik mekim. Dispela i makim olsem, yumi yet wan wan i ken makim yumi laik bihainim tok bilong em o nogat. Sampela yangpela em papamama bilong ol i no stap gutpela eksampel long ol, tasol ol i mekim disisen olsem ol bai mekim wok bilong Jehova, na ol i stap gut long em. Ol narapela yangpela em papamama i givim bes bilong ol long mekim bikpela long ol na skulim ol long laikim Jehova, ol i mekim disisen olsem ol bai lusim tok i tru taim ol i kamap bikpela. So poin em olsem, yumi olgeta wan wan yet i mas makim olsem yumi laik mekim wok bilong Jehova. (Jos. 24:15) So yupela ol papamama i bel hevi, yupela i ken save olsem em i no asua bilong yupela.

 6. Wanpela yangpela inap pilim olsem wanem taim papa o mama i lusim God?

⁶ Sampela taim, papa o mama i lusim tok i tru na ol i lusim famili tu. (Sng. 27:10) Dispela samting i save bagarapim tru bel bilong ol pikinini em ol i bin laikim na rispektim papamama bilong ol. Esther, em papa bilong em i bin raus, em i tok: “Planti taim mi krai, long wanem, mi luksave olsem papa i no lusim tok i tru isi isi, nogat. Em i mekim disisen olsem em bai lusim Jehova olgeta. Mi laikim tru papa, olsem na taim em i raus, oltaim mi save wari long em i stap olsem wanem. Dispela i mekim na planti taim mi save pret nogut tru.”

 7. Jehova i pilim olsem wanem long wanpela yangpela em papa o mama bilong em i raus?

⁷ Yupela ol yangpela, sapos papa o mama bilong yu i raus, orait yu ken save olsem mipela i wari tru long yu! Plis yu ken save tu olsem Jehova i wari tru long yu na em i pilim hevi yu karim. Em i laikim yu tru na em i tingim pasin bilong yu long stap gut long em, na mipela ol brata na sista bilong yu i pilim wankain olsem. Yu mas tingim tu olsem, dispela disisen em papa o mama bilong yu i mekim em i no asua bilong yu. Olsem yumi stori pinis, Jehova i larim wan wan man yet i makim olsem ol i laik lotuim em o nogat. Na olgeta wan wan man husat i dediket na baptais ol i mas “mekim ol samting em ol yet i gat wok long mekim.”​—Gal. 6:5.

 8. Ol narapela insait long famili i ken mekim wanem taim ol i wetim dispela man o meri i raus long kam bek long Jehova? (Lukim blok “Kam Bek Long Jehova.”)

⁸ Taim wanpela i lusim Jehova, yu ken holimpas bilip olsem wanpela taim em bai kam bek long Jehova. So yu ken mekim wanem long dispela haptaim? Yu ken mekim ol samting bilong strongim bilip bilong yu yet. Taim yu mekim olsem, yu bai stap gutpela eksampel long ol narapela insait long famili, na tu, long dispela man o meri i raus. Na yu bai kisim strong long karim dispela bel hevi. Yumi ken stori long sampela samting yu ken mekim bilong strongim bilip bilong yu.

 9. Yu ken mekim wanem bilong stap strong long bilip? (Lukim blok “Sampela Skripsa Bilong Tingim Taim Wanpela Long Famili i Lusim Jehova.”)

⁹ Mekim ol samting bilong strongim bilip bilong yu. Em i bikpela samting long yu wok yet long strongim yu yet na strongim ol narapela insait long famili. Hau yu ken mekim olsem? Kisim strong i kam long Jehova long rot bilong holimpas pasin bilong ritim Baibel na tingim tingim ol tok long bel, na go oltaim long ol miting Kristen. Joanna, em papa bilong em na sista bilong em i bin raus, em i tok: “Mi save pilim bel isi tru taim mi ritim ol stori olsem stori bilong Abigel, Esta, Jop, Josep, na Jisas. Eksampel bilong ol i strongim tru bel na tingting bilong mi na i helpim mi long holim stretpela tingting. Na tu, ol orijinel song i strongim mi tru.”

10. Olsem wanem tok bilong Buk Song 32:6-8 inap helpim yumi long daunim bel hevi?

¹⁰ Tokim Jehova long olgeta samting yu bel hevi na wari long en. Taim yu bel hevi tru, no ken tru lusim pasin bilong beten. Toktok wantaim God na askim em long helpim yu long holim wankain tingting olsem em i gat long dispela hevi na em bai “mekim yu kisim pasin bilong skelim gut ol samting na skulim yu long pasin [em] laik yu bihainim.” (Ritim Buk Song 32:6-8.) Tru sampela taim em bai hatwok long tokim Jehova long samting yu pilim long bel. Tasol Jehova i kliagut long samting yu pilim long bel. Em i laikim yu tru na em i kirapim yu long autim olgeta belwari bilong yu long em.​—Kis. 34:6; Sng. 62:7, 8.

