Jehova—Nambawan Man Bilong Fogivim Ol Narapela

 1. Olsem Eklisiastis 7:20 i kamapim, King Solomon i laik skulim yumi long wanem samting?

KING Solomon i tok: “I no gat wanpela stretpela man i stap long graun husat i save mekim gutpela pasin oltaim na i no save mekim sin.” (Ekl. 7:20) Dispela tok em i tru! Yumi olgeta i sinman. (1 Jon 1:8) Olsem na yumi save amamas taim God i fogivim yumi na ol narapela tu i fogivim yumi.

 2. Yumi save pilim olsem wanem taim wanpela gutpela pren i fogivim yumi?

² Ating yu ken tingim wanpela taim yu bin rongim wanpela gutpela pren bilong yu. Yu laik stretim dispela hevi na stretim bek pasin pren bilong yu wantaim em, so yu go lukim em na tok sori long rong yu bin mekim. Yu bin pilim olsem wanem taim pren bilong yu i fogivim yu? Yu kisim bel isi, a? Yes, na yu amamas tu!

 3. Bai yumi stori long wanem samting long dispela atikol?

³ Yumi laik bai Jehova i kamap gutpela Pren bilong yumi, tasol sampela taim yumi inap rongim em long ol tok o pasin bilong yumi. Maski i olsem, wai na yumi ken save tru olsem Jehova i redi long fogivim yumi? Long wanem rot pasin bilong Jehova long fogivim man i narapela kain long pasin bilong yumi long fogivim man? Na God i save fogivim husat?

 4. I gat wanem as na yumi ken save tru olsem Jehova i redi long fogivim yumi?

⁴ Baibel i tokim yumi olsem Jehova i redi long fogivim yumi. Taim Jehova i kamapim em yet long Moses long Maunten Sainai, long rot bilong wanpela ensel God i tok olsem: “Jehova, Jehova, em God i gat pasin marimari na pasin sori, em i no save belhat kwik na i pulap tru long gutpela pasin laikim na pasin i tru, em i save kamapim gutpela pasin laikim long planti tausen lain manmeri, na lusim rong na asua na sin bilong ol.” (Kis. 34:6, 7) Jehova em God bilong mekim gutpela pasin na pasin marimari na oltaim em i redi long fogivim ol sinman i tanim bel.​—Neh. 9:17; Sng. 86:15.

 5. Olsem Buk Song 103:13, 14 i kamapim, Jehova i save gut tru long ol manmeri na dispela i kirapim em long mekim wanem?

⁵ Jehova em Man Bilong Wokim yumi, olsem na em i save gut tru long yumi. Tingim dispela! Em i save gut tru long olgeta wan wan man na meri long dispela graun. (Sng. 139:15-17) Olsem na em i save long olgeta pasin kranki em yumi kisim long papamama bilong yumi. Na tu, em i save long ol samting i bin kamap long laip bilong yumi we i mekim yumi kamap kain man na meri em nau yumi stap na i stiaim ol pasin yumi gat. Jehova i save gut tru long yumi ol man na dispela i kirapim em long mekim wanem? Dispela i kirapim em long mekim pasin marimari long yumi.​—Sng. 78:39; ritim Buk Song 103:13, 14.

 6. Jehova i mekim wanem bilong soim olsem em i redi long fogivim yumi?

⁶ Jehova i kamapim klia olsem em i redi long fogivim yumi. Em i save gut tru olsem namba 1 man Adam i bin mekim sin na yumi olgeta i kisim sin na yumi dai. (Rom 5:12) Yumi no gat wanpela rot bilong helpim yumi yet o long helpim ol narapela long lusim sin na dai. (Sng. 49:7-9) Tasol God bilong yumi i mekim pasin sori na stretim rot bilong mekim yumi kamap fri. Em i mekim wanem? Olsem Jon 3:16 i kamapim, Jehova i salim dispela Pikinini tru bilong em we em i save laikim tumas i kam dai bilong baim bek yumi. (Mat. 20:28; Rom 5:19) Jisas i kisim ples bilong yumi—em i karim pen na hevi na em i dai—bambai ol man husat i bilip long em, ol i ken kamap fri long sin na dai. (Hib. 2:9) Dispela samting i mas mekim Jehova i bel pen tru taim em i lukim Pikinini em i laikim tumas i karim bikpela pen na kisim sem na dai! Tru tumas, sapos Jehova i no laik fogivim yumi, em i no inap larim Pikinini bilong em i dai olsem.

