Ol Yangpela Brata—Kamap Ol Strongpela Kristen

 1. Wanpela man Kristen i mas mekim wanem bilong stap olsem man tru?

KING DEVIT i tokim Solomon olsem: “Yu mas sanap strong na stap olsem man tru.” (1 Kin. 2:​1-3) Olgeta man Kristen long nau i mas bihainim dispela edvais. Bilong stap olsem man tru, ol i mas lain long bihainim ol lo bilong God na ol stiatok bilong Baibel long olgeta samting ol i mekim long laip bilong ol. (Luk 2:52) Wai na em i bikpela samting long ol yangpela brata i mas kamap ol strongpela Kristen?

2-3. Wai na em i bikpela samting long yangpela brata i mas kamap strongpela Kristen?

² Wanpela man Kristen i gat planti wok bilong mekim insait long famili na long kongrigesen. Ol yangpela brata, ating yupela i bin tingim ol wok yupela inap mekim long bihain. Ating yu putim mak long mekim wok olsem wanpela fultaim sevan, kongrigesen sevan, na bihain wanpela elda bilong kongrigesen. Na tu, ating yu laik marit na kamapim ol pikinini. (Efe. 6:4; 1 Tim. 3:1) Bilong winim ol dispela mak na mekim gut ol wok, yu mas kamap strong long bilip.b

³ Wanem samting inap helpim yu long kamap strong long bilip? I gat planti samting em yu mas lain long mekim gut. Yu ken mekim wanem long nau bilong redim yu yet long mekim gut ol wok yu kisim long bihain?

 4. Yu inap painim we ol gutpela eksampel em yu ken bihainim? (Lukim tu piksa.)

⁴ Makim ol gutpela eksampel em yu ken bihainim. Baibel i gat planti gutpela eksampel em ol yangpela man i ken bihainim. Ol dispela man em Baibel i stori long ol, ol i laikim God na ol i mekim narapela narapela wok bilong lukautim ol manmeri bilong em. Na tu, insait long famili bilong yu yet na long kongrigesen bilong yu i gat ol man Kristen em ol i stap olsem ol gutpela eksampel. (Hib. 13:7) Na Jisas Krais em nambawan gutpela eksampel yu ken bihainim. (1 Pita 2:21) Taim yu stadi gut long ol dispela eksampel, tingim ol naispela pasin bilong ol em yu laikim tru. (Hib. 12:​1, 2) Na tingim hau yu ken bihainim pasin bilong ol dispela man.

 5. Hau yu ken kisim pasin bilong wokim gut tingting, na wai na dispela em i bikpela samting? (Buk Song 119:9)

⁵ Kisim pasin bilong “wokim gut tingting” na “banisim gut.” (Prov. 3:21) Man i gat pasin bilong wokim gut tingting em i save skelim gut ol samting em bai mekim paslain long em i mekim. So wok strong long kisim na holimpas dispela pasin. Bilong wanem? Long wanem, planti yangpela man long dispela graun i larim ol tingting bilong ol yet o ol i larim ol samting ol i pilim long bel i stiaim ol samting ol i mekim. (Prov. 7:7; 29:11) Na tu, ol televisen program, ol muvi, Intenet, na sosel midia inap stiaim tingting na pasin bilong yu. Tasol olsem wanem yu inap kisim pasin bilong wokim gut tingting? Yu ken kisim dispela pasin long rot bilong kisim save long ol stiatok bilong Baibel na tingim risen na ol dispela stiatok inap helpim yu. Na yusim ol dispela stiatok long helpim yu long mekim ol disisen we bai amamasim Jehova. (Ritim Buk Song 119:9.) Sapos yu kisim pasin bilong wokim gut tingting, dispela bai helpim yu long kamap wanpela strongpela man Kristen. (Prov. 2:​11, 12; Hib. 5:14) Tingim hau pasin bilong wokim gut tingting bai helpim yu long tupela rot: (1) pasin yu mekim long ol sista na (2) taim yu laik mekim ol disisen long sait bilong bilas na mekim gut skin.