11. Olsem Hibru 12:11 i kamapim, wai na yumi mas trastim rot Jehova i makim bilong stretim ol man i mekim rong? (Lukim blok “Rausim Man​—Dispela i Soim Pasin Bilong Jehova Long Laikim na Stretim Man.”)

¹¹ Sapotim disisen bilong ol elda. Pasin bilong rausim man em arensmen Jehova i putim. Taim em i stretim man, dispela em bilong helpim yumi olgeta, na em helpim tu man i mekim rong. (Ritim Hibru 12:11.) Sampela long kongrigesen inap tok olsem ol elda i no mekim gutpela disisen taim ol i rausim man, tasol tru tru ol yet i haitim stori bilong ol samting nogut dispela man i mekim. Yumi no save long olgeta stori. Em i savetingting long trastim disisen em ol elda i harim kot i mekim, long wanem, ol i skelim gut olgeta samting i kamap na ol i bihainim gut stiatok bilong Baibel na ol i mekim kot “bilong Jehova.”​—2 Sto. 19:6.

12. Sampela i sapotim rot bilong Jehova long stretim man na dispela i helpim ol olsem wanem?

¹² Taim yu sapotim disisen em ol elda i mekim bilong rausim wanpela long famili bilong yu husat i mekim sin, yu ken helpim em long kam bek long Jehova. Elizabeth, em yumi stori pinis long em, em i tok: “I hatwok tru long stap longwe long bikpela pikinini man bilong mipela taim em i raus. Tasol taim em i kam bek long Jehova, em i tokaut olsem i stret em i raus. Bihain em i amamas long ol gutpela lesen em i lainim long dispela. Na mi tu i luksave olsem pasin bilong Jehova long stretim man i save kamapim gutpela samting.” Man bilong em Mark i tok: “Bihain pikinini man bilong mipela i tokim mi olsem, em i kam bek, long wanem, mipela i mekim samting mipela i mas mekim. Mi amamas tru olsem Jehova i helpim mipela long bihainim tok bilong em.”

13. Wanem samting inap helpim yu long daunim ol bel hevi?

¹³ Toktok wantaim ol gutpela pren husat i pilim tru hevi bilong yu. Bung wantaim ol strongpela Kristen em ol inap helpim yu long holimpas stretpela tingting. (Prov. 12:25; 17:17) Joanna, em yumi stori pinis long em, em i tok: “Long bel, mi pilim olsem mi stap wanpis. Tasol taim mi toktok long ol gutpela pren, dispela i helpim mi long daunim bel hevi bilong mi.” Yu ken mekim wanem sapos yu pilim olsem sampela long kongrigesen i mekim ol tok we i mekim na yu bel hevi tru?

14. Wai na yumi “mas wok yet long karim hevi narapela i putim long [yumi] na amamas long fogivim narapela”?

¹⁴ Yumi no ken les kwik long ol bratasista bilong yumi. Na yumi no ken ting olsem olgeta bai mekim ol rait tok tasol. (Jems 3:2) Yumi olgeta i gat sin, so yumi no ken kirap nogut sapos sampela i hatwok long painim ol tok i stret bilong helpim yumi o ol i no min na mekim ol tok i bagarapim bel bilong yumi. Tingim tok bilong aposel Pol, em i tok: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela.” (Kol. 3:13) Wanpela sista em wanpela long famili bilong em i raus, em i tok: “Jehova i bin helpim mi long fogivim ol brata em ol i laik mekim ol tok bilong strongim mi, tasol tok bilong ol i bagarapim bel bilong mi.” Kongrigesen i ken mekim wanem bilong helpim ol narapela insait long famili em wanpela long famili bilong ol i raus?

15. Yumi ken mekim wanem bilong helpim ol narapela insait long famili em wanpela insait long famili bilong ol i raus?

¹⁵ Mekim gutpela pasin na stap pren bilong ol narapela insait long famili em ol i stap gut long God. Wanpela sista nem bilong em Miriam, em i tok em i bin tingting planti olsem em bai go long miting o nogat, bihain long brata bilong em i raus. Em i tok: “Mi pret long ol narapela bai tok wanem. Tasol i gat ol gutpela pren em ol i pilim tru bel sori bilong mi, na ol i no mekim ol tok kranki long brata bilong mi i raus. Mi amamas long ol na mi no pilim wanpis long dispela bel hevi mi karim.” Narapela sista i tok: “Bihain long pikinini man bilong mipela i raus, ol gutpela pren i kam mekim gut bel bilong mipela. Sampela i tok olsem ol i no save long wanem tok ol bai mekim. Ol i krai wantaim mi na raitim ol liklik nout long mi. Samting ol i mekim i bin helpim mi tru!”