 7. Baibel i stori long wanem sampela eksampel bilong ol manmeri em Jehova i bin redi long fogivim ol?

⁷ Baibel i gat stori bilong ol manmeri em Jehova i bin redi long fogivim ol. (Efe. 4:32) Yu inap tingim stori bilong husat? Ating yu tingim stori bilong King Manase. Dispela man nogut i bin mekim planti sin tru long ai bilong Jehova. Em i go pas long lotuim ol god giaman na em i kirapim ol narapela tu long mekim olsem. Em i kilim i dai ol pikinini bilong em yet na givim ol olsem ofa i go long ol god giaman. Na tu, em i wokim imis bilong wanpela god giaman na sanapim dispela imis insait long tempel holi bilong Jehova. Baibel i tok long em olsem: “Em i mekim ol pasin nogut tru long ai bilong Jehova na mekim em i kros.” (2 Sto. 33:2-7) Maski i olsem, taim Manase i soim olsem em i tanim bel tru tru, Jehova i redi long lusim ol rong bilong em. Na God i larim em i mekim wok king gen. (2 Sto. 33:12, 13) Ating yu tingim tu stori bilong King Devit, em i bin mekim ol bikpela sin long ai bilong Jehova—em i mekim pasin adaltri na kilim man i dai. Maski i olsem, taim Devit i bin tanim bel tru na em i tokaut long ol rong bilong em, Jehova i fogivim em tu. (2 Sml. 12:9, 10, 13, 14) Yes, yumi ken save tru olsem Jehova i redi long lusim ol rong bilong yumi. Olsem yumi bai skelim, pasin bilong em long lusim rong bilong yumi em i narapela kain long pasin bilong ol man long lusim rong bilong yumi.

 8. Jehova i stap olsem Jas, na dispela i mekim wanem long pasin bilong em long fogivim ol man?

⁸ Jehova em i “Jas bilong graun olgeta.” (Stt. 18:25) Wanpela gutpela jas i mas save gut tru long ol lo. Dispela em i tru long Jehova, long wanem, em i gutpela Jas, na long wankain taim, em Man Bilong Givim Lo. (Ais. 33:22) I no gat wanpela man i olsem Jehova. Em i save gut tru long wanem samting i stret na wanem samting i no stret. Wanem narapela samting em gutpela jas i mas save long en? Em i mas save gut tru long olgeta samting i bin kamap paslain long em i ken wokim disisen long kot. Long dispela samting tu, Jehova i stap olsem nambawan gutpela Jas, long wanem, em i save long olgeta samting.

 9. Jehova i save long wanem ol samting paslain long em i fogivim wanpela man?

⁹ Jehova em i no wankain olsem ol jas bilong graun, em i save gut tru long olgeta stori long ol samting i bin kamap paslain long em i mekim wanpela kot. (Stt. 18:20, 21; Sng. 90:8) Em i no save skelim ol man long samting em i lukim na harim, nogat. Em i kliagut tru long ol samting i stiaim pasin bilong wanpela man olsem, ol pasin em i kisim long papamama bilong em, save em i gat, ples em i stap long en, na ol samting em i pilim long bel na tingting. Jehova i save lukim tu ol samting i stap insait long bel bilong man. Olsem na em i save gut tru long astingting na ol laik we i kirapim man long mekim ol samting em i mekim. I no gat wanpela samting i stap hait long ai bilong Jehova. (Hib. 4:13) Olsem na taim Jehova i fogivim wanpela man, em i save gut long olgeta samting i bin kamap.   

10. Wai na yumi ken tok Jehova i save mekim kot long stretpela pasin na pasin i fea? (Lo 32:4)

¹⁰ Jehova i save mekim kot long stretpela pasin na pasin i fea. Em i no save mekim wansait pasin. Em i no save fogivim man bikos man i luk nais, em i gat planti mani kago, em i gat biknem, o em i gat bikpela save, nogat. (1 Sml. 16:7; Jems 2:1-4) Na i no gat wanpela man inap putim presa long Jehova o braibim em. (2 Sto. 19:7) Na em i no save larim pasin bilong belhat o ol narapela filings i stiaim disisen em i mekim. (Kis. 34:7) Tru tumas, Jehova i kliagut tru long olgeta samting na dispela save bilong em i mekim na em i stap nambawan gutpela Jas.​—Ritim Lo 32:4.