 6. Olsem wanem pasin bilong wokim gut tingting bai helpim yangpela brata long soim rispek long ol sista?

⁶ Pasin bilong wokim gut tingting bai helpim yu long soim rispek long ol meri. Em nomol na i no gat rong long wanpela yangpela brata i poromanim wanpela sista Kristen. Tasol yangpela man i gat pasin bilong wokim gut tingting em i no inap mekim wanpela tok, raitim ol mesis, o mekim wanpela samting we inap kirapim wanpela yangpela sista long ting em i laik prenim em, tasol tru tru dispela brata i no gat tingting long maritim em. (1 Tim. 5:​1, 2) Sapos em i prenim wanpela sista, em bai lukautim gutnem bilong dispela sista long rot bilong kisim wanpela i go wantaim ol taim tupela i laik raun na em i no inap stap wanpis wantaim dispela sista.—1 Kor. 6:18.

 7. Olsem wanem pasin bilong wokim gut tingting bai helpim yangpela brata taim em i laik mekim disisen long sait bilong bilas na mekim gut skin?

⁷ Narapela rot wanpela yangpela man inap soim olsem em i kisim pasin bilong wokim gut tingting em long rot bilong mekim ol gutpela disisen long sait bilong bilas na mekim gut skin. Ol lain em ol i save disainim na edvetaisim ol nupela stail bilong ol klos, planti bilong ol i no save rispektim Jehova, na tu, ol i no bihainim ol stretpela lo bilong em long laip bilong ol. Ol tingting doti bilong ol i stap ples klia long ol stail bilong ol klos ol i wokim, ol dispela klos i pas tumas long skin o sampela taim ol i mekim ol man i luk olsem ol meri. Taim wanpela yangpela man husat i wok long kamap strong long bilip i laik makim ol klos em i laik werim, em bai larim ol stiatok bilong Baibel na ol gutpela eksampel bilong ol narapela insait long kongrigesen i stiaim em. Em i ken askim em yet olsem: ‘Ol disisen bilong mi i soim olsem mi bihainim gutpela tingting na mi tingim ol narapela? Pasin bilong mi long bilas i mekim na em isi long ol narapela i luksave olsem mi wanpela wokman bilong God?’ (1 Kor. 10:​31-33; Tai. 2:6) Yangpela man i gat pasin bilong wokim gut tingting bai mekim ol samting na bai ol bratasista na Papa bilong em long heven i rispektim em.

 8. Olsem wanem yangpela brata inap lain long mekim gut ol wok?

⁸ Mekim gut ol wok. Wanpela yangpela man husat i save mekim gut ol wok, em i save givim bel long mekim gut olgeta wok bilong em. (Luk 16:10) Tingim nambawan gutpela eksampel bilong Jisas. Em i save tingim gut ol wok em i mekim na givim bel long mekim ol dispela wok. Em i inapim gut ol wok Jehova i givim long em, maski sampela taim i hatwok long mekim olsem. Em i laikim tru ol manmeri—moa yet ol disaipel bilong em—na em i redi long givim laip bilong em bilong helpim ol. (Jon 13:1) Yu ken bihainim pasin bilong Jisas na wok strong tru long inapim ol asainmen yu kisim. Sapos yu no save hau long mekim wanpela asainmen, orait daunim yu yet na askim ol brata i strong long bilip long helpim yu. No ken traim long inapim liklik hap tasol na ting olsem dispela em inap, nogat. (Rom 12:11) Yu mas inapim gut asainmen bilong yu, na mekim olsem yu “mekim long Jehova na i no long ol man.” (Kol. 3:23) Em tru olsem yu no gutpela olgeta, olsem na taim yu mekim ol popaia, daunim yu yet na tokaut long ol popaia bilong yu.—Prov. 11:2.

 9. Wai na yangpela brata i mas lainim sampela skil we bai helpim em?

⁹ Bilong kamap wanpela strongpela man Kristen, yu mas lainim sampela skil. Dispela bai helpim yu long kisim ol wok insait long kongrigesen, holim gut wanpela wok mani bilong lukautim yu yet o famili bilong yu, na pas gut wantaim ol narapela. Skelim sampela skil em yu ken lainim.

10-11. Olsem wanem yangpela brata inap helpim em yet na kongrigesen tu taim em i lain gut long rit na rait? (Buk Song 1:​1-3) (Lukim tu piksa.)

¹⁰ Lain gut long rit na rait. Baibel i tok man i save amamas na mekim gut ol wok taim em i lusim haptaim long olgeta wan wan de long ritim Tok Bilong God na tingim tingim long bel. (Ritim Buk Song 1:​1-3.) Taim em i ritim Baibel long olgeta wan wan de, em bai save long tingting bilong Jehova, na dispela bai helpim em long wokim gut tingting na skelim gut ol samting. (Prov. 1:​3, 4) Kongrigesen i nidim kain ol man olsem. Bilong wanem?