16. Olsem wanem kongrigesen i ken sapotim yet ol narapela insait long famili?

¹⁶ Wok yet long sapotim ol narapela insait long famili em ol i stap gut long God. Long nau em taim we ol i nidim tru pasin laikim na ol tok yu bai mekim bilong strongim ol. (Hib. 10:24, 25) Sampela taim, ol narapela insait long famili bilong wanpela i raus, ol i pilim olsem kongrigesen i mekim pasin long ol olsem ol tu i raus. No ken larim dispela samting i kamap! Ol yangpela em papamama bilong ol i lusim tok i tru, ol i nidim yupela long mekim gutpela tok bilong strongim ol. Maria, em man bilong em i bin raus na lusim famili bilong ol, em i tok: “Sampela pren bilong mi i save kam long haus na ol i save kukim kaikai wantaim mipela na helpim mipela long taim bilong famili stadi. Ol i pilim bel hevi bilong mi na ol i krai wantaim mi. Na ol i sambai long gutnem bilong mi taim ol tok win i raun na i bagarapim gutnem bilong mi. Pasin bilong ol i bin strongim mi tru!”​—Rom 12:13, 15.

17. Ol elda i ken mekim wanem bilong helpim ol lain husat i karim hevi?

¹⁷ Ol elda, yupela i mas mekim ol samting bilong strongim ol narapela insait long famili. Yupela i gat wok long mekim gut bel bilong ol wanbilip em wanpela insait long famili bilong ol i lusim Jehova. (1 Tes. 5:14) Paslain na bihain long ol miting Kristen, go pas long mekim ol tok bilong strongim ol. Go lukim ol long haus bilong ol na beten wantaim ol. Na wok wantaim ol long wok autim tok o sampela taim singautim ol long joinim yupela long famili lotu bilong yupela. Ol elda i gat wok long mekim pasin sori, laikim na tingim tru ol wokman bilong Jehova em ol i bel hevi tru.​—1 Tes. 2:7, 8.

18. Olsem 2 Pita 3:9 i kamapim, God i laik bai ol man i mekim sin i mas mekim wanem?

¹⁸ Jehova “i no laik bai wanpela i kisim bagarap. Em i laik bai olgeta i tanim bel.” (Ritim 2 Pita 3:9.) Maski wanpela man i mekim bikpela rong, laip bilong em i dia tumas long God. Tingim dispela bikpela pe God i bin givim—em ofa bilong Pikinini man bilong em—bilong baim bek laip bilong ol dispela sinman. Jehova i mekim pasin sori na em i laik bai olgeta dispela manmeri i kam bek long em. Em i bilip olsem ol inap mekim olsem, olsem yumi lukim long tok piksa bilong Jisas long pikinini man i kam bek long papa. (Luk 15:11-32) Planti husat i bin lusim tok i tru, bihain ol i kam bek long Papa bilong ol long heven. Na kongrigesen i amamas long welkamim ol bek. Elizabeth, em yumi stori pinis long em, em i amamas tru long lukim pikinini man bilong em i kam bek insait long kongrigesen. Em i tingim i go bek, na em i tok: “Mi amamas tru olsem planti i bin strongim mipela long no ken givap olsem gutpela samting bai kamap.”

19. Wai na yumi ken wok yet long trastim Jehova?

¹⁹ Oltaim yumi ken trastim Jehova. Ol tok em i givim long yumi i no save bagarapim yumi. Em i save givim yumi ol gutpela samting na em Papa i gat pasin sori husat i save laikim tru ol man i laikim em na lotuim em. Yu ken save tru olsem Jehova i no inap lusim yu long taim yu bel hevi. (Hib. 13:5, 6) Mark, em yumi stori pinis long em, em i tok: “Jehova i no save lusim mipela. Em i no stap longwe long yumi olgeta wan wan long taim bilong hevi.” Jehova bai wok yet long givim yu “dispela strong i winim strong bilong yumi ol man.” (2 Kor. 4:7) Yes, yu ken stap strong yet long bilip na wetim gutpela samting i kamap taim wanpela long famili bilong yu i lusim Jehova.