11. Long wanem rot pasin bilong Jehova long fogivim man i narakain long pasin bilong ol man long fogivim man?

¹¹ Ol man bilong raitim Ol Skripsa Hibru i luksave olsem Jehova i gat narakain pasin bilong fogivim man. Sampela taim ol i yusim wanpela tok Hibru em wanpela buk i stori long en olsem, “dispela tok i makim tasol pasin bilong God long fogivim ol sinman, na dispela tok i no makim pasin bilong ol man long fogivim ol narapela man.” Jehova tasol i gat namba long lusim tru rong bilong wanpela sinman i tanim bel tru. Wanem samting i save kamap taim Jehova i fogivim yumi?

12-13. (a) Taim yumi save tru olsem Jehova i fogivim yumi, yumi bai pilim olsem wanem? (b) Taim Jehova i fogivim wanpela man, dispela i save mekim wanem long em?

¹² Taim yumi save olsem Jehova i fogivim yumi, yumi kisim “nupela strong” na bel na tingting bai stap isi na yumi gat klinpela maus bilong bel. Kain pasin bilong fogivim man i no inap kam long ol man, nogat, em i mas kam long “Jehova yet.” (Apo. 3:19) Taim Jehova i fogivim yumi, em i stretim bek pasin pren bilong yumi wantaim em na dispela i mekim yumi pilim olsem yumi stap klin na yumi no bin mekim sin bipo.

¹³ Taim Jehova i fogivim yumi, em i no inap sutim tok long yumi o panisim yumi gen long dispela sin. (Ais. 43:25; Jer. 31:34) Jehova i save rausim ol sin bilong yumi i go longwe tru olsem “hap bilong sankamap i stap longwe tru long hap bilong san i go daun.”b (Sng. 103:12) Taim yumi tingim dispela gutpela pasin bilong Jehova long fogivim yumi, dispela i mekim yumi pilim bikpela tenkyu tru long bel. (Sng. 130:4) Tasol Jehova bai fogivim husat?

14. Yumi kisim wanem save long pasin bilong Jehova long fogivim man?

¹⁴ Olsem yumi stori pinis, Jehova i no save lukim sin bilong yumi olsem em i bikpela o liklik na fogivim yumi long en, nogat. Na tu, yumi lainim olsem Jehova i save yusim save em i gat olsem Man Bilong Wokim yumi, Man Bilong Givim Lo, na Jas bilong makim olsem em bai fogivim man o nogat. Jehova i save tingim wanem ol samting taim em i laik makim olsem em bai fogivim man o nogat?

15. Olsem Luk 12:47, 48 i kamapim, Jehova i save tingim wanem narapela samting paslain long em i fogivim yumi?

¹⁵ Wanpela samting Jehova i save tingim paslain long em i fogivim man em olsem, em i save lukim sapos sinman i luksave long samting em i mekim i rong o nogat. Jisas i kamapim klia dispela samting long tok bilong em i stap long Luk 12:47, 48. (Ritim.) Man i pasim tok long bel bilong em olsem em bai mekim sin na em i save tru olsem dispela samting bai bagarapim bel bilong Jehova, tasol em i go het na mekim, orait em i mekim bikpela sin. Jehova i ken mekim disisen olsem em i no inap fogivim dispela man. (Mak 3:29; Jon 9:41) Tasol yumi ken tok stret olsem sampela taim yumi save olsem samting yumi mekim em rong. Long kain taim olsem, yu ting Jehova bai fogivim yumi? Yes! Dispela i bringim yumi i kam long narapela samting em Jehova i save tingim paslain long em i lusim rong bilong yumi.

16. (a) Tanim bel i makim wanem samting? (b) Wai na yumi mas tanim bel tru sapos yumi laik Jehova i fogivim yumi?