¹¹ Ol bratasista bilong yumi i nidim helpim bilong ol man em ol inap skulim ol na stiaim ol long ol tok bilong Baibel. (Tai. 1:9) Sapos yu save long rit na rait gut, dispela bai helpim yu long redim gut ol tok na mekim ol bekim we i strongim bilip bilong ol narapela. Na tu, yu inap raitim ol gutpela nout taim yu mekim stadi bilong yu na taim yu putim yau long ol tok i kamap long ol miting bilong kongrigesen, ol kibung sekit, na ol rijinel kibung. Ol dispela nout bai helpim yu long strongim bilip bilong yu yet na ol narapela.

12. Wanem samting bai helpim yu long toktok gut wantaim ol narapela?

¹² Kisim pasin bilong toktok gut wantaim ol narapela. Wanpela brata Kristen i mas lain long toktok gut wantaim ol narapela. Man i gat pasin bilong toktok gut wantaim ol narapela em i save putim gut yau na pilim tingting bilong ol narapela. (Prov. 20:5) Em inap luksave long krai bilong nek bilong ol na pasin bilong ol long wokim han na pes. Yu no inap lain long mekim ol dispela samting sapos yu no lusim haptaim long stap wantaim ol narapela. Sapos oltaim yu save yusim mobail fon o teblet samting long salim E-meil o teks mesis, dispela inap daunim pasin bilong yu long toktok gut wantaim ol narapela. Olsem na taim yu stap wantaim ol narapela, painim rot long toktok gut wantaim ol.—2 Jon 12.    

13. Wanem narapela samting yangpela man i mas lain long mekim? (1 Timoti 5:8) (Lukim tu piksa.)

¹³ Lain long lukautim yu yet. Wanpela brata Kristen i strong long bilip em i mas lukautim em yet, na tu, lukautim famili bilong em. (Ritim 1 Timoti 5:8.) Long sampela kantri, ol yangpela brata inap lain long mekim wanpela wok long papa bilong ol o long wanpela wanblut. Long ol narapela kantri, wanpela yangpela man inap lainim sampela skil taim em i stap long haiskul o teknikel skul. Maski yu kisim save long wanem rot, i gutpela yu lainim wanpela skil we bai helpim yu long kisim wanpela wok mani. (Apo. 18:​2, 3; 20:34; Efe. 4:28) Yu mas wok strong na pinisim gut wok yu mekim. Ol narapela bai luksave long dispela na laikim pasin bilong yu long wok. Sapos yu mekim olsem, orait em bai isi moa long yu kisim wanpela wok mani na holim gut dispela wok. Em i bikpela samting long wanpela brata Kristen i kisim ol pasin na ol skil em yumi stori long en, dispela bai helpim em tu long inapim gut ol wok em i mekim long bihain. Yumi ken stori long sampela bilong ol dispela wok.

14. Yangpela brata i ken mekim wanem bilong redi long mekim wok olsem wanpela fultaim sevan?

¹⁴ Fultaim sevan. Planti brata Kristen i kirap mekim wok long fultaim sevis taim ol i yangpela yet. Wok painia inap helpim wanpela yangpela man long lain long wok gut wantaim kain kain manmeri. Na tu, em inap helpim em long mekim gutpela baset na bihainim gut. (Fili. 4:​11-13) Wanpela gutpela rot bilong helpim yu long insait long fultaim sevis em painia haptaim. Planti i save mekim dispela wok inap sampela haptaim, na dispela i helpim ol long redi long mekim painia oltaim. Wok painia inap opim rot long yu mekim ol narapela wok insait long fultaim sevis, olsem mekim wok olsem wanpela konstraksen sevan o wanpela Betelait.

15-16. Olsem wanem yangpela brata inap winim mak bilong mekim ol wok insait long kongrigesen?

¹⁵ Kongrigesen sevan o elda. Olgeta brata Kristen i mas winim ol mak we bai helpim ol long mekim wok olsem ol elda insait long kongrigesen na helpim ol bratasista bilong ol. Baibel i tok ol man em ol i wok strong long winim dispela mak ol i laik “kisim gutpela wok.” (1 Tim. 3:1) Paslain long wanpela brata i mekim wok olsem wanpela elda, em i mas winim mak long mekim wok olsem wanpela kongrigesen sevan. Ol kongrigesen sevan i save helpim ol elda long planti rot. Ol elda na ol kongrigesen sevan wantaim i save daunim ol yet na helpim ol bratasista bilong ol na ol i save givim bel long autim tok. Ol yangpela brata inap winim mak long mekim wok olsem kongrigesen sevan maski ol i gat 17 i go 19 krismas. Na wanpela kongrigesen sevan husat i winim mak em inap mekim wok olsem wanpela elda maski em i gat 20 o 21 krismas samting.