¹⁶ Narapela samting em Jehova i save skelim em olsem sinman i tanim bel tru o nogat. Dispela tok tanim bel i makim wanem samting? Tanim bel i makim olsem “man i senisim tingting, ol pasin, na ol samting em i tingting pinis long mekim.” Em i makim tu olsem sinman i rigret na sori tru long ol pasin nogut em i bin mekim, o em i rigret na sori tru olsem em i no mekim stretpela pasin em i mas mekim. Taim sinman i tanim bel, em i bel hevi tru long ol rong em i bin mekim, na i no dispela tasol, em i bel hevi tu long em i lusim pasin bilong em long pas gut wantaim Jehova na dispela i mekim na em i mekim bikpela rong. Tingim stori bilong King Manase na King Devit em tupela i bin mekim ol bikpela sin tru, tasol Jehova i bin fogivim ol bikos ol i bin tanim bel tru. (1 Kin. 14:8) Yes, Jehova i mas lukim evidens i soim olsem man i tanim bel tru bambai em i ken fogivim em. Tasol pasin bilong pilim sori tasol long yumi wokabaut long rot bilong sin o long sin yumi bin mekim, dispela tasol em i no inap. Yumi mas redi long mekim sampela samting bilong soim olsem yumi tanim bel.c Dispela i bringim yumi i kam long narapela samting em Jehova i save skelim.

17. (a) Pasin bilong baut i makim wanem samting? (b) Wai na em i bikpela samting long yumi mas sakim ol sin em yumi bin mekim long bipo? (Aisaia 55:7)

¹⁷ Narapela bikpela samting em Jehova i save skelim em pasin bilong man long baut. Baut i makim olsem man i tanim na lukluk i go long narapela sait. Dispela i makim olsem man i mas senisim ol pasin bilong em na lusim ol pasin nogut bilong em na wok strong long bihainim ol stretpela pasin bilong Jehova. (Ritim Aisaia 55:7.) Man i mas senisim ol tingting bilong em bambai tingting bilong Jehova i ken stiaim em. (Rom 12:2; Efe. 4:23) Em i mas tingting strong long lusim olgeta pasin nogut na ol tingting nogut bilong em. (Kol. 3:7-10) Tru tumas, pasin bilong yumi long bilip long ofa bilong Jisas Krais em wanpela rot tasol bilong Jehova long fogivim ol sin bilong yumi na mekim yumi kamap klin. Jehova bai yusim pe bilong dispela ofa bilong Jisas long helpim yumi taim em i lukim olsem yumi wok strong long senisim ol pasin bilong yumi na bihainim stretpela rot.​—1 Jon 1:7.

18. Yumi kisim wanem save long pasin bilong Jehova long fogivim yumi?

¹⁸ Yumi ken stori gen long sampela bikpela tok em yumi bin stori long en long dispela atikol. Long yunives olgeta, Jehova em nambawan Man tru bilong fogivim ol narapela. I gat wanem as na yumi ken tok olsem? Namba 1, oltaim em i redi long fogivim yumi. Namba 2, em i save gut tru long yumi. Em i save gut tru long ol pasin na tingting bilong yumi, olsem na em tasol inap save olsem tru tru yumi tanim bel tru o nogat. Na namba 3, taim Jehova i fogivim yumi, em i lusim tru olgeta sin bilong yumi. Dispela i helpim yumi long kisim klinpela maus bilong bel na pas gut wantaim em.

19. Yumi ol sinman na yumi bai wok yet long mekim sin, tasol wanem samting i ken mekim yumi belgut?

¹⁹ Tru tumas, yumi ol sinman, olsem na yumi bai wok yet long mekim sin. Tasol yumi ken kisim bel isi taim yumi skelim ol tok i stap long buk Insight on the Scriptures, Volium 2, pes 771. Em i tok: “Jehova i gat pasin marimari tru na em i save olsem ol wokman bilong em i no gat strong. Olsem na ol i no ken pilim wari long olgeta taim, long wanem, ol i no gutpela olgeta na ol bai mekim ol popaia. (Sng. 103:8-14; 130:3) Tasol sapos ol i wok strong long bihainim tok bilong God long i stap bilong ol, ol i ken stap belgut. (Fili. 4:4-6; 1 Jon 3:19-22).” Tru tumas, dispela tok i strongim tru bel bilong yumi!

20. Atikol i kamap bihain bai stori long wanem samting?

²⁰ Yumi amamas olsem Jehova i redi long lusim ol rong bilong yumi taim yumi sori tru long ol sin yumi bin mekim. Tasol olsem wanem yumi ken bihainim pasin bilong Jehova long fogivim ol narapela? Long wanem ol rot pasin bilong yumi long fogivim ol man i wankain long pasin bilong Jehova long fogivim man, na long wanem ol rot em i no wankain? Wai na em i bikpela samting long yumi mas kliagut long dispela? Atikol i kamap bihain bai bekim ol dispela askim.