¹⁶ Baibel i stori long ol mak em yu mas winim bilong kamap wanpela kongrigesen sevan o elda. Bilong winim ol dispela mak, yu mas i gat pasin bilong laikim Jehova, laikim famili bilong yu, na laikim kongrigesen. (1 Tim. 3:​1-13; Tai. 1:​6-9; 1 Pita 5:​2, 3) Yu ken mekim wanem bilong winim mak long mekim ol dispela wok? Wok strong long kliagut long olgeta wan wan mak yu mas winim. Na beten askim Jehova long helpim yu long winim ol dispela mak.c

17. Yangpela brata i ken mekim wanem bilong redi long mekim wok olsem wanpela man marit na het bilong famili? (Lukim tu piksa.)

¹⁷ Man marit na het bilong famili. Olsem Jisas i tok, sampela brata Kristen i mekim disisen long stap singel. (Mat. 19:12) Tasol sapos yu mekim disisen long marit, yu bai kisim sampela wok moa olsem man marit na het bilong famili. (1 Kor. 11:3) Jehova i laik bai man marit i laikim meri bilong em na lukautim em long sait bilong skin, bel na tingting, na long sait bilong bilip. (Efe. 5:​28, 29) Ol pasin na ol skil em yumi stori long en long dispela atikol, olsem pasin bilong wokim gut tingting, rispektim ol meri, na mekim gut ol wok, ol bai helpim yu long stap olsem gutpela poroman marit. Yu bai redi gut long inapim ol wok bilong yu olsem wanpela man marit na het bilong famili.

18. Yangpela brata i ken mekim wanem bilong redi long mekim wok olsem wanpela papa?

¹⁸ Papa. Bihain long yu marit, yu inap kamap wanpela papa. Yu ken kisim wanem skul long Jehova long kamap wanpela gutpela papa? I gat planti skul yu inap lainim. (Efe. 6:4) Jehova i tokim Pikinini bilong em, Jisas, olsem em i laikim em na Em i orait long em. (Mat. 3:17) Sapos yu kamap wanpela papa, orait oltaim tokim ol pikinini bilong yu olsem yu laikim ol. Tok amamas long ol long ol gutpela samting ol i mekim. Ol papa em ol i bihainim pasin bilong Jehova, ol i helpim ol pikinini bilong ol long kamap ol man na meri Kristen i strong long bilip. Yu ken redi nau long mekim dispela wok long rot bilong lukautim gut ol narapela insait long famili bilong yu na long kongrigesen, na kisim pasin bilong tokim ol olsem yu laikim ol na yu amamas long ol. (Jon 15:9) Dispela bai helpim yu long inapim gut wok bilong yu sapos yu kamap wanpela man marit o wanpela papa long bihain. Tasol long nau yet, yu bai stap olsem samting i dia tumas long Jehova, famili bilong yu, na long kongrigesen.

19-20. Wanem samting bai helpim ol yangpela brata long kamap ol strongpela Kristen? (Lukim fran pes piksa.)

¹⁹ Ol yangpela brata, yupela i mas wok strong long kamap ol strongpela man Kristen. Yu mas makim ol gutpela eksampel em yu ken bihainim, kisim pasin bilong wokim gut tingting, mekim gut ol wok, lainim sampela skil we bai helpim yu long lukautim yu yet long bihain, na redi nau long mekim ol wok em yu inap kisim long bihain.

²⁰ Sampela taim yu inap tingting planti taim yu tingim ol wok yu inap mekim long bihain. Tasol yu ken mekim gut ol dispela wok. Yu mas tingim olsem Jehova i laik tru long helpim yu. (Ais. 41:​10, 13) Na tu, ol bratasista bilong yu long kongrigesen bai helpim yu. Taim yu kamap wanpela strongpela man Kristen, yu bai stap amamas tru na belgut. Mipela i laikim yupela ol yangpela brata! Jehova i ken blesim yupela long nau taim yupela i wok strong long kamap ol strongpela man Kristen.—Prov. 22:4.